ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓ ภาษาบาลี อักษรไทย พระวินัยปิฎกเล่มที่ ๓ วินย. ภิกฺขุนีวิภงฺโค

                               ทสมสงฺฆาทิเสสํ
     [๘๕]   เตน  สมเยน  พุทฺโธ  ภควา  สาวตฺถิยํ  วิหรติ  เชตวเน
อนาถปิณฺฑิกสฺส   อาราเม   ฯ   เตน   โข   ปน  สมเยน  ถุลฺลนนฺทา
ภิกฺขุนี   สงฺเฆน   สมนุภฏฺฐา   ภิกฺขุนิโย   เอวํ   วเทติ   สํสฏฺฐา  ว
อยฺเย   ตุเมฺห   วิหรถ   มา   ตุเมฺห   นานา  วิหริตฺถ  สนฺติ  สงฺเฆ
อญฺญาปิ   ภิกฺขุนิโย   เอวาจารา  เอวํสทฺทา  เอวํสิโลกา  ภิกฺขุนีสงฺฆสฺส
@เชิงอรรถ:  ม. ยุ. ขิตฺตจิตฺตานํ เวทนฏฺฏานนฺติ ปาฐทฺวยํ น ทิสฺสติ ฯ
วิเหสิกา    อญฺญมญฺญิสฺสา   วชฺชปฏิจฺฉาทิกา   ตา   สงฺโฆ   น   กิญฺจิ
อาห   ตุเมฺหเยว  สงฺโฆ  อุญฺญาย  ปริภเวน  อกฺขนฺติยา  เวภสฺสา  ๑-
ทุพฺพลฺยา   เอวมาห   ภคินิโย   โข   สํสฏฺฐา   วิหรนฺติ   ปาปาจารา
ปาปสทฺทา    ปาปสิโลกา    ภิกฺขุนีสงฺฆสฺส    วิเหสิกา    อญฺญมญฺญิสฺสา
วชฺชปฏิจฺฉาทิกา วิวิจฺจถยฺเย วิเวกญฺเญว ภคินีนํ สงฺโฆ วณฺเณตีติ ฯ
     {๘๕.๑}   ยา  ตา  ภิกฺขุนิโย  อปฺปิจฺฉา  ฯเปฯ  ตา  อุชฺฌายนฺติ
ขียนฺติ    วิปาเจนฺติ    กถํ   หิ   นาม   อยฺยา   ถุลฺลนนฺทา   [๒]-
สงฺเฆน   สมนุภฏฺฐา   ภิกฺขุนิโย   เอวํ   วกฺขติ   สํสฏฺฐา   ว  อยฺเย
ตุเมฺห   วิหรถ   มา   ตุเมฺห   นานา   วิหริตฺถ   ฯเปฯ  วิวิจฺจถยฺเย
วิเวกญฺเญว   ภคินีนํ   สงฺโฆ   วณฺเณตีติ   ฯเปฯ   สจฺจํ  กิร  ภิกฺขเว
ถุลฺลนนฺทา    ภิกฺขุนี   สงฺเฆน   สมนุภฏฺฐา   ภิกฺขุนิโย   เอวํ   วเทติ
สํสฏฺฐา   ว   อยฺเย   ตุเมฺห   วิหรถ   มา   ตุเมฺห  นานา  วิหริตฺถ
ฯเปฯ    วิวิจฺจถยฺเย    วิเวกญฺเญว   ภคินีนํ   สงฺโฆ   วณฺเณตีติ   ฯ
สจฺจํ   ภควาติ   ฯ   วิครหิ   พุทฺโธ   ภควา  กถํ  หิ  นาม  ภิกฺขเว
ถุลฺลนนฺทา    ภิกฺขุนี   สงฺเฆน   สมนุภฏฺฐา   ภิกฺขุนิโย   เอวํ   วกฺขติ
สํสฏฺฐา   ว   อยฺเย   ตุเมฺห   วิหรถ   มา   ตุเมฺห  นานา  วิหริตฺถ
ฯเปฯ   วิวิจฺจถยฺเย   วิเวกญฺเญว   ภคินีนํ   สงฺโฆ   วณฺเณตีติ   เนตํ
