บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

หน้าที่ ๔๓๘.

๘ ภลฺลาติยชาตกํ [๒๑๕๓] ภลฺลาติโย ^๑- นาม อโหสิ ราชา รฏฺฐํ ปหาย มิควํ อจาริโส อคมา คิริวรํ คนฺธมาทนํ สุปุปฺผิตํ กึปุริสานุจิณฺณํ ฯ สาลูรสงฺฆญฺจ นิเสธยิตฺวา ธนุกลาปญฺจ โส นิกฺขิปิตฺวา อุปาคมิ วจนํ วตฺตุกาโม ยตฺถฏฺฐิตา กึปุริสา อเหสุํ ฯ หิมจฺจเย เหมวตาย ตีเร กิมิธฏฺฐิตา มนฺตยโวฺห อภิณฺหํ ปุจฺฉามิ โว มานุสเทหวณฺเณ กถํ โว ^๒- ชานนฺติ มนุสฺสโลเก ฯ [๒๑๕๔] มลฺลคิรึ ปณฺฑรกํ ติกูฏํ สีโตทกา ^๓- อนุวิจราม นชฺโช มิคา มนุสฺสาว นิภาสวณฺณา ชานนฺติ โน กึปุริสาติ ลุทฺท ฯ [๒๑๕๕] สุกิจฺฉรูปํ ปริเทวยโวฺห อาลิงฺคิโต จาสิ ปิโย ปิยาย ปุจฺฉามิ โว มานุสเทหวณฺเณ @เชิงอรรถ: ^๑ สี. ยุ. ภลฺลาฏิโย ฯ ^๒ ม. นุ. ฯ ^๓ สี. ยุ. สีโตทิยา ฯ

--------------------------------------------------------------------------------------------- หน้าที่ ๔๓๙.

กิมิธ วเน โรทถ อปฺปตีตา ฯ สุกิจฺฉรูปํ ปริเทวยโวฺห อาลิงฺคิโต จาสิ ปิโย ปิยาย ปุจฺฉามิ โว มานุสเทหวณฺเณ กิมิธ วเน วิลปถ อปฺปตีตา ฯ สุกิจฺฉรูปํ ปริเทวยโวฺห อาลิงฺคิโต จาสิ ปิโย ปิยาย ปุจฺฉามิ โว มานุสเทหวณฺเณ กิมิธ วเน โสจถ อปฺปตีตา ฯ [๒๑๕๖] มเยกรตฺตํ ^๑- วิปฺปวสิมฺห ลุทฺท อกามกา อญฺญมญฺญํ สรนฺตา ตเมกรตฺตํ ^๒- อนุตปฺปมานา โสจาม สา รตฺติ ปุน น เหสฺสติ ฯ [๒๑๕๗] ยเมกรตฺตํ ^๓- อนุตปฺปเถตํ ธนํว นฏฺฐํ ปิตรญฺจ เปตํ ปุจฺฉามิ โว มานุสเทหวณฺเณ กถํ วินาวาสมกปฺปยิตฺถ ฯ [๒๑๕๘] ยมิมํ นทึ ปสฺสสิ สีฆโสตํ นานาทุมจฺฉาทน เสลกูลํ ^๔- ตํ เม ปิโย อุตฺตริ วสฺสกาเล @เชิงอรรถ: ^๑-๒-๓ ยุ. - รตฺตึ ฯ ^๔ สี. ยุ. ทุมจฺฉทนํ เสลกูฏํ ฯ ม. - ทุมจฺฉาทนํ ฯ

--------------------------------------------------------------------------------------------- หน้าที่ ๔๔๐.

มมญฺจ มญฺเญ อนุพนฺธตีติ ฯ อหญฺจ องฺโกลกโมจินามิ อธิมุตฺตกํ สตฺตลิโยธิกญฺจ ปิโย จ เม เหหิติ มาลภารี อหญฺจ นํ มาลินิ ^๑- อชฺฌุเปสฺสํ ฯ อหญฺจิทํ กุรวกํ โอจินามิ อุทฺทาลกา ปาตลิ สินฺธุวาริตา ^๒- ปิโย จ เม เหหิติ มาลภารี อหญฺจ นํ มาลินิ อชฺฌุเปสฺสํ ฯ อหญฺจ สาลสฺส สุปุปฺผิตสฺส โอเจยฺย ปุปฺผานิ กโรมิ มาลํ ปิโย จ เม เหหิติ มาลภารี อหญฺจ นํ มาลินิ อชฺฌุเปสฺสํ ฯ อหญฺจ สาลสฺส สุปุปฺผิตสฺส โอเจยฺย ปุปฺผานิ กโรมิ ภารํ อิทญฺจ โน เหหิติ สนฺถรตฺถํ ยตฺถชฺชิมํ ^๓- วิหริสฺสาม ^๔- รตฺตึ ฯ อหญฺจ โข อคฺคลุ ^๕- จนฺทนญฺจ สิลาย ปึสามิ ปมตฺตรูปา ปิโย จ เม เหหิติ โรสิตงฺโค @เชิงอรรถ: ^๑ ม. มาลินี ฯ เอวมุปริปิ ฯ ^๒ ม. ปาฏลิสินฺธุวารกา ฯ ^๓ สี. ยุ. ยถชฺชมํ ฯ @^๔ ยุ. วิหริสฺสามุ ฯ ^๕ ม. อคฬุํ ฯ ยุ. อกลุํ ฯ

--------------------------------------------------------------------------------------------- หน้าที่ ๔๔๑.

