ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๔ ภาษาบาลี อักษรไทย พระอภิธรรมปิฎกเล่มที่ ๑ อภิ. ธมฺมสงฺคณิ

     [๕๓๙]   กตมนฺตํ รูปํ โนอุปาทา โผฏฺฐพฺพายตนํ อาโปธาตุ ฯ
     [๕๔๐]   กตมนฺตํ   รูปํ   โผฏฺฐพฺพายตนํ   ปฐวีธาตุ   เตโชธาตุ
วาโยธาตุ    กกฺขฬํ    มุทุกํ   สณฺหํ   ผรุสํ   สุขสมฺผสฺสํ   ทุกฺขสมฺผสฺสํ
ครุกํ   ลหุกํ   ยํ   โผฏฺฐพฺพํ   อนิทสฺสนํ  สปฺปฏิฆํ  กาเยน  อนิทสฺสเนน
สปฺปฏิเฆน  ผุสิ  วา  ผุสติ  วา  ผุสิสฺสติ  วา  ผุเส วา โผฏฺฐพฺโพเปโส
โผฏฺฐพฺพายตนํเปตํ โผฏฺฐพฺพธาตุเปสา อิทนฺตํ รูปํ โผฏฺฐพฺพายตนํ ฯ
     {๕๔๐.๑}   กตมนฺตํ   รูปํ   โผฏฺฐพฺพายตนํ  ปฐวีธาตุ  เตโชธาตุ
วาโยธาตุ   กกฺขฬํ   มุทุกํ   สณฺหํ  ผรุสํ  สุขสมฺผสฺสํ  ทุกฺขสมฺผสฺสํ  ครุกํ
ลหุกํ   ยมฺหิ   โผฏฺฐพฺพมฺหิ   อนิทสฺสนมฺหิ  สปฺปฏิฆมฺหิ  กาโย  อนิทสฺสโน
สปฺปฏิโฆ   ปฏิหญฺญิ   วา   ปฏิหญฺญติ   วา  ปฏิหญฺญิสฺสติ  วา  ปฏิหญฺเญ
วา  โผฏฺฐพฺโพเปโส  โผฏฺฐพฺพายตนํเปตํ  โผฏฺฐพฺพธาตุเปสา  อิทนฺตํ  รูปํ
โผฏฺฐพฺพายตนํ ฯ
     {๕๔๐.๒}   กตมนฺตํ   รูปํ   โผฏฺฐพฺพายตนํ  ปฐวีธาตุ  เตโชธาตุ
วาโยธาตุ    กกฺขฬํ    มุทุกํ   สณฺหํ   ผรุสํ   สุขสมฺผสฺสํ   ทุกฺขสมฺผสฺสํ
ครุกํ    ลหุกํ    โย    โผฏฺฐพฺโพ    อนิทสฺสโน   สปฺปฏิโฆ   กายมฺหิ
@เชิงอรรถ:  ปุริมภาณวารโต สมฺพนฺธคณนาย สตฺตมํ ภวิตพฺพํ ฯ
อนิทสฺสนมฺหิ   สปฺปฏิฆมฺหิ   ปฏิหญฺญิ   วา   ปฏิหญฺญติ   วา  ปฏิหญฺญิสฺสติ
วา      ปฏิหญฺเญ     วา     โผฏฺฐพฺโพเปโส     โผฏฺฐพฺพายตนํเปตํ
โผฏฺฐพฺพธาตุเปสา อิทนฺตํ รูปํ โผฏฺฐพฺพายตนํ ฯ
     {๕๔๐.๓}   กตมนฺตํ   รูปํ   โผฏฺฐพฺพายตนํ  ปฐวีธาตุ  เตโชธาตุ
วาโยธาตุ   กกฺขฬํ   มุทุกํ   สณฺหํ  ผรุสํ  สุขสมฺผสฺสํ  ทุกฺขสมฺผสฺสํ  ครุกํ
ลหุกํ   ยํ   โผฏฺฐพฺพํ   อารพฺภ   กายํ  นิสฺสาย  กายสมฺผสฺโส  อุปฺปชฺชิ
วา  อุปฺปชฺชติ  วา  อุปฺปชฺชิสฺสติ  วา  อุปฺปชฺเช  วา  ฯเปฯ ยํ โผฏฺฐพฺพํ
อารพฺภ   กายํ  นิสฺสาย  กายสมฺผสฺสชา  เวทนา  ฯเปฯ  สญฺญา  ฯเปฯ
เจตนา   ฯเปฯ  กายวิญฺญาณํ  อุปฺปชฺชิ  วา  อุปฺปชฺชติ  วา  อุปฺปชฺชิสฺสติ
วา  อุปฺปชฺเช  วา  ฯเปฯ  ยํโผฏฺฐพฺพารมฺมโณ กายํ นิสฺสาย กายสมฺผสฺโส
อุปฺปชฺชิ   วา   อุปฺปชฺชติ  วา  อุปฺปชฺชิสฺสติ  วา  อุปฺปชฺเช  วา  ฯเปฯ
ยํโผฏฺฐพฺพารมฺมณา กายํ นิสฺสาย
กายสมฺผสฺสชา    เวทนา   ฯเปฯ   สญฺญา   ฯเปฯ   เจตนา   ฯเปฯ
กายวิญฺญาณํ   อุปฺปชฺชิ   วา  อุปฺปชฺชติ  วา  อุปฺปชฺชิสฺสติ  วา  อุปฺปชฺเช
