ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)

                               ทุติยสิกฺขาปทํ
     [๑๒๘]   เตน  สมเยน  พุทฺโธ  ภควา  สกฺเกสุ วิหรติ กปิลวตฺถุสฺมึ
นิโคฺรธาราเม  ฯ  เตน  โข  ปน  สมเยน  อญฺญตเรน กุมฺภกาเรน ภิกฺขู
ปวาริตา  โหนฺติ  เยสํ  อยฺยานํ  ปตฺเตน  อตฺโถ  อหํ ปตฺเตนาติ ฯ เตน
โข  ปน  สมเยน  ภิกฺขู  น  มตฺตํ  ชานิตฺวา  พหู  ปตฺเต วิญฺญาเปนฺติ ฯ
เยสํ  ขุทฺทกา  ปตฺตา  เต  มหนฺเต  ปตฺเต  วิญฺญาเปนฺติ ฯ เยสํ มหนฺตา
ปตฺตา  เต  ขุทฺทเก  ปตฺเต  วิญฺญาเปนฺติ  ฯ อถโข โส กุมฺภกาโร ภิกฺขูนํ
พหู  ปตฺเต  กโรนฺโต  น  สกฺโกติ  อญฺญํ  วิกฺกายิกํ  ภณฺฑํ กาตุํ อตฺตนาปิ
น ยาเปติ ปุตฺตทาราปิสฺส กิลมนฺติ ฯ
     {๑๒๘.๑}   มนุสฺสา  อุชฺฌายนฺติ  ขียนฺติ  วิปาเจนฺติ  กถํ  หิ  นาม
สมณา   สกฺยปุตฺติยา   น   มตฺตํ  ชานิตฺวา  พหู  ปตฺเต  วิญฺญาเปสฺสนฺติ
อยํ   อิเมสํ  พหู  ปตฺเต  กโรนฺโต  น  สกฺโกติ  อญฺญํ  วิกฺกายิกํ  ภณฺฑํ
กาตุํ อตฺตนาปิ น ยาเปติ ปุตฺตทาราปิสฺส กิลมนฺตีติ ฯ
     {๑๒๘.๒}   อสฺโสสุํ   โข   ภิกฺขู  เตสํ  มนุสฺสานํ  อุชฺฌายนฺตานํ
ขียนฺตานํ   วิปาเจนฺตานํ   ฯ   เย   เต  ภิกฺขู  อปฺปิจฺฉา  ฯเปฯ  เต
อุชฺฌายนฺติ  ขียนฺติ  วิปาเจนฺติ  กถํ  หิ  นาม  ภิกฺขู  น  มตฺตํ  ชานิตฺวา
พหู   ปตฺเต  วิญฺญาเปสฺสนฺตีติ  ฯ  อถโข  เต  ภิกฺขู  ภควโต  เอตมตฺถํ
อาโรเจสุํ   ฯ   สจฺจํ   กิร   ภิกฺขเว   ภิกฺขู   น   มตฺตํ   ชานิตฺวา
พหู  ปตฺเต  วิญฺญาเปนฺตีติ  ฯ  สจฺจํ  ภควาติ  ฯ  วิครหิ  พุทฺโธ  ภควา
กถํ  หิ  นาม  เต  ภิกฺขเว  โมฆปุริสา  น  มตฺตํ  ชานิตฺวา  พหู ปตฺเต
วิญฺญาเปสฺสนฺติ     เนตํ    ภิกฺขเว    อปฺปสนฺนานํ    วา    ปสาทาย
ปสนฺนานํ   วา   ภิยฺโยภาวาย   ฯเปฯ   วิครหิตฺวา  ธมฺมึ  กถํ  กตฺวา
ภิกฺขู   อามนฺเตสิ  น  ภิกฺขเว  ปตฺโต  วิญฺญาเปตพฺโพ  โย  วิญฺญาเปยฺย
