ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๗ ภาษาบาลี อักษรไทย พระอภิธรรมปิฎกเล่มที่ ๔ อภิ. กถาวตฺถุ

                                      ปรวิตารณากถา
     [๕๔๗]   อตฺถิ   อรหโต  ปรวิตารณาติ  ฯ  อามนฺตา  ฯ  อรหา
ปรเนยฺโย    ปรปตฺติโย   ปรปจฺจโย   ปรปฏิพทฺธภู   น   ชานาติ   น
ปสฺสติ สมฺมูฬฺโห อสมฺปชาโนติ ฯ น เหวํ วตฺตพฺเพ ฯเปฯ
     [๕๔๘]   นนุ  อรหา  น  ปรเนยฺโย  น  ปรปตฺติโย  น ปรปจฺจโย
น    ปรปฏิพทฺธภู    ชานาติ    ปสฺสติ   อสมฺมูฬฺโห   สมฺปชาโนติ   ฯ
อามนฺตา  ฯ  หญฺจิ  อรหา  น  ปรเนยฺโย  น  ปรปตฺติโย  น ปรปจฺจโย
น    ปริปฏิพทฺธภู    ชานาติ    ปสฺสติ   อสมฺมูฬฺโห   สมฺปชาโน   โน
วต เร วตฺตพฺเพ อตฺถิ อรหโต ปรวิตารณาติ ฯ
     [๕๔๙]   อตฺถิ   ปุถุชฺชนสฺส   ปรวิตารณา   โส   จ  ปรเนยฺโย
ปรปตฺติโย   ปรปจฺจโย   ปรปฏิพทฺธภู  น  ชานาติ  น  ปสฺสติ  สมฺมูฬฺโห
อสมฺปชาโนติ  ๑-  ฯ  อามนฺตา   ฯ  อตฺถิ  อรหโต  ปรวิตารณา โส จ
ปรเนยฺโย    ปรปตฺติโย   ปรปจฺจโย   ปรปฏิพทฺธภู   น   ชานาติ   น
ปสฺสติ สมฺมูฬฺโห อสมฺปชาโนติ ๒- ฯ น เหวํ วตฺตพฺเพ ฯเปฯ
     [๕๕๐]   อตฺถิ   อรหโต   ปรวิตารณา   โส  จ  น  ปรเนยฺโย
น   ปรปตฺติโย   น   ปรปจฺจโย   น   ปรปฏิพทฺธภู   ชานาติ   ปสฺสติ
อสมฺมูฬฺโห  สมฺปชาโนติ  ฯ  อามนฺตา  ฯ  อตฺถิ  ปุถุชฺชนสฺส  ปรวิตารณา
โส   จ  น  ปรเนยฺโย  น  ปรปตฺติโย  น  ปรปจฺจโย  น  ปรปฏิพทฺธภู
ชานาติ ปสฺสติ อสมฺมูฬฺโห สมฺปชาโนติ ฯ น เหวํ วตฺตพฺเพ ฯเปฯ
@เชิงอรรถ: ๑. ๒. ยุ. อสมฺมูฬฺโห สมฺปชาโน.
