บาลีพระไตรปิฎกเล่มที่ ๒๓ - พระสุตตันตปิฎกเล่มที่ ๑๕

                สุตฺตนฺตปิฏเก องฺคุตฺตรนิกายสฺส
                       อฏฺฐกนิปาโต
                      ----------
            นโม ตสฺส ภควโต อรหโต สมฺมาสมฺพุทฺธสฺส ฯ
                        ปณฺณาสโก
                    เมตฺตาวคฺโค ปฐโม
     [๙๑]   ๑  เอวมฺเม  สุตํ  ฯ  เอกํ  สมยํ  ภควา สาวตฺถิยํ วิหรติ
เชตวเน   อนาถปิณฺฑิกสฺส   อาราเม   ฯ   ตตฺร   โข   ภควา  ภิกฺขู
อามนฺเตสิ   ภิกฺขโวติ  ฯ  ภทนฺเตติ  เต  ภิกฺขู  ภควโต  ปจฺจสฺโสสุํ  ฯ
ภควา   เอตทโวจ   เมตฺตาย   ภิกฺขเว   เจโตวิมุตฺติยา   อาเสวิตาย
ภาวิตาย   พหุลีกตาย   ยานีกตาย   วตฺถุกตาย   อนุฏฺฐิตาย   ปริจิตาย
สุสมารทฺธาย   อฏฺฐานิสํสา   ปาฏิกงฺขา   กตเม  อฏฺฐ  สุขํ  สุปติ  สุขํ
ปฏิพุชฺฌติ    น    ปาปกํ    สุปินํ    ปสฺสติ   มนุสฺสานํ   ปิโย   โหติ
อมนุสฺสานํ   ปิโย  โหติ  เทวตา  รกฺขนฺติ  นาสฺส  อคฺคิ  วา  วิสํ  วา
สตฺถํ  วา  กมติ  อุตฺตรึ  อปฺปฏิวิชฺฌนฺโต  พฺรหฺมโลกูปโค โหติ ฯ เมตฺตาย
ภิกฺขเว   เจโตวิมุตฺติยา   อาเสวิตาย  ภาวิตาย  พหุลีกตาย  ยานีกตาย
วตฺถุกตาย   อนุฏฺฐิตาย   ปริจิตาย   สุสมารทฺธาย   อิเม   อฏฺฐานิสํสา
ปาฏิกงฺขาติ ฯ
         โย จ เมตฺตํ ภาวยติ       อปฺปมาณํ ปฏิสฺสโต
         ตนู สํโยชนา โหนฺติ       ปสฺสโต อุปธิกฺขยํ
               เอกมฺปิ เจ ปาณมทุฏฺฐจิตฺโต
               เมตฺตายติ กุสลํ ^๑- เตน โหติ
               สพฺเพว ปาเณ มนสานุกมฺปิ
               ปหูตมริโย จ ^๒- กโรติ ปุญฺญํ
               เย สตฺตสณฺฑํ ปฐวึ ชินิตฺวา
               ราชิสฺสโย ยชมานานุจริยคา
               สสฺสเมธํ ปุริสเมธํ
               สมฺมาปาสํ วาชเปยฺยํ นิรคฺคฬํ
               เมตฺตสฺส จิตฺตสฺส สุภาวิตสฺส
               กลมฺปิ เต นานุภวนฺติ โสฬสึ
               จนฺทปฺปภา ตารคณาว สพฺเพ
                          (๓)-
         โย น หนติ น ฆาเตติ      น ชินาติ น ชาปเย
         เมตฺตโส สพฺพภูตานํ       เวรนฺตสฺส น เกนจีติ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๒๓ หน้าที่ ๑๕๑-๑๕๒. https://84000.org/tipitaka/read/pali_read.php?B=23&A=3226&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=23&A=3226&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=23&item=91&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=23&siri=74 ศึกษาอรรถกถานี้ได้ที่ :- https://84000.org/tipitaka/attha/attha.php?b=23&i=91 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=16&A=4719 The Pali Atthakatha in Roman :- https://84000.org/tipitaka/atthapali/read_rm.php?B=16&A=4719 สารบัญพระไตรปิฎกเล่มที่ ๒๓ https://84000.org/tipitaka/read/?index_23 https://84000.org/tipitaka/english/?index_23