อาปตฺติ ทุกฺกฏสฺส ๑- ฯ
     [๑๒๙]   เตน  โข  ปน  สมเยน  อญฺญตรสฺส  ภิกฺขุโน ปตฺโต ภินฺโน
โหติ   ฯ   อถโข   โส  ภิกฺขุ  ภควตา  ปฏิกฺขิตฺตํ  ปตฺตํ  วิญฺญาเปตุนฺติ
กุกฺกุจฺจายนฺโต   น   วิญฺญาเปติ   หตฺเถสุ   ปิณฺฑาย  จรติ  ฯ  มนุสฺสา
อุชฺฌายนฺติ   ขียนฺติ   วิปาเจนฺติ   กถํ   หิ   นาม  สมณา  สกฺยปุตฺติยา
หตฺเถสุ   ปิณฺฑาย   จริสฺสนฺติ   เสยฺยถาปิ   ติตฺถิยาติ  ฯ  อสฺโสสุํ  โข
ภิกฺขู   เตสํ   มนุสฺสานํ   อุชฺฌายนฺตานํ   ขียนฺตานํ   วิปาเจนฺตานํ   ฯ
อถโข  เต  ภิกฺขู  ภควโต  เอตมตฺถํ  อาโรเจสุํ ฯ อถโข ภควา เอตสฺมึ
นิทาเน  เอตสฺมึ  ปกรเณ  ธมฺมึ  กถํ  กตฺวา  ภิกฺขู อามนฺเตสิ อนุชานามิ
ภิกฺขเว นฏฺฐปตฺตสฺส วา ภินฺนปตฺตสฺส วา ปตฺตํ วิญฺญาเปตุนฺติ ฯ
     [๑๓๐]   เตน  โข  ปน  สมเยน ฉพฺพคฺคิยา ภิกฺขู ภควตา อนุญฺญาตํ
นฏฺฐปตฺตสฺส   วา   ภินฺนปตฺตสฺส   วา   ปตฺตํ   วิญฺญาเปตุนฺติ  เต  ๒-
อปฺปมตฺตเกนปิ    ภินฺเนน    อปฺปมตฺตเกนปิ    ฉิทฺเทน   อปฺปมตฺตเกนปิ
ขณฺเฑน   อปฺปมตฺตเกนปิ   วิลิขิตเกน   น  มตฺตํ  ชานิตฺวา  พหู  ปตฺเต
@เชิงอรรถ:  ม. ยุ. อิติสทฺโท ทิสฺสติ ฯ   ม. อยํ ปาโฐ นตฺถิ ฯ
วิญฺญาเปนฺติ  ๑-  ฯ  อถโข  โส  กุมฺภกาโร  ภิกฺขูนํ  ตเถว  พหู ปตฺเต
กโรนฺโต   น   สกฺโกติ   อญฺญํ   วิกฺกายิกํ   ภณฺฑํ  กาตุํ  อตฺตนาปิ  น
ยาเปติ   ปุตฺตทาราปิสฺส   กิลมนฺติ   ฯ   มนุสฺสา   ตเถว   อุชฺฌายนฺติ
ขียนฺติ  วิปาเจนฺติ  กถํ  หิ  นาม  สมณา  สกฺยปุตฺติยา  น มตฺตํ ชานิตฺวา
พหู  ปตฺเต  วิญฺญาเปสฺสนฺติ  อยํ  อิเมสํ  พหู  ปตฺเต กโรนฺโต น สกฺโกติ
อญฺญํ   วิกฺกายิกํ   ภณฺฑํ   กาตุํ   อตฺตนาปิ  น  ยาเปติ  ปุตฺตทาราปิสฺส
กิลมนฺตีติ ฯ
     {๑๓๐.๑}   อสฺโสสุํ   โข   ภิกฺขู  เตสํ  มนุสฺสานํ  อุชฺฌายนฺตานํ
ขียนฺตานํ   วิปาเจนฺตานํ   ฯ   เย   เต  ภิกฺขู  อปฺปิจฺฉา  ฯเปฯ  เต