     [๕๕๑]   อตฺถิ  อรหโต  ปรวิตารณาติ  ฯ อามนฺตา ฯ อตฺถิ อรหโต
สตฺถริ    ปรวิตารณา    ธมฺเม    ปรวิตารณา    สงฺเฆ   ปรวิตารณา
สิกฺขาย   ปรวิตารณา   ปุพฺพนฺเต   ปรวิตารณา   อปรนฺเต  ปรวิตารณา
ปุพฺพนฺตาปรนฺเต        ปรวิตารณา       อิทปฺปจฺจยตาปฏิจฺจสมุปฺปนฺเนสุ
ธมฺเมสุ ปรวิตารณาติ ฯ น เหวํ วตฺตพฺเพ ฯเปฯ
     [๕๕๒]   นตฺถิ  อรหโต  สตฺถริ  ปรวิตารณา  ธมฺเม  ปรวิตารณา
ฯเปฯ    อิทปฺปจฺจยตาปฏิจฺจสมุปฺปนฺเนสุ    ธมฺเมสุ    ปรวิตารณาติ   ฯ
อามนฺตา   ฯ   หญฺจิ   นตฺถิ   อรหโต   สตฺถริ   ปรวิตารณา   ธมฺเม
ปรวิตารณา      ฯเปฯ      อิทปฺปจฺจยตาปฏิจฺจสมุปฺปนฺเนสุ     ธมฺเมสุ
ปรวิตารณา โน วต เร วตฺตพฺเพ อตฺถิ อรหโต ปรวิตารณาติ ฯ
     [๕๕๓]   อตฺถิ   ปุถุชฺชนสฺส   ปรวิตารณา   อตฺถิ   ตสฺส  สตฺถริ
ปรวิตารณา     ธมฺเม    ปรวิตารณา    ฯเปฯ    อิทปฺปจฺจยตาปฏิจฺจ-
สมุปฺปนฺเนสุ   ธมฺเมสุ   ปรวิตารณาติ  ฯ  อามนฺตา  ฯ  อตฺถิ  อรหโต
ปรวิตารณา   อตฺถิ   ตสฺส   สตฺถริ   ปรวิตารณา   ธมฺเม  ปรวิตารณา
ฯเปฯ    อิทปฺปจฺจยตาปฏิจฺจสมุปฺปนฺเนสุ    ธมฺเมสุ    ปรวิตารณาติ   ฯ
น เหวํ วตฺตพฺเพ ฯเปฯ
     [๕๕๔]   อตฺถิ   อรหโต   ปรวิตารณา   นตฺถิ   ตสฺส   สตฺถริ
ปรวิตารณา     ธมฺเม    ปรวิตารณา    ฯเปฯ    อิทปฺปจฺจยตาปฏิจฺจ-
สมุปฺปนฺเนสุ  ธมฺเมสุ  ปรวิตารณาติ  ฯ  อามนฺตา  ฯ  อตฺถิ  ปุถุชฺชนสฺส
ปรวิตารณา   นตฺถิ   ตสฺส   สตฺถริ   ปรวิตารณา   ธมฺเม  ปรวิตารณา
ฯเปฯ    อิทปฺปจฺจยตาปฏิจฺจสมุปฺปนฺเนสุ    ธมฺเมสุ    ปรวิตารณาติ   ฯ
น เหวํ วตฺตพฺเพ ฯเปฯ
     [๕๕๕]   อตฺถิ   อรหโต   ปรวิตารณาติ   ฯ  อามนฺตา  ฯ  นนุ
อรหโต   ราโค   ปหีโน   อุจฺฉินฺนมูโล   ตาลาวตฺถุกโต  อนภาวํ  กโต
อายตึอนุปฺปาทธมฺโมติ   ฯ   อามนฺตา  ฯ  หญฺจิ  อรหโต  ราโค  ปหีโน
อุจฺฉินฺนมูโล  ตาลาวตฺถุกโต  อนภาวํ  กโต  อายตึอนุปฺปาทธมฺโม  ฯ  โน
วต  เร  วตฺตพฺเพ  ฯ  อตฺถิ  อรหโต  ปรวิตารณาติ  ฯเปฯ นนุ อรหโต
โทโส ปหีโน ฯเปฯ โมโห ปหีโน ฯเปฯ อโนตฺตปฺปํ ปหีนํ ฯเปฯ
     [๕๕๖]   นนุ   อรหโต   ราคปฺปหานาย  มคฺโค  ภาวิโต  ฯเปฯ
โพชฺฌงฺคา   ภาวิตา  ฯเปฯ  โทสปฺปหานาย  ฯเปฯ  อโนตฺตปฺปปฺปหานาย
มคฺโค ภาวิโต ฯเปฯ โพชฺฌงฺคา ภาวิตา ฯเปฯ
