ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                จตุตฺถํ สิงฺคาลมาตาเถริยาปทานํ (๓๔)
     [๑๗๔]   |๑๗๔.๘๑| ปทุมุตฺตโร นาม ชิโน   สพฺพธมฺมาน ปารคู
                        อิโต สตสหสฺสมฺหิ           กปฺเป อุปฺปชฺชิ นายโก ฯ
       |๑๗๔.๘๒| ตทาหํ หํสวติยา              ชาตามจฺจกุเล อหุ
                        นานารตนปชฺโชเต          อิทฺเธ ผีเต มหทฺธเน ฯ
       |๑๗๔.๘๓| ปิตุนา สห คนฺตฺวาน        มหาชนปุรกฺขตา
                        ธมฺมํ พุทฺธสฺส สุตฺวาน     ปพฺพชึ อนคาริยํ ฯ
       |๑๗๔.๘๔| ปพฺพชิตฺวาน กาเยน        ปาปกมฺมํ วิวชฺชยึ
                        วจีทุจฺจริตํ หิตฺวา             อาชีวํ ปริโสธยึ ฯ
       |๑๗๔.๘๕| พุทฺเธ ปสนฺนา ธมฺเม จ     สงฺเฆ จ ติพฺพคารวา
                        สทฺธมฺมสฺสวเน ยุตฺตา      พุทฺธทสฺสนสาลยา ๑- ฯ
       |๑๗๔.๘๖| อคฺคํ สทฺธาธิมุตฺตานํ ๒-  อสฺโสสึ ภิกฺขุนึ ตทา
                        ตํ ฐานํ ปตฺถยิตฺวาน        ติสฺโส สิกฺขา อปูรยึ ฯ
       |๑๗๔.๘๗| ตโต มํ สุคโต อาห          กรุณานุคตาสโย
                        ยสฺส สทฺธา ตถาคเต       อจลา สุปติฏฺฐิตา ฯ
       |๑๗๔.๘๘| สีลญฺจ ยสฺส กลฺยาณํ      อริยกนฺตํ ปสํสิตํ
                        สงฺเฆ ปสาโท ยสฺสตฺถิ      อุชุภูตญฺจ ทสฺสนํ ฯ
       |๑๗๔.๘๙| อทลิทฺโทติ ตํ อาหุ          อโมฆํ ตสฺส ชีวิตํ
                        ตสฺมา สทฺธญฺจ สีลญฺจ    ปสาทํ ธมฺมทสฺสนํ ฯ
@เชิงอรรถ:  ม. ยุ. ...ลาลสา ฯ อิโต ปรํ อีทิสเมว ฯ  โป. ยุ. องฺควิมุตฺตานํ ฯ
       |๑๗๔.๙๐| อนุยุญฺเชถ เมธาวี           สรํ พุทฺธานํ สาสนํ
                        ตํ สุตฺวาหํ ปมุทิตา          อปุจฺฉึ ปณิธึ มม ฯ
       |๑๗๔.๙๑| ตทา อโนโม อมิโต          พฺยากริตฺถ วินายโก
                        พุทฺธสฺส ๑- ปสนฺโน กลฺยาณี   ลจฺฉเสตํ สุปตฺถิตํ ฯ
       |๑๗๔.๙๒| สตสหสฺเส อิโต กปฺเป      โอกฺกากกุลสมฺภโว
                        โคตโม นาม นาเมน        สตฺถา โลเก ภวิสฺสติ ฯ
       |๑๗๔.๙๓| ตสฺส ธมฺเมสุ ทายาทา     โอรสา ธมฺมนิมฺมิตา
                        สิงฺคาลกสฺส ยา ๒- มาตา เหสฺสติ สตฺถุ สาวิกา ฯ
       |๑๗๔.๙๔| ตํ สุตฺวา มุทิตา หุตฺวา      ยาวชีวํ ตทา ชินํ
                        เมตฺตจิตฺตา ปริจรึ           ปฏิปตฺตีหิ นายกํ ฯ
       |๑๗๔.๙๕| เตน กมฺเมน สุกเตน        เจตนาปณิธีหิ จ
                        ชหิตฺวา มานุสํ เทหํ         ตาวตึสํ อคญฺฉหํ ฯ
       |๑๗๔.๙๖| ปจฺฉิเม จ ภเว ทานิ          คิริพฺพชปุรุตฺตเม
                        ชาตา เสฏฺฐิกุเล ผีเต        มหารตนสญฺจเย ฯ
       |๑๗๔.๙๗| ปุตฺโต สิงฺคาลโก นาม      มมาสิ ๓- วิปเถ รโต
                        ทิฏฺฐิคหณปกฺขนฺโน         ทิสาปูชนตปฺปโร ฯ
       |๑๗๔.๙๘| นานาทิสา นมสฺสติ ๔-    ปิณฺฑาย นครํ วชํ
