ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๑ ภาษาบาลี อักษรไทย พระสุตตันตปิฎกเล่มที่ ๒๓ สุตฺต. ขุ. ปฏิสมฺภิทามคฺโค

                                         ยุคนทฺธวคฺเค สจฺจกถา
                                           ปริปุณฺณกถานิทานํ ๙-
     [๕๔๔]   จตฺตารีมานิ   ภิกฺขเว   ตถานิ   อวิตถานิ   อนญฺญถานิ
กตมานิ    จตฺตาริ    อิทํ    ทุกฺขนฺติ   ภิกฺขเว   ตถเมตํ   อวิตถเมตํ
@เชิงอรรถ:  ม. ยุ. กมฺปติ ฯ  ยุ. สมฺโมหํ ฯ  ม. ยุ. วิกฺขิปติ ฯ  ยุ. วิกฺขิปเต ฯ
@ ยุ. ภาวนา ฯ  ยุ. จิตฺตสงฺเขปวิกฺเขปํ ฯ ม. จิตฺตสฺส สงฺเขปวิกฺเขปํ ฯ
@ ยุ. อวิกฺเขปํ ฯ  ยุ. ปชานาตีติ ฯ  ม. ปุริมนิทานํ ฯ
อนญฺญถเมตํ    อยํ   ทุกฺขสมุทโยติ   ตถเมตํ   อวิตถเมตํ   อนญฺญถเมตํ
อยํ     ทุกฺขนิโรโธติ     ตถเมตํ    อวิตถเมตํ    อนญฺญถเมตํ    อยํ
ทุกฺขนิโรธคามินี     ปฏิปทาติ     ตถเมตํ    อวิตถเมตํ    อนญฺญถเมตํ
อิมานิ โข ภิกฺขเว จตฺตาริ ตถานิ อวิตถานิ อนญฺญถานิ ฯ
     [๕๔๕]   กถํ   ทุกฺขํ   ตถฏฺเฐน   สจฺจํ   ฯ  จตฺตาโร  ทุกฺขสฺส
ทุกฺขฏฺฐา   ตถา   อวิตถา   อนญฺญถา   ทุกฺขสฺส   ปีฬนฏฺโฐ  สงฺขตฏฺโฐ
สนฺตาปฏฺโฐ    วิปริณามฏฺโฐ    อิเม    จตฺตาโร   ทุกฺขสฺส   ทุกฺขฏฺฐา
ตถา อวิตถา อนญฺญถา เอวํ ทุกฺขํ ตถฏฺเฐน สจฺจํ ฯ
     {๕๔๕.๑}   กถํ  สมุทโย  ตถฏฺเฐน  สจฺจํ  ฯ  จตฺตาโร  สมุทยสฺส
สมุทยฏฺฐา  ตถา  อวิตถา  อนญฺญถา  สมุทยสฺส  อายุหนฏฺโฐ  นิทานฏฺโฐ
สงฺโยคฏฺโฐ   ปลิโพธฏฺโฐ   อิเม  จตฺตาโร  สมุทยสฺส  สมุทยฏฺฐา  ตถา
อวิตถา อนญฺญถา เอวํ สมุทโย ตถฏฺเฐน สจฺจํ ฯ
     {๕๔๕.๒}   กถํ  นิโรโธ  ตถฏฺเฐน  สจฺจํ  ฯ  จตฺตาโร  นิโรธสฺส
นิโรธฏฺฐา   ตถา  อวิตถา  อนญฺญถา  นิโรธสฺส  นิสฺสรณฏฺโฐ  วิเวกฏฺโฐ
อสงฺขตฏฺโฐ   อมตฏฺโฐ   อิเม   จตฺตาโร   นิโรธสฺส  นิโรธฏฺฐา  ตถา
อวิตถา อนญฺญถา เอวํ นิโรโธ ตถฏฺเฐน สจฺจํ ฯ
     {๕๔๕.๓}   กถํ   มคฺโค  ตถฏฺเฐน  สจฺจํ  ฯ  จตฺตาโร  มคฺคสฺส
มคฺคฏฺฐา   ตถา   อวิตถา   อนญฺญถา   มคฺคสฺส  นิยฺยานฏฺโฐ  เหตฏฺโฐ
ทสฺสนฏฺโฐ    อาธิปเตยฺยฏฺโฐ    อิเม   จตฺตาโร   มคฺคสฺส   มคฺคฏฺฐา
ตถา อวิตถา อนญฺญถา เอวํ มคฺโค ตถฏฺเฐน สจฺจํ ฯ
     [๕๔๖]   กติหากาเรหิ   จตฺตาริ   สจฺจานิ   เอกปฏิเวธานิ   ฯ
จตูหากาเรหิ   จตฺตาริ   สจฺจานิ  เอกปฏิเวธานิ  ตถฏฺเฐน  อนตฺตฏฺเฐน
สจฺจฏฺเฐน    ปฏิเวธฏฺเฐน   อิเมหิ   จตูหากาเรหิ   จตฺตาริ   สจฺจานิ
เอกสงฺคหิตานิ    ยํ    เอกสงฺคหิตํ   ตํ   เอกตฺตํ   เอกตฺตํ   เอเกน
ญาเณน ปฏิวิชฺฌตีติ จตฺตาริ สจฺจานิ เอกปฏิเวธานิ ฯ
     {๕๔๖.๑}   กถํ   ตถฏฺเฐน  จตฺตาริ  สจฺจานิ  เอกปฏิเวธานิ  ฯ
จตูหากาเรหิ   ตถฏฺเฐน   จตฺตาริ   สจฺจานิ   เอกปฏิเวธานิ   ทุกฺขสฺส
ทุกฺขฏฺโฐ   ตถฏฺโฐ  สมุทยสฺส  สมุทยฏฺโฐ  ตถฏฺโฐ  นิโรธสฺส  นิโรธฏฺโฐ