     [๕๕๗]   นนุ   อรหา   วีตราโค  วีตโทโส  ฯเปฯ  สจฺฉิกาตพฺพํ
สจฺฉิกตนฺติ   ฯ  อามนฺตา  ฯ  หญฺจิ  อรหา  วีตราโค  วีตโทโส  ฯเปฯ
สจฺฉิกาตพฺพํ สจฺฉิกตํ โน วต เร วตฺตพฺเพ อตฺถิ อรหโต ปรวิตารณาติ ฯ
     [๕๕๘]   อตฺถิ  อรหโต  ปรวิตารณาติ  ฯ  สธมฺมกุสลสฺส  อรหโต
อตฺถิ   ปรวิตารณา   ปรธมฺมกุสลสฺส   อรหโต   นตฺถิ  ปรวิตารณาติ  ฯ
สธมฺมกุสลสฺส    อรหโต    อตฺถิ    ปรวิตารณาติ   ฯ   อามนฺตา   ฯ
ปรธมฺมกุสลสฺส อรหโต อตฺถิ ปรวิตารณาติ ฯ น เหวํ วตฺตพฺเพ ฯเปฯ
     [๕๕๙]   ปรธมฺมกุสลสฺส    อรหโต   นตฺถิ   ปรวิตารณาติ   ฯ
อามนฺตา    ฯ    สธมฺมกุสลสฺส    อรหโต   นตฺถิ   ปรวิตารณาติ   ฯ
เหวํ วตฺตพฺเพ ฯเปฯ
     [๕๖๐]   สธมฺมกุสลสฺส   อรหโต   ราโค   ปหีโน   อตฺถิ  ตสฺส
ปรวิตารณาติ   ฯ  อามนฺตา  ฯ  ปรธมฺมกุสลสฺส  อรหโต  ราโค  ปหีโน
อตฺถิ ตสฺส ปรวิตารณาติ ฯ น เหวํ วตฺตพฺเพ ฯเปฯ
     [๕๖๑]   สธมฺมกุสลสฺส   อรหโต   โทโส  ปหีโน  ฯเปฯ  โมโห
ปหีโน ฯเปฯ อโนตฺตปฺปํ ปหีนํ ฯเปฯ
     [๕๖๒]   สธมฺมกุสลสฺส   ราคปฺปหานาย   มคฺโค  ภาวิโต  ฯเปฯ
โพชฺฌงฺคา   ภาวิตา  ฯเปฯ  โทสปฺปหานาย  ฯเปฯ  อโนตฺตปฺปปฺปหานาย
มคฺโค ภาวิโต ฯเปฯ โพชฺฌงฺคา ภาวิตา ฯเปฯ
     [๕๖๓]   สธมฺมกุสโล  อรหา  วีตราโค วีตโทโส ฯเปฯ สจฺฉิกาตพฺพํ
สจฺฉิกตํ   อตฺถิ   ตสฺส   ปรวิตารณาติ   ฯ  อามนฺตา  ฯ  ปรธมฺมกุสโล
อรหา   วีตราโค   วีตโทโส   วีตโมโห   ฯเปฯ  สจฺฉิกาตพฺพํ  สจฺฉิกตํ
อตฺถิ ตสฺส ปรวิตารณาติ ฯ น เหวํ วตฺตพฺเพ ฯเปฯ
     [๕๖๔]   ปรธมฺมกุสลสฺส   อรหโต   ราโค   ปหีโน  นตฺถิ  ตสฺส
ปรวิตารณาติ   ฯ   อามนฺตา  ฯ  สธมฺมกุสลสฺส  อรหโต  ราโค  ปหีโน
นตฺถิ  ตสฺส  ปรวิตารณาติ  ฯ  น  เหวํ  วตฺตพฺเพ  ฯเปฯ ปรธมฺมกุสลสฺส
อรหโต   โทโส   ปหีโน   ฯเปฯ   โมโห   ปหีโน  ฯเปฯ  อโนตฺตปฺปํ
ปหีนํ ฯเปฯ
     [๕๖๕]   ปรธมฺมกุสลสฺส   ราคปฺปหานาย  มคฺโค  ภาวิโต  ฯเปฯ
โพชฺฌงฺคา  ภาวิตา  ฯเปฯ  โทสปฺปหานานาย  ฯเปฯ อโนตฺตปฺปปฺปหานาย
มคฺโค ภาวิโต ฯเปฯ โพชฺฌงฺคา ภาวิตา ฯเปฯ
     [๕๖๖]   ปรธมฺมกุสโล  อรหา  วีตราโค  วีตโทโส วีตโมโห ฯเปฯ
สจฺฉิกาตพฺพํ   สจฺฉิกตํ   นตฺถิ   ตสฺส   ปรวิตารณาติ   ฯ  อามนฺตา  ฯ
สธมฺมกุสโล   อรหา   วีตราโค  วีตโทโส  ฯเปฯ  สจฺฉิกาตพฺพํ  สจฺฉิกตํ
