บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

                                    สุตฺตนฺตปิฏเก ขุทฺทกนิกายสฺส
                                                   จริยาปิฏกํ
                                      สุตฺตนฺตปิฏเก ขุทฺทกนิกายสฺส
                                                   จริยาปิฏกํ
                                                   --------
                            นโม ตสฺส ภควโต อรหโต สมฺมาสมฺพุทฺธสฺส ฯ
                                               ๑. ทานปารมิตา
                                               ปฐมํ อกิตฺติจริยํ ^๑-
     [๑]   /จริยา./ |๑.๑| กปฺเป จ สตสหสฺเส   จตุโร จ อสงฺเขยฺเย
                เอตฺถนฺตเร ยํ จริตํ                   สพฺพนฺตํ โพธิปาจนํ ฯ
       |๑.๒| อตีตกปฺเป จริตํ                      ฐปยิตฺวา ภวาภเว
                อิมมฺหิ กปฺเป จริตํ                  ปวกฺขิสฺสํ สุโณหิ เม ฯ
       |๑.๓| ยทา อหํ พฺรหารญฺเญ             สุญฺเญ วิวนกานเน ^๒-
                อชฺโฌคเหตฺวา วิหรามิ            อกิตฺติ ^๓- นาม ตาปโส ฯ
       |๑.๔| ตทา มํ ตปเตเชน                   สนฺตตฺโต ติทิวาภิภู
                ธาเรนฺโต พฺราหฺมณวณฺณํ       ภิกฺขาย มํ อุปาคมิ ฯ
       |๑.๕| ปวนา อาภฏํ ปณฺณํ               อเตลญฺจ อโลณิกํ
                มม ทฺวาเร ฐิตํ ทิสฺวา              สกฏาเหน อากิรึ ฯ
       |๑.๖| ตสฺส ทตฺวานหํ ปณฺณํ             นิกุชฺชิตฺวาน ภาชนํ
                ปุเนสนํ ชหิตฺวาน                   ปาวิสึ ปณฺณสาลกํ ฯ
@เชิงอรรถ: ^๑ ยุ. อกตฺติจริยํ ฯ ^๒ ม. วิปินกานเน ฯ ยุ. วิวินกานเน ฯ ^๓ ยุ. อกตฺติ นาม ฯ
       |๑.๗| ทุติยํ ทิวสํ ตติยํปิ                    อุปคจฺฉิ มมนฺติเก
                อกมฺปิโต อโนลคฺโค                เอวเมวมทาสหํ ฯ
       |๑.๘| น เม ตปฺปจฺจยา อตฺถิ              สรีรสฺมึ วิวณฺณิยํ
                ปีติสุเขน รติยา                       วีตินาเมมิ ตํ ทิวํ ฯ
       |๑.๙| ยทิ มาสํปิ ทฺวิมาสํ                  ทกฺขิเณยฺยํ วรํ ลเภ
                อกมฺปิโต อโนลีโน                  ทเทยฺยํ ทานมุตฺตมํ ฯ
       |๑.๑๐| น ตสฺส ทานํ ททมาโน          ยสํ ลาภญฺจ ปตฺถยึ
                  สพฺพญฺญุตํ ปตฺถยาโน         ตานิ กมฺมานิ อาจรินฺติ ฯ
                                               อกิตฺติจริยํ ปฐมํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๕๕๐-๕๕๒. https://84000.org/tipitaka/read/pali_read.php?B=33&A=11339&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=11339&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.3&item=1&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=220 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=209 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=52&A=1 The Pali Atthakatha in Roman :- https://84000.org/tipitaka/atthapali/read_rm.php?B=52&A=1 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33