ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๖ ภาษาบาลี อักษรไทย พระวินัยปิฎกเล่มที่ ๖ วินย. จุลฺลวคฺโค (๑)

     [๓๙๕]   โส  ปริวสนฺโต  อนฺตรา  เอกํ อาปตฺตึ อาปชฺชิ สญฺเจตนิกํ
สุกฺกวิสฏฺฐึ  อปฺปฏิจฺฉนฺนํ  ฯ  โส  ภิกฺขูนํ  อาโรเจสิ  อหํ  อาวุโส  เอกํ
อาปตฺตึ     อาปชฺชึ     สญฺเจตนิกํ     สุกฺกวิสฏฺฐึ     ปญฺจาหปฏิจฺฉนฺนํ
โสหํ    สงฺฆํ    เอกิสฺสา    อาปตฺติยา   สญฺเจตนิกาย   สุกฺกวิสฏฺฐิยา
ปญฺจาหปฏิจฺฉนฺนาย   ปญฺจาหปริวาสํ   ยาจึ  ตสฺส  เม  สงฺโฆ  เอกิสฺสา
อาปตฺติยา      สญฺเจตนิกาย      สุกฺกวิสฏฺฐิยา     ปญฺจาหปฏิจฺฉนฺนาย
ปญฺจาหปริวาสํ   อทาสิ   โสหํ   ปริวสนฺโต   อนฺตรา   เอกํ   อาปตฺตึ
อาปชฺชึ   สญฺเจตนิกํ   สุกฺกวิสฏฺฐึ   อปฺปฏิจฺฉนฺนํ   กถํ   นุ   โข  มยา
ปฏิปชฺชิตพฺพนฺติ  ฯ  เต  ภิกฺขู  ภควโต  เอตมตฺถํ  อาโรเจสุํ  ฯ  เตนหิ
ภิกฺขเว    สงฺโฆ    อุทายึ    ภิกฺขุํ   อนฺตรา   เอกิสฺสา   อาปตฺติยา
สญฺเจตนิกาย        สุกฺกวิสฏฺฐิยา        อปฺปฏิจฺฉนฺนาย       มูลาย
ปฏิกสฺสตุ ฯ
     [๓๙๖]   เอวญฺจ   ปน  ภิกฺขเว  มูลาย  ปฏิกสฺสิตพฺโพ  ฯ  เตน
ภิกฺขเว   อุทายินา   ภิกฺขุนา   สงฺฆํ  อุปสงฺกมิตฺวา  เอกํสํ  อุตฺตราสงฺคํ
กริตฺวา    วุฑฺฒานํ    ภิกฺขูนํ   ปาเท   วนฺทิตฺวา   อุกฺกุฏิกํ   นิสีทิตฺวา
อญฺชลึ   ปคฺคเหตฺวา   เอวมสฺส   วจนีโย   อหํ  ภนฺเต  เอกํ  อาปตฺตึ
อาปชฺชึ    สญฺเจตนิกํ    สุกฺกวิสฏฺฐึ    ปญฺจาหปฏิจฺฉนฺนํ    โสหํ   สงฺฆํ
เอกิสฺสา   อาปตฺติยา   สญฺเจตนิกาย   สุกฺกวิสฏฺฐิยา  ปญฺจาหปฏิจฺฉนฺนาย
ปญฺจาหปริวาสํ   ยาจึ   ฯ   ตสฺส   เม   สงฺโฆ  เอกิสฺสา  อาปตฺติยา
สญฺเจตนิกาย      สุกฺกวิสฏฺฐิยา      ปญฺจาหปฏิจฺฉนฺนาย      ปญฺจาห-
ปริวาสํ   อทาสิ   ฯ   โสหํ    ปริวสนฺโต   อนฺตรา   เอกํ  อาปตฺตึ
อาปชฺชึ     สญฺเจตนิกํ    สุกฺกวิสฏฺฐึ    อปฺปฏิจฺฉนฺนํ    โสหํ    ภนฺเต
สงฺฆํ    อนฺตรา   เอกิสฺสา   อาปตฺติยา   สญฺเจตนิกาย   สุกฺกวิสฏฺฐิยา
อปฺปฏิจฺฉนฺนาย   มูลาย   ปฏิกสฺสนํ   ยาจามีติ   ฯ  ทุติยมฺปิ  ยาจิตพฺพา
ตติยมฺปิ ยาจิตพฺพา ฯ
