ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๕ ภาษาบาลี อักษรไทย พระสุตตันตปิฎกเล่มที่ ๑๗ สุตฺต. ขุ. ขุทฺทกปาฐ-ธมฺมปทคาถา-อุทานํ-อิติวุตฺตก-สุตฺตนิปาตา

                     สุตฺตนิปาเต ทุติยสฺส จูฬวคฺคสฺส
                       สตฺตมํ พฺราหฺมณธมฺมิกสุตฺตํ
     [๓๒๒]   ๗  เอวมฺเม  สุตํ  ฯ  เอกํ  สมยํ ภควา สาวตฺถิยํ วิหรติ
เชตวเน   อนาถปิณฺฑิกสฺส   อาราเม  ฯ  อถ  โข  สมฺพหุลา  โกสลกา
พฺราหฺมณมหาสาลา      ชิณฺณา      วุฑฺฒา     มหลฺลกา     อทฺธคตา
วโย    อนุปฺปตฺตา    เยน    ภควา    เตนุปสงฺกมึสุ    อุปสงฺกมิตฺวา
ภควตา      สทฺธึ     สมฺโมทึสุ     สมฺโมทนียํ     กถํ     สาราณียํ
วีติสาเรตฺวา   เอกมนฺตํ   นิสีทึสุ   ฯ   เอกมนฺตํ   นิสินฺนา   โข  เต
พฺราหฺมณมหาสาลา      ภควนฺตํ      เอตทโวจุํ     สนฺทิสฺสนฺติ     นุ
โข    โภ    โคตม   เอตรหิ   พฺราหฺมณา   โปราณานํ   พฺราหฺมณานํ
พฺราหฺมณธมฺเมติ    ฯ    น    โข   พฺราหฺมณา   สนฺทิสฺสนฺติ   เอตรหิ
พฺราหฺมณา      โปราณานํ     พฺราหฺมณานํ     พฺราหฺมณธมฺเมติ     ฯ
สาธุ   โน  ภวํ  [๑]-  โคตโม  โปราณานํ  พฺราหฺมณานํ  พฺราหฺมณธมฺมํ
ภาสตุ  สเจ  โภโต  โคตมสฺส  อครูติ  ฯ  เตน  หิ  พฺราหฺมณา  สุณาถ
สาธุกํ   มนสิกโรถ   ภาสิสฺสามีติ  ฯ  เอวํ  โภติ  โข  เต  พฺราหฺมณ-
มหาสาลา ภควโต ปจฺจสฺโสสุํ ฯ ภควา เอตทโวจ
     [๓๒๓]   |๓๒๓.๗๑๐| อิสโย ปุพฺพกา อาสุํ        สญฺญตตฺตา ตปสฺสิโน
                          ปญฺจ กามคุเณ หิตฺวา     อตฺตทตฺถมจาริสุํ
     |๓๒๓.๗๑๑|   น ปสู พฺราหฺมณานาสุํ     น หิรญฺญํ น ธานิยํ
                         สชฺฌายธนธญฺญาสุํ        พฺรหฺมํ นิธึ อปาลยุํ ๒-
@เชิงอรรถ:  โป. โส ฯ  โป. พฺรหฺมนิธิมปาลยุํ ฯ ม. ยุ. พฺรหฺมํ นิธิมปาลยุํ ฯ
     |๓๒๓.๗๑๒|   ยํ เนสํ ปกตํ อาสิ           ทฺวารภตฺตํ อุปฏฺฐิตํ
                         สทฺธาปกตเมสานํ           ทาตเว ตทมญฺญิสุํ ฯ
     |๓๒๓.๗๑๓|   นานารตฺเตหิ วตฺเถหิ      สยเนหาวสเถหิ จ
                         ผีตา ชนปทา รฏฺฐา         เต นมสฺสึสุ พฺราหฺมเณ ฯ
     |๓๒๓.๗๑๔|   อวชฺฌา พฺราหฺมณา อาสุํ  อเชยฺยา ธมฺมรกฺขิตา
                         น เน โกจิ นิวาเรสิ           กุลทฺวาเรสุ สพฺพโส ฯ
     |๓๒๓.๗๑๕|   อฏฺฐจตฺตาฬีสํ วสฺสานิ    (โกมาร) พฺรหฺมจริยํ จรึสุ เต
                         วิชฺชาจรณปริเยฏฺฐึ ๑-     อจรุํ พฺราหฺมณา ปุเร ฯ
     |๓๒๓.๗๑๖|   น พฺราหฺมณา อญฺญมคมุํ      นปิ ภริยํ กิณึสุ เต
                         สมฺปิเยเนว สํวาสํ            สงฺคนฺตฺวา สมโรจยุํ ฯ
     |๓๒๓.๗๑๗|   อญฺญตฺร ตมฺหา สมยา   อุตุเวรมณิมฺปติ ๒-
                         อนฺตรา เมถุนํ ธมฺมํ       นาสฺสุ คจฺฉนฺติ พฺราหฺมณา ฯ
     |๓๒๓.๗๑๘|   พฺรหฺมจริยญฺจ สีลญฺจ   อชฺชวํ มทฺทวํ ตปํ
                         โสรจฺจํ อวิหึสญฺจ            ขนฺติญฺจาปิ อวณฺณยุํ ฯ
     |๓๒๓.๗๑๙|   โย เนสํ ปรโม อาสิ         พฺรหฺมา ทฬฺหปรกฺกโม
                          ส วาปิ เมถุนํ ธมฺมํ          สุปินนฺเตน ๓- นาคมา ฯ
