ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๖ ภาษาบาลี อักษรไทย พระอภิธรรมปิฎกเล่มที่ ๓ อภิ. ธาตุกถา เจว ปุคฺคลปญฺญตฺติ จ

                                        เอกกนิทฺเทโส
     [๑๗]   กตโม   จ   ปุคฺคโล   สมยวิมุตฺโต   อิเธกจฺโจ  ปุคฺคโล
กาเลน   กาลํ   สมเยน   สมยํ   อฏฺฐ   วิโมกฺเข   กาเยน  ผุสิตฺวา
วิหรติ    ปญฺญาย    จสฺส    ทิสฺวา    เอกจฺเจ   อาสวา   ปริกฺขีณา
โหนฺติ อยํ วุจฺจติ ปุคฺคโล สมยวิมุตฺโต ฯ
     [๑๘]   กตโม   จ   ปุคฺคโล   อสมยวิมุตฺโต  อิเธกจฺโจ  ปุคฺคโล

--------------------------------------------------------------------------------------------- หน้าที่ ๑๔๑.

น เหว โข กาเลน กาลํ สมเยน สมยํ อฏฺฐ วิโมกฺเข กาเยน ผุสิตฺวา วิหรติ ปญฺญาย จสฺส ทิสฺวา อาสวา ปริกฺขีณา โหนฺติ อยํ วุจฺจติ ปุคฺคโล อสมยวิมุตฺโต ฯ สพฺเพปิ อริยปุคฺคลา อริเย วิโมกฺเข อสมยวิมุตฺตา ฯ [๑๙] กตโม จ ปุคฺคโล กุปฺปธมฺโม อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข น นิกามลาภี โหติ น อกิจฺฉลาภี น อกสิรลาภี น ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ ฐานํ โข ปเนตํ วิชฺชติ ยํ ตสฺส ปุคฺคลสฺส ปมาทมาคมฺม ตา สมาปตฺติโย กุปฺเปยฺยุํ อยํ วุจฺจติ ปุคฺคโล กุปฺปธมฺโม ฯ [๒๐] กตโม จ ปุคฺคโล อกุปฺปธมฺโม อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข นิกามลาภี โหติ อกิจฺฉลาภี อกสิรลาภี ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ อฏฺฐานเมตํ อนวกาโส ยํ ตสฺส ปุคฺคลสฺส ปมาทมาคมฺม ตา สมาปตฺติโย กุปฺเปยฺยุํ อยํ วุจฺจติ ปุคฺคโล อกุปฺปธมฺโม ฯ สพฺเพปิ อริยปุคฺคลา อริเย วิโมกฺเข อกุปฺปธมฺมา ฯ [๒๑] กตโม จ ปุคฺคโล ปริหานธมฺโม อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข น นิกามลาภี โหติ น อกิจฺฉลาภี น อกสิรลาภี น

--------------------------------------------------------------------------------------------- หน้าที่ ๑๔๒.

ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ ฐานํ โข ปเนตํ วิชฺชติ ยํ โส ปุคฺคโล ปมาทมาคมฺม ตาหิ สมาปตฺตีหิ ปริหาเยยฺย อยํ วุจฺจติ ปุคฺคโล ปริหานธมฺโม ฯ [๒๒] กตโม จ ปุคฺคโล อปริหานธมฺโม อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข นิกามลาภี โหติ อกิจฺฉลาภี อกสิรลาภี ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ อฏฺฐานเมตํ อนวกาโส ยํ โส ปุคฺคโล ปมาทมาคมฺม ตาหิ สมาปตฺตีหิ ปริหาเยยฺย อยํ วุจฺจติ ปุคฺคโล อปริหานธมฺโม ฯ สพฺเพปิ อริยปุคฺคลา อริเย วิโมกฺเข อปริหานธมฺมา ฯ [๒๓] กตโม จ ปุคฺคโล เจตนาภพฺโพ อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข น นิกามลาภี โหติ น อกิจฺฉลาภี น อกสิรลาภี น ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ สเจ อนุสญฺเจเตติ น ปริหายติ ตาหิ สมาปตฺตีหิ สเจ น อนุสญฺเจเตติ ปริหายติ ตาหิ สมาปตฺตีหิ อยํ วุจฺจติ ปุคฺคโล เจตนาภพฺโพ ฯ [๒๔] กตโม จ ปุคฺคโล อนุรกฺขนาภพฺโพ อิเธกจฺโจ ปุคฺคโล ลาภี โหติ รูปสหคตานํ วา อรูปสหคตานํ วา สมาปตฺตีนํ โส จ โข น นิกามลาภี โหติ น อกิจฺฉลาภี น อกสิรลาภี น ยตฺถิจฺฉกํ ยทิจฺฉกํ ยาวติจฺฉกํ สมาปชฺชติปิ วุฏฺฐาติปิ สเจ อนุรกฺขติ

