ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                               สตฺตมํ มหาโกฏฺฐิกตฺเถราปทานํ (๕๓๗)
     [๑๒๗]   |๑๒๗.๒๒๑| ปทุมุตฺตโร นาม ชิโน  สพฺพโลกวิทู มุนิ
                              อิโต สตสหสฺสมฺหิ           กปฺเป อุปฺปชฺชิ จกฺขุมา ฯ
           |๑๒๗.๒๒๒| โอวาทโก วิญฺญาปโก       ตารโก สพฺพปาณินํ
                              เทสนากุสโล พุทฺโธ         ตาเรสิ ชนตํ พหุํ ฯ
           |๑๒๗.๒๒๓| อนุกมฺปโก การุณิโก         หิเตสี สพฺพปาณินํ
                              สมฺปตฺเต ติตฺถิเย สพฺเพ    ปญฺจสีเล ปติฏฺฐหิ ๑- ฯ
           |๑๒๗.๒๒๔| เอวํ นิรากุลํ อาสิ              สุญฺญตํ ติตฺถิเยหิ จ
                              วิจิตฺตํ อรหนฺเตหิ             วสีภูเตหิ ตาทิภิ ฯ
           |๑๒๗.๒๒๕| รตนานฏฺฐปญฺญาสํ          อุคฺคโต โส มหามุนิ
                              กญฺจนคฺฆิยสงฺกาโส        พตฺตึสวรลกฺขโณ ฯ
           |๑๒๗.๒๒๖| วสฺสสตสหสฺสานิ             อายุ วิชฺชติ ตาวเท
                              ตาวตา ติฏฺฐมาโน โส       ตาเรสิ ชนตํ พหุํ ฯ
           |๑๒๗.๒๒๗| ตทาหํ หํสวติยา               พฺราหฺมโณ เวทปารคู
                              อุเปตฺวา ๒- สพฺพโลกคฺคํ ๓-  อสฺโสสึ ธมฺมเทสนํ ฯ
           |๑๒๗.๒๒๘| ตทา โส สาวกํ ธีโร           ปภินฺนปฏิสมฺภิทํ ๔-
                              อตฺเถ ธมฺเม นิรุตฺเต จ       ปฏิภาเณ จ โกวิทํ ฯ
           |๑๒๗.๒๒๙| ฐเปสิ เอตทคฺคมฺหิ            ตํ สุตฺวา มุทิโต อหํ
                              สสาวกํ ชินวรํ                  สตฺตาหํ โภชยึ ตทา ฯ
@เชิงอรรถ:  ม. ยุ. ปติฏฺฐปิ ฯ อิโต ปรํ อีทิสเมว ฯ  ม. อุเปจฺจ ฯ  ยุ. สตฺตปารงฺคํ ฯ
@ ม. ยุ. ปภินฺนมติโคจรํ ฯ
           |๑๒๗.๒๓๐| ทุสฺเสหิ ฉาทยิตฺวาน      สสิสฺสํ พุทฺธสาครํ ๑-
                              นิปจฺจ ปาทมูลมฺหิ        ตณฺฐานํ ปตฺถยึ อหํ ฯ
           |๑๒๗.๒๓๑| ตโต อโวจ โลกคฺโค       ปสฺสเถตํ ทิชุตฺตมํ
                              วินตํ ปาทมูลมฺหิ ๒-     กมโลทรสปฺปภํ ฯ
           |๑๒๗.๒๓๒| เสฏฺฐํ ๓- พุทฺธสฺส ภิกฺขุสฺส  ฐานํ ปตฺถยเต อยํ
                              ตาย สทฺธาย จาเคน      สทฺธมฺมสฺสวเนน ๔- จ ฯ
           |๑๒๗.๒๓๓| สพฺพตฺถ สุขิโต หุตฺวา     สํสริตฺวา ภวาภเว
                              อนาคตมฺหิ อทฺธาเน      ลจฺฉเสตํ มโนรถํ ฯ
           |๑๒๗.๒๓๔| สตสหสฺเส อิโต กปฺเป     โอกฺกากกุลสมฺภโว
                              โคตโม นาม นาเมน      สตฺถา โลเก ภวิสฺสติ ฯ
           |๑๒๗.๒๓๕| ตสฺส ธมฺเมสุ ทายาโท    โอรโส ธมฺมนิมฺมิโต
                             โกฏฺฐิโก นาม นาเมน    เหสฺสติ สตฺถุสาวโก ฯ
           |๑๒๗.๒๓๖| ตํ สุตฺวา มุทิโต หุตฺวา     ยาวชีวํ ตทา ชินํ
                              เมตฺตจิตฺโต ปริจรึ          ยโต ๕- ปญฺญาสมาหิโต
           |๑๒๗.๒๓๗| เตน กมฺมวิปาเกน          เจตนาปณิธีหิ จ
                              ชหิตฺวา มานุสํ เทหํ        ตาวตึสํ อคญฺฉหํ ฯ
           |๑๒๗.๒๓๘| สตานํ ตีณิกฺขตฺตุญฺจ      เทวรชฺชมการยึ
                              สตานํ ปญฺจกฺขตฺตุญฺจ   จกฺกวตฺติ อโหสหํ ฯ