วา      โผฏฺฐพฺโพเปโส     โผฏฺฐพฺพายตนํเปตํ     โผฏฺฐพฺพธาตุเปสา
อิทนฺตํ รูปํ โผฏฺฐพฺพายตนํ ฯ
     [๕๔๑]   กตมนฺตํ  รูปํ  อาโปธาตุ  ยํ  อาโป  อาโปคตํ  สิเนโห
สิเนหคตํ พนฺธนตฺตํ รูปสฺส อิทนฺตํ รูปํ อาโปธาตุ ฯ
                                    อิทนฺตํ รูปํ โนอุปาทา ฯ
     [๕๔๒]   กตมนฺตํ  รูปํ  อุปาทินฺนํ  จกฺขายตนํ  โสตายตนํ ฆานายตนํ
ชิวฺหายตนํ   กายายตนํ   อิตฺถินฺทฺริยํ   ปุริสินฺทฺริยํ  ชีวิตินฺทฺริยํ  ยํ  วา
ปนญฺญมฺปิ   อตฺถิ  รูปํ  กมฺมสฺส  กตตฺตา  รูปายตนํ  คนฺธายตนํ  รสายตนํ
โผฏฺฐพฺพายตนํ    อากาสธาตุ    อาโปธาตุ   รูปสฺส   อุปจโย   รูปสฺส
สนฺตติ กพฬึกาโร อาหาโร อิทนฺตํ รูปํ อุปาทินฺนํ ฯ
     {๕๔๒.๑}   กตมนฺตํ   รูปํ   อนุปาทินฺนํ   สทฺทายตนํ  กายวิญฺญตฺติ
วจีวิญฺญตฺติ   รูปสฺส   ลหุตา   รูปสฺส  มุทุตา  รูปสฺส  กมฺมญฺญตา  รูปสฺส
ชรตา   รูปสฺส   อนิจฺจตา   ยํ  วา  ปนญฺญมฺปิ  อตฺถิ  รูปํ  น  กมฺมสฺส
กตตฺตา   รูปายตนํ   คนฺธายตนํ   รสายตนํ  โผฏฺฐพฺพายตนํ  อากาสธาตุ
อาโปธาตุ  รูปสฺส  อุปจโย  รูปสฺส  สนฺตติ  กพฬึกาโร  อาหาโร  อิทนฺตํ
รูปํ อนุปาทินฺนํ ฯ
     [๕๔๓]   กตมนฺตํ   รูปํ   อุปาทินฺนุปาทานิยํ   จกฺขายตนํ   ฯเปฯ
กายายตนํ   อิตฺถินฺทฺริยํ   ปุริสินฺทฺริยํ   ชีวิตินฺทฺริยํ   ยํ  วา  ปนญฺญมฺปิ
อตฺถิ    รูปํ    กมฺมสฺส    กตตฺตา   รูปายตนํ   คนฺธายตนํ   รสายตนํ
โผฏฺฐพฺพายตนํ    อากาสธาตุ    อาโปธาตุ   รูปสฺส   อุปจโย   รูปสฺส
สนฺตติ กพฬึกาโร อาหาโร อิทนฺตํ รูปํ อุปาทินฺนุปาทานิยํ ฯ
     {๕๔๓.๑}   กตมนฺตํ    รูปํ    อนุปาทินฺนุปาทานิยํ    สทฺทายตนํ
กายวิญฺญตฺติ    วจีวิญฺญตฺติ    รูปสฺส   ลหุตา   รูปสฺส   มุทุตา   รูปสฺส
กมฺมญฺญตา   รูปสฺส   ชรตา  รูปสฺส  อนิจฺจตา  ยํ  วา  ปนญฺญมฺปิ  อตฺถิ
รูปํ   น   กมฺมสฺส  กตตฺตา  รูปายตนํ  สทฺทายตนํ  คนฺธายตนํ  รสายตนํ
โผฏฺฐพฺพายตนํ    อากาสธาตุ    อาโปธาตุ   รูปสฺส   อุปจโย   รูปสฺส
สนฺตติ กพฬึกาโร อาหาโร อิทนฺตํ รูปํ อนุปาทินฺนุปาทานิยํ ฯ
     [๕๔๔]   กตมนฺตํ    รูปํ   สนิทสฺสนํ   รูปายตนํ   อิทนฺตํ   รูปํ
สนิทสฺสนํ    ฯ    กตมนฺตํ    รูปํ    อนิทสฺสนํ    จกฺขายตนํ    ฯเปฯ
กพฬึกาโร อาหาโร อิทนฺตํ รูปํ อนิทสฺสนํ ฯ
     [๕๔๕]   กตมนฺตํ  รูปํ  สปฺปฏิฆํ  จกฺขายตนํ  โสตายตนํ  ฆานายตนํ
ชิวฺหายตนํ   กายายตนํ   รูปายตนํ   สทฺทายตนํ   คนฺธายตนํ   รสายตนํ
โผฏฺฐพฺพายตนํ   อิทนฺตํ   รูปํ   สปฺปฏิฆํ   ฯ   กตมนฺตํ   รูปํ   อปฺปฏิฆํ