--------------------------------------------------------------------------------------------- หน้าที่ ๑๔๓.

น ปริหายติ ตาหิ สมาปตฺตีหิ สเจ นานุรกฺขติ ปริหายติ ตาหิ สมาปตฺตีหิ อยํ วุจฺจติ ปุคฺคโล อนุรกฺขนาภพฺโพ ฯ [๒๕] กตโม จ ปุคฺคโล ปุถุชฺชโน ยสฺส ปุคฺคลสฺส ตีณิ สญฺโญชนานิ อปฺปหีนานิ น จ เตสํ ธมฺมานํ ปหานาย ปฏิปนฺโน อยํ วุจฺจติ ปุคฺคโล ปุถุชฺชโน ฯ [๒๖] กตโม จ ปุคฺคโล โคตฺรภู เยสํ ธมฺมานํ สมนนฺตรา อริยธมฺมสฺส อวกฺกนฺติ โหติ เตหิ ธมฺเมหิ สมนฺนาคโต ปุคฺคโล อยํ วุจฺจติ ปุคฺคโล โคตฺรภู ฯ [๒๗] กตโม จ ปุคฺคโล ภยูปรโต สตฺต เสขา ภยูปรตา เย จ ปุคฺคลา ปุถุชฺชนา สีลวนฺโต ฯ อรหา อภยูปรโต ฯ [๒๘] กตโม จ ปุคฺคโล อภพฺพาคมโน เย เต ปุคฺคลา กมฺมาวรเณน สมนฺนาคตา กิเลสาวรเณน สมนฺนาคตา วิปากาวรเณน สมนฺนาคตา อสทฺธา อจฺฉนฺทิกา ทุปฺปญฺญา ชฬา อภพฺพา นิยามํ โอกฺกมิตุํ กุสเลสุ ธมฺเมสุ สมฺมตฺตํ อิเม วุจฺจนฺติ ปุคฺคลา อภพฺพาคมนา ฯ [๒๙] กตโม จ ปุคฺคโล ภพฺพาคมโน เย เต ปุคฺคลา น กมฺมาวรเณน สมนฺนาคตา น กิเลสาวรเณน สมนฺนาคตา น วิปากาวรเณน สมนฺนาคตา สทฺธา ฉนฺทิกา ปญฺญวนฺโต อเนฬา ภพฺพา นิยามํ โอกฺกมิตุํ กุสเลสุ ธมฺเมสุ สมฺมตฺตํ อิเม วุจฺจนฺติ ปุคฺคลา ภพฺพาคมนา ฯ

--------------------------------------------------------------------------------------------- หน้าที่ ๑๔๔.