ภิกฺขเว   อปฺปสนฺนานํ   วา   ปสาทาย   ฯเปฯ  เอวญฺจ  ปน  ภิกฺขเว
ภิกฺขุนิโย    อิมํ    สิกฺขาปทํ   อุทฺทิสนฺตุ    ยา   ปน   ภิกฺขุนี   เอวํ
@เชิงอรรถ:  ม. ยุ. เวภสฺสิยา ฯ เอวํ สพฺพตฺถ ญาตพฺพํ ฯ  ม. ภิกฺขุนี ฯ
วเทยฺย   สํสฏฺฐา   ว   อยฺเย   ตุเมฺห   วิหรถ   มา  ตุเมฺห  นานา
วิหริตฺถ   สนฺติ   สงฺเฆ   อญฺญาปิ   ภิกฺขุนิโย   เอวาจารา  เอวํสทฺทา
เอวํสิโลกา   ภิกฺขุนีสงฺฆสฺส   วิเหสิกา   อญฺญมญฺญิสฺสา   วชฺชปฏิจฺฉาทิกา
ตา   สงฺโฆ   น   กิญฺจิ   อาห  ตุเมฺหเยว  สงฺโฆ  อุญฺญาย  ปริภเวน
อกฺขนฺติยา   เวภสฺสา   ๑-  ทุพฺพลฺยา  เอวมาห  ภคินิโย  โข  สํสฏฺฐา
วิหรนฺติ   ปาปาจารา   ปาปสทฺทา  ปาปสิโลกา  ภิกฺขุนีสงฺฆสฺส  วิเหสิกา
อญฺญมญฺญิสฺสา       วชฺชปฏิจฺฉาทิกา      วิวิจฺจถยฺเย      วิเวกญฺเญว
ภคินีนํ สงฺโฆ วณฺเณตีติ ฯ
     {๘๕.๒}   สา  ภิกฺขุนี  ภิกฺขุนีหิ  เอวมสฺส  วจนียา  มายฺเย  เอวํ
อวจ   สํสฏฺฐา  ว  อยฺเย  ตุเมฺห  วิหรถ  มา  ตุเมฺห  นานา  วิหริตฺถ
สนฺติ   สงฺเฆ   อญฺญาปิ  ภิกฺขุนิโย  เอวาจารา  เอวํสทฺทา  เอวํสิโลกา
ภิกฺขุนีสงฺฆสฺส       วิเหสิกา       อญฺญมญฺญิสฺสา      วชฺชปฏิจฺฉาทิกา
ตา   สงฺโฆ   น   กิญฺจิ   อาห  ตุเมฺหเยว  สงฺโฆ  อุญฺญาย  ปริภเวน
อกฺขนฺติยา   เวภสฺสา   ทุพฺพลฺยา   เอวมาห   ภคินิโย   โข   สํสฏฺฐา
วิหรนฺติ     ปาปาจารา     ปาปสทฺทา    ปาปสิโลกา    ภิกฺขุนีสงฺฆสฺส
วิเหสิกา    อญฺญมญฺญิสฺสา   วชฺชปฏิจฺฉาทิกา   วิวิจฺจถยฺเย   วิเวกญฺเญว
ภคินีนํ    สงฺโฆ    วณฺเณตีติ    ฯ   เอวญฺจ   สา   ภิกฺขุนี   ภิกฺขุนีหิ
วุจฺจมานา    ตเถว   ปคฺคเณฺหยฺย   สา   ภิกฺขุนี   ภิกฺขุนีหิ   ยาวตติยํ
สมนุภาสิตพฺพา   ตสฺส   ปฏินิสฺสคฺคาย  ฯ  ยาวตติยญฺเจ  สมนุภาสิยมานา
ตํ   ปฏินิสฺสชฺเชยฺย   อิจฺเจตํ   กุสลํ   โน  เจ  ปฏินิสฺสชฺเชยฺย  อยมฺปิ
ภิกฺขุนี ยาวตติยกํ ธมฺมํ อาปนฺนา นิสฺสารณียํ สงฺฆาทิเสสนฺติ ฯ
@เชิงอรรถ:  ม. ยุ. เวภสฺสิยา ฯ เอวํ สพฺพตฺถ ญาตพฺพํ ฯ
     [๘๖]   ยา   ปนาติ  ยา  ยาทิสา  ฯเปฯ  ภิกฺขุนีติ  ฯเปฯ  อยํ