ตถฏฺโฐ   มคฺคสฺส   มคฺคฏฺโฐ   ตถฏฺโฐ  อิเมหิ  จตูหากาเรหิ  ตถฏฺเฐน
จตฺตาริ   สจฺจานิ  เอกสงฺคหิตานิ  ยํ  เอกสงฺคหิตํ  ตํ  เอกตฺตํ  เอกตฺตํ
เอเกน ญาเณน ปฏิวิชฺฌตีติ จตฺตาริ สจฺจานิ เอกปฏิเวธานิ ฯ
     {๕๔๖.๒}   กถํ  อนตฺตฏฺเฐน  จตฺตาริ  สจฺจานิ  เอกปฏิเวธานิ  ฯ
จตูหากาเรหิ   อนตฺตฏฺเฐน   จตฺตาริ   สจฺจานิ  เอกปฏิเวธานิ  ทุกฺขสฺส
ทุกฺขฏฺโฐ    อนตฺตฏฺโฐ   สมุทยสฺส   สมุทยฏฺโฐ   อนตฺตฏฺโฐ   นิโรธสฺส
นิโรธฏฺโฐ    อนตฺตฏฺโฐ    มคฺคสฺส    มคฺคฏฺโฐ    อนตฺตฏฺโฐ   อิเมหิ
จตูหากาเรหิ    อนตฺตฏฺเฐน    จตฺตาริ   สจฺจานิ   เอกสงฺคหิตานิ   ยํ
เอกสงฺคหิตํ    ตํ   เอกตฺตํ   เอกตฺตํ   เอเกน   ญาเณน   ปฏิวิชฺฌตีติ
จตฺตาริ สจฺจานิ เอกปฏิเวธานิ ฯ
     {๕๔๖.๓}   กถํ สจฺจฏฺเฐน จตฺตาริ สจฺจานิ เอกปฏิเวธานิ ฯ จตูหากาเรหิ
สจฺจฏฺเฐน    จตฺตาริ    สจฺจานิ   เอกปฏิเวธานิ   ทุกฺขสฺส   ทุกฺขฏฺโฐ
สจฺจฏฺโฐ    สมุทยสฺส    สมุทยฏฺโฐ   สจฺจฏฺโฐ   นิโรธสฺส   นิโรธฏฺโฐ
สจฺจฏฺโฐ    มคฺคสฺส    มคฺคฏฺโฐ    สจฺจฏฺโฐ    อิเมหิ   จตูหากาเรหิ
สจฺจฏฺเฐน   จตฺตาริ   สจฺจานิ   เอกสงฺคหิตานิ   ยํ   เอกสงฺคหิตํ   ตํ
เอกตฺตํ   เอกตฺตํ   เอเกน   ญาเณน   ปฏิวิชฺฌตีติ   จตฺตาริ   สจฺจานิ
เอกปฏิเวธานิ ฯ
     {๕๔๖.๔}   กถํ  ปฏิเวธฏฺเฐน  จตฺตาริ  สจฺจานิ  เอกปฏิเวธานิ ฯ
จตูหากาเรหิ   ปฏิเวธฏฺเฐน   จตฺตาริ  สจฺจานิ  เอกปฏิเวธานิ  ทุกฺขสฺส
ทุกฺขฏฺโฐ     ปฏิเวธฏฺโฐ     สมุทยสฺส     สมุทยฏฺโฐ     ปฏิเวธฏฺโฐ
นิโรธสฺส   นิโรธฏฺโฐ   ปฏิเวธฏฺโฐ   มคฺคสฺส   มคฺคฏฺโฐ   ปฏิเวธฏฺโฐ
อิเมหิ   จตูหากาเรหิ   ปฏิเวธฏฺเฐน   จตฺตาริ  สจฺจานิ  เอกสงฺคหิตานิ
ยํ   เอกสงฺคหิตํ   ตํ   เอกตฺตํ   เอกตฺตํ  เอเกน  ญาเณน  ปฏิวิชฺฌตีติ
จตฺตาริ สจฺจานิ เอกปฏิเวธานิ ฯ
     [๕๔๗]   กติหากาเรหิ  ๑-  จตฺตาริ  สจฺจานิ  เอกปฏิเวธานิ ฯ ยํ
อนิจฺจํ   ตํ   ทุกฺขํ   [๒]-   ยํ   อนิจฺจญฺจ   ทุกฺขญฺจ  ตํ  อนตฺตา  ยํ
อนิจฺจญฺจ   ทุกฺขญฺจ   อนตฺตา   จ   ตํ   ตถํ   ยํ   อนิจฺจญฺจ  ทุกฺขญฺจ
อนตฺตา   จ   ตถญฺจ   ตํ   สจฺจํ   ยํ   อนิจฺจญฺจ   ทุกฺขญฺจ   อนตฺตา
จ   ตถญฺจ   สจฺจญฺจ   ตํ   เอกสงฺคหิตํ   ยํ  เอกสงฺคหิตํ  ตํ  เอกตฺตํ
เอกตฺตํ     เอเกน     ญาเณน     ปฏิวิชฺฌตีติ    จตฺตาริ    สจฺจานิ
เอกปฏิเวธานิ ฯ
@เชิงอรรถ:  ยุ. กถํ ... ฯ  ม. ยํ ทุกฺขํ ตํ อนิจฺจํ ฯ
     {๕๔๗.๑}   กติหากาเรหิ   จตฺตาริ   สจฺจานิ  เอกปฏิเวธานิ  ฯ
นวหากาเรหิ   จตฺตาริ   สจฺจานิ  เอกปฏิเวธานิ  ตถฏฺเฐน  อนตฺตฏฺเฐน
สจฺจฏฺเฐน    ปฏิเวธฏฺเฐน    อภิญฺญฏฺเฐน    ปริญฺญฏฺเฐน   ปหานฏฺเฐน
ภาวนฏฺเฐน   สจฺฉิกิริยฏฺเฐน   อิเมหิ   นวหากาเรหิ   จตฺตาริ  สจฺจานิ
เอกสงฺคหิตานิ   ยํ  เอกสงฺคหิตํ  ตํ  เอกตฺตํ  เอกตฺตํ  เอเกน  ญาเณน