[๓๐] กตโม จ ปุคฺคโล นิยโต ปญฺจ ปุคฺคลา อานนฺตริกา เย จ มิจฺฉาทิฏฺฐิกา นิยตา อฏฺฐ จ อริยปุคฺคลา นิยตา ฯ อวเสสา ปุคฺคลา อนิยตา ฯ [๓๑] กตโม จ ปุคฺคโล ปฏิปนฺนโก จตฺตาโร มคฺคสมงฺคิโน ปุคฺคลา ปฏิปนฺนกา ฯ จตฺตาโร ผลสมงฺคิโน ปุคฺคลา ผเลฏฺฐิตา ฯ [๓๒] กตโม จ ปุคฺคโล สมสีสี ยสฺส ปุคฺคลสฺส อปุพฺพํ อจริมํ อาสวปริยาทานญฺจ โหติ ชีวิตปริยาทานญฺจ อยํ วุจฺจติ ปุคฺคโล สมสีสี ฯ [๓๓] กตโม จ ปุคฺคโล ฐิตกปฺปี อยญฺจ ปุคฺคโล โสตาปตฺติผลสจฺฉิกิริยาย ปฏิปนฺโน อสฺส กปฺปสฺส จ อุฑฺฑยฺหนเวลา อสฺส เนว ตาว กปฺโป อุฑฺฑเยฺหยฺย ยาวายํ ปุคฺคโล น โสตาปตฺติผลํ สจฺฉิกโรติ อยํ วุจฺจติ ปุคฺคโล ฐิตกปฺปี ฯ สพฺเพปิ มคฺคสมงฺคิโน ปุคฺคลา ฐิตกปฺปิโน ฯ [๓๔] กตโม จ ปุคฺคโล อริโย อฏฺฐ อริยปุคฺคลา อริยา ฯ อวเสสา ปุคฺคลา อนริยา ฯ [๓๕] กตโม จ ปุคฺคโล เสโข จตฺตาโร มคฺคสมงฺคิโน ตโย ผลสมงฺคิโน ปุคฺคลา เสขา ฯ อรหา อเสโข ฯ อวเสสา ปุคฺคลา เนวเสขานาเสขา ฯ [๓๖] กตโม จ ปุคฺคโล เตวิชฺโช ตีหิ วิชฺชาหิ สมนฺนาคโต

--------------------------------------------------------------------------------------------- หน้าที่ ๑๔๕.

ปุคฺคโล เตวิชฺโช ฯ [๓๗] กตโม จ ปุคฺคโล ฉฬภิญฺโญ ฉหิ อภิญฺญาหิ สมนฺนาคโต ปุคฺคโล ฉฬภิญฺโญ ฯ [๓๘] กตโม จ ปุคฺคโล สมฺมาสมฺพุทฺโธ อิเธกจฺโจ ปุคฺคโล ปุพฺเพ อนนุสฺสุเตสุ ธมฺเมสุ สามํ สจฺจานิ อภิสมฺพุชฺฌติ ตตฺถ จ สพฺพญฺญุตํ ปาปุณาติ พเลสุ จ วสีภาวํ อยํ วุจฺจติ ปุคฺคโล สมฺมาสมฺพุทฺโธ ฯ [๓๙] กตโม จ ปุคฺคโล ปจฺเจกสมฺพุทฺโธ อิเธกจฺโจ ปุคฺคโล ปุพฺเพ อนนุสฺสุเตสุ ธมฺเมสุ สามํ สจฺจานิ อภิสมฺพุชฺฌติ น จ ตตฺถ สพฺพญฺญุตํ ปาปุณาติ น จ พเลสุ วสีภาวํ อยํ วุจฺจติ ปุคฺคโล ปจฺเจกสมฺพุทฺโธ ฯ [๔๐] กตโม จ ปุคฺคโล อุภโตภาควิมุตฺโต อิเธกจฺโจ ปุคฺคโล อฏฺฐ วิโมกฺเข กาเยน ผุสิตฺวา วิหรติ ปญฺญาย จสฺส ทิสฺวา อาสวา ปริกฺขีณา โหนฺติ อยํ วุจฺจติ ปุคฺคโล อุภโตภาควิมุตฺโต ฯ [๔๑] กตโม จ ปุคฺคโล ปญฺญาวิมุตฺโต อิเธกจฺโจ ปุคฺคโล น เหว โข อฏฺฐ วิโมกฺเข กาเยน ผุสิตฺวา วิหรติ ปญฺญาย จสฺส ทิสฺวา อาสวา ปริกฺขีณา โหนฺติ อยํ วุจฺจติ ปุคฺคโล ปญฺญาวิมุตฺโต ฯ [๔๒] กตโม จ ปุคฺคโล กายสกฺขี อิเธกจฺโจ ปุคฺคโล อฏฺฐ วิโมกฺเข กาเยน ผุสิตฺวา วิหรติ ปญฺญาย จสฺส ทิสฺวา

--------------------------------------------------------------------------------------------- หน้าที่ ๑๔๖.