อุชฺฌายนฺติ   ขียนฺติ   วิปาเจนฺติ   กถํ   หิ   นาม   ฉพฺพคฺคิยา   ภิกฺขู
อปฺปมตฺตเกนปิ    ภินฺเนน    อปฺปมตฺตเกนปิ    ฉิทฺเทน   อปฺปมตฺตเกนปิ
ขณฺเฑน   อปฺปมตฺตเกนปิ   วิลิขิตเกน   น  มตฺตํ  ชานิตฺวา  พหู  ปตฺเต
วิญฺญาเปสฺสนฺตีติ  ฯ  อถโข  เต  ภิกฺขู  ภควโต  เอตมตฺถํ  อาโรเจสุํ ฯ
สจฺจํ   กิร   ตุเมฺห   ภิกฺขเว   อปฺปมตฺตเกนปิ  ภินฺเนน  อปฺปมตฺตเกนปิ
ฉิทฺเทน    อปฺปมตฺตเกนปิ    ขณฺเฑน   อปฺปมตฺตเกนปิ   วิลิขิตเกน   น
มตฺตํ ชานิตฺวา ๒- พหู ปตฺเต วิญฺญาเปถาติ ฯ สจฺจํ ภควาติ ฯ
     {๑๓๐.๒}   วิครหิ   พุทฺโธ   ภควา   กถํ   หิ   นาม   ตุเมฺห
โมฆปุริสา     อปฺปมตฺตเกนปิ     ภินฺเนน    อปฺปมตฺตเกนปิ    ฉิทฺเทน
อปฺปมตฺตเกนปิ      ขณฺเฑน      อปฺปมตฺตเกนปิ     วิลิขิตเกน     น
@เชิงอรรถ:  ม. ยุ. เต อปฺปมตฺตเกนปิ ภินฺเนน อปฺปมตฺตเกนปิ ขณฺเฑน
@วิลิขิตมตฺเตนปิ พหู ปตฺเต วิญฺญาเปนฺติ ฯ เอวมุปริปิ ฯ
@ ม. น มตฺตํ ชานิตฺวาติ ปาโฐ นตฺถิ ฯ เอวมุปริปิ ฯ
มตฺตํ    ชานิตฺวา    พหู    ปตฺเต   วิญฺญาเปสฺสถ   เนตํ   โมฆปุริสา
อปฺปสนฺนานํ   วา   ปสาทาย   ปสนฺนานํ   วา   ภิยฺโยภาวาย   ฯเปฯ
เอวญฺจ    ปน   ภิกฺขเว   อิมํ   สิกฺขาปทํ   อุทฺทิเสยฺยาถ   โย   ปน
ภิกฺขุ    อูนปญฺจพนฺธเนน    ปตฺเตน   อญฺญํ   นวํ   ปตฺตํ   เจตาเปยฺย
นิสฺสคฺคิยํ   ปาจิตฺติยํ   ฯ   เตน   ภิกฺขุนา   โส   ปตฺโต  ภิกฺขุปริสาย
นิสฺสชฺชิตพฺโพ ฯ
     {๑๓๐.๓}   โย  จ  ตสฺสา  ภิกฺขุปริสาย  ปตฺตปริยนฺโต โส จ ตสฺส
ภิกฺขุโน  ปทาตพฺโพ  อยนฺเต  ภิกฺขุ  ปตฺโต ยาว เภทนาย ธาเรตพฺโพติ ฯ
อยํ ตตฺถ สามีจีติ ฯ
     [๑๓๑]   โย  ปนาติ  โย  ยาทิโส  ฯเปฯ ภิกฺขูติ ฯเปฯ อยํ อิมสฺมึ
อตฺเถ   อธิปฺเปโต   ภิกฺขูติ  ฯ  อูนปญฺจพนฺธโน  นาม  ปตฺโต  อพนฺธโน
วา  เอกพนฺธโน  วา  ทฺวิพนฺธโน  วา  ติพนฺธโน  วา จตุพฺพนฺธโน วา ฯ
อพนฺธโนกาโส   นาม   ปตฺโต   ยสฺส   ทฺวงฺคุลา   ราชิ  น  โหติ  ฯ