อิตฺถินฺทฺริยํ ฯเปฯ กพฬึกาโร อาหาโร อิทนฺตํ รูปํ อปฺปฏิฆํ ฯ
     [๕๔๖]   กตมนฺตํ  รูปํ  อินฺทฺริยํ  จกฺขุนฺทฺริยํ  โสตินฺทฺริยํ ฆานินฺทฺริยํ
ชิวฺหินฺทฺริยํ   กายินฺทฺริยํ   อิตฺถินฺทฺริยํ   ปุริสินฺทฺริยํ  ชีวิตินฺทฺริยํ
อิทนฺตํ   รูปํ   อินฺทฺริยํ   ฯ   กตมนฺตํ  รูปํ  นอินฺทฺริยํ  รูปายตนํ  ฯเปฯ
กพฬึกาโร อาหาโร อิทนฺตํ รูปํ นอินฺทฺริยํ ฯ
     [๕๔๗]   กตมนฺตํ   รูปํ   มหาภูตํ   โผฏฺฐพฺพายตนํ   อาโปธาตุ
อิทนฺตํ    รูปํ    มหาภูตํ   ฯ   กตมนฺตํ   รูปํ   นมหาภูตํ   จกฺขายตนํ
ฯเปฯ กพฬึกาโร อาหาโร อิทนฺตํ รูปํ นมหาภูตํ ฯ
     [๕๔๘]   กตมนฺตํ    รูปํ    วิญฺญตฺติ   กายวิญฺญตฺติ   วจีวิญฺญตฺติ
อิทนฺตํ    รูปํ    วิญฺญตฺติ   ฯ   กตมนฺตํ   รูปํ   นวิญฺญตฺติ   จกฺขายตนํ
ฯเปฯ กพฬึกาโร อาหาโร อิทนฺตํ รูปํ นวิญฺญตฺติ ฯ
     [๕๔๙]   กตมนฺตํ   รูปํ   จิตฺตสมุฏฺฐานํ   กายวิญฺญตฺติ  วจีวิญฺญตฺติ
ยํ   วา   ปนญฺญมฺปิ   อตฺถิ   รูปํ   จิตฺตชํ   จิตฺตเหตุกํ   จิตฺตสมุฏฺฐานํ
รูปายตนํ   สทฺทายตนํ  คนฺธายตนํ  รสายตนํ  โผฏฺฐพฺพายตนํ  อากาสธาตุ
อาโปธาตุ    รูปสฺส    ลหุตา    รูปสฺส   มุทุตา   รูปสฺส   กมฺมญฺญตา
รูปสฺส    อุปจโย    รูปสฺส    สนฺตติ   กพฬึกาโร   อาหาโร   อิทนฺตํ
รูปํ    จิตฺตสมุฏฺฐานํ   ฯ   กตมนฺตํ   รูปํ   นจิตฺตสมุฏฺฐานํ   จกฺขายตนํ
ฯเปฯ    กายายตนํ    อิตฺถินฺทฺริยํ    ปุริสินฺทฺริยํ    ชีวิตินฺทฺริยํ   รูปสฺส
ชรตา   รูปสฺส   อนิจฺจตา   ยํ   วา  ปนญฺญมฺปิ  อตฺถิ  รูปํ  น  จิตฺตชํ
น   จิตฺตเหตุกํ   น   จิตฺตสมุฏฺฐานํ   รูปายตนํ   สทฺทายตนํ  คนฺธายตนํ
รสายตนํ    โผฏฺฐพฺพายตนํ   อากาสธาตุ   อาโปธาตุ   รูปสฺส   ลหุตา
รูปสฺส    มุทุตา    รูปสฺส    กมฺมญฺญตา    รูปสฺส    อุปจโย   รูปสฺส
สนฺตติ กพฬึกาโร อาหาโร อิทนฺตํ รูปํ นจิตฺตสมุฏฺฐานํ ฯ
     [๕๕๐]   กตมนฺตํ    รูปํ   จิตฺตสหภุ   กายวิญฺญตฺติ   วจีวิญฺญตฺติ
อิทนฺตํ   รูปํ   จิตฺตสหภุ   ฯ   กตมนฺตํ   รูปํ   นจิตฺตสหภุ   จกฺขายตนํ
ฯเปฯ กพฬึกาโร อาหาโร อิทนฺตํ รูปํ นจิตฺตสหภุ ฯ
     [๕๕๑]   กตมนฺตํ   รูปํ   จิตฺตานุปริวตฺติ  กายวิญฺญตฺติ  วจีวิญฺญตฺติ
อิทนฺตํ  รูปํ  จิตฺตานุปริวตฺติ  ฯ  กตมนฺตํ  รูปํ  นจิตฺตานุปริวตฺติ จกฺขายตนํ
ฯเปฯ กพฬึกาโร อาหาโร อิทนฺตํ รูปํ นจิตฺตานุปริวตฺติ ฯ
     [๕๕๒]   กตมนฺตํ   รูปํ  อชฺฌตฺติกํ  จกฺขายตนํ  ฯเปฯ  กายายตนํ
อิทนฺตํ   รูปํ   อชฺฌตฺติกํ   ฯ   กตมนฺตํ   รูปํ  พาหิรํ  รูปายตนํ  ฯเปฯ