เอกจฺเจ อาสวา ปริกฺขีณา โหนฺติ อยํ วุจฺจติ ปุคฺคโล กายสกฺขี ฯ [๔๓] กตโม จ ปุคฺคโล ทิฏฺฐิปฺปตฺโต อิเธกจฺโจ ปุคฺคโล อิทํ ทุกฺขนฺติ ยถาภูตํ ปชานาติ อยํ ทุกฺขสมุทโยติ ยถาภูตํ ปชานาติ อยํ ทุกฺขนิโรโธติ ยถาภูตํ ปชานาติ อยํ ทุกฺขนิโรธคามินี ปฏิปทาติ ยถาภูตํ ปชานาติ ตถาคตปฺปเวทิตา จสฺส ธมฺมา ปญฺญาย โวทิฏฺฐา โหนฺติ โวจริตา ปญฺญาย จสฺส ทิสฺวา เอกจฺเจ อาสวา ปริกฺขีณา โหนฺติ อยํ วุจฺจติ ปุคฺคโล ทิฏฺฐิปฺปตฺโต ฯ [๔๔] กตโม จ ปุคฺคโล สทฺธาวิมุตฺโต อิเธกจฺโจ ปุคฺคโล อิทํ ทุกฺขนฺติ ยถาภูตํ ปชานาติ อยํ ทุกฺขสมุทโยติ ยถาภูตํ ปชานาติ อยํ ทุกฺขนิโรโธติ ยถาภูตํ ปชานาติ อยํ ทุกฺขนิโรธคามินี ปฏิปทาติ ยถาภูตํ ปชานาติ ตถาคตปฺปเวทิตา จสฺส ธมฺมา ปญฺญาย โวทิฏฺฐา โหนฺติ โวจริตา ปญฺญาย จสฺส ทิสฺวา เอกจฺเจ อาสวา ปริกฺขีณา โหนฺติ โน จ โข ยถา ทิฏฺฐิปฺปตฺตสฺส อยํ วุจฺจติ ปุคฺคโล สทฺธาวิมุตฺโต ฯ [๔๕] กตโม จ ปุคฺคโล ธมฺมานุสารี ยสฺส ปุคฺคลสฺส โสตาปตฺติผลสจฺฉิกิริยาย ปฏิปนฺนสฺส ปญฺญินฺทฺริยํ อธิมตฺตํ โหติ ปญฺญาวาหึ ปญฺญาปุพฺพงฺคมํ อริยมคฺคํ ภาเวติ อยํ วุจฺจติ ปุคฺคโล ธมฺมานุสารี ฯ โสตาปตฺติผลสจฺฉิกิริยาย ปฏิปนฺโน ปุคฺคโล ธมฺมานุสารี ฯ ผเลฏฺฐิโต ทิฏฺฐิปฺปตฺโต ฯ

--------------------------------------------------------------------------------------------- หน้าที่ ๑๔๗.

[๔๖] กตโม จ ปุคฺคโล สทฺธานุสารี ยสฺส ปุคฺคลสฺส โสตาปตฺติผลสจฺฉิกิริยาย ปฏิปนฺนสฺส สทฺธินฺทฺริยํ อธิมตฺตํ โหติ สทฺธาวาหึ สทฺธาปุพฺพงฺคมํ อริยมคฺคํ ภาเวติ อยํ วุจฺจติ ปุคฺคโล สทฺธานุสารี ฯ โสตาปตฺติผลสจฺฉิกิริยาย ปฏิปนฺโน ปุคฺคโล สทฺธานุสารี ฯ ผเลฏฺฐิโต สทฺธาวิมุตฺโต ฯ [๔๗] กตโม จ ปุคฺคโล สตฺตกฺขตฺตุํปรโม อิเธกจฺโจ ปุคฺคโล ติณฺณํ สญฺโญชนานํ ปริกฺขยา โสตาปนฺโน โหติ อวินิปาตธมฺโม นิยโต สมฺโพธิปรายโน โส สตฺตกฺขตฺตุํ เทเว จ มานุเส จ สนฺธาวิตฺวา สํสริตฺวา ทุกฺขสฺสนฺตํ กโรติ อยํ วุจฺจติ ปุคฺคโล สตฺตกฺขตฺตุํปรโม ฯ [๔๘] กตโม จ ปุคฺคโล โกลํโกโล อิเธกจฺโจ ปุคฺคโล ติณฺณํ สญฺโญชนานํ ปริกฺขยา โสตาปนฺโน โหติ อวินิปาตธมฺโม นิยโต สมฺโพธิปรายโน โส เทฺว วา ตีณิ วา กุลานิ สนฺธาวิตฺวา สํสริตฺวา ทุกฺขสฺสนฺตํ กโรติ อยํ วุจฺจติ ปุคฺคโล โกลํโกโล ฯ [๔๙] กตโม จ ปุคฺคโล เอกพีชี อิเธกจฺโจ ปุคฺคโล ติณฺณํ สญฺโญชนานํ ปริกฺขยา โสตาปนฺโน โหติ อวินิปาตธมฺโม นิยโต สมฺโพธิปรายโน โส เอกํเยว มานุสกํ ภวํ นิพฺพตฺเตตฺวา ทุกฺขสฺสนฺตํ กโรติ อยํ วุจฺจติ ปุคฺคโล เอกพีชี ฯ [๕๐] กตโม จ ปุคฺคโล สกทาคามี อิเธกจฺโจ ปุคฺคโล ติณฺณํ สญฺโญชนานํ ปริกฺขยา ราคโทสโมหานํ ตนุตฺตา สกทาคามี

