ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)

                               ตติยสิกฺขาปทํ
     [๑๓๘]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม   ฯ   เตน   โข   ปน   สมเยน  อายสฺมา
ปิลินฺทวจฺโฉ   ราชคเห   ปพฺภารํ   โสธาเปติ   เลนํ   กตฺตุกาโม   ฯ
อถโข   ราชา   มาคโธ  เสนิโย  พิมฺพิสาโร  เยนายสฺมา  ปิลินฺทวจฺโฉ
เตนุปสงฺกมิ    อุปสงฺกมิตฺวา    อายสฺมนฺตํ    ปิลินฺทวจฺฉํ   อภิวาเทตฺวา
เอกมนฺตํ   นิสีทิ   ฯ  เอกมนฺตํ  นิสินฺโน  โข  ราชา  มาคโธ  เสนิโย
พิมฺพิสาโร   อายสฺมนฺตํ   ปิลินฺทวจฺฉํ   เอตทโวจ   กึ   ภนฺเต   เถโร
การาเปตีติ ฯ ปพฺภารํ มหาราช โสธาเปมิ เลนํ กตฺตุกาโมติ ฯ
     {๑๓๘.๑}   อตฺโถ   ภนฺเต  อยฺยสฺส  อารามิเกนาติ  ฯ  น  โข
มหาราช   ภควตา  อารามิโก  อนุญฺญาโตติ  ฯ  เตนหิ  ภนฺเต  ภควนฺตํ
ปฏิปุจฺฉิตฺวา  มม  อาโรเจยฺยาถาติ  ฯ  เอวํ  มหาราชาติ  โข อายสฺมา
ปิลินฺทวจฺโฉ   รญฺโญ   มาคธสฺส   เสนิยสฺส  พิมฺพิสารสฺส  ปจฺจสฺโสสิ  ฯ
อถโข  อายสฺมา  ปิลินฺทวจฺโฉ  ราชานํ  มาคธํ  เสนิยํ  พิมฺพิสารํ ธมฺมิยา
กถาย   สนฺทสฺเสสิ   สมาทเปสิ   สมุตฺเตเชสิ   สมฺปหํเสสิ   ฯ  อถโข
ราชา   มาคโธ  เสนิโย  พิมฺพิสาโร  อายสฺมตา  ปิลินฺทวจฺเฉน  ธมฺมิยา
กถาย   สนฺทสฺสิโต   สมาทปิโต   สมุตฺเตชิโต  สมฺปหํสิโต  อุฏฺฐายาสนา
อายสฺมนฺตํ   ปิลินฺทวจฺฉํ   อภิวาเทตฺวา   ปทกฺขิณํ   กตฺวา   ปกฺกามิ  ฯ
อถโข   อายสฺมา   ปิลินฺทวจฺโฉ  ภควโต  สนฺติเก  ทูตํ  ปาเหสิ  ราชา
ภนฺเต  มาคโธ  เสนิโย  พิมฺพิสาโร  อารามิกํ  ทาตุกาโม  กถํ  นุ  โข
ภนฺเต   ปฏิปชฺชิตพฺพนฺติ   ฯ   อถโข  ภควา  เอตสฺมึ  นิทาเน  เอตสฺมึ
ปกรเณ   ภิกฺขุสงฺฆํ   สนฺนิปาตาเปตฺวา   ๑-   ธมฺมึ  กถํ  กตฺวา  ภิกฺขู
อามนฺเตสิ   อนุชานามิ   ภิกฺขเว  อารามิกนฺติ  ฯ  ทุติยมฺปิ  โข  ราชา
มาคโธ   เสนิโย   พิมฺพิสาโร   เยนายสฺมา   ปิลินฺทวจฺโฉ  เตนุปสงฺกมิ
อุปสงฺกมิตฺวา     อายสฺมนฺตํ    ปิลินฺทวจฺฉํ    อภิวาเทตฺวา    เอกมนฺตํ
นิสีทิ   ฯ  เอกมนฺตํ  นิสินฺโน  โข  ราชา  มาคโธ  เสนิโย  พิมฺพิสาโร
