บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

                                  จตุตฺถํ กาฬุทายิตฺเถราปทานํ (๓๔)
     [๓๖] |๓๖.๔๘|   ปทุมุตฺตรสฺส พุทฺธสฺส  โลกเชฏฺฐสฺส ตาทิโน
                     อทฺธานํ ปฏิปนฺนสฺส        จรโต จาริกํ ตทา ฯ
       |๓๖.๔๙| สุผุลฺลํ ปทุมํ คยฺห           อุปฺปลํ มลฺลิกญฺจหํ
                     ปรมนฺนํ คเหตฺวาน          อทาสึ สตฺถุโน อหํ ฯ
       |๓๖.๕๐| ปริภุญฺชิ มหาวีโร            ปรมนฺนํ สุโภชนํ
                     ตญฺจ ปุปฺผํ คเหตฺวาน      ชินสฺส ^๑- สมฺปทสฺสยิ ฯ
       |๓๖.๕๑| อิฏฺฐํ กนฺตยิทํ ^๒- โลเก     ชลชํ ปุปฺผมุตฺตมํ
                     สุทุกฺกรํ กตํ เตน         ยํ ^๓- เม ปุปฺผํ อทาสิ ^๔- โส ฯ
       |๓๖.๕๒| โย ปุปฺผํ อภิโรเปสิ      ปรมนฺนญฺจทาสิ เม
                     ตมหํ กิตฺตยิสฺสามิ      สุณาถ มม ภาสโต ฯ
       |๓๖.๕๓| ทสมฏฺฐกฺขตฺตุญฺจ ^๕-  โส เทวรชฺชํ กริสฺสติ
                     อุปฺปลํ ปทุมญฺจาปิ          มลฺลิกญฺจ ตทุตฺตริ ฯ
@เชิงอรรถ: ^๑ ม. ยุ. ชนสฺส ฯ ^๒ ม. กนฺตํ ปิยํ ฯ ยุ. กนฺตํ จิรํ ฯ ^๓ ม. ยุ. โย เม ฯ
@^๔ ม. ยุ. อทาสิทํ ฯ ^๕ ม. ทสอฏฺฐจกฺขตฺตุํ โส ฯ ยุ. ทส จฏฺฐจกฺขตฺตุํ โส ฯ
       |๓๖.๕๔| อสฺส ปุญฺญวิปาเกน        ทิพฺพคนฺธสมายุตํ
                     อากาเส ฉทนํ กตฺวา        ธารยิสฺสติ ตาวเท ฯ
       |๓๖.๕๕| ปญฺจวีสติขตฺตุญฺจ           จกฺกวตฺติ ภวิสฺสติ
                     ปฐพฺยา รชฺชํ ปญฺจสตํ      วสุธํ อาวสิสฺสติ ฯ
       |๓๖.๕๖| กปฺปสตสหสฺสมฺหิ           โอกฺกากกุลสมฺภโว
                     โคตโม นาม นาเมน        สตฺถา โลเก ภวิสฺสติ ฯ
       |๓๖.๕๗| สกกมฺมาภิรทฺโธ โส         สุกฺกมูเลน โจทิโต
                     สกฺยานํ นนฺทิชนโก ^๑-     ญาติพนฺธุ ภวิสฺสติ ฯ
       |๓๖.๕๘| โส จ ปจฺฉา ปพฺพชิตฺวา    สุกฺกมูเลน โจทิโต
                     สพฺพาสเว ปริญฺญาย       นิพฺพายิสฺสตฺยนาสโว ฯ
       |๓๖.๕๙| ปฏิสมฺภิทมนุปฺปตฺตํ         กตกิจฺจํ อนาสวํ
                     โคตโม โลกพนฺธุ ตํ          เอตทคฺเค ฐเปสฺสติ ฯ
       |๓๖.๖๐| ปธานํ ปหิตตฺโต โส         อุปสนฺโต นิรูปธิ
                     อุทายิ นาม นาเมน         เหสฺสติ สตฺถุ สาวโก ฯ
       |๓๖.๖๑|  ราโค โทโส จ โมโห ^๒- จ มาโน มกฺโข จ ธํสิโต
                     สพฺพาสเว ปริญฺญาย       วิหรามิ อนาสโว ฯ
       |๓๖.๖๒| โตสยิญฺจาปิ สมฺพุทฺธํ      อาตาปี นิปโก อหํ
                     ปสาทิโต ^๓- จ สมฺพุทฺโธ   เอตทคฺเค ฐเปสิ มํ ฯ
       |๓๖.๖๓| ปฏิสมฺภิทา จตสฺโส          วิโมกฺขาปิจ อฏฺฐิเม
                      ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
@เชิงอรรถ: ^๑ ม. ยุ. นนฺทิชนโน ฯ ^๒ ยุ. จิตฺตญฺจ สุวิมุตฺตํ เม ฯ ^๓ ยุ. ปโมทิโต ฯ
         อิตฺถํ สุทํ อายสฺมา กาฬุทายิ เถโร อิมา คาถาโย
อภาสิตฺถาติ ฯ
                                กาฬุทายิตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๒ หน้าที่ ๑๒๒-๑๒๔. https://84000.org/tipitaka/read/pali_read.php?B=32&A=2530&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=32&A=2530&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=36&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=32&siri=36 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=36 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=1450 The Pali Atthakatha in Roman :- https://84000.org/tipitaka/atthapali/read_rm.php?B=50&A=1450 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32