ปฏิวิชฺฌตีติ จตฺตาริ สจฺจานิ เอกปฏิเวธานิ ฯ
     [๕๔๘]   กถํ   ตถฏฺเฐน   จตฺตาริ   สจฺจานิ  เอกปฏิเวธานิ  ฯ
นวหากาเรหิ   ตถฏฺเฐน   จตฺตาริ   สจฺจานิ   เอกปฏิเวธานิ   ทุกฺขสฺส
ทุกฺขฏฺโฐ    ตถฏฺโฐ    สมุทยสฺส    สมุทยฏฺโฐ    ตถฏฺโฐ    นิโรธสฺส
นิโรธฏฺโฐ     ตถฏฺโฐ    มคฺคสฺส    มคฺคฏฺโฐ    ตถฏฺโฐ    อภิญฺญาย
อภิญฺญฏฺโฐ       ตถฏฺโฐ      ปริญฺญาย      ปริญฺญฏฺโฐ      ตถฏฺโฐ
ปหานสฺส    ปหานฏฺโฐ    ตถฏฺโฐ    ภาวนาย    ภาวนฏฺโฐ   ตถฏฺโฐ
สจฺฉิกิริยาย   สจฺฉิกิริยฏฺโฐ   ตถฏฺโฐ   อิเมหิ   นวหากาเรหิ  ตถฏฺเฐน
จตฺตาริ    สจฺจานิ    เอกสงฺคหิตานิ   ยํ   เอกสงฺคหิตํ   ตํ   เอกตฺตํ
เอกตฺตํ เอเกน ญาเณน ปฏิวิชฺฌตีติ จตฺตาริ สจฺจานิ เอกปฏิเวธานิ ฯ
     {๕๔๘.๑}   กถํ   อนตฺตฏฺเฐน  สจฺจฏฺเฐน  ปฏิเวธฏฺเฐน  จตฺตาริ
สจฺจานิ  เอกปฏิเวธานิ  ฯ  นวหากาเรหิ  ปฏิเวธฏฺเฐน  จตฺตาริ สจฺจานิ
เอกปฏิเวธานิ     ทุกฺขสฺส     ทุกฺขฏฺโฐ     ปฏิเวธฏฺโฐ     สมุทยสฺส
สมุทยฏฺโฐ   ปฏิเวธฏฺโฐ   นิโรธสฺส   นิโรธฏฺโฐ   ปฏิเวธฏฺโฐ  มคฺคสฺส
มคฺคฏฺโฐ     ปฏิเวธฏฺโฐ     อภิญฺญาย     อภิญฺญฏฺโฐ     ปฏิเวธฏฺโฐ
ปริญฺญาย      ปริญฺญฏฺโฐ     ปฏิเวธฏฺโฐ     ปหานสฺส     ปหานฏฺโฐ
ปฏิเวธฏฺโฐ     ภาวนาย     ภาวนฏฺโฐ    ปฏิเวธฏฺโฐ    สจฺฉิกิริยาย
สจฺฉิกิริยฏฺโฐ    ปฏิเวธฏฺโฐ    อิเมหิ    นวหากาเรหิ    ปฏิเวธฏฺเฐน
จตฺตาริ    สจฺจานิ    เอกสงฺคหิตานิ   ยํ   เอกสงฺคหิตํ   ตํ   เอกตฺตํ
เอกตฺตํ เอเกน ญาเณน ปฏิวิชฺฌตีติ จตฺตาริ สจฺจานิ เอกปฏิเวธานิ ฯ
     [๕๔๙]   กติหากาเรหิ   จตฺตาริ   สจฺจานิ   เอกปฏิเวธานิ   ฯ
ทฺวาทสหากาเรหิ     จตฺตาริ    สจฺจานิ    เอกปฏิเวธานิ    ตถฏฺเฐน
อนตฺตฏฺเฐน   สจฺจฏฺเฐน   ปฏิเวธฏฺเฐน   อภิชานนฏฺเฐน  ปริชานนฏฺเฐน
ธมฺมฏฺเฐน     ตถฏฺเฐน    ญาตฏฺเฐน    สจฺฉิกิริยฏฺเฐน    ผสฺสนฏฺเฐน
อภิสมยฏฺเฐน     อิเมหิ     ทฺวาทสหากาเรหิ     จตฺตาริ     สจฺจานิ
เอกสงฺคหิตานิ   ยํ  เอกสงฺคหิตํ  ตํ  เอกตฺตํ  เอกตฺตํ  เอเกน  ญาเณน
ปฏิวิชฺฌตีติ จตฺตาริ สจฺจานิ เอกปฏิเวธานิ ฯ
     {๕๔๙.๑}   กถํ  ตถฏฺเฐน จตฺตาริ สจฺจานิ เอกปฏิเวธานิ ฯ โสฬสหิ
อากาเรหิ    ตถฏฺเฐน    จตฺตาริ   สจฺจานิ   เอกปฏิเวธานิ   ทุกฺขสฺส
ปีฬนฏฺโฐ   สงฺขตฏฺโฐ   สนฺตาปฏฺโฐ   วิปริณามฏฺโฐ   ตถฏฺโฐ  สมุทยสฺส
อายุหนฏฺโฐ     นิทานฏฺโฐ     สญฺโญคฏฺโฐ     ปลิโพธฏฺโฐ    ตถฏฺโฐ
นิโรธสฺส   นิสฺสรณฏฺโฐ   วิเวกฏฺโฐ   อสงฺขตฏฺโฐ   อมตฏฺโฐ   ตถฏฺโฐ
มคฺคสฺส   นิยฺยานฏฺโฐ   เหตฏฺโฐ   ทสฺสนฏฺโฐ  อาธิปเตยฺยฏฺโฐ  ตถฏฺโฐ
อิเมหิ   โสฬสหิ  อากาเรหิ  ตถฏฺเฐน  จตฺตาริ  สจฺจานิ  เอกสงฺคหิตานิ
ยํ   เอกสงฺคหิตํ   ตํ   เอกตฺตํ   เอกตฺตํ  เอเกน  ญาเณน  ปฏิวิชฺฌตีติ
จตฺตาริ สจฺจานิ เอกปฏิเวธานิ ฯ
     {๕๔๙.๒}   กถํ   อนตฺตฏฺเฐน   ฯเปฯ  สจฺจฏฺเฐน  ปฏิเวธฏฺเฐน
