บาลีพระไตรปิฎกเล่มที่ ๓๗ - พระอภิธรรมปิฎกเล่มที่ ๔

                                     ปฐวีกมฺมวิปาโกติกถา
     [๑๑๕๘]   ปฐวี   กมฺมวิปาโกติ   ฯ   อามนฺตา  ฯ  สุขเวทนิยา
ทุกฺขเวทนิยา    อทุกฺขมสุขเวทนิยา    สุขาย    เวทนาย    สมฺปยุตฺตา
ทุกฺขาย   เวทนาย   สมฺปยุตฺตา   อทุกฺขมสุขาย   เวทนาย   สมฺปยุตฺตา
ผสฺเสน    สมฺปยุตฺตา    เวทนาย    สมฺปยุตฺตา   สญฺญาย   สมฺปยุตฺตา
เจตนาย    สมฺปยุตฺตา    จิตฺเตน    สมฺปยุตฺตา    สารมฺมณา    อตฺถิ
ตาย   อาวชฺชนา  อาโภโค  สมนฺนาหาโร  มนสิกาโร  เจตนา  ปตฺถนา
ปณิธีติ  ฯ  น  เหวํ  วตฺตพฺเพ  ฯเปฯ นนุ น สุขเวทนิยา น ทุกฺขเวทนิยา
น     อทุกฺขมสุขเวทนิยา     น     สุขาย    เวทนาย    สมฺปยุตฺตา
น  ทุกฺขาย  เวทนาย  สมฺปยุตฺตา  น  อทุกฺขมสุขาย  เวทนาย สมฺปยุตฺตา
น    ผสฺเสน   สมฺปยุตฺตา   น   เวทนาย   สมฺปยุตฺตา   น   สญฺญาย
สมฺปยุตฺตา    น    เจตนาย    สมฺปยุตฺตา   น   จิตฺเตน   สมฺปยุตฺตา
อนารมฺมณา  นตฺถิ  ตาย  อาวชฺชนา  อาโภโค  สมนฺนาหาโร  มนสิกาโร
เจตนา   ปตฺถนา   ปณิธีติ   ฯ   อามนฺตา   ฯ  หญฺจิ  น  สุขเวทนิยา
น    ทุกฺขเวทนิยา    ฯเปฯ   อนารมฺมณา   นตฺถิ   ตาย   อาวชฺชนา
ฯเปฯ ปณิธิ โน วต เร วตฺตพฺเพ ปฐวี กมฺมวิปาโกติ ฯ
     [๑๑๕๙]   ผสฺโส  กมฺมวิปาโก  ผสฺโส  สุขเวทนิโย  ทุกฺขเวทนิโย
อทุกฺขมสุขเวทนิโย    สุขาย   เวทนาย   สมฺปยุตฺโต   ทุกฺขาย   ฯเปฯ
อทุกฺขมสุขาย   เวทนาย   สมฺปยุตฺโต   ผสฺเสน   สมฺปยุตฺโต   เวทนาย
สมฺปยุตฺโต    สญฺญาย    สมฺปยุตฺโต    เจตนาย   สมฺปยุตฺโต   จิตฺเตน
สมฺปยุตฺโต   สารมฺมณา   อตฺถิ   ตสฺส   อาวชฺชนา   ฯเปฯ  ปณิธีติ  ฯ
อามนฺตา   ฯ   ปฐวี   กมฺมวิปาโก   ปฐวี   สุขเวทนิยา  ทุกฺขเวทนิยา
อทุกฺขมสุขเวทนิยา   สุขาย   เวทนาย   สมฺปยุตฺตา   ทุกฺขาย  เวทนาย
สมฺปยุตฺตา   อทุกฺขมสุขาย   เวทนาย   สมฺปยุตฺตา   ผสฺเสน  สมฺปยุตฺตา
เวทนาย    สมฺปยุตฺตา    สญฺญาย   สมฺปยุตฺตา   เจตนาย   สมฺปยุตฺตา
จิตฺเตน   สมฺปยุตฺตา   สารมฺมณา   อตฺถิ   ตาย   อาวชฺชนา  อาโภโค
สมนฺนาหาโร   มนสิกาโร   เจตนา   ปตฺถนา   ปณิธีติ   ฯ   น  เหวํ
วตฺตพฺเพ ฯเปฯ
     [๑๑๖๐]   ปฐวี    กมฺมวิปาโก   ปฐวี   น   สุขเวทนิยา   น
ทุกฺขเวทนิยา   ฯเปฯ   อนารมฺมณา   นตฺถิ   ตาย   อาวชฺชนา  ฯเปฯ
ปณิธีติ   ฯ   อามนฺตา  ฯ  ผสฺโส  กมฺมวิปาโก  ผสฺโส  น  สุขเวทนิโย
น    ทุกฺขเวทนิโย    ฯเปฯ   อนารมฺมโณ   นตฺถิ   ตสฺส   อาวชฺชนา
ฯเปฯ ปณิธีติ ฯ น เหวํ วตฺตพฺเพ ฯเปฯ
     [๑๑๖๑]   ปฐวี  กมฺมวิปาโกติ  ฯ อามนฺตา ฯ ปฐวี ปคฺคหนิคฺคหูปคา
เฉทนเภทนูปคาติ    ฯ   อามนฺตา   ฯ   กมฺมวิปาโก   ปคฺคหนิคฺคหูปโค
เฉทนเภทนูปโคติ ฯ น เหวํ วตฺตพฺเพ ฯเปฯ
     [๑๑๖๒]   ลพฺภา   ปฐวี   เกตุํ   วิเกตุํ   อาฐเปตุํ   โอจินิตุํ
  วิจินิตุนฺติ   ฯ   อามนฺตา   ฯ   ลพฺภา   กมฺมวิปาโก   เกตุํ   วิเกตุํ