     |๓๒๓.๗๒๐|   ตสฺส วตฺตมนุสิกฺขนฺตา    อิเธเก วิญฺญุชาติกา
                          พฺรหฺมจริยญฺจ สีลญฺจ     ขนฺติญฺจาปิ อวณฺณยุํ ฯ
     |๓๒๓.๗๒๑|   ตณฺฑุลํ สยนํ วตฺถํ         สปฺปิเตลญฺจ ยาจิย
                         ธมฺเมน สโมธาเนตฺวา ๔- ตโต ยญฺญมกปฺปยุํ
@เชิงอรรถ:  ยุ. ... ปริยิฏฺฐึ ฯ    โป. อุตุเวรมณีปติ     โป. ม. สุปินนฺเตปิ
@ ยุ. สมุทาเนตฺวา ฯ
     |๓๒๓.๗๒๒|   อุปฏฺฐิตสฺมึ ยญฺญสฺมึ      นาสฺสุ คาโว หนึสุ เต ฯ
                          ยถา มาตา ปิตา ภาตา    อญฺเญ วาปิ จ ญาตกา
                          คาโว โน ปรมา มิตฺตา     ยาสุ ชายนฺติ โอสถา ฯ
     |๓๒๓.๗๒๓|   อนฺนทา พลทา เจตา       วณฺณทา สุขทา ตถา
                          เอตมตฺถวสํ ญตฺวา          นาสฺสุ คาโว หนึสุ เต ฯ
     |๓๒๓.๗๒๔|   สุขุมาลา มหากายา        วณฺณวนฺโต ยสสฺสิโน
                          พฺราหฺมณา เสหิ ธมฺเมหิ   กิจฺจากิจฺเจสุ อุสฺสุกา
                          ยาย ๑- โลเก อวตฺตึสุ      สุขเมธิตฺถยมฺปชา ฯ
     |๓๒๓.๗๒๕|   เตสํ อาสิ วิปลฺลาโส        ทิสฺวาน อณุโต อณุํ
                          ราชิโน จ วิยาการํ            นาริโย จ สมลงฺกตา
     |๓๒๓.๗๒๖|   รเถ จาชญฺญสํยุตฺเต        สุกเต จิตฺรสิพฺพเน
                          นิเวสเน นิเวเส จ             วิภตฺเต ภาคโส มิเต
     |๓๒๓.๗๒๗|   โคมณฺฑลปริพฺยุฬฺหํ ๒-   นาริวรคณายุตํ
                          อุฬารํ มานุสํ โภคํ           อภิชฺฌายึสุ พฺราหฺมณา ฯ
     |๓๒๓.๗๒๘|   เต ตตฺถ มนฺเต คนฺเถตฺวา  โอกฺกากํ ตทุปาคมุํ
                          ปหูตธนธญฺโญสิ
                          (ยชสฺสุ พหุ เต วิตฺตํ)        ยชสฺสุ พหุ เต ธนํ ฯ
     |๓๒๓.๗๒๙|   ตโต จ ราชา สญฺญตฺโต    พฺราหฺมเณหิ รเถสโภ
                          อสฺสเมธํ ปุริสเมธํ (สมฺมาปาสํ) วาชเปยฺยํ นิรคฺคฬํ ฯ
@เชิงอรรถ:  โป. ม. ยาว ฯ   ยุ. ปริพฺพูฬฺหํ ฯ
                          เอเต ยาเค ยชิตฺวาน        พฺราหฺมณานํ อทา ธนํ
     |๓๒๓.๗๓๐|   คาโว สยนญฺจ วตฺถญฺจ    นาริโย จ สมลงฺกตา
                          รเถ จาชญฺญสํยุตฺเต        สุกเต จิตฺรสิพฺพเน ๑-
     |๓๒๓.๗๓๑|   นิเวสนานิ รมฺมานิ          สุวิภตฺตานิ สพฺพโส ๒-
                          นานาธญฺญสฺส ปูเรตฺวา   พฺราหฺมณานํ อทา ธนํ ฯ
     |๓๒๓.๗๓๒|   เต จ ตตฺถ ธนํ ลทฺธา       สนฺนิธึ สมโรจยุํ
                          เตสํ อิจฺฉาวติณฺณานํ       ภิยฺโย ตณฺหา ปวฑฺฒถ
                          เต ตตฺถ มนฺเต คนฺเถตฺวา  โอกฺกากํ ปุนมุปาคมุํ ฯ
     |๓๒๓.๗๓๓|   ยถา อาโป จ ปฐวี จ        หิรญฺญํ ธนธานิยํ
                          เอวํ คาโว มนุสฺสานํ         ปริกฺขาโร โส หิ ปาณินํ
                          ยชสฺสุ พหุ เต วิตฺตํ          ยชสฺสุ พหุ เต ธนํ ฯ
     |๓๒๓.๗๓๔|   ตโต จ ราชา สญฺญตฺโต   พฺราหฺมเณหิ รเถสโภ
                          เนกา สตสหสฺสิโย           คาโว ยญฺเญ อฆาตยิ ฯ
     |๓๒๓.๗๓๕|   น ปาทา น วิสาเณน       นาสฺสุ หึสนฺติ เกนจิ