กพฬึกาโร อาหาโร อิทนฺตํ รูปํ พาหิรํ ฯ
     [๕๕๓]   กตมนฺตํ  รูปํ  โอฬาริกํ  จกฺขายตนํ  ฯเปฯ โผฏฺฐพฺพายตนํ
อิทนฺตํ    รูปํ    โอฬาริกํ    ฯ    กตมนฺตํ   รูปํ   สุขุมํ   อิตฺถินฺทฺริยํ
ฯเปฯ กพฬึกาโร อาหาโร อิทนฺตํ รูปํ สุขุมํ ฯ
     [๕๕๔]   กตมนฺตํ   รูปํ   ทูเร   อิตฺถินฺทฺริยํ   ฯเปฯ  กพฬึกาโร
อาหาโร   อิทนฺตํ   รูปํ   ทูเร   ฯ  กตมนฺตํ  รูปํ  สนฺติเก  จกฺขายตนํ
ฯเปฯ โผฏฺฐพฺพายตนํ อิทนฺตํ รูปํ สนฺติเก ฯ
     [๕๕๕]   กตมนฺตํ    รูปํ    จกฺขุสมฺผสฺสสฺส   วตฺถุ   จกฺขายตนํ
อิทนฺตํ   รูปํ   จกฺขุสมฺผสฺสสฺส   วตฺถุ   ฯ  กตมนฺตํ  รูปํ  จกฺขุสมฺผสฺสสฺส
นวตฺถุ    โสตายตนํ    ฯเปฯ    กพฬึกาโร   อาหาโร   อิทนฺตํ   รูปํ
จกฺขุสมฺผสฺสสฺส นวตฺถุ ฯ
     [๕๕๖]   กตมนฺตํ  รูปํ  จกฺขุสมฺผสฺสชาย  เวทนาย  ฯเปฯ  สญฺญาย
ฯเปฯ     เจตนาย    ฯเปฯ    จกฺขุวิญฺญาณสฺส    วตฺถุ    จกฺขายตนํ
อิทนฺตํ   รูปํ   จกฺขุวิญฺญาณสฺส   วตฺถุ   ฯ  กตมนฺตํ  รูปํ  จกฺขุวิญฺญาณสฺส
นวตฺถุ    โสตายตนํ    ฯเปฯ    กพฬึกาโร   อาหาโร   อิทนฺตํ   รูปํ
จกฺขุวิญฺญาณสฺส นวตฺถุ ฯ
     [๕๕๗]   กตมนฺตํ   รูปํ   โสตสมฺผสฺสสฺส   ฯเปฯ  ฆานสมฺผสฺสสฺส
ฯเปฯ    ชิวฺหาสมฺผสฺสสฺส   ฯเปฯ   กายสมฺผสฺสสฺส   วตฺถุ   กายายตนํ
อิทนฺตํ   รูปํ   กายสมฺผสฺสสฺส   วตฺถุ   ฯ  กตมนฺตํ  รูปํ  กายสมฺผสฺสสฺส
นวตฺถุ    จกฺขายตนํ    ฯเปฯ    กพฬึกาโร   อาหาโร   อิทนฺตํ   รูปํ
กายสมฺผสฺสสฺส นวตฺถุ ฯ
     [๕๕๘]   กตมนฺตํ  รูปํ  กายสมฺผสฺสชาย  เวทนาย  ฯเปฯ  สญฺญาย
ฯเปฯ   เจตนาย   ฯเปฯ   กายวิญฺญาณสฺส   วตฺถุ   กายายตนํ  อิทนฺตํ
รูปํ    กายวิญฺญาณสฺส    วตฺถุ    ฯ    กตมนฺตํ   รูปํ   กายวิญฺญาณสฺส
นวตฺถุ    จกฺขายตนํ    ฯเปฯ    กพฬึกาโร   อาหาโร   อิทนฺตํ   รูปํ
กายวิญฺญาณสฺส นวตฺถุ ฯ
     [๕๕๙]   กตมนฺตํ   รูปํ   จกฺขุสมฺผสฺสสฺส   อารมฺมณํ   รูปายตนํ
อิทนฺตํ   รูปํ  จกฺขุสมฺผสฺสสฺส  อารมฺมณํ  ฯ  กตมนฺตํ  รูปํ  จกฺขุสมฺผสฺสสฺส
นอารมฺมณํ      จกฺขายตนํ      ฯเปฯ      กพฬึกาโร      อาหาโร
อิทนฺตํ รูปํ จกฺขุสมฺผสฺสสฺส นอารมฺมณํ ฯ
     [๕๖๐]   กตมนฺตํ  รูปํ  จกฺขุสมฺผสฺสชาย  เวทนาย  ฯเปฯ  สญฺญาย
ฯเปฯ    เจตนาย    ฯเปฯ    จกฺขุวิญฺญาณสฺส    อารมฺมณํ   รูปายตนํ
อิทนฺตํ   รูปํ  จกฺขุวิญฺญาณสฺส  อารมฺมณํ  ฯ  กตมนฺตํ  รูปํ  จกฺขุวิญฺญาณสฺส
นอารมฺมณํ      จกฺขายตนํ      ฯเปฯ      กพฬึกาโร      อาหาโร
อิทนฺตํ รูปํ จกฺขุวิญฺญาณสฺส นอารมฺมณํ ฯ
