ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)

                              สตฺตมสิกฺขาปทํ
     [๗๖๓]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม   ฯ   เตน   โข   ปน   สมเยน   ภควตา
ภิกฺขูนํ    นิสีทนํ   อนุญฺญาตํ   โหติ   ฯ   ฉพฺพคฺคิยา   ภิกฺขู   ภควตา
นิสีทนํ    อนุญฺญาตนฺติ   อปฺปมาณิกานิ   นิสีทนานิ   ธาเรนฺติ   มญฺจสฺสปิ
ปีฐสฺสปิ   ปุรโตปิ  ปจฺฉโตปิ  โอลมฺเพนฺติ  ฯ  เย  เต  ภิกฺขู  อปฺปิจฺฉา
ฯเปฯ   เต   อุชฺฌายนฺติ  ขียนฺติ  วิปาเจนฺติ  กถํ  หิ  นาม  ฉพฺพคฺคิยา
ภิกฺขู   อปฺปมาณิกานิ  นิสีทนานิ  ธาเรสฺสนฺตีติ  ฯเปฯ  สจฺจํ  กิร  ตุเมฺห
ภิกฺขเว   อปฺปมาณิกานิ   นิสีทนานิ   ธาเรถาติ   ฯ  สจฺจํ  ภควาติ  ฯ
วิครหิ   พุทฺโธ  ภควา  กถํ  หิ  นาม  ตุเมฺห  โมฆปุริสา  อปฺปมาณิกานิ
นิสีทนานิ   ธาเรสฺสถ   เนตํ   โมฆปุริสา   อปฺปสนฺนานํ  วา  ปสาทาย
ปสนฺนานํ   วา   ภิยฺโยภาวาย   ฯเปฯ   เอวญฺจ   ปน   ภิกฺขเว  อิมํ
สิกฺขาปทํ อุทฺทิเสยฺยาถ
     {๗๖๓.๑}   นิสีทนํ    ปน    ภิกฺขุนา   การยมาเนน   ปมาณิกํ
กาเรตพฺพํ   ฯ   ตตฺริทํ   ปมาณํ  ทีฆโส  เทฺว  วิทตฺถิโย  สุคตวิทตฺถิยา
ติริยํ ทิยฑฺฒํ ฯ ตํ อติกฺกามยโต เฉทนกํ ปาจิตฺติยนฺติ ฯ
     {๗๖๓.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๗๖๔]   เตน  โข  ปน สมเยน อายสฺมา อุทายิ มหากาโย โหติ ฯ
โส   ภควโต   ปุรโต   นิสีทนํ   ปญฺญาเปตฺวา   สมนฺตโต  สมญฺฉมาโน
นิสีทติ    ฯ    อถโข    ภควา    อายสฺมนฺตํ    อุทายึ    เอตทโวจ
กิสฺส    ตฺวํ    อุทายิ    นิสีทนํ    ปญฺญาเปตฺวา   สมนฺตโต   สมญฺฉสิ
เสยฺยถาปิ   ปุราณสิโกฏฺโฐติ  ฯ  ตถา  หิ  ปน  ภนฺเต  ภควตา  ภิกฺขูนํ
อติขุทฺทกํ   นิสีทนํ   อนุญฺญาตนฺติ   ฯ   อถโข  ภควา  เอตสฺมึ  นิทาเน
เอตสฺมึ   ปกรเณ   ธมฺมึ   กถํ   กตฺวา   ภิกฺขู  อามนฺเตสิ  อนุชานามิ
ภิกฺขเว  นิสีทนสฺส  ทสา  ๑-  วิทตฺถึ  เอวญฺจ  ปน ภิกฺขเว อิมํ สิกฺขาปทํ
อุทฺทิเสยฺยาถ
     {๗๖๔.๑}   นิสีทนํ  ปน  ภิกฺขุนา การยมาเนน ปมาณิกํ กาเรตพฺพํ ฯ
ตตฺรีทํ  ปมาณํ  ทีฆโส  เทฺว  วิทตฺถิโย  สุคตวิทตฺถิยา  ติริยํ  ทิยฑฺฒํ ทสา
วิทตฺถิ ฯ ตํ อติกฺกามยโต เฉทนกํ ปาจิตฺติยนฺติ ฯ
     [๗๖๕]   นิสีทนํ  นาม  สทสํ  วุจฺจติ  ฯ  การยมาเนนาติ กโรนฺโต
วา   การาเปนฺโต   วา   ฯ   ปมาณิกํ  กาเรตพฺพํ  ฯ  ตตฺริทํ  ปมาณํ
ทีฆโส   เทฺว   วิทตฺถิโย  สุคตวิทตฺถิยา  ติริยํ  ทิยฑฺฒํ  ทสา  วิทตฺถิ  ฯ
ตํ  อติกฺกาเมตฺวา  กโรติ  วา  การาเปติ  วา ปโยเค ทุกฺกฏํ ปฏิลาเภน
ฉินฺทิตฺวา ปาจิตฺติยํ เทเสตพฺพํ ฯ
     [๗๖๖]   อตฺตนา   วิปฺปกตํ   อตฺตนา   ปริโยสาเปติ   อาปตฺติ
ปาจิตฺติยสฺส   ฯ   อตฺตนา   วิปฺปกตํ   ปเรหิ   ปริโยสาเปติ   อาปตฺติ
ปาจิตฺติยสฺส   ฯ   ปเรหิ   วิปฺปกตํ   อตฺตนา   ปริโยสาเปติ   อาปตฺติ
ปาจิตฺติยสฺส    ฯ   ปเรหิ   วิปฺปกตํ   ปเรหิ   ปริโยสาเปติ   อาปตฺติ
ปาจิตฺติยสฺส ฯ
     {๗๖๖.๑}   อญฺญสฺสตฺถาย   กโรติ  วา  การาเปติ  วา  อาปตฺติ
ทุกฺกฏสฺส ฯ อญฺเญน กตํ ปฏิลภิตฺวา ปริภุญฺชติ อาปตฺติ ทุกฺกฏสฺส ฯ
@เชิงอรรถ:  ม. ทสํ ฯ
     [๗๖๗]   อนาปตฺติ   ปมาณิกํ   กโรติ   อูนกํ   กโรติ   อญฺเญน
กตํ    ปมาณาติกฺกนฺตํ    ปฏิลภิตฺวา    ฉินฺทิตฺวา    ปริภุญฺชติ    วิตานํ
วา   ภุมฺมตฺถรณํ   วา   สาณิปาการํ   วา   ภิสึ   วา  พิมฺโพหนํ  วา
กโรติ อุมฺมตฺตกสฺส อาทิกมฺมิกสฺสาติ
                         สตฺตมสิกฺขาปทํ นิฏฺฐิตํ ฯ
                                   ---------


             เนื้อความพระไตรปิฎกฉบับภาษาบาลี อักษรไทย เล่มที่ ๒ หน้าที่ ๕๐๔-๕๐๖. https://84000.org/tipitaka/read/pali_read.php?B=2&A=9093&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=2&A=9093&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=2&item=763&items=5              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=2&siri=125              ศึกษาอรรถกถานี้ได้ที่ :- https://84000.org/tipitaka/attha/attha.php?b=2&i=763              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=2&A=10249              The Pali Atthakatha in Roman :- https://84000.org/tipitaka/atthapali/read_rm.php?B=2&A=10249              สารบัญพระไตรปิฎกเล่มที่ ๒ https://84000.org/tipitaka/read/?index_2 https://84000.org/tipitaka/english/?index_2

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]