อิมสฺมึ   อตฺเถ   อธิปฺเปตา  ภิกฺขุนีติ  ฯ  เอวํ  วเทยฺยาติ  สํสฏฺฐา  ว
อยฺเย   ตุเมฺห   วิหรถ   มา   ตุเมฺห   นานา  วิหริตฺถ  สนฺติ  สงฺเฆ
อญฺญาปิ   ภิกฺขุนิโย   เอวาจารา  เอวํสทฺทา  เอวํสิโลกา  ภิกฺขุนีสงฺฆสฺส
วิเหสิกา    อญฺญมญฺญิสฺสา   วชฺชปฏิจฺฉาทิกา   ตา   สงฺโฆ   น   กิญฺจิ
อาห    ตุเมฺหเยว   สงฺโฆ   อุญฺญายาติ   อวญฺญาย   ฯ   ปริภเวนาติ
ปริภพฺยตา  ๑-  ฯ  อกฺขนฺติยาติ  โกเปน  ฯ  เวภสฺสาติ  วิภสฺสีกตา  ฯ
ทุพฺพลฺยาติ   อปกฺขตา   ฯ   เอวมาห   ภคินิโย  โข  สํสฏฺฐา  วิหรนฺติ
ปาปาจารา     ปาปสทฺทา    ปาปสิโลกา    ภิกฺขุนีสงฺฆสฺส    วิเหสิกา
อญฺญมญฺญิสฺสา    วชฺชปฏิจฺฉาทิกา    วิวิจฺจถยฺเย    วิเวกญฺเญว   ภคินีนํ
สงฺโฆ   วณฺเณตีติ   ฯ   สา  ภิกฺขุนีติ  ยา  สา  เอวํวาทินี  ภิกฺขุนี  ฯ
ภิกฺขุนีหีติ   อญฺญาหิ   ภิกฺขุนีหิ   ฯ   ยา   ปสฺสนฺติ   ยา  สุณนฺติ  ตาหิ
วตฺตพฺพา   มายฺเย   เอวํ   อวจ   สํสฏฺฐา  ว  อยฺเย  ตุเมฺห  วิหรถ
มา    ตุเมฺห    นานา   วิหริตฺถ   ฯเปฯ   วิวิจฺจถยฺเย   วิเวกญฺเญว
ภคินีนํ   สงฺโฆ  วณฺเณตีติ  ฯ  ทุติยมฺปิ  วตฺตพฺพา  ตติยมฺปิ  วตฺตพฺพา  ฯ
สเจ   ปฏินิสฺสชฺชติ   อิจฺเจตํ   กุสลํ   โน   เจ  ปฏินิสฺสชฺชติ  อาปตฺติ
ทุกฺกฏสฺส    ฯ   สุตฺวา   น   วทนฺติ   อาปตฺติ   ทุกฺกฏสฺส   ฯ   สา
ภิกฺขุนี    สงฺฆมชฺฌํปิ   อากฑฺฒิตฺวา   วตฺตพฺพา   มายฺเย   เอวํ   อวจ
สํสฏฺฐา   ว   อยฺเย   ตุเมฺห   วิหรถ   มา   ตุเมฺห  นานา  วิหริตฺถ
ฯเปฯ    วิวิจฺจถยฺเย    วิเวกญฺเญว   ภคินีนํ   สงฺโฆ   วณฺเณตีติ   ฯ
@เชิงอรรถ:  ม. ยุ. ปาริภพฺยตา ฯ
ทุติยมฺปิ    วตฺตพฺพา    ตติยมฺปิ    วตฺตพฺพา   ฯ   สเจ   ปฏินิสฺสชฺชติ
อิจฺเจตํ กุสลํ โน เจ ปฏินิสฺสชฺชติ อาปตฺติ ทุกฺกฏสฺส ฯ
     [๘๗]   สา   ภิกฺขุนี   สมนุภาสิตพฺพา  ฯ  เอวญฺจ  ปน  ภิกฺขเว
สมนุภาสิตพฺพา พฺยตฺตาย ภิกฺขุนิยา ปฏิพลาย สงฺโฆ ญาเปตพฺโพ
     {๘๗.๑}   สุณาตุ  เม  อยฺเย สงฺโฆ อยํ อิตฺถนฺนามา ภิกฺขุนี สงฺเฆน
สมนุภฏฺฐา  ภิกฺขุนิโย  เอวํ  วเทติ  สํสฏฺฐา  ว  อยฺเย ตุเมฺห วิหรถ มา
