ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓ ภาษาบาลี อักษรไทย พระวินัยปิฎกเล่มที่ ๓ วินย. ภิกฺขุนีวิภงฺโค

                                  ตติยปาราชิกํ
     [๑๘]   เตน  สมเยน  พุทฺโธ  ภควา  สาวตฺถิยํ  วิหรติ  เชตวเน
อนาถปิณฺฑิกสฺส  อาราเม  ฯ  เตน  โข  ปน  สมเยน  ถุลฺลนนฺทา ภิกฺขุนี
สมคฺเคน  สงฺเฆน  อุกฺขิตฺตํ  อริฏฺฐํ  ภิกฺขุํ  คนฺธพาธิปุพฺพํ  ๑- อนุวตฺตติ ฯ
ยา    ตา   ภิกฺขุนิโย   อปฺปิจฺฉา   ฯเปฯ   ตา   อุชฺฌายนฺติ   ขียนฺติ
วิปาเจนฺติ   กถํ   หิ   นาม   อยฺยา   ถุลฺลนนฺทา   สมคฺเคน  สงฺเฆน
อุกฺขิตฺตํ     อริฏฺฐํ    ภิกฺขุํ    คนฺธพาธิปุพฺพํ    อนุวตฺติสฺสตีติ    ฯเปฯ
สจฺจํ   กิร   ภิกฺขเว   ถุลฺลนนฺทา   ภิกฺขุนี  สมคฺเคน  สงฺเฆน  อุกฺขิตฺตํ
อริฏฺฐํ   คนฺธพาธิปุพฺพํ   อนุวตฺตตีติ   ฯ   สจฺจํ   ภควาติ   ฯ   วิครหิ
พุทฺโธ   ภควา   กถํ   หิ  นาม  ภิกฺขเว  ถุลฺลนนฺทา  ภิกฺขุนี  สมคฺเคน
สงฺเฆน   อุกฺขิตฺตํ   อริฏฺฐํ   คนฺธพาธิปุพฺพํ   อนุวตฺติสฺสติ  เนตํ  ภิกฺขเว
อปฺปสนฺนานํ   วา   ปสาทาย   ฯเปฯ  เอวญฺจ  ปน  ภิกฺขเว  ภิกฺขุนิโย
อิมํ สิกฺขาปทํ อุทฺทิสนฺตุ
     {๑๘.๑}   ยา  ปน  ภิกฺขุนี  สมคฺเคน สงฺเฆน อุกฺขิตฺตํ ภิกฺขุํ ธมฺเมน
วินเยน   สตฺถุสาสเนน   อนาทรํ   อปฺปฏิการํ  อกตสหายํ  ตมนุวตฺเตยฺย
สา  ภิกฺขุนี  ภิกฺขุนีหิ  เอวมสฺส  วจนียา  เอโส โข อยฺเย ภิกฺขุ สมคฺเคน
สงฺเฆน  อุกฺขิตฺโต  ธมฺเมน  วินเยน  สตฺถุสาสเนน  อนาทโร อปฺปฏิกาโร
อกตสหาโย   มายฺเย   เอตํ   ภิกฺขุํ   อนุวตฺตีติ   เอวญฺจ  สา  ภิกฺขุนี
ภิกฺขุนีหิ    วุจฺจมานา    ตเถว   ปคฺคเณฺหยฺย   สา   ภิกฺขุนี   ภิกฺขุนีหิ
@เชิงอรรถ:  ม. ยุ. คทฺธพาธิปุพฺพํ ฯ สพฺพตฺถ เอวํ ญาตพฺพํ ฯ
ยาวตติยํ     สมนุภาสิตพฺพา     ตสฺส    ปฏินิสฺสคฺคาย    ยาวตติยญฺเจ
สมนุภาสิยมานา    ตํ    ปฏินิสฺสชฺเชยฺย    อิจฺเจตํ   กุสลํ   โน   เจ
ปฏินิสฺสชฺเชยฺย อยมฺปิ ปาราชิกา โหติ อสํวาสา อุกฺขิตฺตานุวตฺติกาติ ฯ
     [๑๙]   ยา  ปนาติ  ยา ยาทิสา ฯเปฯ อยํ อิมสฺมึ อตฺเถ อธิปฺเปตา
ภิกฺขุนีติ    ฯ   สมคฺโค   นาม   สงฺโฆ   สมานสํวาสโก   สมานสีมายํ
ฐิโต  ฯ  อุกฺขิตฺโต  นาม  อาปตฺติยา  อทสฺสเน  ๑- วา อปฺปฏิกมฺเม ๒-
วา   อปฺปฏินิสฺสคฺเค  ๓-  วา  อุกฺขิตฺโต  ฯ  ธมฺเมน  วินเยนาติ  เยน
ธมฺเมน  เยน  วินเยน  ฯ  สตฺถุสาสเนนาติ  ชินสาสเนน พุทฺธสาสเนน ฯ
อนาทโร  นาม  สงฺฆํ  วา  [๔]-  ปุคฺคลํ  วา  กมฺมํ  วา  นาทิยติ  ฯ