อภิชานนฏฺเฐน    ปริชานนฏฺเฐน    ธมฺมฏฺเฐน    ตถฏฺเฐน   ญาตฏฺเฐน
สจฺฉิกิริยฏฺเฐน     ผสฺสนฏฺเฐน     อภิสมยฏฺเฐน    จตฺตาริ    สจฺจานิ
เอกปฏิเวธานิ   โสฬสหิ    อากาเรหิ   อภิสมยฏฺเฐน  จตฺตาริ  สจฺจานิ
เอกปฏิเวธานิ     ทุกฺขสฺส     ปีฬนฏฺโฐ     สงฺขตฏฺโฐ    สนฺตาปฏฺโฐ
วิปริณามฏฺโฐ     อภิสมยฏฺโฐ    สมุทยสฺส    อายุหนฏฺโฐ    นิทานฏฺโฐ
สญฺโญคฏฺโฐ     ปลิโพธฏฺโฐ    อภิสมยฏฺโฐ    นิโรธสฺส    นิสฺสรณฏฺโฐ
วิเวกฏฺโฐ   อสงฺขตฏฺโฐ   อมตฏฺโฐ   อภิสมยฏฺโฐ  มคฺคสฺส  นิยฺยานฏฺโฐ
เหตฏฺโฐ     ทสฺสนฏฺโฐ     อาธิปเตยฺยฏฺโฐ     อภิสมยฏฺโฐ    อิเมหิ
โสฬสหิ   อากาเรหิ   อภิสมยฏฺเฐน   จตฺตาริ   สจฺจานิ  เอกสงฺคหิตานิ
ยํ   เอกสงฺคหิตํ   ตํ   เอกตฺตํ   เอกตฺตํ  เอเกน  ญาเณน  ปฏิวิชฺฌตีติ
จตฺตาริ สจฺจานิ เอกปฏิเวธานิ ฯ
     [๕๕๐]   สจฺจานํ   กติ   ลกฺขณานิ  ฯ  สจฺจานํ  เทฺว  ลกฺขณานิ
สงฺขตลกฺขณญฺจ      อสงฺขตลกฺขณญฺจ      สจฺจานํ     อิมานิ     เทฺว
ลกฺขณานิ ฯ
     {๕๕๐.๑}   สจฺจานํ   กติ  ลกฺขณานิ  ฯ  สจฺจานํ  ฉ  ลกฺขณานิ
สงฺขตานํ    สจฺจานํ   อุปฺปาโท   ปญฺญายติ   วโย   ปญฺญายติ   ฐิตานํ
อญฺญถตฺตํ   ปญฺญายติ   น   อสงฺขตสฺส   สจฺจสฺส   อุปฺปาโท   ปญฺญายติ
น   วโย   ปญฺญายติ   น  ฐิตสฺส  อญฺญถตฺตํ  ปญฺญายติ  สจฺจานํ  อิมานิ
ฉ ลกฺขณานิ ฯ
     {๕๕๐.๒}   สจฺจานํ  กติ  ลกฺขณานิ  ฯ  สจฺจานํ  ทฺวาทส ลกฺขณานิ
ทุกฺขสจฺจสฺส     อุปฺปาโท     ปญฺญายติ    วโย    ปญฺญายติ    ฐิตสฺส
อญฺญถตฺตํ    ปญฺญายติ    สมุทยสจฺจสฺส    อุปฺปาโท    ปญฺญายติ   วโย
ปญฺญายติ       ฐิตสฺส      อญฺญถตฺตํ      ปญฺญายติ      มคฺคสจฺจสฺส
อุปฺปาโท     ปญฺญายติ     วโย     ปญฺญายติ     ฐิตสฺส    อญฺญถตฺตํ
ปญฺญายติ    น    นิโรธสจฺจสฺส    อุปฺปาโท    ปญฺญายติ    น   วโย
ปญฺญายติ    น    ฐิตสฺส    อญฺญถตฺตํ    ปญฺญายติ    สจฺจานํ   อิมานิ
ทฺวาทส ลกฺขณานิ ฯ
     [๕๕๑]   จตุนฺนํ   สจฺจานํ   กติ   กุสลา   กติ   อกุสลา   กติ
อพฺยากตา    ฯ    สมุทยสจฺจํ   อกุสลํ   มคฺคสจฺจํ   กุสลํ   นิโรธสจฺจํ
อพฺยากตํ   ทุกฺขสจฺจํ  สิยา  กุสลํ  สิยา  อกุสลํ  สิยา  อพฺยากตํ  [๑]-
ตีณิ   สจฺจานิ   เอกสจฺเจน   สงฺคหิตานิ   เอกํ   สจฺจํ   ตีหิ  สจฺเจหิ
สงฺคหิตํ วตฺถุวเสน ปริยาเยน ฯ
     {๕๕๑.๑}   สิยาติ  กถญฺจ  สิยา  ฯ  ยํ ทุกฺขสจฺจํ อกุสลํ สมุทยสจฺจํ
อกุสลํ   เอวํ   อกุสลฏฺเฐน   เทฺว   สจฺจานิ   เอกสจฺเจน  สงฺคหิตานิ
เอกํ    สจฺจํ    ทฺวีหิ    สจฺเจหิ    สงฺคหิตํ    ยํ   ทุกฺขสจฺจํ   กุสลํ
มคฺคสจฺจํ    กุสลํ    เอวํ   กุสลฏฺเฐน   เทฺว   สจฺจานิ   เอกสจฺเจน
@เชิงอรรถ:  ม. สิยา ฯ
สงฺคหิตานิ    เอกํ   สจฺจํ   ทฺวีหิ   สจฺเจหิ   สงฺคหิตํ   ยํ   ทุกฺขสจฺจํ