พนฺธโนกาโส  นาม  ปตฺโต  ยสฺส  ทฺวงฺคุลา  ราชิ  โหติ  ฯ  นโว นาม
ปตฺโต วิญฺญตฺตึ อุปาทาย วุจฺจติ ฯ
     {๑๓๑.๑}   เจตาเปยฺยาติ  วิญฺญาเปติ  ปโยเค  ทุกฺกฏํ  ปฏิลาเภน
นิสฺสคฺคิโย   โหติ  สงฺฆมชฺเฌ  นิสฺสชฺชิตพฺโพ  ฯ  สพฺเพเหว  อธิฏฺฐิตปตฺตํ
คเหตฺวา   สนฺนิปติตพฺพํ   ฯ   น  ลามโก  ปตฺโต  อธิฏฺฐาตพฺโพ  มหคฺฆํ
ปตฺตํ   คเหสฺสามีติ   ฯ   สเจ   ลามกํ  ปตฺตํ  อธิฏฺเฐติ  มหคฺฆํ  ปตฺตํ
คเหสฺสามีติ อาปตฺติ ทุกฺกฏสฺส ฯ เอวญฺจ ปน ภิกฺขเว นิสฺสชฺชิตพฺโพ ฯ
     [๑๓๒]   เตน  ภิกฺขุนา  สงฺฆํ  อุปสงฺกมิตฺวา  เอกํสํ  อุตฺตราสงฺคํ
กริตฺวา    วุฑฺฒานํ    ภิกฺขูนํ   ปาเท   วนฺทิตฺวา   อุกฺกุฏิกํ   นิสีทิตฺวา
อญฺชลึ   ปคฺคเหตฺวา   เอวมสฺส   วจนีโย   อยํ   เม   ภนฺเต  ปตฺโต
อูนปญฺจพนฺธเนน    ปตฺเตน   เจตาปิโต   นิสฺสคฺคิโย   อิมาหํ   สงฺฆสฺส
นิสฺสชฺชามีติ   ฯ   นิสฺสชฺชิตฺวา   อาปตฺติ   เทเสตพฺพา   ฯ   พฺยตฺเตน
ภิกฺขุนา    ปฏิพเลน    อาปตฺติ    ปฏิคฺคเหตพฺพา    ฯ    ปญฺจหงฺเคหิ
สมนฺนาคโต   ภิกฺขุ   ปตฺตคาหาปโก   สมฺมนฺนิตพฺโพ   โย  น  ฉนฺทาคตึ
คจฺเฉยฺย   น  โทสาคตึ  คจฺเฉยฺย  น  โมหาคตึ  คจฺเฉยฺย  น  ภยาคตึ
คจฺเฉยฺย    คหิตาคหิตญฺจ    ชาเนยฺย    ฯ   เอวญฺจ   ปน   ภิกฺขเว
สมฺมนฺนิตพฺโพ   ฯ   ปฐมํ   ภิกฺขุ   ยาจิตพฺโพ   ฯ  ยาจิตฺวา  พฺยตฺเตน
ภิกฺขุนา ปฏิพเลน สงฺโฆ ญาเปตพฺโพ
     {๑๓๒.๑}   สุณาตุ  เม  ภนฺเต  สงฺโฆ ยทิ สงฺฆสฺส ปตฺตกลฺลํ สงฺโฆ
อิตฺถนฺนามํ ภิกฺขุํ ปตฺตคาหาปกํ สมฺมนฺเนยฺย ฯ เอสา ญตฺติ ฯ
     {๑๓๒.๒}   สุณาตุ  เม  ภนฺเต  สงฺโฆ  สงฺโฆ  อิตฺถนฺนามํ  ภิกฺขุํ
ปตฺตคาหาปกํ    สมฺมนฺนติ    ฯ    ยสฺสายสฺมโต   ขมติ   อิตฺถนฺนามสฺส
ภิกฺขุโน   ปตฺตคาหาปกสฺส   สมฺมติ   โส   ตุณฺหสฺส  ยสฺส  นกฺขมติ  โส
ภาเสยฺย ฯ
     {๑๓๒.๓}   สมฺมโต      สงฺเฆน     อิตฺถนฺนาโม     ภิกฺขุ
