ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                        เอกาทสโม สุเมธพุทฺธวํโส
     [๑๒]   |๑๒.๑| ปทุมุตฺตรสฺส อปเรน       สุเมโธ นาม นายโก
                   ทุราสโท อุคฺคเตโช              สพฺพโลกุตฺตโม ชิโน ๑- ฯ
       |๑๒.๒| ปสนฺนเนตฺโต สุมุโข             พฺรหา อุชุ ปตาปวา
                   หิเตสี สพฺพสตฺตานํ             พหู โมเจสิ พนฺธนา ฯ
       |๑๒.๓| ยทา พุทฺโธ ปาปุณิตฺวา        เกวลํ โพธิมุตฺตมํ
                   สุทสฺสนมฺหิ นคเร                ธมฺมจกฺกํ ปวตฺตยิ ฯ
       |๑๒.๔| ตสฺสาปิ อภิสมยา ตีณิ         อเหสุํ ธมฺมเทสเน
                  โกฏิสตสหสฺสานํ                  ปฐมาภิสมโย อหุ ฯ
       |๑๒.๕| ปุนาปรํ กุมฺภกณฺณํ              ยกฺขญฺจ ๒- ทมยี ชิโน
                   นวุติโกฏิสหสฺสานํ               ทุติยาภิสมโย อหุ ฯ
       |๑๒.๖| ปุนาปรํ อมิตยโส                 จตุสจฺจํ ปกาสยิ
                   อสีติโกฏิสหสฺสานํ               ตติยาภิสมโย อหุ ฯ
       |๑๒.๗| สนฺนิปาตา ตโย อาสุํ            สุเมธสฺส มเหสิโน
                   ขีณาสวานํ วิมลานํ              สนฺตจิตฺตาน ตาทินํ ฯ
       |๑๒.๘| สุทสฺสนมฺหิ นคเร ๓-            อุปคญฺฉิ ชิโน ยทา
                   ตทา ขีณาสวา ภิกฺขู             สมึสุ สตโกฏิโย ฯ
       |๑๒.๙| ปุนาปรํ เทวกูเฏ                   ภิกฺขูนํ กฐินตฺถเต
                   ตทา นวุติโกฏีนํ                  ทุติโย อาสิ สมาคโม ฯ
@เชิงอรรถ:  ม. มุนิ ฯ ยุ. สพฺพโลกุตฺตโร มุนิ ฯ  ม. ยุ. ยกฺขํ โส ฯ  ม. สุทสฺสนํ นาม
@นครํ ฯ ยุ. สุทสฺสนํ นครํ วรํ ฯ
       |๑๒.๑๐| ปุนาปรํ ทสพโล                ยทา จรติ จาริกํ
                     ตทา อสีติโกฏีนํ                ตติโย อาสิ สมาคโม ฯ
       |๑๒.๑๑| อหนฺเตน สมเยน               อุตฺตโร นาม มาณโว
                     อสีติโกฏิโย มยฺหํ              ฆเร สนฺนิจฺจิตํ ธนํ ฯ
       |๑๒.๑๒| เกวลํ สพฺพํ ทตฺวาน           สสงฺเฆ โลกนายเก ๑-
                     สรณํ ตสฺส อุปคญฺฉึ           ปพฺพชฺชํ อภิโรจยึ ฯ
       |๑๒.๑๓| โสปิ มํ ตทา ๒- พฺยากาสิ   กโรนฺโต อนุโมทนํ
                     ตึสกปฺปสหสฺสมฺหิ             อยํ พุทฺโธ ภวิสฺสติ ฯ
       |๑๒.๑๔| อหุ กปิลวฺหยา รมฺมา         นิกฺขมิตฺวา ตถาคโต
                     ปธานํ ปทหิตฺวาน              กตฺวา ทุกฺกรการิกํ ฯ
       |๑๒.๑๕| อชปาลรุกฺขมูลสฺมึ             นิสีทิตฺวา ตถาคโต
                     ตตฺถ ปายาสํ ปคฺคยฺห        เนรญฺชรมุเปหิติ ฯ
       |๑๒.๑๖| เนรญฺชราย ตีรมฺหิ             ปายาสํ อทิ โส ชิโน
                     ปฏิยตฺตวรมคฺเคน              โพธิมูลมฺหิ เอหิติ ฯ