อพฺยากตํ   นิโรธสจฺจํ   อพฺยากตํ   เอวํ  อพฺยากตฏฺเฐน  เทฺว  สจฺจานิ
เอกสจฺเจน   สงฺคหิตานิ   เอกํ   สจฺจํ   ทฺวีหิ  สจฺเจหิ  สงฺคหิตํ  เอวํ
สิยา    ตีณิ   สจฺจานิ   เอกสจฺเจน   สงฺคหิตานิ   เอกํ   สจฺจํ   ตีหิ
สจฺเจหิ สงฺคหิตํ วตฺถุวเสน ปริยาเยนาติ ฯ
     [๕๕๒]   ปุพฺเพ  เม ภิกฺขเว สมฺโพธา อนภิสมฺพุทฺธสฺส โพธิสตฺตสฺเสว
สโต  เอตทโหสิ  โก  นุ  โข  รูปสฺส  อสฺสาโท โก อาทีนโว กึ นิสฺสรณํ
โก  เวทนาย  อสฺสาโท  โก  อาทีนโว  กึ นิสฺสรณํ โก สญฺญาย อสฺสาโท
โก  อาทีนโว  กึ  นิสฺสรณํ  โก  สงฺขารานํ  อสฺสาโท  โก  อาทีนโว กึ
นิสฺสรณํ   โก   วิญฺญาณสฺส   อสฺสาโท   โก   อาทีนโว  กึ  นิสฺสรณนฺติ
ตสฺส   มยฺหํ   ภิกฺขเว  เอตทโหสิ  ยํ  โข  รูปํ  ปฏิจฺจ  อุปฺปชฺชติ  สุขํ
โสมนสฺสํ   อยํ   รูปสฺส   อสฺสาโท   ยํ   รูปํ   อนิจฺจํ   [๑]-  ทุกฺขํ
วิปริณามธมฺมํ   อยํ   รูปสฺส   อาทีนโว   โย   รูปสฺมึ   ฉนฺทราควินโย
ฉนฺทราคปฺปหานํ    อิทํ    รูปสฺส   นิสฺสรณํ   ยํ   เวทนํ   ปฏิจฺจ   ยํ
สญฺญํ   ปฏิจฺจ   ยํ   สงฺขาเร   ปฏิจฺจ   ยํ  วิญฺญาณํ  ปฏิจฺจ  อุปฺปชฺชติ
สุขํ   โสมนสฺสํ   อยํ  วิญฺญาณสฺส  อสฺสาโท  ยํ  วิญฺญาณํ  อนิจฺจํ  [๑]-
ทุกฺขํ    วิปริณามธมฺมํ   อยํ   วิญฺญาณสฺส   อาทีนโว   โย   วิญฺญาณสฺมึ
ฉนฺทราควินโย ฉนฺทราคปฺปหานํ อิทํ วิญฺญาณสฺส นิสฺสรณํ ฯ
@เชิงอรรถ:  ม. ตํ ฯ เอวมีทิเสสุ ฐาเนสุ ฯ
     [๕๕๓]   ยาวกีวญฺจาหํ  ภิกฺขเว  อิเมสํ  ปญฺจนฺนํ  อุปาทานกฺขนฺธานํ
เอวํ    อสฺสาทญฺจ    อสฺสาทโต   อาทีนวญฺจ   อาทีนวโต   นิสฺสรณญฺจ
นิสฺสรณโต   ยถาภูตํ   นพฺภญฺญาสึ   เนว   ตาวาหํ   ภิกฺขเว  สเทวเก
โลเก      สมารเก     สพฺรหฺมเก     สสฺสมณพฺราหฺมณิยา     ปชาย
สเทวมนุสฺสาย   อนุตฺตรํ   สมฺมาสมฺโพธึ   อภิสมฺพุทฺโธ   ๑-  ปจฺจญฺญาสึ
ยโต    จ    ขฺวาหํ    ภิกฺขเว   อิเมสํ   ปญฺจนฺนํ   อุปาทานกฺขนฺธานํ
เอวํ    อสฺสาทญฺจ    อสฺสาทโต   อาทีนวญฺจ   อาทีนวโต   นิสฺสรณญฺจ
นิสฺสรณโต   ยถาภูตํ   อพฺภญฺญาสึ   อถาหํ   ภิกฺขเว   สเทวเก  โลเก
สมารเก    สพฺรหฺมเก    สสฺสมณพฺราหฺมณิยา    ปชาย   สเทวมนุสฺสาย
อนุตฺตรํ    สมฺมาสมฺโพธึ    อภิสมฺพุทฺโธ    ๑-    ปจฺจญฺญาสึ   ญาณญฺจ
ปน   เม   ทสฺสนํ  อุทปาทิ  อกุปฺปา  เม  เจโตวิมุตฺติ  ๒-  อยมนฺติมา
ชาติ นตฺถิทานิ ปุนพฺภโวติ ฯ
     [๕๕๔]   ยํ   รูปํ  ปฏิจฺจ  อุปฺปชฺชติ  สุขํ  โสมนสฺสํ  อยํ  รูปสฺส
อสฺสาโทติ    ปหานปฺปฏิเวโธ    สมุทยสจฺจํ   ยํ   รูปํ   อนิจฺจํ   ทุกฺขํ
วิปริณามธมฺมํ    อยํ   รูปสฺส   อาทีนโวติ   ปริญฺญาปฏิเวโธ   ทุกฺขสจฺจํ
โย   รูปสฺมึ   ฉนฺทราควินโย   ฉนฺทราคปฺปหานํ  อิทํ  รูปสฺส  นิสฺสรณนฺติ
สจฺฉิกิริยาปฏิเวโธ  นิโรธสจฺจํ  ยา  อิเมสุ  ตีสุ  ฐาเนสุ  ทิฏฺฐิ สงฺกปฺโป
วาจา   กมฺมนฺโต   อาชีโว   วายาโม   สติ   สมาธิ  ภาวนาปฏิเวโธ
