ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)

                     สหธมฺมิกวคฺคสฺส ปฐมสิกฺขาปทํ
     [๖๘๐]   เตน   สมเยน   พุทฺโธ   ภควา   โกสมฺพิยํ   วิหรติ
โฆสิตาราเม   ฯ  เตน  โข  ปน  สมเยน  อายสฺมา  ฉนฺโน  อนาจารํ
อาจรติ   ฯ   ภิกฺขู   เอวมาหํสุ   มา  อาวุโส  ฉนฺน  เอวรูปํ  อกาสิ
เนตํ   กปฺปตีติ   ฯ   โส  เอวํ  วเทติ  น  ตาวาหํ  อาวุโส  เอตสฺมึ
สิกฺขาปเท    สิกฺขิสฺสามิ    ยาว    นญฺญํ    ภิกฺขุํ    พฺยตฺตํ   วินยธรํ
ปริปุจฺฉามีติ   ฯ   เย   เต   ภิกฺขู  อปฺปิจฺฉา  ฯเปฯ  เต  อุชฺฌายนฺติ
ขียนฺติ    วิปาเจนฺติ    กถํ    หิ   นาม   อายสฺมา   ฉนฺโน   ภิกฺขูหิ
สหธมฺมิกํ   วุจฺจมาโน   เอวํ   วกฺขติ   น   ตาวาหํ  อาวุโส  เอตสฺมึ
สิกฺขาปเท    สิกฺขิสฺสามิ    ยาว    นญฺญํ    ภิกฺขุํ    พฺยตฺตํ   วินยธรํ
ปริปุจฺฉามีติ  ฯเปฯ  สจฺจํ  กิร  ตฺวํ  ฉนฺน  ภิกฺขูหิ  สหธมฺมิกํ  วุจฺจมาโน
เอวํ   วเทสิ   น   ตาวาหํ   อาวุโส  เอตสฺมึ  สิกฺขาปเท  สิกฺขิสฺสามิ
ยาว   นญฺญํ  ภิกฺขุํ  พฺยตฺตํ  วินยธรํ  ปริปุจฺฉามีติ  ฯ  สจฺจํ  ภควาติ  ฯ
วิครหิ   พุทฺโธ  ภควา  กถํ  หิ  นาม  ตฺวํ  โมฆปุริส  ภิกฺขูหิ  สหธมฺมิกํ
วุจฺจมาโน   เอวํ   วกฺขสิ   น   ตาวาหํ  อาวุโส  เอตสฺมึ  สิกฺขาปเท
สิกฺขิสฺสามิ   ยาว   นญฺญํ   ภิกฺขุํ   พฺยตฺตํ   วินยธรํ  ปริปุจฺฉามีติ  เนตํ
โมฆปุริส   อปฺปสนฺนานํ   วา   ปสาทาย   ปสนฺนานํ  วา  ภิยฺโยภาวาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๖๘๐.๑}   โย   ปน  ภิกฺขุ  ภิกฺขูหิ  สหธมฺมิกํ  วุจฺจมาโน  เอวํ
วเทยฺย   น   ตาวาหํ   อาวุโส  เอตสฺมึ  สิกฺขาปเท  สิกฺขิสฺสามิ  ยาว
นญฺญํ   ภิกฺขุํ   พฺยตฺตํ   วินยธรํ  ปริปุจฺฉามีติ  ปาจิตฺติยํ  ฯ  สิกฺขมาเนน
ภิกฺขเว    ภิกฺขุนา   อญฺญาตพฺพํ   ปริปุจฺฉิตพฺพํ   ปริปญฺหิตพฺพํ   ฯ   อยํ
ตตฺถ สามีจีติ ฯ
     [๖๘๑]   โย  ปนาติ  โย  ยาทิโส  ฯเปฯ ภิกฺขูติ ฯเปฯ อยํ อิมสฺมึ
อตฺเถ อธิปฺเปโต ภิกฺขูติ ฯ ภิกฺขูหีติ อญฺเญหิ ภิกฺขูหิ ฯ
     {๖๘๑.๑}   สหธมฺมิกํ  นาม  ยํ  ภควตา  ปญฺญตฺตํ  สิกฺขาปทํ  เอตํ
สหธมฺมิกํ  นาม  ฯ  เตน  วุจฺจมาโน  เอวํ วเทติ ๑- น ตาวาหํ อาวุโส
เอตสฺมึ   สิกฺขาปเท   สิกฺขิสฺสามิ   ยาว   นญฺญํ  ภิกฺขุํ  พฺยตฺตํ  วินยธรํ
ปณฺฑิตํ    เมธาวึ   พหุสฺสุตํ   ธมฺมกถิกํ   ปริปุจฺฉามีติ   ภณติ   อาปตฺติ
ปาจิตฺติยสฺส ฯ
     [๖๘๒]   อุปสมฺปนฺเน   อุปสมฺปนฺนสญฺญี   เอวํ   วเทติ   อาปตฺติ
ปาจิตฺติยสฺส    ฯ    อุปสมฺปนฺเน   เวมติโก   เอวํ   วเทติ   อาปตฺติ
ปาจิตฺติยสฺส    ฯ    อุปสมฺปนฺเน    อนุปสมฺปนฺนสญฺญี    เอวํ    วเทติ