       |๑๒.๑๗| ตโต ปทกฺขิณํ กตฺวา           โพธิมณฺฑํ อนุตฺตรํ
                     อสฺสตฺถ รุกฺขมูลมฺหิ           พุชฺฌิสฺสติ มหายโส ฯ
       |๑๒.๑๘| อิมสฺส ชนิกา มาตา           มายา นาม ภวิสฺสติ
                     ปิตา สุทฺโธทโน นาม         อยํ เหสฺสติ โคตโม ฯ
       |๑๒.๑๙| อนาสวา วีตราคา              สนฺตจิตฺตา สมาหิตา
                     โกลิโต อุปติสฺโส จ             อคฺคา เหสฺสนฺติ สาวกา
                     อานนฺโท นามุปฏฺฐาโก         อุปฏฺฐิสฺสติ มํ ชินํ ฯ
@เชิงอรรถ:  ยุ. สสงฺฆํ โลกนายก ฯ  ม. ยุ. พุทฺโธ ฯ
       |๑๒.๒๐| เขมา อุปฺปลวณฺณา จ        อคฺคา เหสฺสนฺติ สาวิกา
                     อนาสวา วีตราคา              สนฺตจิตฺตา สมาหิตา ฯ
       |๑๒.๒๑| โพธิ ตสฺส ภควโต              อสฺสตฺโถติ ปวุจฺจติ
                     จิตฺโต จ หตฺถาฬวโก          อคฺคา เหสฺสนฺตุปฏฺฐกา ฯ
       |๑๒.๒๒| นนฺทมาตา จ อุตฺตรา         อคฺคา เหสฺสนฺตุปฏฺฐิกา
                     อายุ วสฺสสตํ ตสฺส             โคตมสฺส ยสสฺสิโน ฯ
       |๑๒.๒๓| อิทํ สุตฺวาน วจนํ               อสมสฺส มเหสิโน
                     อาโมทิตา นรมรู               พุทฺธวีชงฺกุโร อยํ ฯ
       |๑๒.๒๔| อุกฺกุฏฺฐิสทฺทา วตฺตนฺติ       อปฺโผเฏนฺติ หสนฺติ จ
                     กตญฺชลี นมสฺสนฺติ            ทสสหสฺสี สเทวกา ฯ
       |๑๒.๒๕| ยทิมสฺส โลกนาถสฺส         วิรชฺฌิสฺสาม สาสนํ
                     อนาคตมฺหิ อทฺธาเน          เหสฺสาม สมฺมุขา อิมํ ฯ
       |๑๒.๒๖| ยถา มนุสฺสา นทึ ตรนฺตา   ปฏิติตฺถํ วิรชฺฌิย
                     เหฏฺฐา ติตฺถํ คเหตฺวาน      อุตฺตรนฺติ มหานทึ ฯ
       |๑๒.๒๗| เอวเมว มยํ สพฺเพ             ยทิ มุญฺจามิมํ ชินํ
                     อนาคตมฺหิ อทฺธาเน          เหสฺสาม สมฺมุขา อิมํ ฯ
       |๑๒.๒๘| ตสฺสาปิ วจนํ สุตฺวา           ภิยฺโย จิตฺตํ ปสาทยึ
                     อุตฺตรึ ๑- วตฺตมธิฏฺฐาสี     ทสปารมิปูริยา ฯ
       |๑๒.๒๙| สุตฺตนฺตํ วินยญฺจาปิ          นวงฺคสตฺถุสาสนํ
                     สพฺพํ ปริยาปุณิตฺวาน        โสภยึ ชินสาสนํ ฯ
@เชิงอรรถ:  ม. ยุ. อุตฺตริวตมธิฏฺฐาสึ ฯ
       |๑๒.๓๐| ตตฺถปฺปมตฺโต วิหรนฺโต      นิสชฺชฏฺฐานจงฺกเม
                     อภิญฺญาปารมึ ๑- ปตฺวา   พฺรหฺมโลกมคญฺฉิหํ ฯ
       |๑๒.๓๑| สุทสฺสนํ นาม นครํ            สุทตฺโต นาม ขตฺติโย
                     สุทตฺตา นาม ชนิกา           สุเมธสฺส มเหสิโน ฯ
       |๑๒.๓๒| นววสฺสสหสฺสานิ               อคารํ อชฺฌาวสิ โส
                     สุจนฺโท กญฺจโน สิริวฑฺโฒ  ตโย ปาสาทมุตฺตมา ฯ
       |๑๒.๓๓| ติโสฬสสหสฺสานิ               นาริโย สมลงฺกตา
                     สุมนา นาม สา นารี          ปุนพฺโพ ๒- นาม อตฺรโช ฯ