อายสฺมนฺตํ    ปิลินฺทวจฺฉํ    เอตทโวจ    อนุญฺญาโต   ภนฺเต   ภควตา
อารามิโกติ  ฯ  เอวํ  มหาราชาติ  ฯ  เตนหิ  ภนฺเต  อยฺยสฺส อารามิกํ
ทมฺมีติ ฯ
     {๑๓๘.๒}   อถโข  ราชา  มาคโธ  เสนิโย  พิมฺพิสาโร อายสฺมโต
ปิลินฺทวจฺฉสฺส    อารามิกํ    ปฏิสฺสุณิตฺวา    วิสฺสริตฺวา    จิเรน   สตึ
ปฏิลภิตฺวา    อญฺญตรํ   สพฺพตฺถกํ   มหามตฺตํ   อามนฺเตสิ   โย   มยา
ภเณ  อยฺยสฺส  อารามิโก  ปฏิสฺสุโต  ทินฺโน  โส  อารามิโกติ  ฯ น โข
เทว  อยฺยสฺส  อารามิโก  ทินฺโนติ  ฯ  กีวจิรํ นุ โข ภเณ อิโต รตฺติ ๒-
โหตีติ  ฯ  อถโข  โส  มหามตฺโต  รตฺติโย  คเณตฺวา ๓- ราชานํ มาคธํ
เสนิยํ  พิมฺพิสารํ  เอตทโวจ  ปญฺจ  เทว  รตฺติสตานีติ  ฯ  เตนหิ  ภเณ
อยฺยสฺส   ปญฺจ   อารามิกสตานิ   เทหีติ  ๔-  ฯ  เอวํ   เทวาติ  โข
โส     มหามตฺโต     รญฺโญ    มาคธสฺส    เสนิยสฺส    พิมฺพิสารสฺส
ปฏิสฺสุณิตฺวา     อายสฺมโต     ปิลินฺทวจฺฉสฺส    ปญฺจ    อารามิกสตานิ
@เชิงอรรถ:  ม. ยุ. อิทํ ปาฐทฺวยํ นตฺถิ ฯ   ม. หิ ตํ ฯ ยุ. หิตํ ฯ
@ ม. ยุ. วิคเณตฺวา ฯ   ยุ. เทถาติ ฯ
อทาสิ   ๑-   ฯ  ปาฏิเยกฺโก  คาโม  นิวิสิ  ฯ  อารามิกคามโกติปิ  นํ
อาหํสุ ปิลินฺทวจฺฉคามโกติปิ ๒- นํ อาหํสุ ฯ
     [๑๓๙]   เตน  โข  ปน สมเยน อายสฺมา ปิลินฺทวจฺโฉ ตสฺมึ คามเก
กุลุปโก  โหติ  ฯ  อถโข  อายสฺมา  ปิลินฺทวจฺโฉ ปุพฺพณฺหสมยํ นิวาเสตฺวา
ปตฺตจีวรมาทาย   ปิลินฺทวจฺฉคามกํ   ปิณฺฑาย  ปาวิสิ  ฯ  เตน  โข  ปน
สมเยน  ตสฺมึ  คามเก  อุสฺสโว  โหติ ฯ ทารกา ๓- อลงฺกตา มาลากิตา
กีฬนฺติ   ฯ   อถโข   อายสฺมา  ปิลินฺทวจฺโฉ  ปิลินฺทวจฺฉคามเก  สปทานํ
ปิณฺฑาย   จรมาโน  เยน  อญฺญตรสฺส  อารามิกสฺส  นิเวสนํ  เตนุปสงฺกมิ
อุปสงฺกมิตฺวา ปญฺญตฺเต อาสเน นิสีทิ ฯ
     {๑๓๙.๑}   เตน  โข  ปน  สมเยน  ตสฺสา  อารามิกินิยา  ธีตา
อญฺเญ   ทารเก   อลงฺกเต   มาลากิเต   ปสฺสิตฺวา  โรทติ  มาลํ  เม
เทถ   อลงฺการํ   เม   เทถาติ   ฯ   อถโข   อายสฺมา  ปิลินฺทวจฺโฉ
ตํ    อารามิกินึ    เอตทโวจ    กิสฺสายํ    ทาริกา    โรทตีติ    ฯ
