พระไตรปิฎกเล่มที่ ๔ ภาษาบาลี อักษรไทย
 พระวินัยปิฎกเล่มที่ ๔ วินย. มหาวคฺโค (๑)

     [๑๕๗]   เตน  โข  ปน  สมเยน  ภิกฺขู  อนุปริเวณิยํ  ปาติโมกฺขํ
อุทฺทิสนฺติ   อสงฺเกเตน   ฯ   อาคนฺตุกา   ภิกฺขู   น   ชานนฺติ   กตฺถ
วา  ๑-  อชฺช  อุโปสโถ  กริยิสฺสตีติ  ฯ  ภควโต เอตมตฺถํ อาโรเจสุํ ฯ
น   ภิกฺขเว   อนุปริเวณิยํ   ปาติโมกฺขํ   อุทฺทิสิตพฺพํ   อสงฺเกเตน  โย
อุทฺทิเสยฺย   อาปตฺติ   ทุกฺกฏสฺส   ฯ  อนุชานามิ  ภิกฺขเว  อุโปสถาคารํ
สมฺมนฺนิตฺวา  อุโปสถํ  กาตุํ  ยํ  สงฺโฆ  อากงฺขติ  วิหารํ  วา  อฑฺฒโยคํ
วา  ปาสาทํ  วา หมฺมิยํ วา คุหํ วา ฯ เอวญฺจ ปน ภิกฺขเว สมฺมนฺนิตพฺพํ ฯ
พฺยตฺเตน ภิกฺขุนา ปฏิพเลน สงฺโฆ าเปตพฺโพ
     {๑๕๗.๑}   สุณาตุ  เม  ภนฺเต  สงฺโฆ ยทิ สงฺฆสฺส ปตฺตกลฺลํ สงฺโฆ
อิตฺถนฺนามํ วิหารํ อุโปสถาคารํ สมฺมนฺเนยฺย ฯ เอสา ตฺติ ฯ
     {๑๕๗.๒}   สุณาตุ  เม  ภนฺเต  สงฺโฆ  สงฺโฆ  อิตฺถนฺนามํ  วิหารํ
อุโปสถาคารํ    สมฺมนฺนติ    ฯ    ยสฺสายสฺมโต   ขมติ   อิตฺถนฺนามสฺส
วิหารสฺส    อุโปสถาคารสฺส   สมฺมติ   โส   ตุณฺหสฺส   ยสฺส   นกฺขมติ
โส  ภาเสยฺย  ฯ  สมฺมโต  สงฺเฆน  อิตฺถนฺนาโม วิหาโร อุโปสถาคารํ ฯ
ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
@เชิงอรรถ: ๑ อยํ สทฺโท อติเรโก วิย ขายติ ฯ
     [๑๕๘]   เตน   โข   ปน  สมเยน  อญฺตรสฺมึ  อาวาเส  เทฺว
อุโปสถาคารานิ   สมฺมตานิ   โหนฺติ   ฯ   ภิกฺขู   อุภยตฺถ   สนฺนิปตนฺติ
อิธ   อุโปสโถ   กริยิสฺสติ   อิธ   อุโปสโถ   กริยิสฺสตีติ   ฯ  ภควโต
เอตมตฺถํ   อาโรเจสุํ   ฯ   น   ภิกฺขเว   เอกสฺมึ   อาวาเส   เทฺว
อุโปสถาคารานิ  สมฺมนฺนิตพฺพานิ  โย  สมฺมนฺเนยฺย  อาปตฺติ  ทุกฺกฏสฺส  ฯ
อนุชานามิ   ภิกฺขเว   เอกํ   สมูหนิตฺวา   เอกตฺถ   อุโปสถํ  กาตุํ  ฯ
เอวญฺจ   ปน   ภิกฺขเว   สมูหนฺตพฺพํ   ฯ  พฺยตฺเตน  ภิกฺขุนา  ปฏิพเลน
สงฺโฆ าเปตพฺโพ
     {๑๕๘.๑}   สุณาตุ   เม  ภนฺเต  สงฺโฆ  ยทิ  สงฺฆสฺส  ปตฺตกลฺลํ