อปฺปฏิกาโร   นาม   อุกฺขิตฺโต   อโนสาริโต   ฯ   อกตสหาโย   นาม
สมานสํวาสกา   ภิกฺขู   วุจฺจนฺติ   สหายา   โส   เตหิ   สทฺธึ   นตฺถิ
เตน   วุจฺจติ   อกตสหาโยติ   ฯ  ตมนุวตฺเตยฺยาติ  ยํทิฏฺฐิโก  โส  ๕-
โหติ ยํขนฺติโก ยํรุจิโก สาปิ ตํทิฏฺฐิกา โหติ ตํขนฺติกา ตํรุจิกา ฯ
     [๒๐]   สา  ภิกฺขุนีติ  ยา  สา อุกฺขิตฺตานุวตฺติกา ภิกฺขุนี ฯ ภิกฺขุนีหีติ
อญฺญาหิ   ภิกฺขุนีหิ   ฯ   ยา   ปสฺสนฺติ   ยา   สุณนฺติ  ตาหิ  วตฺตพฺพา
เอโส  โข  อยฺเย  ภิกฺขุ  สมคฺเคน  สงฺเฆน  อุกฺขิตฺโต  ธมฺเมน วินเยน
สตฺถุสาสเนน    อนาทโร   อปฺปฏิกาโร   อกตสหาโย   มายฺเย   เอตํ
@เชิงอรรถ: ๑-๒-๓ มรมฺมยุโรปิยโปตฺถเกสุ อิเม ปาฐา ตติยาวิภตฺติวเสน กตา ฯ
@ ม. ยุ. คณํ วา ฯ  โส ยํทิฏฺฐิโกติ เอวํ กมฺเมน ภวิตพฺพํ ฯ
ภิกฺขุํ   อนุวตฺตีติ   ฯ   ทุติยมฺปิ  วตฺตพฺพา  ตติยมฺปิ  วตฺตพฺพา  ฯ  สเจ
ปฏินิสฺสชฺชติ    อิจฺเจตํ    กุสลํ    โน    เจ   ปฏินิสฺสชฺชติ   อาปตฺติ
ทุกฺกฏสฺส   ฯ   สุตฺวา   น  วทนฺติ  อาปตฺติ  ทุกฺกฏสฺส  ฯ  สา  ภิกฺขุนี
สงฺฆมชฺฌํปิ    อากฑฺฒิตฺวา    วตฺตพฺพา    เอโส   โข   อยฺเย   ภิกฺขุ
สมคฺเคน   สงฺเฆน  อุกฺขิตฺโต  ธมฺเมน  วินเยน  สตฺถุสาสเนน  อนาทโร
อปฺปฏิกาโร   อกตสหาโย   มายฺเย  เอตํ  ภิกฺขุํ  อนุวตฺตีติ  ฯ  ทุติยมฺปิ
วตฺตพฺพา   ตติยมฺปิ   วตฺตพฺพา   ฯ   สเจ  ปฏินิสฺสชฺชติ  อิจฺเจตํ  กุสลํ
โน เจ ปฏินิสฺสชฺชติ อาปตฺติ ทุกฺกฏสฺส ฯ
     [๒๑]   สา   ภิกฺขุนี   สมนุภาสิตพฺพา  ฯ  เอวญฺจ  ปน  ภิกฺขเว
สมนุภาสิตพฺพา ฯ พฺยตฺตาย ภิกฺขุนิยา ปฏิพลาย สงฺโฆ ญาเปตพฺโพ
     {๒๑.๑}   สุณาตุ เม อยฺเย สงฺโฆ อยํ อิตฺถนฺนามา ภิกฺขุนี สมคฺเคน สงฺเฆน
อุกฺขิตฺตํ   ภิกฺขุํ   ธมฺเมน   วินเยน   สตฺถุสาสเนน  อนาทรํ  อปฺปฏิการํ
อกตสหายํ   ตมนุวตฺตติ  สา  ตํ  วตฺถุํ  นปฺปฏินิสฺสชฺชติ  ฯ  ยทิ  สงฺฆสฺส
ปตฺตกสฺลํ   สงฺโฆ   อิตฺถนฺนามํ   ภิกฺขุนึ   สมนุภาเสยฺย   ตสฺส  วตฺถุสฺส
ปฏินิสฺสคฺคาย ฯ เอสา ญตฺติ ฯ
     {๒๑.๒}   สุณาตุ   เม  อยฺเย  สงฺโฆ  อยํ  อิตฺถนฺนามา  ภิกฺขุนี
สมคฺเคน   สงฺเฆน   อุกฺขิตฺตํ   ภิกฺขุํ   ธมฺเมน   วินเยน  สตฺถุสาสเนน
อนาทรํ  อปฺปฏิการํ  อกตสหายํ  ตมนุวตฺตติ  สา ตํ วตฺถุํ นปฺปฏินิสฺสชฺชติ ฯ
สงฺโฆ     อิตฺถนฺนามํ     ภิกฺขุนึ     สมนุภาสติ     ตสฺส     วตฺถุสฺส
ปฏินิสฺสคฺคาย   ฯ    ยสฺสา   อยฺยาย   ขมติ   อิตฺถนฺนามาย  ภิกฺขุนิยา
สมนุภาสนา     ตสฺส     วตฺถุสฺส     ปฏินิสฺสคฺคาย    สา    ตุณฺหสฺส
