บาลีพระไตรปิฎกเล่มที่ ๓๗ - พระอภิธรรมปิฎกเล่มที่ ๔

                                        วิมุจฺจมานกถา
     [๗๕๔]   วิมุตฺตํ  วิมุจฺจมานนฺติ  ฯ  อามนฺตา  ฯ  เอกเทสํ  วิมุตฺตํ
เอกเทสํ อวิมุตฺตนฺติ ฯ น เหวํ วตฺตพฺเพ ฯเปฯ
     [๗๕๕]   เอกเทสํ  วิมุตฺตํ  เอกเทสํ  อวิมุตฺตนฺติ  ฯ  อามนฺตา  ฯ
เอกเทสํ    โสตาปนฺโน    เอกเทสํ    น    โสตาปนฺโน    เอกเทสํ
โสตาปตฺติผลปฺปตฺโต     ปฏิลทฺโธ    อธิคโต    สจฺฉิกโต    อุปสมฺปชฺช
วิหรติ  กาเยน  ผุสิตฺวา  วิหรติ  เอกเทสํ  น  กาเยน  ผุสิตฺวา  วิหรติ
เอกเทสํ  สตฺตกฺขตฺตุํปรโม  โกลํโกโล  เอกวีชี  พุทฺเธ  อเวจฺจปฺปสาเทน
สมนฺนาคโต  ธมฺเม  ฯเปฯ  สงฺเฆ  ฯเปฯ อริยกนฺเตหิ สีเลหิ สมนฺนาคโต
เอกเทสํ อริยกนฺเตหิ สีเลหิ น สมนฺนาคโตติ ฯ น เหวํ วตฺตพฺเพ ฯเปฯ
     [๗๕๖]   เอกเทสํ  วิมุตฺตํ  เอกเทสํ  อวิมุตฺตนฺติ  ฯ  อามนฺตา  ฯ
เอกเทสํ     สกทาคามี     เอกเทสํ    น    สกทาคามี    เอกเทสํ
สกทาคามิผลปฺปตฺโต     ปฏิลทฺโธ    อธิคโต    สจฺฉิกโต    อุปสมฺปชฺช
วิหรติ  กาเยน  ผุสิตฺวา  วิหรติ  เอกเทสํ  น กาเยน ผุสิตฺวา วิหรตีติ ฯ
น เหวํ วตฺตพฺเพ ฯเปฯ
     [๗๕๗]   เอกเทสํ  วิมุตฺตํ  เอกเทสํ  อวิมุตฺตนฺติ  ฯ  อามนฺตา  ฯ
เอกเทสํ  อนาคามี  เอกเทสํ  น  อนาคามี  เอกเทสํ อนาคามิผลปฺปตฺโต
ปฏิลทฺโธ     อธิคโต     สจฺฉิกโต    อุปสมฺปชฺช    วิหรติ    กาเยน
ผุสิตฺวา   วิหรติ   เอกเทสํ   น   กาเยน   ผุสิตฺวา  วิหรติ  เอกเทสํ
อนฺตรา     ปรินิพฺพายี     อุปหจฺจ    ปรินิพฺพายี    อสงฺขารปรินิพฺพายี
สสงฺขารปรินิพฺพายี   อุทฺธํโสโต   อกนิฏฺฐคามี   เอกเทสํ  น  อุทฺธํโสโต
น อกนิฏฺฐคามีติ ฯ น เหวํ วตฺตพฺเพ ฯเปฯ
     [๗๕๘]   เอกเทสํ  วิมุตฺตํ  เอกเทสํ  อวิมุตฺตนฺติ  ฯ  อามนฺตา  ฯ
เอกเทสํ   อรหา   เอกเทสํ   น   อรหา   เอกเทสํ   อรหตฺตปฺปตฺโต
ปฏิลทฺโธ   อธิคโต   สจฺฉิกโต   อุปสมฺปชฺช   วิหรติ   กาเยน  ผุสิตฺวา
วิหรติ   เอกเทสํ   น   กาเยน   ผุสิตฺวา  วิหรติ  เอกเทสํ  วีตราโค
วีตโทโส   วีตโมโห   ฯเปฯ  เอกเทสํ  สจฺฉิกาตพฺพํ  สจฺฉิกตํ  เอกเทสํ
สจฺฉิกาตพฺพํ น สจฺฉิกตนฺติ ฯ น เหวํ วตฺตพฺเพ ฯเปฯ
     [๗๕๙]   วิมุตฺตํ   วิมุจฺจมานนฺติ   ฯ  อามนฺตา  ฯ  อุปฺปาทกฺขเณ