                          คาโว เอฬกสมานา         โสรตา กุมฺภทูหนา
                          ตา วิสาเณ คเหตฺวาน      ราชา สตฺเถน ฆาตยิ ฯ
     |๓๒๓.๗๓๖|   ตโต จ เทวา ปิตโร          อินฺโท อสุรรกฺขสา
                          อธมฺโม อิติ ปกฺกนฺทุํ       ยํ สตฺตํ นิปตี คเว ฯ
     |๓๒๓.๗๓๗|   ตโย โรคา ปุเร อาสุํ         อิจฺฉา อนสนญฺชรา
                          ปสูนญฺจ สมารมฺภา        อฏฺฐานวุติมาคมุํ ฯ
@เชิงอรรถ:  ม. สพฺพตฺถ จิตฺตสิพฺพเนติ ทิสฺสติ ฯ  ม. ยุ. ภาคโส ฯ
     |๓๒๓.๗๓๘|   เอโส อธมฺโม ทณฺฑานํ    โอกฺกนฺโต ปุรโณ ๑- อหุ ๒-
                          อทูสิกาโย ๓- หญฺญนฺติ  ธมฺมา ธํสนฺติ ยาชกา ฯ
     |๓๒๓.๗๓๙|   เอวเมโส อนุธมฺโม          โปราโณ วิญฺญุครหิโต
                          ยตฺถ เอทิสกํ ปสฺสติ        ยชกํ ๔- ครหตี ชโน ฯ
     |๓๒๓.๗๔๐|   เอวํ ธมฺเม วิยาปนฺเน       วิภินฺนา สุทฺทเวสฺสิกา
                          ปุถู วิภินฺนา ขตฺติยา        ปตึ ภริยา ๕- อวมญฺญถ ฯ
     |๓๒๓.๗๔๑|   ขตฺติยา พฺรหฺมพนฺธู จ     เย จญฺเญ โคตฺตรกฺขิตา
                          ชาติวาทํ นิรงฺกตฺวา         กามานํ วสมุปาคมุนฺติ ๖- ฯ
     [๓๒๔]   เอวํ    วุตฺเต    เต   พฺราหฺมณมหาสาลา   ภควนฺตํ
เอตทโวจุํ    อภิกฺกนฺตํ    โภ    โคตม    อภิกฺกนฺตํ    โภ    โคตม
เสยฺยถาปิ   โภ   โคตม   นิกฺกุชฺชิตํ   วา  อุกฺกุชฺเชยฺย  ปฏิจฺฉนฺนํ  วา
วิวเรยฺย    มูฬฺหสฺส    วา    มคฺคํ    อาจิกฺเขยฺย   อนฺธกาเร   วา
เตลปชฺโชตํ    ธาเรยฺย    จกฺขุมนฺโต    รูปานิ   ทกฺขนฺตีติ   เอวเมวํ
โภตา   โคตเมน   อเนกปริยาเยน   ธมฺโม   ปกาสิโต   เอเต   มยํ
ภวนฺตํ    โคตมํ    สรณํ   คจฺฉาม   ธมฺมญฺจ   ภิกฺขุสงฺฆญฺจ   อุปาสเก
โน ภวํ โคตโม ธาเรตุ อชฺชตคฺเค ปาณุเปเต สรณงฺคเตติ ฯ
                    พฺราหฺมณธมฺมิกสุตฺตํ สตฺตมํ ฯ
                                     -----------
@เชิงอรรถ:  ม. ปุราโณ ฯ  โป. ยุ. อหู ฯ  โป. อทูสิกา เย ฯ  โป. ยาชกํ ฯ ม. ยุ. อาชกํ ฯ
@ ม. ปตึ ภริยาวมญฺญถ ฯ  โป. กามานํ วสมาคมุํ ฯ ม. วสมนฺวคุนฺติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๒๕ หน้าที่ ๓๘๑-๓๘๕. https://84000.org/tipitaka/read/pali_read.php?B=25&A=7906&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=25&A=7906&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=25&item=322&items=3              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=25&siri=246              ศึกษาอรรถกถานี้ได้ที่ :- https://84000.org/tipitaka/attha/attha.php?b=25&i=322              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=29&A=2801              The Pali Atthakatha in Roman :- https://84000.org/tipitaka/atthapali/read_rm.php?B=29&A=2801              สารบัญพระไตรปิฎกเล่มที่ ๒๕ https://84000.org/tipitaka/read/?index_25 https://84000.org/tipitaka/english/?index_25

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]