  อาฐเปตุํ โอจินิตุํ วิจินิตุนฺติ ฯ น เหวํ วตฺตพฺเพ ฯเปฯ
     [๑๑๖๓]   ปฐวี  ปเรสํ  สาธารณาติ  ฯ  อามนฺตา  ฯ กมฺมวิปาโก
ปเรสํ สาธารโณติ ฯ น เหวํ วตฺตพฺเพ ฯเปฯ
     [๑๑๖๔]   กมฺมวิปาโก  ปเรสํ  สาธารโณติ  ฯ  อามนฺตา  ฯ  นนุ
วุตฺตํ ภควตา
                          อสาธารณมญฺเญสํ          อโจราหรโณ นิธิ
                          กยิราถ มจฺโจ ปุญฺญานิ    ส เว สุจริตํ จเรติ
อตฺเถว  สุตฺตนฺโตติ  ฯ  อามนฺตา  ฯ  เตน  หิ  น  วตฺตพฺพํ กมฺมวิปาโก
ปเรสํ สาธารโณติ ฯ
     [๑๑๖๕]   ปฐวี  กมฺมวิปาโกติ  ฯ  อามนฺตา  ฯ ปฐมํ ปฐวี สณฺฐาติ
ปจฺฉา   สตฺตา  อุปฺปชฺชนฺตีติ  ฯ  อามนฺตา  ฯ  ปฐมํ  วิปาโก  อุปฺปชฺชติ
ปจฺฉา วิปากปฏิลาภาย กมฺมํ กโรนฺตีติ ฯ น เหวํ วตฺตพฺเพ ฯเปฯ
     [๑๑๖๖]   ปฐวี   สพฺพสตฺตานํ   กมฺมวิปาโกติ   ฯ  อามนฺตา  ฯ
สพฺเพ  สตฺตา  ปฐวึ  ปริภุญฺชนฺตีติ  ฯ  น  เหวํ  วตฺตพฺเพ  ฯเปฯ สพฺเพ
สตฺตา  ปฐวึ  ปริภุญฺชนฺตีติ  ฯ  อามนฺตา  ฯ  อตฺถิ เกจิ ปฐวึ ปริภุญฺชิตฺวา
ปรินิพฺพายนฺตีติ   ฯ   อามนฺตา  ฯ  อตฺถิ  เกจิ  กมฺมวิปากํ  อเขเปตฺวา
ปรินิพฺพายนฺตีติ ฯ น เหวํ วตฺตพฺเพ ฯเปฯ
     [๑๑๖๗]   ปฐวี  จกฺกวตฺติสตฺตสฺส  กมฺมวิปาโกติ  ฯ  อามนฺตา  ฯ
อญฺเญ   สตฺตา   ปฐวึ   ปริภุญฺชนฺตีติ  ฯ  อามนฺตา  ฯ  จกฺกวตฺติสตฺตสฺส
กมฺมวิปากํ   อญฺเญ  สตฺตา  ปริภุญฺชนฺตีติ  ฯ  น  เหวํ  วตฺตพฺเพ  ฯเปฯ
จกฺกวตฺติสตฺตสฺส    กมฺมวิปากํ    อญฺเญ    สตฺตา    ปริภุญฺชนฺตีติ    ฯ
อามนฺตา   ฯ   จกฺกวตฺติสตฺตสฺส   ผสฺสํ   เวทนํ   สญฺญํ   เจตนํ  จิตฺตํ
สทฺธํ   วิริยํ   สตึ   สมาธึ   ปญฺญํ  อญฺเญ  สตฺตา  ปริภุญฺชนฺตีติ  ฯ  น
เหวํ วตฺตพฺเพ ฯเปฯ
     [๑๑๖๘]   น   วตฺตพฺพํ   ปฐวี   กมฺมวิปาโกติ  ฯ  อามนฺตา  ฯ
นนุ    อตฺถิ   อิสฺสริยสํวตฺตนิยํ   กมฺมํ   อธิปจฺจสํวตฺตนิยํ   กมฺมนฺติ   ฯ
อามนฺตา   ฯ   หญฺจิ   อตฺถิ   อิสฺสริยสํวตฺตนิยํ   กมฺมํ  อธิปจฺจสํวตฺตนิยํ
กมฺมํ เตน วต เร วตฺตพฺเพ ปฐวี กมฺมวิปาโกติ ฯ
                                    ปฐวีกมฺมวิปาโกติกถา ฯ
                                            --------

เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๓๗๙-๓๘๒. https://84000.org/tipitaka/read/pali_read.php?B=37&A=7572&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=7572&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1158&items=11 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=89 ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1158 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=5109 The Pali Atthakatha in Roman :- https://84000.org/tipitaka/atthapali/read_rm.php?B=55&A=5109 สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37