ปตฺตคาหาปโก    ฯ   ขมติ   สงฺฆสฺส   ฯ   ตสฺมา   ตุณฺหี   เอวเมตํ
ธารยามีติ  ฯ  เตน  สมฺมเตน  ภิกฺขุนา  ปตฺโต  คาเหตพฺโพ  ฯ  เถโร
วตฺตพฺโพ   คณฺหาตุ   ภนฺเต  เถโร  ปตฺตนฺติ  ฯ  สเจ  เถโร  คณฺหาติ
เถรสฺส   ปตฺโต   ทุติยสฺส   คาเหตพฺโพ   น   จ   ตสฺส  อนุทฺทยตาย
น   คเหตพฺโพ   โย   น  คเณฺหยฺย  อาปตฺติ  ทุกฺกฏสฺส  ฯ  อปตฺตกสฺส
น  คาเหตพฺโพ  ฯ  เอเตเนว  อุปาเยน  ยาว สงฺฆนวกา คาเหตพฺโพ ฯ
โย   จ   ตสฺสา   ภิกฺขุปริสาย   ปตฺตปริยนฺโต  โส  จ  ตสฺส  ภิกฺขุโน
ปทาตพฺโพ อยนฺเต ภิกฺขุ ปตฺโต ยาว เภทนาย ธาเรตพฺโพติ ฯ
     {๑๓๒.๔}   เตน  ภิกฺขุนา  โส  ปตฺโต  น  อเทเส นิกฺขิปิตพฺโพ น
อโภเคน   ปริภุญฺชิตพฺโพ   น   วิสฺสชฺเชตพฺโพ  กถายํ  ปตฺโต  นสฺเสยฺย
วา  วินสฺเสยฺย  วา  ภิชฺเชยฺย  วาติ  สเจ อเทเส วา นิกฺขิปติ อโภเคน
วา ปริภุญฺชติ วิสฺสชฺเชติ วา อาปตฺติ ทุกฺกฏสฺส ฯ
     {๑๓๒.๕}   อยํ ตตฺถ สามีจีติ อยํ ตตฺถ อนุธมฺมตา ฯ
     [๑๓๓]   อพนฺธเนน  ปตฺเตน  อพนฺธนํ  ปตฺตํ  เจตาเปติ  นิสฺสคฺคิยํ
ปาจิตฺติยํ    ฯ   อพนฺธเนน   ปตฺเตน   เอกพนฺธนํ   ปตฺตํ   เจตาเปติ
นิสฺสคฺคิยํ    ปาจิตฺติยํ    ฯ    อพนฺธเนน   ปตฺเตน   ทฺวิพนฺธนํ   ปตฺตํ
เจตาเปติ   นิสฺสคฺคิยํ   ปาจิตฺติยํ   ฯ   อพนฺธเนน   ปตฺเตน   ติพนฺธนํ
ปตฺตํ    เจตาเปติ    นิสฺสคฺคิยํ   ปาจิตฺติยํ   ฯ   อพนฺธเนน   ปตฺเตน
จตุพฺพนฺธนํ ปตฺตํ เจตาเปติ นิสฺสคฺคิยํ ปาจิตฺติยํ ฯ
     {๑๓๓.๑}   เอกพนฺธเนน  ปตฺเตน อพนฺธนํ ปตฺตํ เจตาเปติ นิสฺสคฺคิยํ
ปาจิตฺติยํ  ฯ  เอกพนฺธเนน  ปตฺเตน  เอกพนฺธนํ  ปตฺตํ เจตาปติ นิสฺสคฺคิยํ
ปาจิตฺติยํ   ฯ   เอกพนฺธเนน   ปตฺเตน   ทฺวิพนฺธนํ   ปตฺตํ   เจตาเปติ
นิสฺสคฺคิยํ    ปาจิตฺติยํ    ฯ   เอกพนฺธเนน   ปตฺเตน   ติพนฺธนํ   ปตฺตํ
เจตาเปติ   นิสฺสคฺคิยํ   ปาจิตฺติยํ  ฯ  เอกพนฺธเนน  ปตฺเตน  จตุพฺพนฺธนํ
