บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

หน้าที่ ๑๓๑.

๔ ททฺทรชาตกํ [๕๑๔] อิมานิ มํ ททฺทร ตาปยนฺติ วาจาทุรุตฺตานิ มนุสฺสโลเก มณฺฑูกภกฺขา อุทกนฺตเสวี อสีวิสํ ^๑- มํ อวิสา สปนฺติ ฯ [๕๑๕] สกา รฏฺฐา ปพฺพาชิโต อญฺญํ ชนปทํ คโต มหนฺตํ โกฏฺฐํ กยิราถ ทุรุตฺตานํ นิเธตเว ฯ [๕๑๖] ยตฺถ โปสํ น ชานนฺติ ชาติยา วินเยน วา น ตตฺถ มานํ กยิราถ วสํ อญฺญาตเก ชเน ฯ [๕๑๗] วิเทสวาสํ วสโต ชาตเวทสเมนปิ ขมิตพฺพํ สปญฺเญน อปิ ทาสสฺส ตชฺชิตนฺติ ฯ ททฺทรชาตกํ จตุตฺถํ ฯ ---------