ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๔ ภาษาบาลี อักษรไทย พระอภิธรรมปิฎกเล่มที่ ๑ อภิ. ธมฺมสงฺคณิ

     [๗๔๘]   กตเม   ธมฺมา  นีวรณา  ฉ  นีวรณานิ  กามจฺฉนฺทนีวรณํ
พฺยาปาทนีวรณํ    ถีนมิทฺธนีวรณํ    อุทฺธจฺจกุกฺกุจฺจนีวรณํ    วิจิกิจฺฉานีวรณํ
อวิชฺชานีวรณํ ฯ
     [๗๔๙]   ตตฺถ  กตมํ  กามจฺฉนฺทนีวรณํ  โย  กาเมสุ  กามจฺฉนฺโท
กามราโค   กามนนฺที  กามตณฺหา  กามสิเนโห  กามปริฬาโห  กามมุจฺฉา
กามชฺโฌสานํ อิทํ วุจฺจติ กามจฺฉนฺทนีวรณํ ฯ
     [๗๕๐]   ตตฺถ  กตมํ  พฺยาปาทนีวรณํ  อนตฺถํ  เม  อจรีติ อาฆาโต
ชายติ  อนตฺถํ  เม  จรตีติ  อาฆาโต ชายติ อนตฺถํ เม จริสฺสตีติ อาฆาโต
ชายติ  ปิยสฺส  เม  มนาปสฺส อนตฺถํ อจริ ฯเปฯ อนตฺถํ จรติ ฯเปฯ อนตฺถํ
จริสฺสตีติ  อาฆาโต  ชายติ อปฺปิยสฺส เม อมนาปสฺส อตฺถํ อจริ ฯเปฯ อตฺถํ
จรติ   ฯเปฯ   อตฺถํ   จริสฺสตีติ   อาฆาโต   ชายติ   อฏฺฐาเน   วา
ปน   อาฆาโต   ชายติ   โย   เอวรูโป  จิตฺตสฺส  อาฆาโต  ปฏิฆาโต
ปฏิฆํ    ปฏิวิโรโธ    โกโป   ปโกโป   สมฺปโกโป   โทโส   ปโทโส
สมฺปโทโส    จิตฺตสฺส    พฺยาปตฺติ    มโนปโทโส    โกโธ    กุชฺฌนา
กุชฺฌิตตฺตํ     โทโส     ทูสนา    ทูสิตตฺตํ    พฺยาปตฺติ    พฺยาปชฺชนา
พฺยาปชฺชิตตฺตํ   วิโรโธ   ปฏิวิโรโธ   จณฺฑิกฺกํ   อสุโรโป   อนตฺตมนตา
จิตฺตสฺส อิทํ วุจฺจติ พฺยาปาทนีวรณํ ฯ
     [๗๕๑]   ตตฺถ   กตมํ  ถีนมิทฺธนีวรณํ  อตฺถิ  ถีนํ  อตฺถิ  มิทฺธํ  ฯ
ตตฺถ   กตมํ   ถีนํ   ยา   จิตฺตสฺส   อกลฺยตา   อกมฺมญฺญตา  โอลียนา
สลฺลียนา    ลีนํ   ลียนา   ลียิตตฺตํ   ถีนํ   ถียนา   ถียิตตฺตํ   จิตฺตสฺส
อิทํ   วุจฺจติ   ถีนํ   ฯ   ตตฺถ   กตมํ   มิทฺธํ  ยา  กายสฺส  อกลฺยตา
อกมฺมญฺญตา   โอนาโห   ปริโยนาโห   อนฺโตสโมโรโธ   มิทฺธํ   โสปฺปํ
ปจลายิกา   โสปฺปํ   สุปนา   สุปิตตฺตํ   อิทํ   วุจฺจติ   มิทฺธํ   ฯ  อิติ
อิทญฺจ ถีนํ อิทญฺจ มิทฺธํ ฯ อิทํ วุจฺจติ ถีนมิทฺธนีวรณํ ฯ
     [๗๕๒]   ตตฺถ    กตมํ   อุทฺธจฺจกุกฺกุจฺจนีวรณํ   อตฺถิ   อุทฺธจฺจํ
อตฺถิ   กุกฺกุจฺจํ   ฯ   ตตฺถ   กตมํ   อุทฺธจฺจํ   ยํ   จิตฺตสฺส   อุทฺธจฺจํ
อวูปสโม  เจตโส  วิกฺเขโป  ภนฺตตฺตํ  จิตฺตสฺส  อิทํ  วุจฺจติ  อุทฺธจฺจํ  ฯ
ตตฺถ   กตมํ   กุกฺกุจฺจํ  อกปฺปิเย  กปฺปิยสญฺญิตา  กปฺปิเย  อกปฺปิยสญฺญิตา
อวชฺเช     วชฺชสญฺญิตา     วชฺเช     อวชฺชสญฺญิตา    ยํ    เอวรูปํ