นตฺถิ ตสฺส ปรวิตารณาติ ฯ น เหวํ วตฺตพฺเพ ฯเปฯ
     [๕๖๗]   อตฺถิ   อรหโต   ปรวิตารณาติ   ฯ  อามนฺตา  ฯ  นนุ
วุตฺตํ   ภควตา   ชานตฺวาหํ   ภิกฺขเว   ปสฺสโต  อาสวานํ  ขยํ  วทามิ
โน   อชานโต   โน   อปสฺสโต   กิญฺจ  ภิกฺขเว  ชานโต  กึ  ปสฺสโต
อาสวานํ  ขโย  โหติ  ฯ  อิติ  รูปํ  ฯเปฯ  อิติ  วิญฺญาณสฺส อตฺถงฺคโมติ
เอวํ   โข   ภิกฺขเว   ชานโต  เอวํ  ปสฺสโต  อาสวานํ  ขโย  โหตีติ
อตฺเถว   สุตฺตนฺโตติ   ฯ   อามนฺตา   ฯ  เตน  หิ  น  วตฺตพฺพํ  อตฺถิ
อรหโต ปรวิตารณาติ ฯ
     [๕๖๘]   อตฺถิ   อรหโต   ปรวิตารณาติ   ฯ  อามนฺตา  ฯ  นนุ
วุตฺตํ   ภควตา   ชานตฺวาหํ   ภิกฺขเว   ปสฺสโต  อาสวานํ  ขยํ  วทามิ
โน   อชานโต   โน   อปสฺสโต   กิญฺจ  ภิกฺขเว  ชานโต  กึ  ปสฺสโต
อาสวานํ   ขโย   โหติ   อิทํ   ทุกฺขนฺติ   ภิกฺขเว   ชานโต   ปสฺสโต
อาสวานํ   ขโย   โหติ   อยํ  ทุกฺขสมุทโยติ  ฯเปฯ  อยํ  ทุกฺขนิโรโธติ
ฯเปฯ    อยํ   ทุกฺขนิโรธคามินีปฏิปทาติ   ชานโต   ปสฺสโต   อาสวานํ
ขโย   โหติ   เอวํ   โข   ภิกฺขเว  ชานโต  เอวํ  ปสฺสโต  อาสวานํ
ขโย   โหตีติ   อตฺเถว   สุตฺตนฺโตติ   ฯ   อามนฺตา  ฯ  เตน  หิ  น
@เชิงอรรถ: ๑. สํ. นิทาน. ๓๕.
วตฺตพฺพํ อตฺถิ อรหโต ปรวิตารณาติ ฯ
     [๕๖๙]   อตฺถิ   อรหโต   ปรวิตารณาติ   ฯ  อามนฺตา  ฯ  นนุ
วุตฺตํ   ภควตา   สพฺพํ  ภิกฺขเว  อนภิชานํ  อปริชานํ  อวิราชยํ  อปฺปชหํ
อภพฺโพ    ทุกฺขกฺขยาย    สพฺพญฺจ   โข   ภิกฺขเว   อภิชานํ   ปริชานํ
วิราชยํ   ปชหํ   ภพฺโพ   ทุกฺขกฺขยายาติ   ๑-  อตฺเถว  สุตฺตนฺโตติ  ฯ
อามนฺตา ฯ เตน หิ น วตฺตพฺพํ อตฺถิ อรหโต ปรวิตารณาติ ฯ
     [๕๗๐]   อตฺถิ  อรหโต  ปรวิตารณาติ  ฯ  อามนฺตา  ฯ  นนุ วุตฺตํ
ภควตา   สหาวสฺส   ทสฺสนสมฺปทาย   ฯเปฯ   ฉ  จาภิฐานานิ  อภพฺโพ
กาตุนฺติ   อตฺเถว   สุตฺตนฺโตติ  ฯ  อามนฺตา  ฯ  เตน  หิ  น  วตฺตพฺพํ
อตฺถิ อรหโต ปรวิตารณาติ ฯ
     [๕๗๑]   อตฺถิ   อรหโต   ปรวิตารณาติ   ฯ  อามนฺตา  ฯ  นนุ
วุตฺตํ   ภควตา   ยสฺมึ   ภิกฺขเว   สมเย   อริยสาวกสฺส  วิรชํ  วีตมลํ
ธมฺมจกฺขุํ    อุทปาทิ   ยํ   กิญฺจิ   สมุทยธมฺมํ   สพฺพนฺตํ   นิโรธธมฺมนฺติ
สห   ทสฺสนุปฺปาทา   ภิกฺขเว   อริยสาวกสฺส  ตีณิ  สญฺโญชนานิ  ปหียนฺติ