--------------------------------------------------------------------------------------------- หน้าที่ ๑๔๘.

โหติ สกิเทว อิมํ โลกํ อาคนฺตฺวา ทุกฺขสฺสนฺตํ กโรติ อยํ วุจฺจติ ปุคฺคโล สกทาคามี ฯ [๕๑] กตโม จ ปุคฺคโล อนาคามี อิเธกจฺโจ ปุคฺคโล ปญฺจนฺนํ โอรมฺภาคิยานํ สญฺโญชนานํ ปริกฺขยา โอปปาติโก โหติ ตตฺถ ปรินิพฺพายี อนาวตฺติธมฺโม ตสฺมา โลกา อยํ วุจฺจติ ปุคฺคโล อนาคามี ฯ [๕๒] กตโม จ ปุคฺคโล อนฺตราปรินิพฺพายี อิเธกจฺโจ ปุคฺคโล ปญฺจนฺนํ โอรมฺภาคิยานํ สญฺโญชนานํ ปริกฺขยา โอปปาติโก โหติ ตตฺถ ปรินิพฺพายี อนาวตฺติธมฺโม ตสฺมา โลกา โส อุปฺปนฺนํ วา สมนนฺตรา อปฺปตฺตํ วา เวมชฺฌํ อายุปฺปมาณํ อริยมคฺคํ สญฺชเนติ อุปริฏฺฐิมานํ สญฺโญชนานํ ปหานาย อยํ วุจฺจติ ปุคฺคโล อนฺตราปรินิพฺพายี ฯ [๕๓] กตโม จ ปุคฺคโล อุปหจฺจปรินิพฺพายี อิเธกจฺโจ ปุคฺคโล ปญฺจนฺนํ โอรมฺภาคิยานํ สญฺโญชนานํ ปริกฺขยา โอปปาติโก โหติ ตตฺถ ปรินิพฺพายี อนาวตฺติธมฺโม ตสฺมา โลกา โส อติกฺกมิตฺวา เวมชฺฌํ อายุปฺปมาณํ อุปหจฺจ วา กาลกิริยํ อริยมคฺคํ สญฺชเนติ อุปริฏฺฐิมานํ สญฺโญชนานํ ปหานาย อยํ วุจฺจติ ปุคฺคโล อุปหจฺจปรินิพฺพายี ฯ [๕๔] กตโม จ ปุคฺคโล อสงฺขารปรินิพฺพายี อิเธกจฺโจ ปุคฺคโล ปญฺจนฺนํ โอรมฺภาคิยานํ สญฺโญชนานํ ปริกฺขยา โอปปาติโก โหติ

--------------------------------------------------------------------------------------------- หน้าที่ ๑๔๙.