     [๕๖๑]   กตมนฺตํ   รูปํ   โสตสมฺผสฺสสฺส   ฯเปฯ  ฆานสมฺผสฺสสฺส
ฯเปฯ     ชิวฺหาสมฺผสฺสสฺส     ฯเปฯ     กายสมฺผสฺสสฺส     อารมฺมณํ
โผฏฺฐพฺพายตนํ   อิทนฺตํ   รูปํ   กายสมฺผสฺสสฺส   อารมฺมณํ   ฯ  กตมนฺตํ
รูปํ    กายสมฺผสฺสสฺส    นอารมฺมณํ    จกฺขายตนํ   ฯเปฯ   กพฬึกาโร
อาหาโร อิทนฺตํ รูปํ กายสมฺผสฺสสฺส นอารมฺมณํ ฯ
     [๕๖๒]   กตมนฺตํ  รูปํ  กายสมฺผสฺสชาย  เวทนาย  ฯเปฯ  สญฺญาย
ฯเปฯ   เจตนาย   ฯเปฯ   กายวิญฺญาณสฺส   อารมฺมณํ   โผฏฺฐพฺพายตนํ
อิทนฺตํ      รูปํ      กายวิญฺญาณสฺส     อารมฺมณํ     ฯ     กตมนฺตํ
รูปํ    กายวิญฺญาณสฺส    นอารมฺมณํ    จกฺขายตนํ   ฯเปฯ   กพฬึกาโร
อาหาโร อิทนฺตํ รูปํ กายวิญฺญาณสฺส นอารมฺมณํ ฯ
     [๕๖๓]   กตมนฺตํ   รูปํ  จกฺขายตนํ  ยํ  จกฺขุํ  จตุนฺนํ  มหาภูตานํ
อุปาทาย    ปสาโท    ฯเปฯ    สุญฺโญ    คาโมเปโส   อิทนฺตํ   รูปํ
จกฺขายตนํ    ฯ    กตมนฺตํ    รูปํ   นจกฺขายตนํ   โสตายตนํ   ฯเปฯ
กพฬึกาโร อาหาโร อิทนฺตํ รูปํ นจกฺขายตนํ ฯ
     [๕๖๔]   กตมนฺตํ   รูปํ   โสตายตนํ   ฯเปฯ  ฆานายตนํ  ฯเปฯ
ชิวฺหายตนํ    ฯเปฯ    กายายตนํ   โย   กาโย   จตุนฺนํ   มหาภูตานํ
อุปาทาย    ปสาโท    ฯเปฯ    สุญฺโญ    คาโมเปโส   อิทนฺตํ   รูปํ
กายายตนํ    ฯ    กตมนฺตํ    รูปํ   นกายายตนํ   จกฺขายตนํ   ฯเปฯ
กพฬึกาโร อาหาโร อิทนฺตํ รูปํ นกายายตนํ ฯ
     [๕๖๕]   กตมนฺตํ   รูปํ   รูปายตนํ   ยํ  รูปํ  จตุนฺนํ  มหาภูตานํ
อุปาทาย   วณฺณนิภา   ฯเปฯ   รูปธาตุเปสา  อิทนฺตํ  รูปํ  รูปายตนํ  ฯ
กตมนฺตํ   รูปํ   นรูปายตนํ   จกฺขายตนํ   ฯเปฯ   กพฬึกาโร  อาหาโร
อิทนฺตํ รูปํ นรูปายตนํ ฯ
     [๕๖๖]   กตมนฺตํ   รูปํ   สทฺทายตนํ   ฯเปฯ  คนฺธายตนํ  ฯเปฯ
รสายตนํ   ฯเปฯ   โผฏฺฐพฺพายตนํ  ปฐวีธาตุ  ฯเปฯ  โผฏฺฐพฺพธาตุเปสา
อิทนฺตํ    รูปํ    โผฏฺฐพฺพายตนํ   ฯ   กตมนฺตํ   รูปํ   นโผฏฺฐพฺพายตนํ
จกฺขายตนํ     ฯเปฯ     กพฬึกาโร     อาหาโร     อิทนฺตํ     รูปํ
นโผฏฺฐพฺพายตนํ ฯ
     [๕๖๗]   กตมนฺตํ   รูปํ   จกฺขุธาตุ   จกฺขายตนํ   อิทนฺตํ   รูปํ
จกฺขุธาตุ    ฯ    กตมนฺตํ    รูปํ    นจกฺขุธาตุ    โสตายตนํ   ฯเปฯ
กพฬึกาโร อาหาโร อิทนฺตํ รูปํ นจกฺขุธาตุ ฯ
     [๕๖๘]   กตมนฺตํ   รูปํ   โสตธาตุ   ฯเปฯ   ฆานธาตุ   ฯเปฯ
ชิวฺหาธาตุ   ฯเปฯ   กายธาตุ   กายายตนํ   อิทนฺตํ  รูปํ  กายธาตุ  ฯ
กตมนฺตํ   รูปํ   นกายธาตุ   จกฺขายตนํ   ฯเปฯ   กพฬึกาโร  อาหาโร
อิทนฺตํ รูปํ นกายธาตุ ฯ