วิมุตฺตํ วยกฺขเณ วิมุจฺจมานนฺติ ฯ น เหวํ วตฺตพฺเพ ฯเปฯ
     [๗๖๐]   น  วตฺตพฺพํ  วิมุตฺตํ  วิมุจฺจมานนฺติ  ฯ  อามนฺตา  ฯ  นนุ
วุตฺตํ   ภควตา  ตสฺส  เอวํ  ชานโต  เอวํ  ปสฺสโต  กามาสวาปิ  จิตฺตํ
วิมุจฺจติ   ภวาสวาปิ  จิตฺตํ  วิมุจฺจติ  อวิชฺชาสวาปิ  จิตฺตํ  วิมุจฺจตีติ  ^๑-
อตฺเถว สุตฺตนฺโตติ ฯ อามนฺตา ฯ เตน หิ วิมุตฺตํ วิมุจฺจมานนฺติ ฯ
     [๗๖๑]   วิมุตฺตํ   วิมุจฺจมานนฺติ   ฯ   อามนฺตา   ฯ  นนุ  วุตฺตํ
ภควตา   โส  เอวํ  สมาหิเต  จิตฺเต  ปริสุทฺเธ  ปริโยทาเต  อนงฺคเณ
วิคตูปกฺกิเลเส   มุทุภูเต   กมฺมนีเย   ฐิเต   อาเนญฺชปฺปตฺเต  อาสวานํ
ขยญาณาย  จิตฺตํ  อภินินฺนาเมตีติ  ^๒-  อตฺเถว  สุตฺตนฺโตติ ฯ อามนฺตา ฯ
@เชิงอรรถ: ^๑ ม. อุ. ๒๓ ? ม. อุ. ๒๓ ฯ อํ. จตุหฺก. ๒๙๖ ฯ
เตน หิ น วตฺตพฺพํ วิมุตฺตํ วิมุจฺจมานนฺติ
     [๗๖๒]   อตฺถิ  จิตฺตํ  วิมุจฺจมานนฺติ  ฯ  อามนฺตา  ฯ  อตฺถิ  จิตฺตํ
รชฺชมานํ  ทุสฺสมานํ  มุยฺหมานํ  กิลิสฺสมานนฺติ  ฯ  น เหวํ วตฺตพฺเพ ฯเปฯ
นนุ    รตฺตญฺเจว    อรตฺตญฺจ    ทุฏฺฐญฺเจว    อทุฏฺฐญฺจ    มูฬฺหญฺเจว
อมูฬฺหญฺจ    ฉินฺนญฺเจว   อจฺฉินฺนญฺจ   ภินฺนญฺเจว   อภินฺนญฺจ   กตญฺเจว
อกตญฺจาติ   ฯ   อามนฺตา   ฯ  หญฺจิ  รตฺตญฺเจว  อรตฺตญฺจ  ทุฏฺฐญฺเจว
อทุฏฺฐญฺจ   มูฬฺหญฺเจว   อมูฬฺหญฺจ   ฉินฺนญฺเจว   อจฺฉินฺนญฺจ   ภินฺนญฺเจว
อภินฺนญฺจ    กตญฺเจว    อกตญฺจ   โน   วต   เร   วตฺตพฺเพ   อตฺถิ
จิตฺตํ วิมุจฺจมานนฺติ ฯ
                                        วิมุจฺจมานกถา ฯ
                                           ----------

เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๒๖๔-๒๖๖. https://84000.org/tipitaka/read/pali_read.php?B=37&A=5314&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=5314&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=754&items=9 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=44 ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=754 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=4338 The Pali Atthakatha in Roman :- https://84000.org/tipitaka/atthapali/read_rm.php?B=55&A=4338 สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37