มคฺคสจฺจํ    ยํ   เวทนํ   ปฏิจฺจ   ยํ   สญฺญํ   ปฏิจฺจ   ยํ   สงฺขาเร
ปฏิจฺจ    ยํ    วิญฺญาณํ    ปฏิจฺจ    อุปฺปชฺชติ   สุขํ   โสมนสฺสํ   อยํ
@เชิงอรรถ:  ม. อิติสทฺโท ทิสฺสติ ฯ  ม. วิมุตฺติ ฯ
วิญฺญาณสฺส    อสฺสาโทติ    ปหานปฺปฏิเวโธ   สมุทยสจฺจํ   ยํ   วิญฺญาณํ
อนิจฺจํ   ทุกฺขํ  วิปริณามธมฺมํ  อยํ  วิญฺญาณสฺส  อาทีนโว  ปริญฺญาปฏิเวโธ
ทุกฺขสจฺจํ     โย     วิญฺญาณสฺมึ     ฉนฺทราควินโย    ฉนฺทราคปฺปหานํ
อิทํ     วิญฺญาณสฺส     นิสฺสรณนฺติ     สจฺฉิกิริยาปฏิเวโธ    นิโรธสจฺจํ
ยา   อิเมสุ   ตีสุ  ฐาเนสุ  ทิฏฺฐิ  สงฺกปฺโป  วาจา  กมฺมนฺโต  อาชีโว
วายาโม สติ สมาธิ ภาวนาปฏิเวโธ มคฺคสจฺจนฺติ ๑- ฯ
     [๕๕๕]   [๒]-   กติหากาเรหิ   สจฺจํ   ฯ   ตีหากาเรหิ  สจฺจํ
เอสนฏฺเฐน ปริคฺคหฏฺเฐน ปฏิเวธฏฺเฐน ฯ
     {๕๕๕.๑}   กถํ  เอสนฏฺเฐน  สจฺจํ  ฯ  ชรามรณํ กึนิทานํ กึสมุทยํ
กึชาติกํ  กึปภวนฺติ  เอวํ  เอสนฏฺเฐน  สจฺจํ  ชรามรณํ  ชาตินิทานํ  ชาติ
สมุทยํ  ชาติชาติกํ  ชาติปฺปภวนฺติ  เอวํ  ปริคฺคหฏฺเฐน  สจฺจํ  ชรามรณญฺจ
ปชานาติ    ชรามรณสมุทยญฺจ   ปชานาติ   ชรามรณนิโรธญฺจ   ปชานาติ
ชรามรณนิโรธคามินีปฏิปทญฺจ ปชานาติ เอวํ ปฏิเวธฏฺเฐน สจฺจํ ฯ
     {๕๕๕.๒}   ชาติ  กึนิทานา  กึสมุทยา  กึชาติกา  กึปภวาติ  เอวํ
เอสนฏฺเฐน  สจฺจํ  ชาติ  ภวนิทานา  ภวสมุทยา  ภวชาติกา  ภวปฺปภวาติ
เอวํ    ปริคฺคหฏฺเฐน    สจฺจํ    ชาติญฺจ    ปชานาติ    ชาติสมุทยญฺจ
ปชานาติ      ชาตินิโรธญฺจ      ปชานาติ     ชาตินิโรธคามินีปฏิปทญฺจ
ปชานาติ เอวํ ปฏิเวธฏฺเฐน สจฺจํ ฯ
     {๕๕๕.๓}   ภโว กึนิทาโน กึสมุทโย กึชาติโก กึปภโวติ เอวํ เอสนฏฺเฐน
@เชิงอรรถ:  ม. ยุ. อิติสทฺโท น ทิสฺสติ ฯ  ม. ยุ. สจฺจนฺติ ฯ
สจฺจํ    ภโว    อุปาทานนิทาโน    อุปาทานสมุทโย    อุปาทานชาติโก
อุปาทานปฺปภโวติ    เอวํ    ปริคฺคหฏฺเฐน    สจฺจํ   ภวญฺจ   ปชานาติ
ภวสมุทยญฺจ    ปชานาติ    ภวนิโรธญฺจ    ปชานาติ    ภวนิโรธคามินี-
ปฏิปทญฺจ ปชานาติ เอวํ ปฏิเวธฏฺเฐน สจฺจํ ฯ
     {๕๕๕.๔}   อุปาทานํ  กึนิทานํ  กึสมุทยํ  กึชาติกํ  กึปภวนฺติ  เอวํ
เอสนฏฺเฐน   สจฺจํ   อุปาทานํ   ตณฺหานิทานํ   ตณฺหาสมุทยํ  ตณฺหาชาติกํ
ตณฺหาปภวนฺติ    เอวํ    ปริคฺคหฏฺเฐน   สจฺจํ   อุปาทานญฺจ   ปชานาติ
อุปาทานสมุทยญฺจ       ปชานาติ      อุปาทานนิโรธญฺจ      ปชานาติ
อุปาทานนิโรธคามินีปฏิปทญฺจ ปชานาติ เอวํ ปฏิเวธฏฺเฐน สจฺจํ ฯ
     {๕๕๕.๕}   ตณฺหา  กึนิทานา  กึสมุทยา  กึชาติกา  กึปภวาติ  เอวํ
เอสนฏฺเฐน  สจฺจํ  ตณฺหา  เวทนานิทานา  เวทนาสมุทยา  เวทนาชาติกา
เวทนาปภวาติ    เอวํ    ปริคฺคหฏฺเฐน    สจฺจํ    ตณฺหญฺจ   ปชานาติ
ตณฺหาสมุทยญฺจ    ปชานาติ    ตณฺหานิโรธญฺจ   ปชานาติ   ตณฺหานิโรธ-