อยํ   ภนฺเต   ทาริกา  อญฺเญ  ทารเก  อลงฺกเต  มาลากิเต  ปสฺสิตฺวา
โรทติ   มาลํ   เม   เทถ   อลงฺการํ   เม   เทถาติ  กุโต  อมฺหากํ
ทุคฺคตานํ   มาลา  กุโต  อลงฺกาโรติ  ฯ  อถโข  อายสฺมา  ปิลินฺทวจฺโฉ
อญฺญตรํ    ติณณฺฑูปกํ    ๔-    คเหตฺวา   ตํ   อารามิกินึ   เอตทโวจ
หนฺทิมํ   ติณณฺฑูปกํ  ตสฺสา  ทาริกาย  สีเส  ปฏิมุญฺจาหีติ  ๕-  ฯ  อถโข
@เชิงอรรถ:  ม. ยุ. ปาทาสิ ฯ   ม. ยุ. ปิลินฺทคามโกติปิ ฯ   ม. ยุ. ทาริกา ฯ
@ ม. ยุ. ติณณฺฑุปกํ ฯ เอวมุปริปิ ฯ   ม. ยุ. ปฏิมุญฺจาติ ฯ
สา  อารามิกินี  ตํ  ติณณฺฑูปกํ  คเหตฺวา  ตสฺสา ทาริกาย สีเส ปฏิมุญฺจิ ฯ
สา  อโหสิ  สุวณฺณมาลา  อภิรูปา  ทสฺสนียา  ปาสาทิกา  ฯ นตฺถิ ตาทิสา
รญฺโญปิ  อนฺเตปุเร  สุวณฺณมาลา  ฯ  มนุสฺสา  รญฺโญ  มาคธสฺส เสนิยสฺส
พิมฺพิสารสฺส   อาโรเจสุํ  อมุกสฺส  เทว  อารามิกสฺส  ฆเร  สุวณฺณมาลา
อภิรูปา   ทสฺสนียา   ปาสาทิกา   นตฺถิ  ตาทิสา  เทวสฺสาปิ  อนฺเตปุเร
สุวณฺณมาลา กุโต ตสฺส ทุคฺคตสฺส นิสฺสํสยํ โจริกาย อาภตาติ ฯ
     {๑๓๙.๒}   อถโข  ราชา มาคโธ เสนิโย พิมฺพิสาโร ตํ อารามิกกุลํ
พนฺธาเปสิ   ฯ   ทุติยมฺปิ   โข   อายสฺมา   ปิลินฺทวจฺโฉ   ปุพฺพณฺหสมยํ
นิวาเสตฺวา    ปตฺตจีวรมาทาย    ปิลินฺทวจฺฉคามกํ     ปิณฺฑาย   ปาวิสิ
ปิลินฺทวจฺฉคามเก    สปทานํ    ปิณฺฑาย    จรมาโน     เยน    ตสฺส
อารามิกสฺส   นิเวสนํ   เตนุปสงฺกมิ   อุปสงฺกมิตฺวา   ปฏิวิสฺสเก   ปุจฺฉิ
กหํ   อิทํ   อารามิกกุลํ   คตนฺติ   ฯ   เอติสฺสา  ภนฺเต  สุวณฺณมาลาย
การณา รญฺญา พนฺธาปิตนฺติ ฯ
     {๑๓๙.๓}   อถโข  อายสฺมา  ปิลินฺทวจฺโฉ  เยน  รญฺโญ  มาคธสฺส
เสนิยสฺส   พิมฺพิสารสฺส   นิเวสนํ   เตนุปสงฺกมิ  อุปสงฺกมิตฺวา  ปญฺญตฺเต
อาสเน  นิสีทิ  ฯ  อถโข  ราชา  มาคโธ เสนิโย พิมฺพิสาโร เยนายสฺมา
ปิลินฺทวจฺโฉ    เตนุปสงฺกมิ    อุปสงฺกมิตฺวา    อายสฺมนฺตํ    ปิลินฺทวจฺฉํ
อภิวาเทตฺวา  เอกมนฺตํ  นิสีทิ  ฯ  เอกมนฺตํ  นิสินฺนํ  โข  ราชานํ มาคธํ
เสนิยํ   พิมฺพิสารํ   อายสฺมา   ปิลินฺทวจฺโฉ  เอตทโวจ  กิสฺส  มหาราช