อหญฺจ นํ โรสิตา อชฺฌุเปสฺสํ อถาคมา สลิลํ สีฆโสตํ นุทํ สาเล สลเล กณฺณิกาเร อาปูรเถ ^๑- เตน มุหุตฺตเกน สายํ นที อาสิ มยา สุทุตฺตรา ฯ อุโภสุ ตีเรสุ มยํ ตทา ฐิตา สมฺปสฺสนฺตา อุภโย อญฺญมญฺญํ สกึปิ โรทาม สกึ หสาม กิจฺเฉน โน อคมา สมฺพรี สา ฯ ปาโต จ โข อุคฺคเต สุริยมฺหิ จตุกฺกํ นทึ อุตฺตริยาน ลุทฺท อาลิงฺคิยา อญฺญมญฺญํ มยํ อุโภ สกึปิ โรทาม สกึ หสาม ฯ ตีหูนกํ สตฺต สตานิ ลุทฺท ยมิธ มยํ วิปฺปวสิมฺห ปุพฺเพ วสฺเสกิมํ ^๒- ชีวิตํ ภูมิปาล โกนีธ กนฺตาย วินา วเสยฺย ฯ [๒๑๕๙] อายุญฺจ โว กีวตโก นุ สมฺม สเจปิ ชานาถ วเทถ อายุํ อนุสฺสวา วุฑฺฒโต อาคมา วา @เชิงอรรถ: ^๑ ม. อาปูรถ ฯ ^๒ สี. ยุ. วาเสกิมํ ฯ

--------------------------------------------------------------------------------------------- หน้าที่ ๔๔๒.

อกฺขาถ เม ตํ อวิกมฺปมานา ฯ [๒๑๖๐] อายุญฺจ โน วสฺสสหสฺส ^๑- ลุทฺท น จนฺตรา ปาปโก อตฺถิ โรโค อปฺปํว ทุกฺขํ สุขเมว ภิยฺโย อวีตราคา วิชหาม ชีวิตํ ฯ [๒๑๖๑] อิทญฺจ สุตฺวาน อมานุสานํ ภลฺลาติโย อิตฺตรํ ชีวิตนฺติ นิวตฺตถ น มิควํ อจริ อทาสิ ทานานิ อภุญฺชิ โภเค ฯ [๒๑๖๒] อิทญฺจ สุตฺวาน อมานุสานํ สมฺโมทถ มา กลหํ อกตฺถ มา โว ตปฺปิ ^๒- อตฺตกมฺมาปราโธ ยถาปิ เต กึปุริเสกรตฺตํ ฯ อิทญฺจ สุตฺวาน อมานุสานํ สมฺโมทถ มา วิวาทํ อกตฺถ มา โว ตปฺปิ ^๓- อตฺตกมฺมาปราโธ ยถาปิ เต กึปุริเสกรตฺตํ ฯ [๒๑๖๓] วิวิธ ^๔- อธิมนา สุโณมหํ วจนปถํ วต อตฺถสญฺหิตํ มุญฺจํ ^๕- คิรํ นุทเสว เม ทรํ @เชิงอรรถ: ^๑ ม. วสฺสสหสสํ ฯ ^๒-๓ ม. ตปี ฯ ^๔ ม. วิวิธํ ฯ ^๕ สี. ยุ. มุญฺจ ฯ

--------------------------------------------------------------------------------------------- หน้าที่ ๔๔๓.

สมณ สุขาวห ชีว เม จิรนฺติ ฯ ภลฺลาติยชาตกํ อฏฺฐมํ ฯ ---------

เนื้อความพระไตรปิฎกฉบับภาษาบาลี อักษรไทย เล่มที่ ๒๗ หน้าที่ ๔๓๘-๔๔๓. https://84000.org/tipitaka/read/pali_read.php?B=27&A=9001&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=27&A=9001&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=27&item=2153&items=11 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=27&siri=504 ศึกษาอรรถกถาชาดกนี้ได้ที่ :- https://84000.org/tipitaka/attha/attha.php?b=27&i=2153 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=41&A=1769 The Pali Atthakatha in Roman :- https://84000.org/tipitaka/atthapali/read_rm.php?B=41&A=1769 สารบัญพระไตรปิฎกเล่มที่ ๒๗ https://84000.org/tipitaka/read/?index_27 https://84000.org/tipitaka/english/?index_27