ปตฺตํ    เจตาเปติ   นิสฺสคฺคิยํ   ปาจิตฺติยํ   ฯ   ทฺวิพนฺธเนน   ปตฺเตน
อพนฺธนํ ปตฺตํ เจตาเปติ นิสฺสคฺคิยํ ปาจิตฺติยํ ฯ
     {๑๓๓.๒}   ทฺวิพนฺธเนน   ปตฺเตน   เอกพนฺธนํ  ปตฺตํ  เจตาเปติ
นิสฺสคฺคิยํ    ปาจิตฺติยํ    ฯ   ทฺวิพนฺธเนน   ปตฺเตน   ทฺวิพนฺธนํ   ปตฺตํ
เจตาเปติ     นิสฺสคฺคิยํ     ปาจิตฺติยํ    ฯ    ทฺวิพนฺธเนน    ปตฺเตน
ติพนฺธนํ    ปตฺตํ   เจตาเปติ   นิสฺสคฺคิยํ   ปาจิตฺติยํ   ฯ   ทฺวิพนฺธเนน
ปตฺเตน จตุพฺพนฺธนํ ปตฺตํ เจตาเปติ นิสฺสคฺคิยํ ปาจิตฺติยํ ฯ
     {๑๓๓.๓}   ติพนฺธเนน   ปตฺเตน   อพนฺธนํ   ปตฺตํ   เจตาเปติ
นิสฺสคฺคิยํ    ปาจิตฺติยํ    ฯ   ติพนฺธเนน   ปตฺเตน   เอกพนฺธนํ   ปตฺตํ
เจตาเปติ   นิสฺสคฺคิยํ   ปาจิตฺติยํ   ฯ   ติพนฺธเนน   ปตฺเตน  ทฺวิพนฺธนํ
ปตฺตํ    เจตาเปติ    นิสฺสคฺคิยํ   ปาจิตฺติยํ   ฯ   ติพนฺธเนน   ปตฺเตน
ติพนฺธนํ    ปตฺตํ    เจตาเปติ   นิสฺสคฺคิยํ   ปาจิตฺติยํ   ฯ   ติพนฺธเนน
ปตฺเตน จตุพฺพนฺธนํ ปตฺตํ เจตาเปติ นิสฺสคฺคิยํ ปาจิตฺติยํ ฯ
     {๑๓๓.๔}   จตุพฺพนฺธเนน   ปตฺเตน   อพนฺธนํ   ปตฺตํ  เจตาเปติ
นิสฺสคฺคิยํ   ปาจิตฺติยํ   ฯ   จตุพฺพนฺธเนน   ปตฺเตน   เอกพนฺธนํ   ปตฺตํ
เจตาเปติ   นิสฺสคฺคิยํ   ปาจิตฺติยํ   ฯ  จตุพฺพนฺธเนน  ปตฺเตน  ทฺวิพนฺธนํ
ปตฺตํ   เจตาเปติ   นิสฺสคฺคิยํ   ปาจิตฺติยํ   ฯ   จตุพฺพนฺธเนน   ปตฺเตน
ติพนฺธนํ   ปตฺตํ   เจตาเปติ   นิสฺสคฺคิยํ   ปาจิตฺติยํ   ฯ   จตุพฺพนฺธเนน
ปตฺเตน จตุพฺพนฺธนํ ปตฺตํ เจตาเปติ นิสฺสคฺคิยํ ปาจิตฺติยํ ฯ
     [๑๓๔]   อพนฺธเนน ปตฺเตน อพนฺธโนกาสํ ปตฺตํ ... เอกพนฺธโนกาสํ
ปตฺตํ   ...   ทฺวิพนฺธโนกาสํ   ปตฺตํ   ...  ติพนฺธโนกาสํ  ปตฺตํ  ...
จตุพฺพนฺธโนกาสํ  ปตฺตํ  เจตาเปติ  นิสฺสคฺคิยํ  ปาจิตฺติยํ  ฯ  เอกพนฺธเนน
ปตฺเตน   อพนฺธโนกาสํ   ปตฺตํ   ...   เอกพนฺธโนกาสํ   ปตฺตํ   ...