                        ตํ ทิสฺวา อวทิ พุทฺโธ        มคฺเค ฐตฺวา วินายโก ฯ
       |๑๗๔.๙๙| ตสฺส เทสยโต ธมฺมํ          ปนาโท วิมฺหโย ๕- อหุ
                        เทฺวโกฏินรนารีนํ            ธมฺมาภิสมโย อหุ ฯ
@เชิงอรรถ:  ม. ยุ. พุทฺเธ ปสนฺนา ฯ  ม. ยุ. มาตาติ ฯ  ยุ. มตาสี ฯ
@ ม. ยุ. นมสฺสนฺตํ ฯ  โป. วิสโย ฯ ยุ. วิสเย ฯ
       |๑๗๔.๑๐๐| ตทา ตํ ๑- ปริสํ คนฺตฺวา   สุตฺวา สุคตภาสิตํ
                          โสตาปตฺติผลํ ปตฺวา      ปพฺพชึ อนคาริยํ ฯ
       |๑๗๔.๑๐๑| น จิเรเนว กาเลน          พุทฺธทสฺสนสาลยา
                          อนุสฺสตึ ตํ ภาเวตฺวา      อรหตฺตํ อปาปุณึ ฯ
       |๑๗๔.๑๐๒| ทสฺสนตฺถาย พุทฺธสฺส    สพฺพทา จ วชามหํ
                          อติตฺตาเยว ปสฺสามิ      รูปํ นยนนนฺทนํ ฯ
       |๑๗๔.๑๐๓| สพฺพปารมิสมฺภูตํ         ลกฺขินิลยนํ ปรํ ๒-
                          รูปํ สพฺพสุภากิณฺณํ       อติตฺตา วิหรามหํ ๓- ฯ
       |๑๗๔.๑๐๔| ชิโน ตสฺมึ คุเณ ตุฏฺโฐ    เอตทคฺเค ฐเปสิ มํ
                          สิงฺคาลกสฺส ยา มาตา   อคฺคา สทฺธาธิมุตฺติกา ๔- ฯ
       |๑๗๔.๑๐๕| อิทฺธีสุ จ วสี โหมิ          ทิพฺพาย โสตธาตุยา
                          เจโตปริยญาณสฺส         วสี โหมิ มหามุเน ฯ
       |๑๗๔.๑๐๖| ปุพฺเพนิวาสํ ชานามิ      ทิพฺพจกฺขุํ วิโสธิตํ
                          สพฺพาสเว ๕- ปริญฺญาย  นตฺถิ ทานิ ปุนพฺภโว ฯ
       |๑๗๔.๑๐๗| อตฺถธมฺมนิรุตฺตีสุ          ปฏิภาเณ ตเถว จ
                          ญาณํ มม มหาวีร         อุปฺปนฺนํ ตว สนฺติเก ฯ
       |๑๗๔.๑๐๘| กิเลสา ฌาปิตา มยฺหํ    ภวา สพฺเพ สมูหตา
                          นาคีว พนฺธนํ เฉตฺวา      วิหรามิ อนาสวา ฯ
       |๑๗๔.๑๐๙| สฺวาคตํ วต เม อาสิ        พุทฺธเสฏฺฐสฺส สนฺติเก
                          ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
@เชิงอรรถ:  ม. ตทาหํ ฯ  ม. ยุ. วรํ ฯ  ยุ. ภยามหํ ฯ  ยุ. สงฺควิมุตฺติกา ฯ
@ ม. ยุ. สพฺพาสวปริกฺขีณา ฯ
       |๑๗๔.๑๑๐| ปฏิสมฺภิทา จตสฺโส       วิโมกฺขาปิจ อฏฺฐิเม
                          ฉฬภิญฺญา สจฺฉิกตา     กตํ พุทฺธสฺส สาสนนฺติ ฯ
             อิตฺถํ สุทํ สิงฺคาลมาตา ภิกฺขุนี อิมา คาถาโย อภาสิตฺถาติ ฯ
                                สิงฺคาลมาตาเถริยา อปทานํ สมตฺตํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๓๘๕-๓๘๘. https://84000.org/tipitaka/read/pali_read.php?B=33&A=7896&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=7896&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=174&items=1              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=185              ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=174              สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]