อารามิกกุลํ    พนฺธาปิตนฺติ    ฯ   ตสฺส   ภนฺเต   อารามิกสฺส   ฆเร
สุวณฺณมาลา     อภิรูปา    ทสฺสนียา    ปาสาทิกา    นตฺถิ    ตาทิสา
อมฺหากํปิ     อนฺเตปุเร     สุวณฺณมาลา    กุโต    ตสฺส    ทุคฺคตสฺส
นิสฺสํสยํ    โจริกาย   อาภตาติ   ฯ   อถโข   อายสฺมา   ปิลินฺทวจฺโฉ
รญฺโญ    มาคธสฺส    เสนิยสฺส    พิมฺพิสารสฺส    ปาสาทํ    สุวณฺณนฺติ
อธิมุจฺจิ   ฯ  โส  อโหสิ  สพฺพโสวณฺณมโย  ฯ  อิทํ  ปน  เต  มหาราช
ตาวพหุํ   สุวณฺณํ   กุโตติ   ฯ   อญฺญาตํ   ภนฺเต   อยฺยสฺเสเวโส  ๑-
อิทฺธานุภาโวติ ตํ อารามิกกุลํ มุญฺจาเปสิ ฯ
     [๑๔๐]   มนุสฺสา  อยฺเยน  กิร  ปิลินฺทวจฺเฉน  สราชิกาย  ปริสาย
อุตฺตริมนุสฺสธมฺมํ     อิทฺธิปาฏิหาริยํ     ๒-     ทสฺสิตนฺติ     อตฺตมนา
อภิปฺปสนฺนา      อายสฺมโต     ปิลินฺทวจฺฉสฺส     ปญฺจ     เภสชฺชานิ
อภิหรึสุ  เสยฺยถีทํ  สปฺปิ  นวนีตํ  เตลํ  มธุ  ผาณิตํ  ฯ ปกติยาปิจายสฺมา
ปิลินฺทวจฺโฉ   ลาภี   โหติ   ปญฺจนฺนํ   เภสชฺชานํ  ลทฺธํ  ลทฺธํ  ปริสาย
วิสฺสชฺเชติ   ฯ  ปริสา  จสฺส  โหติ  พาหุลฺลิกา  ลทฺธํ  ลทฺธํ  โกลมฺเพปิ
ฆเฏปิ   ปูเรตฺวา   ปฏิสาเมติ   ปริสฺสาวนานิปิ   ถวิกาโยปิ   ปูเรตฺวา
วาตปาเนสุ   ลคฺเคติ   ฯ  ตานิ  โอลีนวิลีนานิ  ติฏฺฐนฺติ  ฯ  อุนฺทุเรหิปิ
วิหารา   โอกิณฺณวิกิณฺณา   โหนฺติ  ฯ  มนุสฺสา  วิหารจาริกํ  อาหิณฺฑนฺตา
ปสฺสิตฺวา   อุชฺฌายนฺติ   ขียนฺติ   วิปาเจนฺติ   อนฺโตโกฏฺฐาคาริกา  อิเม
สมณา     สกฺยปุตฺติยา     เสยฺยถาปิ    ราชา    มาคโธ    เสนิโย
@เชิงอรรถ:  ยุ. อยฺยสฺส โส ฯ   อิทฺธิปฺปาฏิหาริยนฺติ อมฺหากํ มติ ฯ
พิมฺพิสาโรติ   ฯ   อสฺโสสุํ   โข   ภิกฺขู  เตสํ  มนุสฺสานํ  อุชฺฌายนฺตานํ
ขียนฺตานํ   วิปาเจนฺตานํ   ฯ   เย   เต  ภิกฺขู  อปฺปิจฺฉา  ฯเปฯ  เต
อุชฺฌายนฺติ   ขียนฺติ   วิปาเจนฺติ   กถํ   หิ   นาม   ภิกฺขู   เอวรูปาย
พาหุลฺลาย   เจเตสฺสนฺตีติ   ฯ   อถโข   เต  ภิกฺขู  ภควโต  เอตมตฺถํ
อาโรเจสุํ   ฯ   สจฺจํ   กิร   ภิกฺขเว   ภิกฺขู   เอวรูปาย  พาหุลฺลาย
เจเตนฺตีติ  ฯ  สจฺจํ  ภควาติ  ฯ  วิครหิ  พุทฺโธ  ภควา  กถํ  หิ  นาม