       |๑๒.๓๔| นิมิตฺเต จตุโร ทิสฺวา           หตฺถิยาเนน นิกฺขมิ
                     อนูนกํ อฏฺฐมาสํ               ปธานํ ปทหี ชิโน ฯ
       |๑๒.๓๕| พฺรหฺมุนา ยาจิโต สนฺโต     สุเมโธ โลกนายโก
                     วตฺตจกฺโก มหาวีโร            สุทสฺสนุยฺยานมุตฺตเม ฯ
       |๑๒.๓๖| สรโณ จ สพฺพกาโม จ        อเหสุํ อคฺคสาวกา
                     สาคโร นามุปฏฺฐาโก         สุเมธสฺส มเหสิโน ฯ
       |๑๒.๓๗| รามา เจว สุรามา จ           อเหสุํ อคฺคสาวิกา
                     โพธิ ตสฺส ภควโต              นิมฺพรุกฺโขติ ๓- ปวุจฺจติ ฯ
       |๑๒.๓๘| อุรุเวลา ๔- เจว ยสวา จ     อเหสุํ อคฺคุปฏฺฐกา
                     ยสา ๕- นาม สิริวา จ        อเหสุํ อคฺคุปฏฺฐิกา ฯ
       |๑๒.๓๙| อฏฺฐาสีติรตนานิ               อจฺจุคฺคโต มหามุนิ
                     โอภาเสติ ทิสา สพฺพา        จนฺโท ตารคเณ ยถา ฯ
@เชิงอรรถ:  ม. ยุ. อภิญฺญาสุ ปารมึ คนฺตฺวา ฯ  ม. ปุนพฺพสุ นาม ฯ ยุ. สุมิตฺโต นาม ฯ
@ ม. มหานิโปติ ฯ ยุ. มหานิมฺโพติ ฯ  ม. อุรุเวลา ยสวา จ ฯ ยุ. อุรุเวโฬ จ
@ยสโว จ ฯ  ม. ยุ. ยโสธรา สิริมา จ ฯ
       |๑๒.๔๐| จกฺกวตฺติมณิ นาม             ยถา ตปติ โยชนํ
                     ตเถว ตสฺส รตนํ                สมนฺตา ผรติ โยชนํ ฯ
       |๑๒.๔๑| นวุติวสฺสสหสฺสานิ            อายุ วิชฺชติ ตาวเท
                     ตาวตา ติฏฺฐมาโน โส        ตาเรสิ ชนตํ พหุํ ฯ
       |๑๒.๔๒| เตวิชฺชา ฉฬภิญฺญาหิ         พลปฺปตฺเตหิ ตาทิหิ
                     สมากุลมิทํ อาสิ                อรหนฺเตหิ สาสนํ ๑- ฯ
       |๑๒.๔๓| เตปิ สพฺเพ อมิตยสา         วิปฺปมุตฺตา นิรูปธี
                     ญาณาโลกํ ทสฺสยิตฺวา       นิพฺพุตา เต มหายสา ฯ
       |๑๒.๔๔| สุเมโธ ชินวโร พุทฺโธ          เมธารามมฺหิ นิพฺพุโต
                     ธาตุ วิตฺถาริกํ อาสิ             เตสุ เตสุ ปเทสโตติ ฯ
                                      สุเมธพุทฺธวํโส เอกาทสโม ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๔๘๑-๔๘๕. https://84000.org/tipitaka/read/pali_read.php?B=33&A=9892&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=9892&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.2&item=12&items=1              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=203              ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=192              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=51&A=6364              The Pali Atthakatha in Roman :- https://84000.org/tipitaka/atthapali/read_rm.php?B=51&A=6364              สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]