ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๗ ภาษาบาลี อักษรไทย พระอภิธรรมปิฎกเล่มที่ ๔ อภิ. กถาวตฺถุ

                                         โวหารกถา
     [๖๗๑]   พุทฺธสฺส  ภควโต  โวหาโร  โลกุตฺตโรติ  ฯ  อามนฺตา ฯ
โลกุตฺตเร   โสเต   ปฏิหญฺญติ   โน   โลกิเย  โลกุตฺตเรน  วิญฺญาเณน
ปฏิวิชานนฺติ   โน   โลกิเยน  สาวกา  ปฏิวิชานนฺติ  โน  ปุถุชฺชนาติ  ฯ
น เหวํ วตฺตพฺเพ ฯเปฯ
     [๖๗๒]   นนุ  พุทฺธสฺส ภควโต โวหาโร โลกิเย โสเต ปฏิหญฺญตีติ ฯ
อามนฺตา    ฯ    หญฺจิ    พุทฺธสฺส    ภควโต    โวหาโร    โลกิเย
โสเต   ปฏิหญฺญติ  โน  วต  เร  วตฺตพฺเพ  พุทฺธสฺส  ภควโต  โวหาโร
โลกุตฺตโรติ ฯ
     [๖๗๓]   นนุ   พุทฺธสฺส   ภควโต  โวหารํ  โลกิเยน  วิญฺญาเณน
ปฏิวิชานนฺตีติ   ฯ   อามนฺตา   ฯ   หญฺจิ   พุทฺธสฺส   ภควโต  โวหารํ
โลกิเยน   วิญฺญาเณน   ปฏิวิชานนฺติ   โน  วต  เร  วตฺตพฺเพ  พุทฺธสฺส
ภควโต โวหาโร โลกุตฺตโรติ ฯ
     [๖๗๔]   นนุ  พุทฺธสฺส  ภควโต  โวหารํ  ปุถุชฺชนา ปฏิวิชานนฺตีติ ฯ
อามนฺตา   ฯ   หญฺจิ  พุทฺธสฺส  ภควโต  โวหารํ  ปุถุชฺชนา  ปฏิวิชานนฺติ
โน วต เร วตฺตพฺเพ พุทฺธสฺส ภควโต โวหาโร โลกุตฺตโรติ ฯ
     [๖๗๕]   พุทฺธสฺส  ภควโต  โวหาโร  โลกุตฺตโรติ  ฯ  อามนฺตา ฯ
มคฺโค   ผลํ   นิพฺพานํ   โสตาปตฺติมคฺโค  โสตาปตฺติผลํ  สกทาคามิมคฺโค
สกทาคามิผลํ   อนาคามิมคฺโค   อนาคามิผลํ   อรหตฺตมคฺโค   อรหตฺตผลํ
สติปฏฺฐานํ   สมฺมปฺปธานํ   อิทฺธิปาโท   อินฺทฺริยํ   พลํ   โพชฺฌงฺโคติ  ฯ
น เหวํ วตฺตพฺเพ ฯเปฯ
     [๖๗๖]   พุทฺธสฺส  ภควโต  โวหาโร  โลกุตฺตโรติ  ฯ  อามนฺตา ฯ
อตฺถิ   เกจิ   พุทฺธสฺส   ภควโต   โวหารํ   สุณนฺตีติ  ฯ  อามนฺตา  ฯ
โลกุตฺตโร    ธมฺโม    โสตวิญฺเญยฺโย    โสตสฺมึ   ปฏิหญฺญติ   โสตสฺส
อาปาถํ อาคจฺฉตีติ ฯ น เหวํ วตฺตพฺเพ ฯเปฯ
     [๖๗๗]   นนุ  โลกุตฺตโร  ธมฺโม  น  โสตวิญฺเญยฺโย  น  โสตสฺมึ
ปฏิหญฺญติ    น    โสตสฺส   อาปาถํ   อาคจฺฉตีติ   ฯ   อามนฺตา   ฯ
หญฺจิ   โลกุตฺตโร   ธมฺโม   น   โสตวิญฺเญยฺโย  น  โสตสฺมึ  ปฏิหญฺญติ
น   โสตสฺส   อาปาถํ   อาคจฺฉติ   โน   วต  เร  วตฺตพฺเพ  พุทฺธสฺส
ภควโต โวหาโร โลกุตฺตโรติ ฯ
     [๖๗๘]   พุทฺธสฺส  ภควโต  โวหาโร  โลกุตฺตโรติ  ฯ  อามนฺตา ฯ