เต   ภิกฺขเว   โมฆปุริสา   เอวรูปาย   พาหุลฺลาย  เจเตสฺสนฺติ  เนตํ
ภิกฺขเว   อปฺปสนฺนานํ   วา   ปสาทาย   ปสนฺนานํ   วา  ภิยฺโยภาวาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๑๔๐.๑}   ยานิ  โข  ปน  ตานิ  คิลานานํ  ภิกฺขูนํ  ปฏิสายนียานิ
เภสชฺชานิ   เสยฺยถีทํ   สปฺปิ   นวนีตํ   เตลํ   มธุ   ผาณิตํ  ฯ  ตานิ
ปฏิคฺคเหตฺวา     สตฺตาหปรมํ     สนฺนิธิการกํ     ปริภุญฺชิตพฺพานิ    ตํ
อติกฺกามยโต นิสฺสคฺคิยํ ปาจิตฺติยนฺติ ฯ
     [๑๔๑]   ยานิ   โข  ปน  ตานิ  คิลานานํ  ภิกฺขูนํ  ปฏิสายนียานิ
เภสชฺชานีติ   สปฺปิ  นาม  โคสปฺปิ  วา  อชิกาสปฺปิ  วา  มหิสสปฺปิ  ๑-
วา  ฯ  เยสํ  มํสํ  กปฺปติ  เตสํ  สปฺปิ ฯ นวนีตํ นาม เตสํเยว นวนีตํ ฯ
เตลํ   นาม   ติลเตลํ  สาสปเตลํ  มธุกเตลํ  เอรณฺฑเตลํ  วสาเตลํ  ฯ
มธุ   นาม   มกฺขิกามธุ  ฯ  ผาณิตํ  นาม  อุจฺฉุมฺหา  นิพฺพตฺตํ  ฯ  ตานิ
ปฏิคฺคเหตฺวา       สตฺตาหปรมํ      สนฺนิธิการกํ      ปริภุญฺชิตพฺพานีติ
สตฺตาหปรมตา      ปริภุญฺชิตพฺพานิ      ฯ      ตํ      อติกฺกามยโต
@เชิงอรรถ:  ม. มหึสสปฺปิ ฯ ยุ. มาหิสํ วา สปฺปิ ฯ
นิสฺสคฺคิยํ  โหติ  ๑-  อฏฺฐเม  อรุณุคฺคมเน  นิสฺสคฺคิยํ  โหติ  นิสฺสชฺชิตพฺพํ
สงฺฆสฺส   วา   คณสฺส   วา  ปุคฺคลสฺส  วา  ฯ  เอวญฺจ  ปน  ภิกฺขเว
นิสฺสชฺชิตพฺพํ    ฯเปฯ   อิทํ   เม   ภนฺเต   เภสชฺชํ   สตฺตาหาติกฺกนฺตํ
นิสฺสคฺคิยํ   อิมาหํ   สงฺฆสฺส   นิสฺสชฺชามีติ   ฯเปฯ   ทเทยฺยาติ  ฯเปฯ
ทเทยฺยุนฺติ ฯเปฯ อายสฺมโต ทมฺมีติ ฯ
     [๑๔๒]   สตฺตาหาติกฺกนฺเต  อติกฺกนฺตสญฺญี  นิสฺสคฺคิยํ  ปาจิตฺติยํ  ฯ
สตฺตาหาติกฺกนฺเต   เวมติโก   นิสฺสคฺคิยํ  ปาจิตฺติยํ  ฯ  สตฺตาหาติกฺกนฺเต
อนติกฺกนฺตสญฺญี    นิสฺสคฺคิยํ   ปาจิตฺติยํ   ฯ   อนธิฏฺฐิเต   อนธิฏฺฐิตสญฺญี
นิสฺสคฺคิยํ    ปาจิตฺติยํ    ฯ    อวิสฺสชฺชิเต    วิสฺสชฺชิตสญฺญี   นิสฺสคฺคิยํ
ปาจิตฺติยํ   ฯ   อนฏฺเฐ   นฏฺฐสญฺญี   นิสฺสคฺคิยํ  ปาจิตฺติยํ  ฯ  อวินฏฺเฐ
วินฏฺฐสญฺญี   นิสฺสคฺคิยํ   ปาจิตฺติยํ   ฯ   อทฑฺเฒ   ทฑฺฒสญฺญี   นิสฺสคฺคิยํ
