บาลีพระไตรปิฎกเล่มที่ ๒๕ - พระสุตตันตปิฎกเล่มที่ ๑๗

สุตฺตนิปาเต ทุติยสฺส จูฬวคฺคสฺส อฏฺฐมํ นาวาสุตฺตํ [๓๒๕] |๓๒๕.๗๔๒| ๘ ยสฺมา หิ ธมฺมํ ปุริโส วิชญฺญา อินฺทํว นํ เทวตา ปูชเยยฺย โส ปูชิโต ตสฺมึ ปสนฺนจิตฺโต พหุสฺสุโต ปาตุกโรติ ธมฺมํ ฯ |๓๒๕.๗๔๓| ตทฏฺฐิกตฺวาน นิสมฺม ธีโร ธมฺมานุธมฺมํ ปฏิปชฺชมาโน วิญฺญู วิภาวี นิปุโณ จ โหติ โย ตาทิสํ ภชติ อปฺปมตฺโต ฯ |๓๒๕.๗๔๔| ขุทฺทญฺจ พาลํ อุปเสวมาโน อนาคตตฺถญฺจ อุสุยฺยกญฺจ อิเธว ธมฺมํ อวิภาวยิตฺวา อวิติณฺณกงฺโข มรณํ อุเปติ ฯ |๓๒๕.๗๔๕| ยถา นโร อาปคํ โอตริตฺวา มโหทกํ สลิลํ สีฆโสตํ โส วุยฺหมาโน อนุโสตคามี กึ โส ปเร สกฺขติ ตารเยตุ ํ ฯ |๓๒๕.๗๔๖| ตเถว ธมฺมํ อวิภาวยิตฺวา พหุสฺสุตานํ อนิสามยตฺถํ สยํ อชานํ อวิติณฺณกงฺโข กึ โส ปเร สกฺขติ นิชฺฌเปตุ ํ ฯ |๓๒๕.๗๔๗| ยถาปิ นาวํ ทฬฺหมารุหิตฺวา ปิเยนริตฺเตน สมงฺคิภูโต โส ตารเย ตตฺถ พหูปิ อญฺเญ ตตฺรูปยญฺญู กุสโล มติมา ^๑- |๓๒๕.๗๔๘| เอวมฺปิ โย เวทคุ ภาวิตตฺโต พหุสฺสุโต โหติ อเวธธมฺโม โส โข ปเร นิชฺฌปเย ปชานํ โสตาวธาโนปนิสูปปนฺเน ฯ |๓๒๕.๗๔๙| ตสฺมา หเว สปฺปุริสํ ภเชถ เมธาวินญฺเจว พหุสฺสุตญฺจ อญฺญาย อตฺถํ ปฏิปชฺชมาโน วิญฺญาตธมฺโม ส ^๒- สุขํ ลเภถาติ ฯ นาวาสุตฺตํ อฏฺฐมํ -------

เนื้อความพระไตรปิฎกฉบับภาษาบาลี อักษรไทย เล่มที่ ๒๕ หน้าที่ ๓๘๖-๓๘๗. https://84000.org/tipitaka/read/pali_read.php?B=25&A=8010&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=25&A=8010&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=25&item=325&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=25&siri=247 ศึกษาอรรถกถานี้ได้ที่ :- https://84000.org/tipitaka/attha/attha.php?b=25&i=325 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=29&A=3145 The Pali Atthakatha in Roman :- https://84000.org/tipitaka/atthapali/read_rm.php?B=29&A=3145 สารบัญพระไตรปิฎกเล่มที่ ๒๕ https://84000.org/tipitaka/read/?index_25 https://84000.org/tipitaka/english/?index_25