บาลีพระไตรปิฎกเล่มที่ ๓๗ - พระอภิธรรมปิฎกเล่มที่ ๔

                                         เอกมคฺคกถา
     [๑๗๔๗]   เอเกน  อริยมคฺเคน จตฺตาริ สามญฺญผลานิ สจฺฉิกโรตีติ ฯ
อามนฺตา  ฯ  จตุนฺนํ  ผสฺสานํ  ฯเปฯ จตสฺสนฺนํ ปญฺญานํ สโมธานํ โหตีติ ฯ
น  เหวํ  วตฺตพฺเพ  ฯเปฯ  เอเกน  อริยมคฺเคน  จตฺตาริ  สามญฺญผลานิ
สจฺฉิกโรตีติ   ฯ   อามนฺตา   ฯ   โสตาปตฺติมคฺเคนาติ   ฯ   น  เหวํ
วตฺตพฺเพ    ฯเปฯ   สกทาคามิมคฺเคน   ฯเปฯ   อนาคามิมคฺเคนาติ  ฯ
น  เหวํ  วตฺตพฺเพ  ฯเปฯ  กตเมน  มคฺเคนาติ  ฯ  อรหตฺตมคฺเคนาติ ฯ
อรหตฺตมคฺเคน       สกฺกายทิฏฺฐึ       วิจิกิจฺฉํ       สีลพฺพตปรามาสํ
ปรามาสํ  ชหตีติ  ฯ  น  เหวํ วตฺตพฺเพ ฯเปฯ อรหตฺตมคฺเคน สกฺกายทิฏฺฐึ
วิจิกิจฺฉํ    สีลพฺพตปรามาสํ   ชหตีติ   ฯ   อามนฺตา   ฯ   นนุ   ติณฺณํ
สญฺโญชนานํ ปหานํ โสตาปตฺติผลํ วุตฺตํ ภควตาติ ฯ
     {๑๗๔๗.๑}   อามนฺตา   ฯ   หญฺจิ   ติณฺณํ   สญฺโญชนานํ  ปหานํ
โสตาปตฺติผลํ   วุตฺตํ   ภควตา  โน  วต  เร  วตฺตพฺเพ  อรหตฺตมคฺเคน
สกฺกายทิฏฺฐึ   วิจิกิจฺฉํ   สีลพฺพตปรามาสํ   ชหตีติ  ฯเปฯ  อรหตฺตมคฺเคน
โอฬาริกํ  กามราคํ  โอฬาริกํ  พฺยาปาทํ  ชหตีติ  ฯ  น  เหวํ  วตฺตพฺเพ
ฯเปฯ อรหตฺตมคฺเคน โอฬาริกํ กามราคํ โอฬาริกํ พฺยาปาทํ ชหตีติ ฯ
     {๑๗๔๗.๒}   อามนฺตา   ฯ   นนุ   กามราคพฺยาปาทานํ  ตนุภาวํ
สกทาคามิผลํ  วุตฺตํ  ภควตาติ  ฯ  อามนฺตา  ฯ หญฺจิ กามราคพฺยาปาทานํ
ตนุภาวํ  สกทาคามิผลํ  วุตฺตํ  ภควตา โน วต เร วตฺตพฺเพ อรหตฺตมคฺเคน
โอฬาริกํ   กามราคํ   โอฬาริกํ   พฺยาปาทํ   ชหตีติ  ฯ  อรหตฺตมคฺเคน
อณุสหคตํ  กามราคํ  อณุสหคตํ  พฺยาปาทํ  ชหตีติ  ฯ  น  เหวํ  วตฺตพฺเพ
ฯเปฯ อรหตฺตมคฺเคน อณุสหคตํ กามราคํ อณุสหคตํ พฺยาปาทํ ชหตีติ ฯ
     {๑๗๔๗.๓}   อามนฺตา  ฯ  นนุ กามราคพฺยาปาทานํ อนวเสสปฺปหานํ
อนาคามิผลํ  วุตฺตํ  ภควตาติ  ฯ  อามนฺตา  ฯ  หญฺจิ กามราคพฺยาปาทานํ
อนวเสสปฺปหานํ   อนาคามิผลํ   วุตฺตํ  ภควตา  โน  วต  เร  วตฺตพฺเพ
อรหตฺตมคฺเคน อณุสหคตํ กามราคํ อณุสหคตํ พฺยาปาทํ ชหตีติ ฯ
     [๑๗๔๘]   น  วตฺตพฺพํ  เอเกน  อริยมคฺเคน  จตฺตาริ สามญฺญผลานิ
สจฺฉิกโรตีติ   ฯ   อามนฺตา  ฯ  ภควตา  โสตาปตฺติมคฺโค  ภาวิโตติ  ฯ
อามนฺตา  ฯ  ภควา  โสตาปนฺโนติ  ฯ  น  เหวํ วตฺตพฺเพ ฯเปฯ ภควตา
สกทาคามิมคฺโค   ฯเปฯ   อนาคามิมคฺโค   ภาวิโตติ   ฯ  อามนฺตา  ฯ
ภควา อนาคามีติ ฯ น เหวํ วตฺตพฺเพ ฯเปฯ
     [๑๗๔๙]   ภควา   เอเกน   อริยมคฺเคน  จตฺตาริ  สามญฺญผลานิ
สจฺฉิกโรติ    สาวกา    จตูหิ    อริยมคฺเคหิ   จตฺตาริ   สามญฺญผลานิ
สจฺฉิกโรนฺตีติ   ฯ   อามนฺตา   ฯ   สาวกา   พุทฺธสฺส  ภควโต  อทิฏฺฐํ
ทกฺขนฺติ    อนธิคตํ    อธิคจฺฉนฺติ    อสจฺฉิกตํ   สจฺฉิกโรนฺตีติ   ฯ   น
เหวํ วตฺตพฺเพ ฯเปฯ
                                       เอกมคฺคกถา ฯ
                                          -----------

เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๕๙๗-๕๙๙. https://84000.org/tipitaka/read/pali_read.php?B=37&A=11836&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=11836&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1747&items=3 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=199 ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1747 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=6744 The Pali Atthakatha in Roman :- https://84000.org/tipitaka/atthapali/read_rm.php?B=55&A=6744 สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37