กุกฺกุจฺจํ  กุกฺกุจฺจายนา  กุกฺกุจฺจายิตตฺตํ  เจตโส  วิปฺปฏิสาโร  มโนวิเลโข
อิทํ    วุจฺจติ    กุกฺกุจฺจํ    ฯ    อิติ    อิทญฺจ    อุทฺธจฺจํ    อิทญฺจ
กุกฺกุจฺจํ ฯ อิทํ วุจฺจติ อุทฺธจฺจกุกฺกุจฺจนีวรณํ ฯ
     [๗๕๓]   ตตฺถ   กตมํ   วิจิกิจฺฉานีวรณํ  สตฺถริ  กงฺขติ  วิจิกิจฺฉติ
ธมฺเม   กงฺขติ   วิจิกิจฺฉติ   สงฺเฆ   กงฺขติ  วิจิกิจฺฉติ  สิกฺขาย  กงฺขติ
วิจิกิจฺฉติ   ปุพฺพนฺเต   กงฺขติ   วิจิกิจฺฉติ   อปรนฺเต   กงฺขติ  วิจิกิจฺฉติ
ปุพฺพนฺตาปรนฺเต     กงฺขติ    วิจิกิจฺฉติ    อิทปฺปจฺจยตาปฏิจฺจสมุปฺปนฺเนสุ
ธมฺเมสุ  กงฺขติ  วิจิกิจฺฉติ  ยา  เอวรูปา  กงฺขา  กงฺขายนา กงฺขายิตตฺตํ
วิมติ    วิจิกิจฺฉา    เทฺวฬฺหกํ    เทฺวธาปโถ    สํสโย   อเนกํสคาโห
อาสปฺปนา     ปริสปฺปนา     อปริโยคาหนา     ถมฺภิตตฺตํ     จิตฺตสฺส
มโนวิเลโข อิทํ วุจฺจติ วิจิกิจฺฉานีวรณํ ฯ
     [๗๕๔]   ตตฺถ  กตมํ  อวิชฺชานีวรณํ  ทุกฺเข  อญฺญาณํ  ทุกฺขสมุทเย
อญฺญาณํ     ทุกฺขนิโรเธ     อญฺญาณํ    ทุกฺขนิโรธคามินิยา    ปฏิปทาย
อญฺญาณํ    ปุพฺพนฺเต    อญฺญาณํ   อปรนฺเต   อญฺญาณํ   ปุพฺพนฺตาปรนฺเต
อญฺญาณํ     อิทปฺปจฺจยตาปฏิจฺจสมุปฺปนฺเนสุ     ธมฺเมสุ    อญฺญาณํ    ยํ
เอวรูปํ  อญฺญาณํ  อทสฺสนํ  อนภิสมโย  อนนุโพโธ  อสมฺโพโธ อปฺปฏิเวโธ
อสงฺคาหนา      อปริโยคาหนา      อสมเปกฺขนา     อปฺปจฺจเวกฺขณา
อปฺปจฺจกฺขกมฺมํ    ทุมฺเมชฺฌํ    พาลฺยํ    อสมฺปชญฺญํ    โมโห   ปโมโห
สมฺโมโห  อวิชฺชา  อวิชฺโชโฆ อวิชฺชาโยโค อวิชฺชานุสโย อวิชฺชาปริยุฏฺฐานํ
อวิชฺชาลงฺคี โมโห อกุสลํ อิทํ วุจฺจติ อวิชฺชานีวรณํ ฯ
                                    อิเม ธมฺมา นีวรณา ฯ
     [๗๕๕]   กตเม  ธมฺมา  โนนีวรณา  เต  ธมฺเม ฐเปตฺวา อวเสสา
กุสลากุสลาพฺยากตา    ธมฺมา    กามาวจรา   รูปาวจรา   อรูปาวจรา
อปริยาปนฺนา     เวทนากฺขนฺโธ    ฯเปฯ    วิญฺญาณกฺขนฺโธ    สพฺพญฺจ
รูปํ อสงฺขตา จ ธาตุ อิเม ธมฺมา โนนีวรณา ฯ
     [๗๕๖]   กตเม   ธมฺมา  นีวรณิยา  สาสวา  กุสลากุสลาพฺยากตา
ธมฺมา    กามาวจรา    รูปาวจรา   อรูปาวจรา   รูปกฺขนฺโธ   ฯเปฯ
วิญฺญาณกฺขนฺโธ   อิเม   ธมฺมา  นีวรณิยา  ฯ  กตเม  ธมฺมา  อนีวรณิยา
อปริยาปนฺนา   มคฺคา   จ   มคฺคผลานิ   จ  อสงฺขตา  จ  ธาตุ  อิเม
ธมฺมา อนีวรณิยา ฯ