ทฺวิพนฺธโนกาสํ   ปตฺตํ  ...  ติพนฺธโนกาสํ  ปตฺตํ  ...  จตุพฺพนฺธโนกาสํ
ปตฺตํ   เจตาเปติ   นิสฺสคฺคิยํ   ปาจิตฺติยํ  ฯ  ทฺวิพนฺธเนน  อพนฺธโนกาสํ
ปตฺตํ   ...   เอกพนฺธโนกาสํ  ปตฺตํ  ...  ทฺวิพนฺธโนกาสํ  ปตฺตํ  ...
ติพนฺธโนกาสํ   ปตฺตํ  ...  จตุพฺพนฺธโนกาสํ  ปตฺตํ  เจตาเปติ  นิสฺสคฺคิยํ
ปาจิตฺติยํ  ฯ  ติพนฺธเนน  ปตฺเตน อพนฺธโนกาสํ ปตฺตํ ... เอกพนฺธโนกาสํ
ปตฺตํ ... ทฺวิพนฺธโนกาสํ ปตฺตํ ... ติพนฺธโนกาสํ ปตฺตํ ... จตุพฺพนฺธโนกาสํ
ปตฺตํ  เจตาเปติ  นิสฺสคฺคิยํ ปาจิตฺติยํ ฯ จตุพฺพนฺธเนน ปตฺเตน อพนฺธโนกาสํ
ปตฺตํ ... เอกพนฺธโนกาสํ ปตฺตํ ... ทฺวิพนฺธโนกาสํ ปตฺตํ ... ติพนฺธโนกาสํ
ปตฺตํ ... จตุพฺพนฺธโนกาสํ ปตฺตํ เจตาเปติ นิสฺสคฺคิยํ ปาจิตฺติยํ ฯ
     [๑๓๕]   อพนฺธโนกาเสน  ปตฺเตน  อพนฺธนํ  ปตฺตํ  ... เอกพนฺธนํ
ปตฺตํ  ...  ทฺวิพนฺธนํ  ปตฺตํ  ...  ติพนฺธนํ  ปตฺตํ  ... จตุพฺพนฺธนํ ปตฺตํ
เจตาเปติ    นิสฺสคฺคิยํ    ปาจิตฺติยํ   ฯ   เอกพนฺธโนกาเสน   ปตฺเตน
อพนฺธนํ  ปตฺตํ  ...  เอกพนฺธนํ  ปตฺตํ  ... ทฺวิพนฺธนํ ปตฺตํ ... ติพนฺธนํ
ปตฺตํ   ...   จตุพฺพนฺธนํ   ปตฺตํ   เจตาเปติ   นิสฺสคฺคิยํ  ปาจิตฺติยํ  ฯ
ทฺวิพนฺธโนกาเสน  ปตฺเตน  อพนฺธนํ  ปตฺตํ  ...  เอกพนฺธนํ  ปตฺตํ  ...
ทฺวิพนฺธนํ  ปตฺตํ  ...  ติพนฺธนํ  ปตฺตํ  ...  จตุพฺพนฺธนํ  ปตฺตํ เจตาเปติ
นิสฺสคฺคิยํ   ปาจิตฺติยํ  ฯ  ติพนฺธโนกาเสน  ปตฺเตน  อพนฺธนํ  ปตฺตํ  ...
เอกพนฺธนํ  ปตฺตํ  ...  ทฺวิพนฺธนํ ปตฺตํ ... ติพนฺธนํ ปตฺตํ ... จตุพฺพนฺธนํ
ปตฺตํ    เจตาเปติ    นิสฺสคฺคิยํ    ปาจิตฺติยํ    ฯ   จตุพฺพนฺธโนกาเสน
ปตฺเตน   อพนฺธนํ   ปตฺตํ   ...   เอกพนฺธนํ   ปตฺตํ   ...  ทฺวิพนฺธนํ
ปตฺตํ  ...  ติพนฺธนํ  ปตฺตํ  ...  จตุพฺพนฺธนํ  ปตฺตํ  เจตาเปติ นิสฺสคฺคิยํ
ปาจิตฺติยํ ฯ
     [๑๓๖]   อพนฺธโนกาเสน   ปตฺเตน   อพนฺธโนกาสํ   ปตฺตํ  ...