อาปตฺติ    ปาจิตฺติยสฺส    ฯ    อปฺปญฺญตฺเตน    วุจฺจมาโน   อิทํ   น
สลฺเลขาย    น    ธูตตฺตาย   น   ปาสาทิกตาย   น   อปจยาย   น
วิริยารมฺภาย   สํวตฺตตีติ   เอวํ   วเทติ  น  ตาวาหํ  อาวุโส  เอตสฺมึ
สิกฺขาปเท    สิกฺขิสฺสามิ    ยาว    นญฺญํ    ภิกฺขุํ    พฺยตฺตํ   วินยธรํ
ปณฺฑิตํ    เมธาวึ   พหุสฺสุตํ   ธมฺมกถิกํ   ปริปุจฺฉามีติ   ภณติ   อาปตฺติ
ทุกฺกฏสฺส   ฯ   อนุปสมฺปนฺเนน   ปญฺญตฺเตน   วา   อปฺปญฺญตฺเตน   วา
@เชิงอรรถ:  ม. ยุ. วเทยฺย ฯ
วุจฺจมาโน   อิทํ   น   สลฺเลขาย   น  ธูตตฺตาย  น  ปาสาทิกตาย  น
อปจยาย   น   วิริยารมฺภาย   สํวตฺตตีติ   เอวํ   วเทติ   น  ตาวาหํ
อาวุโส   เอตสฺมึ   สิกฺขาปเท   สิกฺขิสฺสามิ   ยาว  นญฺญํ  ภิกฺขุํ  พฺยตฺตํ
วินยธรํ    ปณฺฑิตํ   เมธาวึ   พหุสฺสุตํ   ธมฺมกถิกํ   ปริปุจฺฉามีติ   ภณติ
อาปตฺติ    ทุกฺกฏสฺส    ฯ    อนุปสมฺปนฺเน    อุปสมฺปนฺนสญฺญี   อาปตฺติ
ทุกฺกฏสฺส    ฯ    อนุปสมฺปนฺเน    เวมติโก   อาปตฺติ   ทุกฺกฏสฺส   ฯ
อนุปสมฺปนฺเน อนุปสมฺปนฺนสญฺญี อาปตฺติ ทุกฺกฏสฺส ฯ
     [๖๘๓]   สิกฺขมาเนนาติ    สิกฺขิตุกาเมน    ฯ    อญฺญาตพฺพนฺติ
ชานิตพฺพํ    ฯ    ปริปุจฺฉิตพฺพนฺติ    อิทํ   ภนฺเต   กถํ   อิมสฺส   โก
อตฺโถติ   ๑-   ฯ  ปริปญฺหิตพฺพนฺติ  จินฺเตตพฺพํ  ตุลยิตพฺพํ  ฯ  อยํ  ตตฺถ
สามีจีติ อยํ ตตฺถ อนุธมฺมตา ฯ
     [๖๘๔]   อนาปตฺติ     ชานิสฺสามิ     สิกฺขิสฺสามีติ     ภณติ
อุมฺมตฺตกสฺส อาทิกมฺมิกสฺสาติ ฯ
                          ปฐมสิกฺขาปทํ นิฏฺฐิตํ ฯ
                                    -------
@เชิงอรรถ:  ม. กฺวตฺโถติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๒ หน้าที่ ๔๔๙-๔๕๑. https://84000.org/tipitaka/read/pali_read.php?B=2&A=8080&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=2&A=8080&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=2&item=680&items=5              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=2&siri=107              ศึกษาอรรถกถานี้ได้ที่ :- https://84000.org/tipitaka/attha/attha.php?b=2&i=680              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=2&A=9853              The Pali Atthakatha in Roman :- https://84000.org/tipitaka/atthapali/read_rm.php?B=2&A=9853              สารบัญพระไตรปิฎกเล่มที่ ๒ https://84000.org/tipitaka/read/?index_2 https://84000.org/tipitaka/english/?index_2

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]