     [๓๙๗]   พฺยตฺเตน ภิกฺขุนา ปฏิพเลน สงฺโฆ ญาเปตพฺโพ
     {๓๙๗.๑}   สุณาตุ  เม  ภนฺเต สงฺโฆ อยํ อุทายิ ภิกฺขุ เอกํ อาปตฺตึ
อาปชฺชิ   สญฺเจตนิกํ   สุกฺกวิสฏฺฐึ  ปญฺจาหปฏิจฺฉนฺนํ  โส  สงฺฆํ  เอกิสฺสา
อาปตฺติยา      สญฺเจตนิกาย      สุกฺกวิสฏฺฐิยา     ปญฺจาหปฏิจฺฉนฺนาย
ปญฺจาหปริวาสํ    ยาจิ    ฯ   สงฺโฆ   อุทายิสฺส   ภิกฺขุโน   เอกิสฺสา
อาปตฺติยา      สญฺเจตนิกาย      สุกฺกวิสฏฺฐิยา     ปญฺจาหปฏิจฺฉนฺนาย
ปญฺจาหปริวาสํ   อทาสิ   ฯ   โส   ปริวสนฺโต  อนฺตรา  เอกํ  อาปตฺตึ
อาปชฺชิ   สญฺเจตนิกํ   สุกฺกวิสฏฺฐึ   อปฺปฏิจฺฉนฺนํ   โส   สงฺฆํ   อนฺตรา
เอกิสฺสา    อาปตฺติยา    สญฺเจตนิกาย   สุกฺกวิสฏฺฐิยา   อปฺปฏิจฺฉนฺนาย
มูลาย   ปฏิกสฺสนํ   ยาจติ   ฯ  ยทิ  สงฺฆสฺส  ปตฺตกลฺลํ  สงฺโฆ  อุทายึ
ภิกฺขุํ    อนฺตรา   เอกิสฺสา   อาปตฺติยา   สญฺเจตนิกาย   สุกฺกวิสฏฺฐิยา
อปฺปฏิจฺฉนฺนาย มูลาย ปฏิกสฺเสยฺย ฯ เอสา ญตฺติ ฯ
     {๓๙๗.๒}   สุณาตุ เม ภนฺเต สงฺโฆ อยํ อุทายิ ภิกฺขุ เอกํ อาปตฺตึ อาปชฺชิ
สญฺเจตนิกํ  สุกฺกวิสฏฺฐึ  ปญฺจาหปฏิจฺฉนฺนํ  โส  สงฺฆํ  เอกิสฺสา  อาปตฺติยา
สญฺเจตนิกาย     สุกฺกวิสฏฺฐิยา     ปญฺจาหปฏิจฺฉนฺนาย    ปญฺจาหปริวาสํ
ยาจิ  ฯ  สงฺโฆ  อุทายิสฺส  ภิกฺขุโน  เอกิสฺสา  อาปตฺติยา  สญฺเจตนิกาย
สุกฺกวิสฏฺฐิยา     ปญฺจาหปฏิจฺฉนฺนาย     ปญฺจาหปริวาสํ    อทาสิ    ฯ
โส  ปริวสนฺโต  อนฺตรา  เอกํ  อาปตฺตึ  อาปชฺชิ  สญฺเจตนิกํ  สุกฺกวิสฏฺฐึ
อปฺปฏิจฺฉนฺนํ   โส   สงฺฆํ   อนฺตรา  เอกิสฺสา  อาปตฺติยา  สญฺเจตนิกาย
สุกฺกวิสฏฺฐิยา   อปฺปฏิจฺฉนฺนาย   มูลาย   ปฏิกสฺสนํ   ยาจติ   ฯ  สงฺโฆ
อุทายึ  ภิกฺขุํ  อนฺตรา  เอกิสฺสา  อาปตฺติยา  สญฺเจตนิกาย  สุกฺกวิสฏฺฐิยา
อปฺปฏิจฺฉนฺนาย   มูลาย   ปฏิกสฺสติ   ฯ   ยสฺสายสฺมโต  ขมติ  อุทายิสฺส
ภิกฺขุโน   อนฺตรา   เอกิสฺสา   อาปตฺติยา   สญฺเจตนิกาย  สุกฺกวิสฏฺฐิยา
อปฺปฏิจฺฉนฺนาย    มูลาย   ปฏิกสฺสนา   โส   ตุณฺหสฺส   ยสฺส   นกฺขมติ
โส ภาเสยฺย ฯ
     {๓๙๗.๓}   ทุติยมฺปิ    เอตมตฺถํ    วทามิ    ฯเปฯ   ตติยมฺปิ
เอตมตฺถํ    วทามิ   ฯ  สุณาตุ  เม  ภนฺเต  สงฺโฆ  อยํ  อุทายิ  ภิกฺขุ