เอกพนฺธโนกาสํ   ปตฺตํ  ...  ทฺวิพนฺธโนกาสํ  ปตฺตํ  ...  ติพนฺธโนกาสํ
ปตฺตํ   ...  จตุพฺพนฺธโนกาสํ  ปตฺตํ  เจตาเปติ  นิสฺสคฺคิยํ  ปาจิตฺติยํ  ฯ
เอกพนฺธโนกาเสน   ปตฺเตน  อพนฺธโนกาสํ  ปตฺตํ  ...  เอกพนฺธโนกาสํ
ปตฺตํ   ...   ทฺวิพนฺธโนกาสํ   ปตฺตํ   ...  ติพนฺธโนกาสํ  ปตฺตํ  ...
จตุพฺพนฺธโนกาสํ     ปตฺตํ    เจตาเปติ    นิสฺสคฺคิยํ    ปาจิตฺติยํ    ฯ
ทฺวิพนฺธโนกาเสน   ปตฺเตน   อพนฺธโนกาสํ  ปตฺตํ  ...  เอกพนฺธโนกาสํ
ปตฺตํ   ...   ทฺวิพนฺธโนกาสํ   ปตฺตํ   ...  ติพนฺธโนกาสํ  ปตฺตํ  ...
จตุพฺพนฺธโนกาสํ     ปตฺตํ    เจตาเปติ    นิสฺสคฺคิยํ    ปาจิตฺติยํ    ฯ
ติพนฺธโนกาเสน   ปตฺเตน   อพนฺธโนกาสํ   ปตฺตํ  ...  เอกพนฺธโนกาสํ
ปตฺตํ   ...   ทฺวิพนฺธโนกาสํ   ปตฺตํ   ...  ติพนฺธโนกาสํ  ปตฺตํ  ...
จตุพฺพนฺธโนกาสํ     ปตฺตํ    เจตาเปติ    นิสฺสคฺคิยํ    ปาจิตฺติยํ    ฯ
จตุพฺพนฺธโนกาเสน      ปตฺเตน      อพนฺธโนกาสํ     ปตฺตํ     ...
เอกพนฺธโนกาสํ   ปตฺตํ  ...  ทฺวิพนฺธโนกาสํ  ปตฺตํ  ...  ติพนฺธโนกาสํ
ปตฺตํ ... จตุพฺพนฺธโนกาสํ ปตฺตํ เจตาเปติ นิสฺสคฺคิยํ ปาจิตฺติยํ ฯ
     [๑๓๗]   อนาปตฺติ    นฏฺฐปตฺตสฺส    ภินฺนปตฺตสฺส    ญาตกานํ
ปวาริตานํ      อญฺญสฺสตฺถาย      อตฺตโน     ธเนน     อุมฺมตฺตกสฺส
อาทิกมฺมิกสฺสาติ ฯ
                         ทุติยสิกฺขาปทํ นิฏฺฐิตํ ฯ
                                   -------


             เนื้อความพระไตรปิฎกฉบับภาษาบาลี อักษรไทย เล่มที่ ๒ หน้าที่ ๑๐๗-๑๑๖. https://84000.org/tipitaka/read/pali_read.php?B=2&A=1871&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=2&A=1871&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=2&item=128&items=10              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=2&siri=22              ศึกษาอรรถกถานี้ได้ที่ :- https://84000.org/tipitaka/attha/attha.php?b=2&i=128              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=2&A=5220              The Pali Atthakatha in Roman :- https://84000.org/tipitaka/atthapali/read_rm.php?B=2&A=5220              สารบัญพระไตรปิฎกเล่มที่ ๒ https://84000.org/tipitaka/read/?index_2 https://84000.org/tipitaka/english/?index_2

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]