ปาจิตฺติยํ ฯ อวิลุตฺเต วิลุตฺตสญฺญี นิสฺสคฺคิยํ ปาจิตฺติยํ ฯ
     [๑๔๓]   นิสฺสฏฺฐํ  ปฏิลภิตฺวา  น  กายิเกน  ปริโภเคน ปริภุญฺชิตพฺพํ
น  อชฺโฌหริตพฺพํ  ฯ  ปทีเป  วา  กาฬวณฺเณ  วา  อุปเนตพฺพํ ฯ อญฺเญน
ภิกฺขุนา   กายิเกน   ปริโภเคน   ปริภุญฺชิตพฺพํ   น   อชฺโฌหริตพฺพํ   ฯ
สตฺตาหานติกฺกนฺเต      อติกฺกนฺตสญฺญี     อาปตฺติ     ทุกฺกฏสฺส     ฯ
สตฺตาหานติกฺกนฺเต   เวมติโก  อาปตฺติ  ทุกฺกฏสฺส  ฯ  สตฺตาหานติกฺกนฺเต
อนติกฺกนฺตสญฺญี อนาปตฺติ ฯ
@เชิงอรรถ:  อิโต ปรํ สพฺพตฺถ อิติสทฺโท ทิสฺสติ ฯ โส อติเรโกติ เวทิตพฺโพ ฯ ตสฺส
@อติเรกตา ปฐมกฐินสิกฺขาปเท วุตฺตนเยน เวทิตพฺพา ฯ
     [๑๔๔]   อนาปตฺติ  อนฺโตสตฺตาหํ อธิฏฺเฐติ วิสฺสชฺเชติ นสฺสติ วินสฺสติ
ทยฺหติ  อจฺฉินฺทิตฺวา  คณฺหาติ  ๑-  วิสฺสาสํ  คณฺหาติ  ๒-  อนุปสมฺปนฺนสฺส
จตฺเตน   วนฺเตน   มุตฺเตน   อนเปกฺโข   ทตฺวา  ปฏิลภิตฺวา  ปริภุญฺชติ
อุมฺมตฺตกสฺส อาทิกมฺมิกสฺสาติ ฯ
                          ตติยสิกฺขาปทํ นิฏฺฐิตํ ฯ
                                  -------
@เชิงอรรถ: ๑-๒ ม. ยุ. คณฺหนฺติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๒ หน้าที่ ๑๑๗-๑๒๔. https://84000.org/tipitaka/read/pali_read.php?B=2&A=2058&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=2&A=2058&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=2&item=138&items=7              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=2&siri=23              ศึกษาอรรถกถานี้ได้ที่ :- https://84000.org/tipitaka/attha/attha.php?b=2&i=138              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=2&A=5277              The Pali Atthakatha in Roman :- https://84000.org/tipitaka/atthapali/read_rm.php?B=2&A=5277              สารบัญพระไตรปิฎกเล่มที่ ๒ https://84000.org/tipitaka/read/?index_2 https://84000.org/tipitaka/english/?index_2

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]