อตฺถิ   เกจิ  พุทฺธสฺส  ภควโต  โวหาเร  รชฺเชยฺยุนฺติ  ฯ  อามนฺตา  ฯ
โลกุตฺตโร   ธมฺโม   ราคฏฺฐานิโย  รชนิโย  กมนิโย  มทนิโย  พนฺธนิโย
มุจฺฉนิโยติ ฯ น เหวํ วตฺตพฺเพ ฯเปฯ
     [๖๗๙]   นนุ   โลกุตฺตโร  ธมฺโม  น  ราคฏฺฐานิโย  น  รชนิโย
น  กมนิโย  น  มทนิโย  น  พนฺธนิโย  น  มุจฺฉนิโยติ  ฯ  อามนฺตา  ฯ
หญฺจิ   โลกุตฺตโร   ธมฺโม   น  ราคฏฺฐานิโย  น  รชนิโย  น  กมนิโย
น   มทนิโย   น   พนฺธนิโย   น   มุจฺฉนิโย  โน  วต  เร  วตฺตพฺเพ
พุทฺธสฺส ภควโต โวหาโร โลกุตฺตโรติ ฯ
     [๖๘๐]   พุทฺธสฺส  ภควโต  โวหาโร  โลกุตฺตโรติ  ฯ  อามนฺตา ฯ
อตฺถิ   เกจิ   พุทฺธสฺส  ภควโต  โวหารํ  ทุสฺเสยฺยุนฺติ  ฯ  อามนฺตา  ฯ
โลกุตฺตโร   ธมฺโม   โทสฏฺฐานิโย   โกปฏฺฐานิโย   ปฏิฆฏฺฐานิโยติ   ฯ
น เหวํ วตฺตพฺเพ ฯเปฯ
     [๖๘๑]   นนุ  โลกุตฺตโร  ธมฺโม  น  โทสฏฺฐานิโย น โกปฏฺฐานิโย
น   ปฏิฆฏฺฐานิโยติ   ฯ   อามนฺตา   ฯ   หญฺจิ  โลกุตฺตโร  ธมฺโม  น
โทสฏฺฐานิโย   น   โกปฏฺฐานิโย   น   ปฏิฆฏฺฐานิโย   โน   วต  เร
วตฺตพฺเพ พุทฺธสฺส ภควโต โวหาโร โลกุตฺตโรติ ฯ
     [๖๘๒]   พุทฺธสฺส  ภควโต  โวหาโร  โลกุตฺตโรติ  ฯ  อามนฺตา ฯ
อตฺถิ   เกจิ  พุทฺธสฺส  ภควโต  โวหาเร  มุยฺเหยฺยุนฺติ  ฯ  อามนฺตา  ฯ
โลกุตฺตโร     ธมฺโม     โมหฏฺฐานิโย    อญฺญาณกรโณ    อจกฺขุกรโณ
ปญฺญานิโรธิโก    วิฆาตปกฺขิโก    อนิพฺพานสํวตฺตนิโกติ   ฯ   น   เหวํ
วตฺตพฺเพ ฯเปฯ
     [๖๘๓]   นนุ  โลกุตฺตโร  ธมฺโม  น  โมหฏฺฐานิโย น อญฺญาณกรโณ
น   อจกฺขุกรโณ   ปญฺญาวุฑฺฒิโก   อวิฆาตปกฺขิโก  นิพฺพานสํวตฺตนิโกติ  ฯ
อามนฺตา  ฯ  หญฺจิ  โลกุตฺตโร  ธมฺโม  น  โมหฏฺฐานิโย น อญฺญาณกรโณ
น    อจกฺขุกรโณ    ปญฺญาวุฑฺฒิโก    อวิฆาตปกฺขิโก   นิพฺพานสํวตฺตนิโก
โน วต เร วตฺตพฺเพ พุทฺธสฺส ภควโต โวหาโร โลกุตฺตโรติ ฯ
     [๖๘๔]   พุทฺธสฺส  ภควโต  โวหาโร  โลกุตฺตโรติ  ฯ  อามนฺตา ฯ
เย   เกจิ   พุทฺธสฺส   ภควโต   โวหารํ   สุณนฺติ   สพฺเพ  เต  มคฺคํ
ภาเวนฺตีติ ฯ น เหวํ วตฺตพฺเพ ฯเปฯ
     [๖๘๕]   เย   เกจิ   พุทฺธสฺส  ภควโต  โวหารํ  สุณนฺติ  สพฺเพ
เต  มคฺคํ  ภาเวนฺตีติ  ฯ  อามนฺตา  ฯ  พาลปุถุชฺชนา  พุทฺธสฺส  ภควโต
โวหารํ    สุณนฺติ   พาลปุถุชฺชนา   มคฺคํ   ภาเวนฺตีติ   ฯ   น   เหวํ
วตฺตพฺเพ  ฯเปฯ  มาตุฆาตโก  ฯเปฯ ปิตุฆาตโก ... อรหนฺตฆาตโก ...