ตุเมฺห   นานา   วิหริตฺถ  สนฺติ  สงฺเฆ  อญฺญาปิ  ภิกฺขุนิโย  เอวาจารา
เอวํสทฺทา    เอวํสิโลกา    ภิกฺขุนีสงฺฆสฺส    วิเหสิกา    อญฺญมญฺญิสฺสา
วชฺชปฏิจฺฉาทิกา   ตา   สงฺโฆ   น   กิญฺจิ   อาห   ตุเมฺหเยว  สงฺโฆ
อุญฺญาย   ปริภเวน   อกฺขนฺติยา  เวภสฺสา  ทุพฺพลฺยา  เอวมาห  ภคินิโย
โข    สํสฏฺฐา   วิหรนฺติ   ฯเปฯ   วิวิจฺจถยฺเย   วิเวกญฺเญว   ภคินีนํ
สงฺโฆ   วณฺเณตีติ   ฯ  สา  ตํ  วตฺถุํ  นปฺปฏินิสฺสชฺชติ  ฯ  ยทิ  สงฺฆสฺส
ปตฺตกลฺลํ   สงฺโฆ   อิตฺถนฺนามํ   ภิกฺขุนึ   สมนุภาเสยฺย   ตสฺส  วตฺถุสฺส
ปฏินิสฺสคฺคาย ฯ เอสา ญตฺติ ฯ
     {๘๗.๒}   สุณาตุ   เม  อยฺเย  สงฺโฆ  อยํ  อิตฺถนฺนามา  ภิกฺขุนี
สงฺเฆน   สมนุภฏฺฐา   ภิกฺขุนิโย   เอวํ   วเทติ   สํสฏฺฐา   ว  อยฺเย
ตุเมฺห   วิหรถ   มา   ตุเมฺห   นานา  วิหริตฺถ  สนฺติ  สงฺเฆ  อญฺญาปิ
ภิกฺขุนิโย     เอวาจารา    เอวํสทฺทา    เอวํสิโลกา    ภิกฺขุนีสงฺฆสฺส
วิเหสิกา      อญฺญมญฺญิสฺสา      วชฺชปฏิจฺฉาทิกา      ตา     สงฺโฆ
น   กิญฺจิ   อาห   ตุเมฺหเยว   สงฺโฆ   อุญฺญาย  ปริภเวน  อกฺขนฺติยา
เวภสฺสา    ทุพฺพลฺยา    เอวมาห   ภคินิโย   โข   สํสฏฺฐา   วิหรนฺติ
ปาปาจารา     ปาปสทฺทา    ปาปสิโลกา    ภิกฺขุนีสงฺฆสฺส    วิเหสิกา
อญฺญมญฺญิสฺสา       วชฺชปฏิจฺฉาทิกา      วิวิจฺจถยฺเย      วิเวกญฺเญว
ภคินีนํ   สงฺโฆ  วณฺเณตีติ  ฯ  สา  ตํ  วตฺถุํ  นปฺปฏินิสฺสชฺชติ  ฯ  สงฺโฆ
อิตฺถนฺนามํ   ภิกฺขุนึ  สมนุภาสติ  ตสฺส  วตฺถุสฺส  ปฏินิสฺสคฺคาย  ฯ  ยสฺสา
อยฺยาย   ขมติ   อิตฺถนฺนามาย   ภิกฺขุนิยา   สมนุภาสนา  ตสฺส  วตฺถุสฺส
ปฏินิสฺสคฺคาย สา ตุณฺหสฺส ยสฺสา นกฺขมติ สา ภาเสยฺย ฯ
     {๘๗.๓}   ทุติยมฺปิ   เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ   ฯเปฯ  สมนุภฏฺฐา  สงฺเฆน  อิตฺถนฺนามา  ภิกฺขุนี  ตสฺส  วตฺถุสฺส
ปฏินิสฺสคฺคาย ฯ ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     [๘๘]   ญตฺติยา    ทุกฺกฏํ    ทฺวีหิ    กมฺมวาจาหิ   ถุลฺลจฺจยา
กมฺมวาจาปริโยสาเน    อาปตฺติ    สงฺฆาทิเสสสฺส    ฯ    สงฺฆาทิเสสํ