           |๑๒๗.๒๓๙| ปเทสรชฺชํ วิปุลํ              คณนาโต อสงฺขยํ
                              สพฺพตฺถ สุขิโต อาสึ       ตสฺส กมฺมสฺส วาหสา ฯ
@เชิงอรรถ:  ม. พุทฺธิสาครํ ฯ  ม. ปาทมูลํ เม ฯ  ม. ยุ. พุทฺธเสฏฺฐสฺส ฯ  ยุ. เตน
@ธมฺมสฺสวเนน จ ฯ  ม. ยุ. สโต ฯ
           |๑๒๗.๒๔๐| ทุเว ภเว สํสรามิ               เทวตฺเต อถ มานุเส
                              อญฺญํ คตึ น ชานามิ ๑-   สุจิณฺณสฺส อิทํ ผลํ ฯ
           |๑๒๗.๒๔๑| ทุเว กุเล ปชายามิ            ขตฺติเย วาปิ พฺราหฺมเณ
                              นีเจ กุเล น ชายามิ          สุจิณฺณสฺส อิทํ ผลํ ฯ
           |๑๒๗.๒๔๒| ปจฺฉิเม ภวสมฺปตฺเต          พฺรหฺมพนฺธุ อโหสหํ
                              สาวตฺถิยํ วิปฺปกุเล           ปจฺฉา ชาโต มหทฺธเน ๒- ฯ
           |๑๒๗.๒๔๓| มาตา จนฺทวตี นาม          ปิตา เม อสฺสลายโน
                              ยทา เม ปิตรํ พุทฺโธ         วินยิ สพฺพสุทฺธิยา ๓- ฯ
           |๑๒๗.๒๔๔| ตทา ปสนฺโน สุคเต          ปพฺพชึ อนคาริยํ
                              โมคฺคลฺลาโน อาจริโย      อุปชฺฌา สาริสมฺภโว ฯ
           |๑๒๗.๒๔๕| เกเสสุ ฉิชฺชมาเนสุ           ทิฏฺฐิ ฉินฺนา สมูลิกา
                              นิวาเสนฺโต จ กาสาวํ      อรหตฺตํ อปาปุณึ ฯ
           |๑๒๗.๒๔๖| อตฺถธมฺมนิรุตฺตีสุ             ปฏิภาเณ จ เม มติ
                              ปภินฺนา เตน โลกคฺโค      เอตทคฺเค ฐเปสิ มํ ฯ
           |๑๒๗.๒๔๗| อสนฺทิฏฺฐํ วิยากาสึ          อุปติสฺเสน ปุจฺฉิโต
                              ปฏิสมฺภิทาสุ เตนาหํ       อคฺโค สมฺพุทฺธสาสเน ฯ
           |๑๒๗.๒๔๘| กิเลสา ฌาปิตา มยฺหํ       ภวา สพฺเพ สมูหตา
                              นาโคว พนฺธนํ เฉตฺวา      วิหรามิ อนาสโว ฯ
           |๑๒๗.๒๔๙| สฺวาคตํ วต เม อาสิ          พุทฺธเสฏฺฐสฺส สนฺติเก
                              ติสฺโส วิชฺชา อนุปฺปตฺตา    กตํ พุทฺธสฺส สาสนํ ฯ
@เชิงอรรถ:  ม. ยุ. น คจฺฉามิ ฯ อิโต ปรํ อีทิสเมว ฯ  โป. มหทฺธโน ฯ  ยุ. สพฺพพุทฺธิยา ฯ
           |๑๒๗.๒๕๐| ปฏิสมฺภิทา จตสฺโส          วิโมกฺขาปิจ อฏฺฐิเม
                              ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
              อิตฺถํ สุทํ อายสฺมา มหาโกฏฺฐิโก เถโร อิมา คาถาโย อภาสิตฺถาติ ฯ
                                มหาโกฏฺฐิกตฺเถรสฺส อปทานํ สมตฺตํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๒๐๓-๒๐๖. https://84000.org/tipitaka/read/pali_read.php?B=33&A=4037&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=4037&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=127&items=1              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=127              ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=127              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=6308              The Pali Atthakatha in Roman :- https://84000.org/tipitaka/atthapali/read_rm.php?B=50&A=6308              สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]