     [๕๖๙]   กตมนฺตํ  รูปํ  รูปธาตุ  รูปายตนํ  อิทนฺตํ  รูปํ  รูปธาตุ ฯ
กตมนฺตํ     รูปํ     นรูปธาตุ     จกฺขายตนํ     ฯเปฯ    กพฬึกาโร
อาหาโร อิทนฺตํ รูปํ นรูปธาตุ ฯ
     [๕๗๐]   กตมนฺตํ   รูปํ   สทฺทธาตุ   ฯเปฯ   คนฺธธาตุ   ฯเปฯ
รสธาตุ     ฯเปฯ    โผฏฺฐพฺพธาตุ    โผฏฺฐพฺพายตนํ    อิทนฺตํ    รูปํ
โผฏฺฐพฺพธาตุ   ฯ   กตมนฺตํ   รูปํ   นโผฏฺฐพฺพธาตุ   จกฺขายตนํ  ฯเปฯ
กพฬึกาโร อาหาโร อิทนฺตํ รูปํ นโผฏฺฐพฺพธาตุ ฯ
     [๕๗๑]   กตมนฺตํ   รูปํ  จกฺขุนฺทฺริยํ  ยํ  จกฺขุํ  จตุนฺนํ  มหาภูตานํ
อุปาทาย    ปสาโท    ฯเปฯ    สุญฺโญ    คาโมเปโส   อิทนฺตํ   รูปํ
จกฺขุนฺทฺริยํ    ฯ    กตมนฺตํ    รูปํ   นจกฺขุนฺทฺริยํ   โสตายตนํ   ฯเปฯ
กพฬึกาโร อาหาโร อิทนฺตํ รูปํ นจกฺขุนฺทฺริยํ ฯ
     [๕๗๒]   กตมนฺตํ   รูปํ   โสตินฺทฺริยํ   ฯเปฯ  ฆานินฺทฺริยํ  ฯเปฯ
ชิวฺหินฺทฺริยํ    ฯเปฯ    กายินฺทฺริยํ   โย   กาโย   จตุนฺนํ   มหาภูตานํ
อุปาทาย    ปสาโท    ฯเปฯ    สุญฺโญ    คาโมเปโส   อิทนฺตํ   รูปํ
กายินฺทฺริยํ    ฯ    กตมนฺตํ    รูปํ   นกายินฺทฺริยํ   จกฺขายตนํ   ฯเปฯ
กพฬึกาโร อาหาโร อิทนฺตํ รูปํ นกายินฺทฺริยํ ฯ
     [๕๗๓]   กตมนฺตํ   รูปํ   อิตฺถินฺทฺริยํ   ยํ   อิตฺถิยา   อิตฺถีลิงฺคํ
อิตฺถีนิมิตฺตํ   อิตฺถีกุตฺตํ   อิตฺถากปฺโป   อิตฺถิตฺตํ   อิตฺถีภาโว   อิทนฺตํ
รูปํ   อิตฺถินฺทฺริยํ   ฯ   กตมนฺตํ   รูปํ   นอิตฺถินฺทฺริยํ  จกฺขายตนํ  ฯเปฯ
กพฬึกาโร อาหาโร อิทนฺตํ รูปํ นอิตฺถินฺทฺริยํ ฯ
     [๕๗๔]   กตมนฺตํ   รูปํ   ปุริสินฺทฺริยํ   ยํ   ปุริสสฺส   ปุริสลิงฺคํ
ปุริสนิมิตฺตํ    ปุริสกุตฺตํ    ปุริสากปฺโป    ปุริสตฺตํ   ปุริสภาโว   อิทนฺตํ
รูปํ   ปุริสินฺทฺริยํ   ฯ   กตมนฺตํ   รูปํ   นปุริสินฺทฺริยํ  จกฺขายตนํ  ฯเปฯ
กพฬึกาโร อาหาโร อิทนฺตํ รูปํ นปุริสินฺทฺริยํ ฯ
     [๕๗๕]   กตมนฺตํ   รูปํ   ชีวิตินฺทฺริยํ   โย  เตสํ  รูปีนํ  ธมฺมานํ
อายุ  ฐิติ  ยปนา  ยาปนา  อิริยนา  วตฺตนา  ปาลนา  ชีวิตํ  ชีวิตินฺทฺริยํ
อิทนฺตํ   รูปํ   ชีวิตินฺทฺริยํ   ฯ   กตมนฺตํ  รูปํ  นชีวิตินฺทฺริยํ  จกฺขายตนํ
ฯเปฯ กพฬึกาโร อาหาโร อิทนฺตํ รูปํ นชีวิตินฺทฺริยํ ฯ
     [๕๗๖]   กตมนฺตํ   รูปํ   กายวิญฺญตฺติ   ยา   กุสลจิตฺตสฺส   วา
อกุสลจิตฺตสฺส    วา    อพฺยากตจิตฺตสฺส    วา    อภิกฺกมนฺตสฺส    วา
ปฏิกฺกมนฺตสฺส  วา  อาโลเกนฺตสฺส  วา  วิโลเกนฺตสฺส  วา สมฺมิญฺเชนฺตสฺส
วา     ปสาเรนฺตสฺส     วา     กายสฺส     ถมฺภนา     สนฺถมฺภนา