เอกํ    อาปตฺตึ    อาปชฺชิ   สญฺเจตนิกํ   สุกฺกวิสฏฺฐึ   ปญฺจาหปฏิจฺฉนฺนํ
โส    สงฺฆํ    เอกิสฺสา    อาปตฺติยา    สญฺเจตนิกาย   สุกฺกวิสฏฺฐิยา
ปญฺจาหปฏิจฺฉนฺนาย    ปญฺจาหปริวาสํ    ยาจิ    ฯ   สงฺโฆ   อุทายิสฺส
ภิกฺขุโน     เอกิสฺสา     อาปตฺติยา     สญฺเจตนิกาย    สุกฺกวิสฏฺฐิยา
ปญฺจาหปฏิจฺฉนฺนาย    ปญฺจาหปริวาสํ    อทาสิ    ฯ   โส   ปริวสนฺโต
อนฺตรา   เอกํ   อาปตฺตึ   อาปชฺชิ  สญฺเจตนิกํ  สุกฺกวิสฏฺฐึ  อปฺปฏิจฺฉนฺนํ
โส   สงฺฆํ   อนฺตรา  เอกิสฺสา  อาปตฺติยา  สญฺเจตนิกาย  สุกฺกวิสฏฺฐิยา
อปฺปฏิจฺฉนฺนาย   มูลาย   ปฏิกสฺสนํ   ยาจติ   ฯ   สงฺโฆ  อุทายึ  ภิกฺขุํ
อนฺตรา  เอกิสฺสา  อาปตฺติยา  สญฺเจตนิกาย  สุกฺกวิสฏฺฐิยา อปฺปฏิจฺฉนฺนาย
มูลาย    ปฏิกสฺสติ    ฯ    ยสฺสายสฺมโต   ขมติ   อุทายิสฺส   ภิกฺขุโน
อนฺตรา     เอกิสฺสา     อาปตฺติยา     สญฺเจตนิกาย    สุกฺกวิสฏฺฐิยา
อปฺปฏิจฺฉนฺนาย    มูลาย   ปฏิกสฺสนา   โส   ตุณฺหสฺส   ยสฺส   นกฺขมติ
โส ภาเสยฺย ฯ
     {๓๙๗.๔}   ปฏิกสฺสิโต  สงฺเฆน  อุทายิ  ภิกฺขุ  อนฺตรา  เอกิสฺสา
อาปตฺติยา   สญฺเจตนิกาย   สุกฺกวิสฏฺฐิยา   อปฺปฏิจฺฉนฺนาย   มูลาย  ๑-
ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     [๓๙๘]   โส  ปริวุตฺถปริวาโส  มานตฺตารโห  อนฺตรา เอกํ อาปตฺตึ
อาปชฺชิ    สญฺเจตนิกํ    สุกฺกวิสฏฺฐึ    อปฺปฏิจฺฉนฺนํ   ฯ   โส   ภิกฺขูนํ
อาโรเจสิ    อหํ    อาวุโส    เอกํ   อาปตฺตึ   อาปชฺชึ   สญฺเจตนิกํ
@เชิงอรรถ:  อิโต ปรํ ปฏิกสฺสนนฺติปิ ปฏิกสฺสนาติปิ ปาโฐ อญฺเญสุ โปตฺถเกสุ เยภุยฺเยน
@ทิสฺสติ ฐเปตฺวา ปาลิมฺตฺตกวินยวินิจฺฉยํ ฯ ยทิ ปฏิกสฺสนนฺติ ปทํ ปฏิกสฺสิโตติ
@ปเท กิริยาวิเสสนํ สิยา ตํ อพฺภิโต สงฺเฆน อุทายิ ภิกฺขูติ อพฺภานปาลิยา น
@สเมติ เอตฺถ อพฺภิโตติ ปทสฺส นิกฺกิริยาวิเสสนตฺตา ฯ ยทิ ปฏิกสฺสนาติ ปทํ
@ขมตีติ ปเท กตฺตาติ คเหตพฺพํ ตํ น ยุชฺชติ อญฺเญสุ กมฺเมสุ ขมตีติ ปทสฺส กตฺตุโน
@อทิสฺสมานรูปภูตปฺพฺพตฺตา ฯ ตสฺมา โส ทุพฺพิโธ ปาโฐ อยุตฺตรูโปเยว ฯ
สุกฺกวิสฏฺฐึ    ปญฺจาหปฏิจฺฉนฺนํ    โสหํ    สงฺฆํ   เอกิสฺสา   อาปตฺติยา