     [๗๕๗]   กตเม   ธมฺมา   นีวรณสมฺปยุตฺตา   เตหิ  ธมฺเมหิ  เย
ธมฺมา    สมฺปยุตฺตา    เวทนากฺขนฺโธ   ฯเปฯ   วิญฺญาณกฺขนฺโธ   อิเม
ธมฺมา   นีวรณสมฺปยุตฺตา   ฯ   กตเม   ธมฺมา   นีวรณวิปฺปยุตฺตา  เตหิ
ธมฺเมหิ   เย  ธมฺมา  วิปฺปยุตฺตา  เวทนากฺขนฺโธ  ฯเปฯ  วิญฺญาณกฺขนฺโธ
สพฺพญฺจ รูปํ อสงฺขตา จ ธาตุ อิเม ธมฺมา นีวรณวิปฺปยุตฺตา ฯ
     [๗๕๘]   กตเม  ธมฺมา  นีวรณาเจวนีวรณิยาจ  ตาเนว  นีวรณานิ
นีวรณาเจวนีวรณิยาจ    ฯ    กตเม   ธมฺมา   นีวรณิยาเจวโนจนีวรณา
เตหิ   ธมฺเมหิ  เย  ธมฺมา  นีวรณิยา  เต  ธมฺเม  ฐเปตฺวา  อวเสสา
สาสวา  กุสลากุสลาพฺยากตา  ธมฺมา  กามาวจรา  รูปาวจรา อรูปาวจรา
รูปกฺขนฺโธ ฯเปฯ วิญฺญาณกฺขนฺโธ อิเม ธมฺมา นีวรณิยาเจวโนจนีวรณา ฯ
     [๗๕๙]   กตเม      ธมฺมา     นีวรณาเจวนีวรณสมฺปยุตฺตาจ
กามจฺฉนฺทนีวรณํ       อวิชฺชานีวรเณน      นีวรณญฺเจวนีวรณสมฺปยุตฺตญฺจ
อวิชฺชานีวรณํ       กามจฺฉนฺทนีวรเณน      นีวรณญฺเจวนีวรณสมฺปยุตฺตญฺจ
พฺยาปาทนีวรณํ       อวิชฺชานีวรเณน       นีวรณญฺเจวนีวรณสมฺปยุตฺตญฺจ
อวิชฺชานีวรณํ       พฺยาปาทนีวรเณน       นีวรณญฺเจวนีวรณสมฺปยุตฺตญฺจ
ถีนมิทฺธนีวรณํ        อวิชฺชานีวรเณน       นีวรณญฺเจวนีวรณสมฺปยุตฺตญฺจ
อวิชฺชานีวรณํ        ถีนมิทฺธนีวรเณน       นีวรณญฺเจวนีวรณสมฺปยุตฺตญฺจ
อุทฺธจฺจนีวรณํ        อวิชฺชานีวรเณน       นีวรณญฺเจวนีวรณสมฺปยุตฺตญฺจ
อวิชฺชานีวรณํ        อุทฺธจฺจนีวรเณน       นีวรณญฺเจวนีวรณสมฺปยุตฺตญฺจ
กุกฺกุจฺจนีวรณํ        อวิชฺชานีวรเณน       นีวรณญฺเจวนีวรณสมฺปยุตฺตญฺจ
อวิชฺชานีวรณํ        กุกฺกุจฺจนีวรเณน       นีวรณญฺเจวนีวรณสมฺปยุตฺตญฺจ
วิจิกิจฺฉานีวรณํ       อวิชฺชานีวรเณน       นีวรณญฺเจวนีวรณสมฺปยุตฺตญฺจ
อวิชฺชานีวรณํ วิจิกิจฺฉานีวรเณน นีวรณญฺเจวนีวรณสมฺปยุตฺตญฺจ
     {๗๕๙.๑}   กามจฺฉนฺทนีวรณํ    อุทฺธจฺจนีวรเณน    นีวรณญฺเจว-
นีวรณสมฺปยุตฺตญฺจ    อุทฺธจฺจนีวรณํ    กามจฺฉนฺทนีวรเณน   นีวรณญฺเจว-
นีวรณสมฺปยุตฺตญฺจ    พฺยาปาทนีวรณํ    อุทฺธจฺจนีวรเณน    นีวรณญฺเจว-
นีวรณสมฺปยุตฺตญฺจ    อุทฺธจฺจนีวรณํ    พฺยาปาทนีวรเณน    นีวรณญฺเจว-
นีวรณสมฺปยุตฺตญฺจ     ถีนมิทฺธนีวรณํ    อุทฺธจฺจนีวรเณน    นีวรณญฺเจว-
นีวรณสมฺปยุตฺตญฺจ    อุทฺธจฺจนีวรณํ     ถีนมิทฺธนีวรเณน    นีวรณญฺเจว-
