บาลีพระไตรปิฎกเล่มที่ ๓๗ - พระอภิธรรมปิฎกเล่มที่ ๔

                                            ญาณกถา
     [๑๘๓๑]   ทฺวาทสวตฺถุกํ   ญาณํ   โลกุตฺตรนฺติ  ฯ  อามนฺตา  ฯ
ทฺวาทส   โลกุตฺตรญาณานีติ   ฯ   น   เหวํ  วตฺตพฺเพ  ฯเปฯ  ทฺวาทส
โลกุตฺตรญาณานีติ   ฯ   อามนฺตา   ฯ   ทฺวาทส   โสตาปตฺติมคฺคาติ  ฯ
น  เหวํ  วตฺตพฺเพ  ฯเปฯ  ทฺวาทส  โสตาปตฺติมคฺคาติ  ฯ  อามนฺตา  ฯ
ทฺวาทส   โสตาปตฺติผลานีติ   ฯ   น   เหวํ  วตฺตพฺเพ  ฯเปฯ  ทฺวาทส
สกทาคามิมคฺคา   ฯเปฯ   อนาคามิมคฺคา   ฯเปฯ   อรหตฺตมคฺคาติ   ฯ
น   เหวํ   วตฺตพฺเพ  ฯเปฯ  ทฺวาทส  อรหตฺตมคฺคาติ  ฯ  อามนฺตา  ฯ
ทฺวาทส อรหตฺตผลานีติ ฯ น เหวํ วตฺตพฺเพ ฯเปฯ
     [๑๘๓๒]   น   วตฺตพฺพํ   ทฺวาทสวตฺถุกํ   ญาณํ  โลกุตฺตรนฺติ  ฯ
อามนฺตา   ฯ   นนุ   วุตฺตํ   ภควตา   อิทํ   ทุกฺขํ   อริยสจฺจนฺติ  เม
ภิกฺขเว   ปุพฺเพ   อนนุสฺสุเตสุ   ธมฺเมสุ  จกฺขุํ  อุทปาทิ  ญาณํ  อุทปาทิ
ปญฺญา   อุทปาทิ   วิชฺชา   อุทปาทิ   อาโลโก  อุทปาทิ  ตํ  โข  ปนิทํ
ทุกฺขํ   อริยสจฺจํ   ปริญฺเญยฺยนฺติ   เม   ภิกฺขเว   ฯเปฯ   ปริญฺญาตนฺติ
@เชิงอรรถ: ^๑ ที. ม. ๑๘๘ ฯ
ญาตนฺติ   เม   ภิกฺขเว   ฯเปฯ   อิทํ   ทุกฺขสมุทโย  อริยสจฺจนฺติ  เม
ภิกฺขเว   ฯเปฯ   ตํ   โข   ปนิทํ  ทุกฺขสมุทโย  อริยสจฺจํ  ปหาตพฺพนฺติ
เม   ภิกฺขเว   ฯเปฯ  ปหีนนฺติ  เม  ภิกฺขเว  ฯเปฯ  อิทํ  ทุกฺขนิโรโธ
อริยสจฺจนฺติ  เม  ภิกฺขเว  ฯเปฯ  ตํ  โข  ปนิทํ  ทุกฺขนิโรโธ  อริยสจฺจํ
สจฺฉิกาตพฺพนฺติ   เม   ภิกฺขเว  ฯเปฯ  สจฺฉิกตนฺติ  เม  ภิกฺขเว  ฯเปฯ
อิทํ   ทุกฺขนิโรธคามินี   ปฏิปทา   อริยสจฺจนฺติ  เม  ภิกฺขเว  ฯเปฯ  ตํ
โข    ปนิทํ    ทุกฺขนิโรธคามินี    ปฏิปทา    อริยสจฺจํ   ภาเวตพฺพนฺติ
เม   ภิกฺขเว   ฯเปฯ   ภาวิตนฺติ   เม   ภิกฺขเว  ปุพฺเพ  อนนุสฺสุเตสุ
ธมฺเมสุ    จกฺขุํ    อุทปาทิ    ฯเปฯ   อาโลโก   อุทปาทีติ   อตฺเถว
สุตฺตนฺโตติ ฯ อามนฺตา ฯ เตน หิ ทฺวาทสวตฺถุกํ ญาณํ โลกุตฺตรนฺติ ฯ
                                           ญาณกถา ฯ
                                        วีสติโม วคฺโค ฯ
                                        ตสฺส อุทฺทานํ
           มาตุฆาตโก อานนฺตริโก          ปิตุฆาตโก อานนฺตริโก
           อรหนฺตฆาตโก อานนฺตริโก     รุหิรุปฺปาทโก อานนฺตริโก
           สงฺฆเภทโก อานนฺตริโก          นตฺถิ ปุถุชฺชนสฺส ญาณํ
           นตฺถิ นิรเยสุ นิรยปาลา          อตฺถิ เทเวสุ ติรจฺฉานคตา
           ปญฺจงฺคิโก มคฺโค ทฺวาทสวตฺถุกํ  ญาณํ โลกุตฺตรนฺติ ฯ
                                    จตุตฺโถ ปณฺณาสโก ฯ
                  นิคฺคโห ปุญฺญสํจโย อฏฺฐาสิ อตีเตน จ มาตุฆาตโกติ ฯ
                                          -----------

เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๖๓๔-๖๓๕. https://84000.org/tipitaka/read/pali_read.php?B=37&A=12555&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=12555&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1831&items=2 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=217 ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1831 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=7058 The Pali Atthakatha in Roman :- https://84000.org/tipitaka/atthapali/read_rm.php?B=55&A=7058 สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37