สนฺถมฺภิตตฺตํ     วิญฺญตฺติ    วิญฺญาปนา    วิญฺญาปิตตฺตํ    อิทนฺตํ    รูปํ
กายวิญฺญตฺติ    ฯ   กตมนฺตํ   รูปํ   นกายวิญฺญตฺติ   จกฺขายตนํ   ฯเปฯ
กพฬึกาโร อาหาโร อิทนฺตํ รูปํ นกายวิญฺญตฺติ ฯ
     [๕๗๗]   กตมนฺตํ   รูปํ   วจีวิญฺญตฺติ   ยา   กุสลจิตฺตสฺส   วา
อกุสลจิตฺตสฺส   วา   อพฺยากตจิตฺตสฺส   วา   วาจา   คิรา   พฺยปฺปโถ
อุทีรณํ   โฆโส   โฆสกมฺมํ   วาจา   วจีเภโท   อยํ   วุจฺจติ   วาจา
ยา    ตาย    วาจาย    วิญฺญตฺติ   วิญฺญาปนา   วิญฺญาปิตตฺตํ   อิทนฺตํ
รูปํ    วจีวิญฺญตฺติ    ฯ    กตมนฺตํ    รูปํ    นวจีวิญฺญตฺติ   จกฺขายตนํ
ฯเปฯ กพฬึกาโร อาหาโร อิทนฺตํ รูปํ นวจีวิญฺญตฺติ ฯ
     [๕๗๘]   กตมนฺตํ   รูปํ   อากาสธาตุ  โย  อากาโส  อากาสคตํ
อฆํ   อฆคตํ   วิวโร   วิวรคตํ   อสมฺผุฏฺฐํ   จตูหิ   มหาภูเตหิ  อิทนฺตํ
รูปํ    อากาสธาตุ    ฯ    กตมนฺตํ   รูปํ   นอากาสธาตุ   จกฺขายตนํ
ฯเปฯ กพฬึกาโร อาหาโร อิทนฺตํ รูปํ นอากาสธาตุ ฯ
     [๕๗๙]   กตมนฺตํ  รูปํ  อาโปธาตุ  ยํ  อาโป  อาโปคตํ  สิเนโห
สิเนหคตํ   พนฺธนตฺตํ   รูปสฺส   อิทนฺตํ   รูปํ   อาโปธาตุ   ฯ  กตมนฺตํ
รูปํ   นอาโปธาตุ   จกฺขายตนํ   ฯเปฯ   กพฬึกาโร   อาหาโร  อิทนฺตํ
รูปํ นอาโปธาตุ ฯ
     [๕๘๐]   กตมนฺตํ   รูปํ   รูปสฺส   ลหุตา   ยา   รูปสฺส  ลหุตา
ลหุปริณามตา     อทนฺธนตา     อวิตฺถนตา    อิทนฺตํ    รูปํ    รูปสฺส
ลหุตา    ฯ    กตมนฺตํ   รูปํ   รูปสฺส   นลหุตา   จกฺขายตนํ   ฯเปฯ
กพฬึกาโร อาหาโร อิทนฺตํ รูปํ รูปสฺส นลหุตา ฯ
     [๕๘๑]   กตมนฺตํ   รูปํ   รูปสฺส   มุทุตา   ยา   รูปสฺส  มุทุตา
มทฺทวตา   อกกฺขฬตา   อกถินตา   อิทนฺตํ   รูปํ   รูปสฺส   มุทุตา   ฯ
กตมนฺตํ    รูปํ    รูปสฺส    นมุทุตา   จกฺขายตนํ   ฯเปฯ   กพฬึกาโร
อาหาโร อิทนฺตํ รูปํ รูปสฺส นมุทุตา ฯ
     [๕๘๒]   กตมนฺตํ    รูปํ    รูปสฺส   กมฺมญฺญตา   ยา   รูปสฺส
กมฺมญฺญตา     กมฺมญฺญตฺตํ     กมฺมญฺญภาโว    อิทนฺตํ    รูปํ    รูปสฺส
กมฺมญฺญตา    ฯ    กตมนฺตํ    รูปํ   รูปสฺส   นกมฺมญฺญตา   จกฺขายตนํ
ฯเปฯ กพฬึกาโร อาหาโร อิทนฺตํ รูปํ รูปสฺส นกมฺมญฺญตา ฯ
     [๕๘๓]   กตมนฺตํ  รูปํ  รูปสฺส  อุปจโย  โย  อายตนานํ  อาจโย
โส   รูปสฺส   อุปจโย   อิทนฺตํ   รูปํ   รูปสฺส   อุปจโย   ฯ  กตมนฺตํ
รูปํ    รูปสฺส   นอุปจโย   จกฺขายตนํ   ฯเปฯ   กพฬึกาโร   อาหาโร
อิทนฺตํ รูปํ รูปสฺส นอุปจโย ฯ
     [๕๘๔]   กตมนฺตํ   รูปํ   รูปสฺส   สนฺตติ   โย  รูปสฺส  อุปจโย