นีวรณสมฺปยุตฺตญฺจ            กุกฺกุจฺจนีวรณํ          อุทฺธจฺจนีวรเณน
นีวรณญฺเจวนีวรณสมฺปยุตฺตญฺจ
อุทฺธจฺจนีวรณํ        กุกฺกุจฺจนีวรเณน       นีวรณญฺเจวนีวรณสมฺปยุตฺตญฺจ
วิจิกิจฺฉานีวรณํ       อุทฺธจฺจนีวรเณน       นีวรณญฺเจวนีวรณสมฺปยุตฺตญฺจ
อุทฺธจฺจนีวรณํ       วิจิกิจฺฉานีวรเณน       นีวรณญฺเจวนีวรณสมฺปยุตฺตญฺจ
อวิชฺชานีวรณํ        อุทฺธจฺจนีวรเณน       นีวรณญฺเจวนีวรณสมฺปยุตฺตญฺจ
อุทฺธจฺจนีวรณํ        อวิชฺชานีวรเณน       นีวรณญฺเจวนีวรณสมฺปยุตฺตญฺจ
อิเม    ธมฺมา    นีวรณาเจวนีวรณสมฺปยุตฺตาจ    ฯ    กตเม   ธมฺมา
นีวรณสมฺปยุตฺตาเจวโนจนีวรณา     เตหิ     ธมฺเมหิ     เย    ธมฺมา
สมฺปยุตฺตา  เต  ธมฺเม  ฐเปตฺวา  เวทนากฺขนฺโธ  ฯเปฯ  วิญฺญาณกฺขนฺโธ
อิเม ธมฺมา นีวรณสมฺปยุตฺตาเจวโนจนีวรณา ฯ
     [๗๖๐]   กตเม    ธมฺมา   นีวรณวิปฺปยุตฺตา   นีวรณิยา   เตหิ
ธมฺเมหิ   เย   ธมฺมา   วิปฺปยุตฺตา   สาสวา   กุสลาพฺยากตา   ธมฺมา
กามาวจรา   รูปาวจรา  อรูปาวจรา  รูปกฺขนฺโธ  ฯเปฯ  วิญฺญาณกฺขนฺโธ
อิเม      ธมฺมา     นีวรณวิปฺปยุตฺตา     นีวรณิยา     ฯ     กตเม
ธมฺมา    นีวรณวิปฺปยุตฺตา    อนีวรณิยา    อปริยาปนฺนา    มคฺคา   จ
มคฺคผลานิ   จ   อสงฺขตา   จ   ธาตุ   อิเม  ธมฺมา  นีวรณวิปฺปยุตฺตา
อนีวรณิยา ฯ
                                         ------------


             เนื้อความพระไตรปิฎกฉบับภาษาบาลี อักษรไทย เล่มที่ ๓๔ หน้าที่ ๒๙๕-๓๐๐. https://84000.org/tipitaka/read/pali_read.php?B=34&A=5931&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=34&A=5931&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=34&item=748&items=13              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=34&siri=59              ศึกษาอรรถกถานี้ได้ที่ :- https://84000.org/tipitaka/attha/attha.php?b=34&i=748              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=53&A=10827              The Pali Atthakatha in Roman :- https://84000.org/tipitaka/atthapali/read_rm.php?B=53&A=10827              สารบัญพระไตรปิฎกเล่มที่ ๓๔ https://84000.org/tipitaka/read/?index_34 https://84000.org/tipitaka/english/?index_34

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]