รุหิรุปฺปาทโก   ฯเปฯ   สงฺฆเภทโก   พุทฺธสฺส  ภควโต  โวหารํ  สุณาติ
สงฺฆเภทโก มคฺคํ ภาเวตีติ ฯ น เหวํ วตฺตพฺเพ ฯเปฯ
     [๖๘๖]   ลพฺภา     โสวณฺณมยาย     ลฏฺฐิยา    ธญฺญปุญฺโชปิ
สุวณฺณปุญฺโชปิ    อาจิกฺขิตุนฺติ    ฯ   อามนฺตา   ฯ   เอวเมว   ภควา
โลกุตฺตเรน โวหาเรน โลกิยมฺปิ โลกุตฺตรมฺปิ ธมฺมํ โวหรตีติ ฯ
     [๖๘๗]   ลพฺภา     เอลณฺฑิยาย     ลฏฺฐิยา     ธญฺญปุญฺโชปิ
สุวณฺณปุญฺโชปิ    อาจิกฺขิตุนฺติ    ฯ   อามนฺตา   ฯ   เอวเมว   ภควา
โลกิเยน โวหาเรน โลกิยมฺปิ โลกุตฺตรมฺปิ ธมฺมํ โวหรตีติ ฯ
     [๖๘๘]   พุทฺธสฺส  ภควโต  โวหาโร  โลกิยํ  โวหรนฺตสฺส  โลกิโย
โหติ  โลกุตฺตรํ  โวหรนฺตสฺส  โลกุตฺตโร  โหตีติ  ฯ  อามนฺตา  ฯ โลกิยํ
โวหรนฺตสฺส   โส   โลกิเย   โสเต   ปฏิหญฺญติ  โลกุตฺตรํ  โวหรนฺตสฺส
โลกุตฺตเร   โสเต  ปฏิหญฺญติ  โลกิยํ  โวหรนฺตสฺส  โลกิเยน  วิญฺญาเณน
ปฏิวิชานนฺติ     โลกุตฺตรํ     โวหรนฺตสฺส    โลกุตฺตเรน    วิญฺญาเณน
ปฏิวิชานนฺติ      โลกิยํ     โวหรนฺตสฺส     ปุถุชฺชนา     ปฏิวิชานนฺติ
โลกุตฺตรํ    โวหรนฺตสฺส    สาวกา    ปฏิวิชานนฺตีติ    ฯ   น   เหวํ
วตฺตพฺเพ ฯเปฯ
     [๖๘๙]   น  วตฺตพฺพํ  พุทฺธสฺส  ภควโต โวหาโร โลกิยํ โวหรนฺตสฺส
โลกิโย  โหติ  โลกุตฺตรํ  โวหรนฺตสฺส  โลกุตฺตโร  โหตีติ  ฯ อามนฺตา ฯ
นนุ   ภควา   โลกิยมฺปิ  โลกุตฺตรมฺปิ  ธมฺมํ  โวหรตีติ  ฯ  อามนฺตา  ฯ
หญฺจิ   ภควา   โลกิยมฺปิ   โลกุตฺตรมฺปิ   ธมฺมํ   โวหรติ   เตน   วต
เร  วตฺตพฺเพ  พุทฺธสฺส  ภควโต  โวหาโร  โลกิยํ  โวหรนฺตสฺส  โลกิโย
โหติ โลกุตฺตรํ โวหรนฺตสฺส โลกุตฺตโร โหตีติ ฯ
     [๖๙๐]   พุทฺธสฺส  ภควโต  โวหาโร  โลกิยํ  โวหรนฺตสฺส  โลกิโย
โหติ   โลกุตฺตรํ   โวหรนฺตสฺส   โลกุตฺตโร   โหตีติ   ฯ  อามนฺตา  ฯ
มคฺคํ    โวหรนฺตสฺส    มคฺโค   โหติ   อมคฺคํ   โวหรนฺตสฺส   อมคฺโค
โหติ    ผลํ   โวหารนฺตสฺส   ผลํ   โหติ   อผลํ   โวหรนฺตสฺส   อผลํ
โหติ   นิพฺพานํ   โวหรนฺตสฺส   นิพฺพานํ   โหติ   อนิพฺพานํ  โวหรนฺตสฺส
อนิพฺพานํ    โหติ    สงฺขตํ    โวหรนฺตสฺส    สงฺขตํ   โหติ   อสงฺขตํ
โวหรนฺตสฺส   อสงฺขตํ   โหติ   รูปํ   โวหรนฺตสฺส   รูปํ   โหติ   อรูปํ
โวหรนฺตสฺส   อรูปํ   โหติ  เวทนํ  โวหรนฺตสฺส  เวทนา  โหติ  อเวทนํ
โวหรนฺตสฺส    อเวทนา    โหติ   สญฺญํ   โวหรนฺตสฺส   สญฺญา   โหติ
อสญฺญํ   โวหรนฺตสฺส   อสญฺญา   โหติ  สงฺขาเร  โวหรนฺตสฺส  สงฺขารา
โหนฺติ    อสงฺขาเร    โวหรนฺตสฺส    อสงฺขารา    โหนฺติ    วิญฺญาณํ
โวหรนฺตสฺส    วิญฺญาณํ    โหติ    อวิญฺญาณํ    โวหรนฺตสฺส   อวิญฺญาณํ
โหตีติ ฯ น เหวํ วตฺตพฺเพ ฯเปฯ
                                         โวหารกถา ฯ
                                            -------


             เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๒๔๔-๒๔๙. https://84000.org/tipitaka/read/pali_read.php?B=37&A=4912&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=4912&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=671&items=20              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=39              ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=671              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=4211              The Pali Atthakatha in Roman :- https://84000.org/tipitaka/atthapali/read_rm.php?B=55&A=4211              สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]