คามินีปฏิปทญฺจ ปชานาติ เอวํ ปฏิเวธฏฺเฐน สจฺจํ ฯ
     {๕๕๕.๖}   เวทนา  กึนิทานา  กึสมุทยา  กึชาติกา กึปภวาติ เอวํ
เอสนฏฺเฐน   สจฺจํ   เวทนา   ผสฺสนิทานา   ผสฺสสมุทยา   ผสฺสชาติกา
ผสฺสปฺปภวาติ    เอวํ    ปริคฺคหฏฺเฐน    สจฺจํ    เวทนญฺจ   ปชานาติ
เวทนาสมุทยญฺจ       ปชานาติ       เวทนานิโรธญฺจ       ปชานาติ
เวทนานิโรธคามินีปฏิปทญฺจ ปชานาติ เอวํ ปฏิเวธฏฺเฐน สจฺจํ ฯ
     {๕๕๕.๗}   ผสฺโส  กึนิทาโน  กึสมุทโย  กึชาติโก  กึปภโวติ เอวํ
เอสนฏฺเฐน     สจฺจํ     ผสฺโส    สฬายตนนิทาโน    สฬายตนสมุทโย
สฬายตนชาติโก     สฬายตนปฺปภโวติ    เอวํ    ปริคฺคหฏฺเฐน    สจฺจํ
ผสฺสญฺจ     ปชานาติ     ผสฺสสมุทยญฺจ     ปชานาติ     ผสฺสนิโรธญฺจ
ปชานาติ        ผสฺสนิโรธคามินีปฏิปทญฺจ        ปชานาติ       เอวํ
ปฏิเวธฏฺเฐน สจฺจํ ฯ
     {๕๕๕.๘}   สฬายตนํ  กึนิทานํ  กึสมุทยํ  กึชาติกํ  กึปภวนฺติ เอวํ
เอสนฏฺเฐน   สจฺจํ  สฬายตนํ  นามรูปนิทานํ  นามรูปสมุทยํ  นามรูปชาติกํ
นามรูปปฺปภวนฺติ   เอวํ   ปริคฺคหฏฺเฐน   สจฺจํ   สฬายตนญฺจ   ปชานาติ
สฬายตนสมุทยญฺจ       ปชานาติ      สฬายตนนิโรธญฺจ      ปชานาติ
สฬายตนนิโรธคามินีปฏิปทญฺจ ปชานาติ เอวํ ปฏิเวธฏฺเฐน สจฺจํ ฯ
     {๕๕๕.๙}   นามรูปํ   กึนิทานํ  กึสมุทยํ  กึชาติกํ  กึปภวนฺติ  เอวํ
เอสนฏฺเฐน      สจฺจํ     นามรูปํ     วิญฺญาณนิทานํ     วิญฺญาณสมุทยํ
วิญฺญาณชาติกํ     วิญฺญาณปฺปภวนฺติ     เอวํ     ปริคฺคหฏฺเฐน     สจฺจํ
นามรูปญฺจ    ปชานาติ    นามรูปสมุทยญฺจ   ปชานาติ   นามรูปนิโรธญฺจ
ปชานาติ       นามรูปนิโรธคามินีปฏิปทญฺจ       ปชานาติ       เอวํ
ปฏิเวธฏฺเฐน สจฺจํ ฯ
     {๕๕๕.๑๐}   วิญฺญาณํ  กึนิทานํ  กึสมุทยํ  กึชาติกํ  กึปภวนฺติ  เอวํ
เอสนฏฺเฐน   สจฺจํ   วิญฺญาณํ  สงฺขารนิทานํ  สงฺขารสมุทยํ  สงฺขารชาติกํ
สงฺขารปฺปภวนฺติ    เอวํ   ปริคฺคหฏฺเฐน   สจฺจํ   วิญฺญาณญฺจ   ปชานาติ
วิญฺญาณสมุทยญฺจ       ปชานาติ       วิญฺญาณนิโรธญฺจ       ปชานาติ
วิญฺญาณนิโรธคามินีปฏิปทญฺจ ปชานาติ เอวํ ปฏิเวธฏฺเฐน สจฺจํ ฯ
     {๕๕๕.๑๑}   สงฺขารา   กึนิทานา  กึสมุทยา  กึชาติกา  กึปภวาติ
เอวํ   เอสนฏฺเฐน   สจฺจํ   สงฺขารา   อวิชฺชานิทานา   อวิชฺชาสมุทยา
อวิชฺชาชาติกา   อวิชฺชาปภวาติ  เอวํ  ปริคฺคหฏฺเฐน  สจฺจํ  สงฺขาเร  จ
ปชานาติ    สงฺขารสมุทยญฺจ    ปชานาติ    สงฺขารนิโรธญฺจ   ปชานาติ
สงฺขารนิโรธคามินีปฏิปทญฺจ ปชานาติ เอวํ ปฏิเวธฏฺเฐน สจฺจํ ฯ
     [๕๕๖]   ชรามรณํ    ทุกฺขสจฺจํ    ชาติ   สมุทยสจฺจํ   อุภินฺนํปิ
นิสฺสรณํ    นิโรธสจฺจํ    นิโรธปฺปชานนา   มคฺคสจฺจํ   ชาติ   ทุกฺขสจฺจํ
ภโว    สมุทยสจฺจํ    อุภินฺนํปิ   นิสฺสรณํ   นิโรธสจฺจํ   นิโรธปฺปชานนา
มคฺคสจฺจํ   ภโว   ทุกฺขสจฺจํ   อุปาทานํ   สมุทยสจฺจํ   อุภินฺนํปิ  นิสฺสรณํ