สา   รูปสฺส   สนฺตติ   อิทนฺตํ   รูปํ   รูปสฺส  สนฺตติ  ฯ  กตมนฺตํ  รูปํ
รูปสฺส   นสนฺตติ   จกฺขายตนํ   ฯเปฯ   กพฬึกาโร   อาหาโร   อิทนฺตํ
รูปํ รูปสฺส นสนฺตติ ฯ
     [๕๘๕]   กตมนฺตํ   รูปํ   รูปสฺส   ชรตา   ยา   รูปสฺส   ชรา
ชีรณตา   ขณฺฑิจฺจํ   ปาลิจฺจํ   วลิตฺตจตา   อายุโน   สํหานิ  อินฺทฺริยานํ
ปริปาโก   อิทนฺตํ   รูปํ   รูปสฺส   ชรตา   ฯ   กตมนฺตํ   รูปํ  รูปสฺส
นชรตา     จกฺขายตนํ     ฯเปฯ    กพฬึกาโร    อาหาโร    อิทนฺตํ
รูปํ รูปสฺส นชรตา ฯ
     [๕๘๖]   กตมนฺตํ   รูปํ   รูปสฺส   อนิจฺจตา   โย  รูปสฺส  ขโย
วโย   เภโท   ปริเภโท   อนิจฺจตา   อนฺตรธานํ   อิทนฺตํ  รูปํ  รูปสฺส
อนิจฺจตา   ฯ   กตมนฺตํ   รูปํ   รูปสฺส   นอนิจฺจตา  จกฺขายตนํ  ฯเปฯ
กพฬึกาโร อาหาโร อิทนฺตํ รูปํ รูปสฺส นอนิจฺจตา ฯ
     [๕๘๗]   กตมนฺตํ   รูปํ  กพฬึกาโร  อาหาโร  โอทโน  กุมฺมาโส
สตฺตุ   มจฺโฉ   มํสํ   ขีรํ   ทธิ   สปฺปิ   นวนีตํ   เตลํ   มธุ  ผาณิตํ
ยํ   วา   ปนญฺญมฺปิ   อตฺถิ   รูปํ   ยมฺหิ   ยมฺหิ  ชนปเท  เตสํ  เตสํ
สตฺตานํ    มุขาสิยํ   ทนฺตวิขาทนํ   คลชฺโฌหรณียํ   กุจฺฉิวิตฺถมฺภนํ   ยาย
โอชาย   สตฺตา   ยาเปนฺติ   อิทนฺตํ   รูปํ   กพฬึกาโร   อาหาโร  ฯ
กตมนฺตํ   รูปํ   น   กพฬึกาโร   อาหาโร   จกฺขายตนํ  ฯเปฯ  รูปสฺส
อนิจฺจตา อิทนฺตํ รูปํ น กพฬึกาโร อาหาโร ฯ
                                   เอวํ ทุวิเธน รูปสงฺคโห ฯ
                                    ทุกนิทฺเทโส นิฏฺฐิโต ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๔ หน้าที่ ๒๑๕-๒๒๗. https://84000.org/tipitaka/read/pali_read.php?B=34&A=4328&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=34&A=4328&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=34&item=539&items=49              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=34&siri=51              ศึกษาอรรถกถานี้ได้ที่ :- https://84000.org/tipitaka/attha/attha.php?b=34&i=539              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=53&A=9733              The Pali Atthakatha in Roman :- https://84000.org/tipitaka/atthapali/read_rm.php?B=53&A=9733              สารบัญพระไตรปิฎกเล่มที่ ๓๔ https://84000.org/tipitaka/read/?index_34 https://84000.org/tipitaka/english/?index_34

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]