บาลีพระไตรปิฎกเล่มที่ ๓๗ - พระอภิธรรมปิฎกเล่มที่ ๔

                                           ปคฺคหกถา
     [๑๖๔๖]   ปโร   ปรสฺส   จิตฺตํ   ปคฺคณฺหาตีติ  ฯ  อามนฺตา  ฯ
ปโร    ปรสฺส   จิตฺตํ   มา   รชฺชิ   มา   ทุสฺสิ   มา   มุยฺหิ   มา
กิลิสฺสีติ ปคฺคณฺหาตีติ ฯ น เหวํ วตฺตพฺเพ ฯเปฯ
     [๑๖๔๗]   ปโร   ปรสฺส   จิตฺตํ   ปคฺคณฺหาตีติ  ฯ  อามนฺตา  ฯ
ปโร    ปรสฺส   อโลภํ   กุสลมูลํ   ชเนติ   อโทสํ   กุสลมูลํ   ชเนติ
อโมหํ   กุสลมูลํ   ชเนติ   สทฺธํ   ชเนติ   วิริยํ   ชเนติ  สตึ  ชเนติ
สมาธึ ชเนติ ปญฺญํ ชเนตีติ ฯ น เหวํ วตฺตพฺเพ ฯเปฯ
     [๑๖๔๘]   ปโร   ปรสฺส   จิตฺตํ   ปคฺคณฺหาตีติ  ฯ  อามนฺตา  ฯ
ปโร   ปรสฺส   อุปฺปนฺโน   ผสฺโส   มา   นิรุชฺฌีติ  ปคฺคณฺหาตีติ  ฯ  น
เหวํ   วตฺตพฺเพ   ฯเปฯ   ปโร   ปรสฺส   อุปฺปนฺนา   เวทนา  ฯเปฯ
อุปฺปนฺนา    ปญฺญา    มา    นิรุชฺฌีติ    ปคฺคณฺหาตีติ   ฯ   น   เหวํ
วตฺตพฺเพ ฯเปฯ
     [๑๖๔๙]   ปโร   ปรสฺส   จิตฺตํ   ปคฺคณฺหาตีติ  ฯ  อามนฺตา  ฯ
ปโร   ปรสฺส   อตฺถาย   ราคํ   ปชหติ   โทสํ   ปชหติ  โมหํ  ปชหติ
ฯเปฯ อโนตฺตปฺปํ ปชหตีติ ฯ น เหวํ วตฺตพฺเพ ฯเปฯ
     [๑๖๕๐]   ปโร  ปรสฺส  จิตฺตํ  ปคฺคณฺหาตีติ  ฯ  อามนฺตา  ฯ ปโร
ปรสฺส   อตฺถาย   มคฺคํ  ภาเวติ  สติปฏฺฐานํ  ภาเวติ  ฯเปฯ  โพชฺฌงฺคํ
ภาเวตีติ ฯ น เหวํ วตฺตพฺเพ ฯเปฯ
     [๑๖๕๑]   ปโร   ปรสฺส   จิตฺตํ   ปคฺคณฺหาตีติ  ฯ  อามนฺตา  ฯ
ปโร   ปรสฺส   อตฺถาย   ทุกฺขํ  ปริชานาติ  ฯเปฯ  มคฺคํ  ภาเวตีติ  ฯ
น เหวํ วตฺตพฺเพ ฯเปฯ
     [๑๖๕๒]   ปโร   ปรสฺส   จิตฺตํ   ปคฺคณฺหาตีติ  ฯ  อามนฺตา  ฯ
อญฺโญ    อญฺญสฺส    การโก    ปรกตํ    สุขทุกฺขํ    อญฺโญ    กโรติ
อญฺโญ   ปฏิสํเวเทตีติ   ฯ   น   เหวํ  วตฺตพฺเพ  ฯเปฯ  ปโร  ปรสฺส
จิตฺตํ   ปคฺคณฺหาตีติ   ฯ   อามนฺตา   ฯ  นนุ  วุตฺตํ  ภควตา  อตฺตนาว
กตํ   ปาปํ   ฯเปฯ  นาญฺโญ  อญฺญํ  วิโสธเยติ  อตฺเถว  สุตฺตนฺโตติ  ฯ
อามนฺตา ฯ เตน หิ น วตฺตพฺพํ ปโร ปรสฺส จิตฺตํ ปคฺคณฺหาตีติ ฯ
     [๑๖๕๓]   น   วตฺตพฺพํ   ปโร   ปรสฺส   จิตฺตํ  ปคฺคณฺหาตีติ  ฯ
อามนฺตา   ฯ  นนุ  อตฺถิ  พลปฺปตฺตา  อตฺถิ  วสีภูตาติ  ฯ  อามนฺตา  ฯ
หญฺจิ   อตฺถิ   พลปฺปตฺตา   อตฺถิ   วสีภูตา   เตน  วต  เร  วตฺตพฺเพ
ปโร ปรสฺส จิตฺตํ ปคฺคณฺหาตีติ ฯ
                                         ปคฺคหกถา ฯ
                                           ---------

เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๕๕๘-๕๕๙. https://84000.org/tipitaka/read/pali_read.php?B=37&A=11066&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=11066&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1646&items=8 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=175 ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1646 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=6415 The Pali Atthakatha in Roman :- https://84000.org/tipitaka/atthapali/read_rm.php?B=55&A=6415 สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37