สงฺโฆ อิตฺถนฺนามํ อุโปสถาคารํ สมูหเนยฺย ฯ เอสา ตฺติ ฯ
     {๑๕๘.๒}   สุณาตุ   เม   ภนฺเต   สงฺโฆ   สงฺโฆ   อิตฺถนฺนามํ
อุโปสถาคารํ    สมูหนติ    ฯ    ยสฺสายสฺมโต    ขมติ   อิตฺถนฺนามสฺส
อุโปสถาคารสฺส     สมุคฺฆาโต     โส    ตุณฺหสฺส    ยสฺส    นกฺขมติ
โส   ภาเสยฺย  ฯ  สมูหตํ  สงฺเฆน  อิตฺถนฺนามํ  อุโปสถาคารํ  ฯ  ขมติ
สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     [๑๕๙]   เตน  โข  ปน  สมเยน  อญฺตรสฺมึ  อาวาเส  อติขุทฺทกํ
อุโปสถาคารํ   สมฺมตํ  โหติ  ฯ  ตทหุโปสเถ  มหาภิกฺขุสงฺโฆ  สนฺนิปติโต
โหติ   ฯ   ภิกฺขู   อสมฺมตาย  ภูมิยา  นิสินฺนา  ปาติโมกฺขํ  อสฺโสสุํ  ฯ
อถโข   เตสํ   ภิกฺขูนํ   เอตทโหสิ   ภควตา   ปญฺตฺตํ   อุโปสถาคารํ
สมฺมนฺนิตฺวา    อุโปสโถ    กาตพฺโพติ   มยญฺจมฺห   อสมฺมตาย   ภูมิยา
นิสินฺนา   ปาติโมกฺขํ   อสฺสุมฺหา  ๑-  กโต  นุ  โข  อมฺหากํ  อุโปสโถ
@เชิงอรรถ: ๑ ยุ. อสฺโสสุมฺหา ฯ
อกโต  นุ  โขติ  ฯ  ภควโต เอตมตฺถํ อาโรเจสุํ ฯ สมฺมตาย วา ภิกฺขเว
ภูมิยา   นิสินฺโน   ๑-  อสมฺมตาย  วา  ยโต  ปาติโมกฺขํ  สุณาติ  กโต
วสฺส   อุโปสโถ   เตนหิ   ภิกฺขเว  สงฺโฆ  ยาวมหนฺตํ  อุโปสถมุขํ  ๒-
อากงฺขติ   ตาวมหนฺตํ   อุโปสถมุขํ  สมฺมนฺนตุ  ฯ  เอวญฺจ  ปน  ภิกฺขเว
สมฺมนฺนิตพฺพํ   ฯ   ปมํ   นิมิตฺตา   กิตฺเตตพฺพา   นิมิตฺเต   กิตฺเตตฺวา
พฺยตฺเตน ภิกฺขุนา ปฏิพเลน สงฺโฆ าเปตพฺโพ
     {๑๕๙.๑}   สุณาตุ  เม  ภนฺเต  สงฺโฆ  ยาวตา  สมนฺตา  นิมิตฺตา
กิตฺติตา   ยทิ  สงฺฆสฺส  ปตฺตกลฺลํ  สงฺโฆ  เอเตหิ  นิมิตฺเตหิ  อุโปสถมุขํ
สมฺมนฺเนยฺย ฯ เอสา ตฺติ ฯ
     {๑๕๙.๒}  สุณาตุ  เม  ภนฺเต  สงฺโฆ  ยาวตา  สมนฺตา  นิมิตฺตา
กิตฺติตา    สงฺโฆ    เอเตหิ    นิมิตฺเตหิ   อุโปสถมุขํ   สมฺมนฺนติ   ฯ
ยสฺสายสฺมโต   ขมติ   เอเตหิ   นิมิตฺเตหิ   อุโปสถมุขสฺส   สมฺมติ  โส
ตุณฺหสฺส   ยสฺส   นกฺขมติ   โส  ภาเสยฺย  ฯ  สมฺมตํ  สงฺเฆน  เอเตหิ
