บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

                                ฉฏฺฐํ กุสุมาสนิยตฺเถราปทานํ (๑๒๖)
     [๑๒๘]   |๑๒๘.๖๕| นคเร ธญฺญวติยา      อโหสึ พฺราหฺมโณ ตทา
                        ลกฺขเณ อิติหาเส จ           สนิฆณฺฑุสเกฏุเภ ฯ
       |๑๒๘.๖๖| ปทโก เวยฺยากรโณ           นิมิตฺเต โกวิโท อหํ
                        มนฺเต จ สิสฺเส วาเจสึ        ติณฺณํ เวทาน ปารคู
       |๑๒๘.๖๗| ปญฺจ อุปฺปลหตฺถานิ         ปิฏฺฐิยํ ฐปิตานิ เม
                        อาหุตึ ยิฏฺฐุกาโมหํ           ปิตุมาตุสมาคเม ฯ
       |๑๒๘.๖๘| ตทา วิปสฺสิ ภควา            ภิกฺขุสงฺฆปุรกฺขโต
                        โอภาเสนฺโต ทิสา สพฺพา   อาคจฺฉติ นราสโภ ฯ
       |๑๒๘.๖๙| อาสนํ ปญฺญเปตฺวาน        นิมนฺติตฺวา มหามุนึ
                        สนฺถริตฺวาน ตํ ปุปฺผํ          อติเนสึ สกํ ฆรํ ฯ
       |๑๒๘.๗๐| ยํ เม อตฺถิ สเก เคเห          อามิสํ ปจฺจุปฏฺฐิตํ
                        ตาหํ พุทฺธสฺส ปาทาสึ       ปสนฺโน เสหิ ปาณิภิ ฯ
       |๑๒๘.๗๑| ภุตฺตาวีกาลมญฺญาย         เอกํ อตฺถํ อทาสหํ
                        อนุโมทิตฺวาน สพฺพญฺญู   ปกฺกามิ อุตฺตรามุโข ฯ
       |๑๒๘.๗๒| เอกนวุเต อิโต กปฺเป         ยํ ปุปฺผมททึ ตทา
                        ทุคฺคตึ นาภิชานามิ          ปุปฺผทานสฺสิทํ ผลํ ฯ
       |๑๒๘.๗๓| อนนฺตรา อิโต กปฺเป         ราชาหุ วรทสฺสโน
                        สตฺตรตนสมฺปนฺโน           จกฺกวตฺติ มหพฺพโล ฯ
       |๑๒๘.๗๔| ปฏิสมฺภิทา จตสฺโส           วิโมกฺขาปิจ อฏฺฐิเม
                        ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
         อิตฺถํ สุทํ อายสฺมา กุสุมาสนิโย เถโร อิมา คาถาโย
อภาสิตฺถาติ ฯ
                               กุสุมาสนิยตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๒ หน้าที่ ๒๓๐-๒๓๑. https://84000.org/tipitaka/read/pali_read.php?B=32&A=4661&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=32&A=4661&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=128&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=32&siri=128 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=128 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=3683 The Pali Atthakatha in Roman :- https://84000.org/tipitaka/atthapali/read_rm.php?B=50&A=3683 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32