ตตฺถ ปรินิพฺพายี อนาวตฺติธมฺโม ตสฺมา โลกา โส อสงฺขาเรน อริยมคฺคํ สญฺชเนติ อุปริฏฺฐิมานํ สญฺโญชนานํ ปหานาย อยํ วุจฺจติ ปุคฺคโล อสงฺขารปรินิพฺพายี ฯ [๕๕] กตโม จ ปุคฺคโล สสงฺขารปรินิพฺพายี อิเธกจฺโจ ปุคฺคโล ปญฺจนฺนํ โอรมฺภาคิยานํ สญฺโญชนานํ ปริกฺขยา โอปปาติโก โหติ ตตฺถ ปรินิพฺพายี อนาวตฺติธมฺโม ตสฺมา โลกา โส สสงฺขาเรน อริยมคฺคํ สญฺชเนติ อุปริฏฺฐิมานํ สญฺโญชนานํ ปหานาย อยํ วุจฺจติ ปุคฺคโล สสงฺขารปรินิพฺพายี ฯ [๕๖] กตโม จ ปุคฺคโล อุทฺธํโสโต อกนิฏฺฐคามี อิเธกจฺโจ ปุคฺคโล ปญฺจนฺนํ โอรมฺภาคิยานํ สญฺโญชนานํ ปริกฺขยา โอปปาติโก โหติ ตตฺถ ปรินิพฺพายี อนาวตฺติธมฺโม ตสฺมา โลกา โส อวิหา จุโต อตปฺปํ คจฺฉติ อตปฺปา จุโต สุทสฺสํ คจฺฉติ สุทสฺสา จุโต สุทสฺสึ คจฺฉติ สุทสฺสิยา จุโต อกนิฏฺฐํ คจฺฉติ อกนิฏฺเฐ อริยมคฺคํ สญฺชเนติ อุปริฏฺฐิมานํ สญฺโญชนานํ ปหานาย อยํ วุจฺจติ ปุคฺคโล อุทฺธํโสโต อกนิฏฺฐคามี ฯ [๕๗] กตโม จ ปุคฺคโล โสตาปนฺโน โสตาปตฺติผลสจฺฉิกิริยาย ปฏิปนฺโน ติณฺณํ สญฺโญชนานํ ปหานาย ปฏิปนฺโน ปุคฺคโล โสตาปตฺติผลสจฺฉิกิริยาย ปฏิปนฺโน ยสฺส ปุคฺคลสฺส ตีณิ สญฺโญชนานิ ปหีนานิ อยํ วุจฺจติ ปุคฺคโล โสตาปนฺโน ฯ กามราคพฺยาปาทานํ ตนุภาวาย ปฏิปนฺโน ปุคฺคโล สกทาคามิผลสจฺฉิกิริยาย ปฏิปนฺโน

--------------------------------------------------------------------------------------------- หน้าที่ ๑๕๐.

ยสฺส ปุคฺคลสฺส กามราคพฺยาปาทา ตนุภูตา อยํ วุจฺจติ ปุคฺคโล สกทาคามี ฯ กามราคพฺยาปาทานํ อนวเสสปฺปหานาย ปฏิปนฺโน ปุคฺคโล อนาคามิผลสจฺฉิกิริยาย ปฏิปนฺโน ยสฺส ปุคฺคลสฺส กามราคพฺยาปาทา อนวเสสา ปหีนา อยํ วุจฺจติ ปุคฺคโล อนาคามี ฯ รูปราคอรูปราคมานอุทฺธจฺจอวิชฺชาย อนวเสสปฺปหานาย ปฏิปนฺโน ปุคฺคโล อรหตฺตผลสจฺฉิกิริยาย ปฏิปนฺโน ยสฺส ปุคฺคลสฺส รูปราโค อรูปราโค มาโน อุทฺธจฺจํ อวิชฺชา อนวเสสา ปหีนา อยํ วุจฺจติ ปุคฺคโล อรหา ฯ เอกกนิทฺเทโส นิฏฺฐิโต ฯ --------

             เนื้อความพระไตรปิฎกฉบับภาษาบาลี อักษรไทย เล่มที่ ๓๖ หน้าที่ ๑๔๐-๑๕๐. https://84000.org/tipitaka/read/pali_read.php?B=36&A=2771&w=&modeTY=2&pagebreak=1              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=36&A=2771&modeTY=2&pagebreak=1              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=36.2&item=17&items=41              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=36&siri=27              ศึกษาอรรถกถานี้ได้ที่ :- https://84000.org/tipitaka/attha/attha.php?b=36&i=532              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=729              The Pali Atthakatha in Roman :- https://84000.org/tipitaka/atthapali/read_rm.php?B=55&A=729              สารบัญพระไตรปิฎกเล่มที่ ๓๖ https://84000.org/tipitaka/read/?index_36 https://84000.org/tipitaka/english/?index_36

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]