อชฺฌาปชฺชนฺติยา    ญตฺติยา    ทุกฺกฏํ   ทฺวีหิ   กมฺมวาจาหิ   ถุลฺลจฺจยา
ปฏิปฺปสฺสมฺภนฺติ ฯ
     [๘๙]   อยมฺปีติ   ปุริมาโย   อุปาทาย  วุจฺจติ  ฯ  ยาวตติยกนฺติ
ยาวตติยํ    สมนุภาสนาย    อาปชฺชติ   น   สห   วตฺถุชฺฌาจารา   ฯ
นิสฺสารณียนฺติ  สงฺฆมฺหา  นิสฺสาริยติ  ฯ  สงฺฆาทิเสโสติ  สงฺโฆ  ว ตสฺสา
อาปตฺติยา   มานตฺตํ   เทติ   มูลาย   ปฏิกสฺสติ  อพฺเภติ  น  สมฺพหุลา
น  เอกา  ภิกฺขุนี  เตน  วุจฺจติ สงฺฆาทิเสโสติ ฯ ตสฺเสว อาปตฺตินิกายสฺส
นาม กมฺมํ อธิวจนํ เตนปิ วุจฺจติ สงฺฆาทิเสโสติ ฯ
     [๙๐]   ธมฺมกมฺเม    ธมฺมกมฺมสญฺญา   นปฺปฏินิสฺสชฺชติ   อาปตฺติ
สงฺฆาทิเสสสฺส    ฯ   ธมฺมกมฺเม   เวมติกา   นปฺปฏินิสฺสชฺชติ   อาปตฺติ
สงฺฆาทิเสสสฺส    ฯ    ธมฺมกมฺเม    อธมฺมกมฺมสญฺญา    นปฺปฏินิสฺสชฺชติ
อาปตฺติ    สงฺฆาทิเสสสฺส   ฯ   อธมฺมกมฺเม   ธมฺมกมฺมสญฺญา   อาปตฺติ
ทุกฺกฏสฺส    ฯ    อธมฺมกมฺเม    เวมติกา    อาปตฺติ   ทุกฺกฏสฺส   ฯ
อธมฺมกมฺเม อธมฺมกมฺมสญฺญา อาปตฺติ ทุกฺกฏสฺส ฯ
     [๙๑]   อนาปตฺติ   อสมนุภาสนฺติยา  ปฏินิสฺสชฺชนฺติยา  อุมฺมตฺติกาย
อาทิกมฺมิกายาติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓ หน้าที่ ๕๗-๖๓. https://84000.org/tipitaka/read/pali_read.php?B=3&A=1122&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=3&A=1122&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=3&item=85&items=7              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=3&siri=14              ศึกษาอรรถกถานี้ได้ที่ :- https://84000.org/tipitaka/attha/attha.php?b=3&i=85              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=2&A=11104              The Pali Atthakatha in Roman :- https://84000.org/tipitaka/atthapali/read_rm.php?B=2&A=11104              สารบัญพระไตรปิฎกเล่มที่ ๓ https://84000.org/tipitaka/read/?index_3 https://84000.org/tipitaka/english/?index_3

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]