นิโรธสจฺจํ   นิโรธปฺปชานนา   มคฺคสจฺจํ   อุปาทานํ   ทุกฺขสจฺจํ   ตณฺหา
สมุทยสจฺจํ     อุภินฺนํปิ     นิสฺสรณํ     นิโรธสจฺจํ     นิโรธปฺปชานนา
มคฺคสจฺจํ   ตณฺหา   ทุกฺขสจฺจํ   เวทนา   สมุทยสจฺจํ   อุภินฺนํปิ  นิสฺสรณํ
นิโรธสจฺจํ    นิโรธปฺปชานนา   มคฺคสจฺจํ   เวทนา   ทุกฺขสจฺจํ   ผสฺโส
สมุทยสจฺจํ   อุภินฺนํปิ   นิสฺสรณํ   นิโรธสจฺจํ   นิโรธปฺปชานนา  มคฺคสจฺจํ
ผสฺโส   ทุกฺขสจฺจํ   สฬายตนํ  สมุทยสจฺจํ  อุภินฺนํปิ   นิสฺสรณํ  นิโรธสจฺจํ
นิโรธปฺปชานนา      มคฺคสจฺจํ     สฬายตนํ     ทุกฺขสจฺจํ     นามรูปํ
สมุทยสจฺจํ     อุภินฺนํปิ     นิสฺสรณํ     นิโรธสจฺจํ     นิโรธปฺปชานนา
มคฺคสจฺจํ     นามรูปํ    ทุกฺขสจฺจํ    วิญฺญาณํ    สมุทยสจฺจํ    อุภินฺนํปิ
นิสฺสรณํ      นิโรธสจฺจํ     นิโรธปฺปชานนา     มคฺคสจฺจํ     วิญฺญาณํ
ทุกฺขสจฺจํ    สงฺขารา    สมุทยสจฺจํ    อุภินฺนํปิ    นิสฺสรณํ   นิโรธสจฺจํ
นิโรธปฺปชานนา   มคฺคสจฺจํ   สงฺขารา   ทุกฺขสจฺจํ   อวิชฺชา  สมุทยสจฺจํ
อุภินฺนํปิ      นิสฺสรณํ     นิโรธสจฺจํ     นิโรธปฺปชานนา     มคฺคสจฺจํ
ชรามรณํ  [๑]-  ทุกฺขสจฺจํ [๒]- ชาติ สิยา ทุกฺขสจฺจํ ๓- สิยา สมุทยสจฺจํ
อุภินฺนํปิ   นิสฺสรณํ   นิโรธสจฺจํ  นิโรธปฺปชานนา  มคฺคสจฺจํ  ชาติ  [๔]-
ทุกฺขสจฺจํ   [๕]-   ภโว   สิยา   ทุกฺขสจฺจํ  สิยา  สมุทยสจฺจํ  อุภินฺนํปิ
นิสฺสรณํ    นิโรธสจฺจํ   นิโรธปฺปชานนา   มคฺคสจฺจํ   ฯเปฯ   สงฺขารา
ทุกฺขสจฺจํ    อวิชฺชา    สิยา   ทุกฺขสจฺจํ   สิยา   สมุทยสจฺจํ   อุภินฺนํปิ
นิสฺสรณํ นิโรธสจฺจํ นิโรธปฺปชานนา มคฺคสจฺจนฺติ ฯ
                                                สจฺจกถา ฯ
                                                ภาณวารํ ฯ
                                                  --------


             เนื้อความพระไตรปิฎกฉบับภาษาบาลี อักษรไทย เล่มที่ ๓๑ หน้าที่ ๔๔๘-๔๖๒. https://84000.org/tipitaka/read/pali_read.php?B=31&A=9019&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=31&A=9019&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=31&item=544&items=13              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=31&siri=71              ศึกษาอรรถกถานี้ได้ที่ :- https://84000.org/tipitaka/attha/attha.php?b=31&i=544              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=48&A=5160              The Pali Atthakatha in Roman :- https://84000.org/tipitaka/atthapali/read_rm.php?B=48&A=5160              สารบัญพระไตรปิฎกเล่มที่ ๓๑ https://84000.org/tipitaka/read/?index_31 https://84000.org/tipitaka/english/?index_31

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]