สกฺกายทิฏฺฐิ   วิจิกิจฺฉา   สีลพฺพตปรามาโสติ   อตฺเถว   สุตฺตนฺโตติ   ฯ
อามนฺตา ฯ เตน หิ น วตฺตพฺพํ อตฺถิ อรหโต ปรวิตารณาติ ฯ
     [๕๗๒]   อตฺถิ  อรหโต  ปรวิตารณาติ  ฯ  อามนฺตา  ฯ  นนุ วุตฺตํ
ภควตา
                               นาหํ คมิสฺสามิ ปโมจนาย
                               กถํกถึ โธตก กญฺจิ โลเก ๒-
@เชิงอรรถ: ๑. สํ. สฬายตน. ๒๑. ๒. ม. กถํกถึ เตน กิญฺจิ โลเก.
                               ธมฺมญฺจ เสฏฺฐํ อภิชานมาโน
                               เอวํ ตุวํ โอฆมิมนฺตเรสีติ ๑-
อตฺเถว   สุตฺตนฺโตติ   ฯ   อามนฺตา   ฯ  เตน  หิ  น  วตฺตพฺพํ  อตฺถิ
อรหโต ปรวิตารณาติ ฯ
     [๕๗๓]   น  วตฺตพฺพํ  อตฺถิ  อรหโต  ปรวิตารณาติ  ฯ อามนฺตา ฯ
นนุ   อรหโต   อิตฺถีปุริสานํ   นามโคตฺตํ   ปเร  วิตาเรยฺยุํ  มคฺคามคฺคํ
ปเร   วิตาเรยฺยุํ   ติณกฏฺฐวนปฺปตีนํ   นามํ   ปเร   วิตาเรยฺยุนฺติ   ฯ
อามนฺตา   ฯ  หญฺจิ  อรหโต  อิตฺถีปุริสานํ  นามโคตฺตํ  ปเร  วิตาเรยฺยุํ
มคฺคามคฺคํ     ปเร    วิตาเรยฺยุํ    ติณกฏฺฐวนปฺปตีนํ    นามํ    ปเร
วิตาเรยฺยุํ เตน วต เร วตฺตพฺเพ อตฺถิ อรหโต ปรวิตารณาติ ฯ
     [๕๗๔]   อรหโต  อิตฺถีปุริสานํ  นามโคตฺตํ  ปเร  วิตาเรยฺยุํ มคฺคา
มคฺคํ   ปเร   วิตาเรยฺยุํ   ติณกฏฺฐวนปฺปตีนํ   นามํ  ปเร  วิตาเรยฺยุนฺติ
อตฺถิ   อรหโต   ปรวิตารณาติ  ฯ  อามนฺตา  ฯ  อรหโต  โสตาปตฺติผลํ
วา  สกทาคามิผลํ  วา  อนาคามิผลํ วา อรหตฺตํ วา ปเร วิตาเรยฺยุนฺติ ฯ
น เหวํ วตฺตพฺเพ ฯเปฯ
                                       ปรวิตารณากถา ฯ
                                            --------
@เชิงอรรถ:  ขุ. สุ. ๔๓๘ ฯ ขุ. จู. ๘๕ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๒๐๘-๒๑๔. https://84000.org/tipitaka/read/pali_read.php?B=37&A=4198&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=4198&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=547&items=28              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=33              ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=547              สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]