นิมิตฺเตหิ   อุโปสถมุขํ   ฯ   ขมติ  สงฺฆสฺส  ตสฺมา  ตุณฺหี  ฯ  เอวเมตํ
ธารยามีติ ฯ
     [๑๖๐]   เตน  โข  ปน  สมเยน  อญฺตรสฺมึ อาวาเส ตทหุโปสเถ
นวกา   ภิกฺขู   ปมตรํ   สนฺนิปติตฺวา   น   ตาว  เถรา  อาคจฺฉนฺตีติ
ปกฺกมึสุ   ฯ   อุโปสโถ   วิกาโล   ๓-  อโหสิ  ฯ  ภควโต  เอตมตฺถํ
อาโรเจสุํ   ฯ   อนุชานามิ   ภิกฺขเว   ตทหุโปสเถ   เถเรหิ   ภิกฺขูหิ
ปมตรํ สนฺนิปติตุนฺติ
@เชิงอรรถ: ๑ ม. ยุ. นิสินฺนา ฯ  ๒ สพฺพตฺถ ปมุขํ ฯ   ๓ ม. ยุ. วิกาเล ฯ
     [๑๖๑]   เตน  โข  ปน  สมเยน  ราชคเห  สมฺพหุลา  อาวาสา
สมานสีมา   โหนฺติ   ฯ   ตตฺถ   ภิกฺขู   วิวทนฺติ   อมฺหากํ   อาวาเส
อุโปสโถ  กริยตุ  ๑-  อมฺหากํ  อาวาเส  อุโปสโถ  กริยตูติ  ฯ ภควโต
เอตมตฺถํ   อาโรเจสุํ   ฯ   อิธ   ปน   ภิกฺขเว   สมฺพหุลา  อาวาสา
สมานสีมา    โหนฺติ    ตตฺถ    ภิกฺขู    วิวทนฺติ   อมฺหากํ   อาวาเส
อุโปสโถ    กริยตุ    อมฺหากํ   อาวาเส   อุโปสโถ   กริยตูติ   เตหิ
ภิกฺขเว   ภิกฺขูหิ   สพฺเพเหว  เอกชฺฌํ  สนฺนิปติตฺวา  อุโปสโถ  กาตพฺโพ
ยตฺถ   วา   ปน   เถโร   ภิกฺขุ  วิหรติ  ตตฺถ  สนฺนิปติตฺวา  อุโปสโถ
กาตพฺโพ   น   เตฺวว   วคฺเคน   สงฺเฆน   อุโปสโถ   กาตพฺโพ  โย
กเรยฺย อาปตฺติ ทุกฺกฏสฺสาติ ฯ

             เนื้อความพระไตรปิฎกฉบับภาษาบาลี อักษรไทย เล่มที่ ๔ หน้าที่ ๒๑๑-๒๑๔.
https://84000.org/tipitaka/read/pali_read.php?B=4&A=4337&w=&modeTY=1
             อ่านเทียบพระไตรปิฎกฉบับภาษาบาลี อักษรโรมัน :-
https://84000.org/tipitaka/read/roman_read.php?B=4&A=4337&modeTY=1
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=4&item=157&items=5
             อ่านเทียบพระไตรปิฎกฉบับมหาจุฬาฯ :-
https://84000.org/tipitaka/pitaka_item/m_siri.php?B=4&siri=55
             สารบัญพระไตรปิฎกเล่มที่ ๔
https://84000.org/tipitaka/read/?index_4
https://84000.org/tipitaka/english/?index_4