ยสฺสา นกฺขมติ สา ภาเสยฺย ฯ
     {๒๑.๓}   ทุติยมฺปิ   เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ    ฯเปฯ    สมนุภฏฺฐา   สงฺเฆน   อิตฺถนฺนามา   ภิกฺขุนี   ตสฺส
วตฺถุสฺส   ปฏินิสฺสคฺคาย   ฯ  ขมติ  สงฺฆสฺส  ตสฺมา  ตุณฺหี  ฯ  เอวเมตํ
ธารยามีติ ฯ
     [๒๒]    ญตฺติยา    ทุกฺกฏํ    ทฺวีหิ    กมฺมวาจาหิ   ถุลฺลจฺจยา
กมฺมวาจาปริโยสาเน อาปตฺติ ปาราชิกสฺส ฯ
     [๒๓]   อยมฺปีติ  ปุริมาโย  อุปาทาย  วุจฺจติ  ฯ  ปาราชิกา โหตีติ
เสยฺยถาปิ    นาม   ปุถุสิลา   เทฺวธา   ภินฺนา   อปฺปฏิสนฺธิกา   โหติ
เอวเมว     ภิกฺขุนี    ยาวตติยํ    สมนุภาสิยมานา    อปฺปฏินิสฺสชฺชนฺตี
อสฺสมณี   โหติ   อสกฺยธีตา   เตน   วุจฺจติ   ปาราชิกา   โหตีติ   ฯ
อสํวาสาติ   สํวาโส   นาม  เอกกมฺมํ  เอกุทฺเทโส  สมสิกฺขาตา  เอโส
สํวาโส นาม โส ตาย สทฺธึ นตฺถิ เตน วุจฺจติ อสํวาสาติ ฯ
     [๒๔]   ธมฺมกมฺเม    ธมฺมกมฺมสญฺญา   นปฺปฏินิสฺสชฺชติ   อาปตฺติ
ปาราชิกสฺส    ฯ    ธมฺมกมฺเม    เวมติกา   นปฺปฏินิสฺสชฺชติ   อาปตฺติ
ปาราชิกสฺส     ฯ     ธมฺมกมฺเม    อธมฺมกมฺมสญฺญา    นปฺปฏินิสฺสชฺชติ
อาปตฺติ    ปาราชิกสฺส    ฯ    อธมฺมกมฺเม   ธมฺมกมฺมสญฺญา   อาปตฺติ
ทุกฺกฏสฺส  ฯ  อธมฺมกมฺเม  เวมติกา  อาปตฺติ  ทุกฺกฏสฺส  ฯ  อธมฺมกมฺเม
อธมฺมกมฺมสญฺญา อาปตฺติ ทุกฺกฏสฺส ฯ
     [๒๕]   อนาปตฺติ   อสมนุภาสนฺติยา  ปฏินิสฺสชฺชนฺติยา  อุมฺมตฺติกาย
อาทิกมฺมิกายาติ ฯ
                            ตติยปาราชิกํ นิฏฺฐิตํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓ หน้าที่ ๑๕-๑๘. https://84000.org/tipitaka/read/pali_read.php?B=3&A=258&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=3&A=258&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=3&item=18&items=8              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=3&siri=3              ศึกษาอรรถกถานี้ได้ที่ :- https://84000.org/tipitaka/attha/attha.php?b=3&i=18              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=2&A=10789              The Pali Atthakatha in Roman :- https://84000.org/tipitaka/atthapali/read_rm.php?B=2&A=10789              สารบัญพระไตรปิฎกเล่มที่ ๓ https://84000.org/tipitaka/read/?index_3 https://84000.org/tipitaka/english/?index_3

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]