สญฺเจตนิกาย   สุกฺกวิสฏฺฐิยา   ปญฺจาหปฏิจฺฉนฺนาย   ปญฺจาหปริวาสํ  ยาจึ
ตสฺส   เม   สงฺโฆ   เอกิสฺสา  อาปตฺติยา  สญฺเจตนิกาย  สุกฺกวิสฏฺฐิยา
ปญฺจาหปฏิจฺฉนฺนาย     ปญฺจาหปริวาสํ     อทาสิ    โสหํ    ปริวสนฺโต
อนฺตรา   เอกํ   อาปตฺตึ   อาปชฺชึ  สญฺเจตนิกํ  สุกฺกวิสฏฺฐึ  อปฺปฏิจฺฉนฺนํ
โสหํ   สงฺฆํ  อนฺตรา  เอกิสฺสา  อาปตฺติยา  สญฺเจตนิกาย  สุกฺกวิสฏฺฐิยา
อปฺปฏิจฺฉนฺนาย   มูลาย   ปฏิกสฺสนํ   ยาจึ   ตํ   มํ   สงฺโฆ   อนฺตรา
เอกิสฺสา    อาปตฺติยา    สญฺเจตนิกาย   สุกฺกวิสฏฺฐิยา   อปฺปฏิจฺฉนฺนาย
มูลาย    ปฏิกสฺสิ    โสหํ    ปริวุตฺถปริวาโส   มานตฺตารโห   อนฺตรา
เอกํ   อาปตฺตึ   อาปชฺชึ   สญฺเจตนิกํ  สุกฺกวิสฏฺฐึ  อปฺปฏิจฺฉนฺนํ  กถํ  นุ
โข  มยา  ปฏิปชฺชิตพฺพนฺติ  ฯ  เต  ภิกฺขู  ภควโต เอตมตฺถํ อาโรเจสุํ ฯ
เตนหิ   ภิกฺขเว   สงฺโฆ   อุทายึ  ภิกฺขุํ  อนฺตรา  เอกิสฺสา  อาปตฺติยา
สญฺเจตนิกาย สุกฺกวิสฏฺฐิยา อปฺปฏิจฺฉนฺนาย มูลาย ปฏิกสฺสตุ ฯ
     [๓๙๙]   เอวญฺจ  ปน  ภิกฺขเว  มูลาย  ๑-  ปฏิกสฺสิตพฺโพ ฯ เตน
ภิกฺขเว   อุทายินา   ภิกฺขุนา   สงฺฆํ  อุปสงฺกมิตฺวา  เอกํสํ  อุตฺตราสงฺคํ
กริตฺวา    วุฑฺฒานํ    ภิกฺขูนํ   ปาเท   วนฺทิตฺวา   อุกฺกุฏิกํ   นิสีทิตฺวา
อญฺชลึ   ปคฺคเหตฺวา   เอวมสฺส   วจนีโย   อหํ  ภนฺเต  เอกํ  อาปตฺตึ
อาปชฺชึ    สญฺเจตนิกํ    สุกฺกวิสฏฺฐึ    ปญฺจาหปฏิจฺฉนฺนํ    โสหํ   สงฺฆํ
เอกิสฺสา   อาปตฺติยา   สญฺเจตนิกาย   สุกฺกวิสฏฺฐิยา  ปญฺจาหปฏิจฺฉนฺนาย
ปญฺจาหปริวาสํ   ยาจึ   ฯ   ตสฺส   เม   สงฺโฆ  เอกิสฺสา  อาปตฺติยา
@เชิงอรรถ:  ม. ยุ. มูลายาติ นตฺถิ ฯ
สญฺเจตนิกาย     สุกฺกวิสฏฺฐิยา     ปญฺจาหปฏิจฺฉนฺนาย    ปญฺจาหปริวาสํ
อทาสิ  ฯ  โสหํ  ปริวสนฺโต  อนฺตรา  เอกํ  อาปตฺตึ  อาปชฺชึ สญฺเจตนิกํ
สุกฺกวิสฏฺฐึ   อปฺปฏิจฺฉนฺนํ   โสหํ   สงฺฆํ   อนฺตรา  เอกิสฺสา  อาปตฺติยา
สญฺเจตนิกาย   สุกฺกวิสฏฺฐิยา  อปฺปฏิจฺฉนฺนาย  มูลาย  ปฏิกสฺสนํ  ยาจึ  ฯ
ตํ  มํ  สงฺโฆ  อนฺตรา  เอกิสฺสา  อาปตฺติยา  สญฺเจตนิกาย สุกฺกวิสฏฺฐิยา
อปฺปฏิจฺฉนฺนาย     มูลาย    ปฏิกสฺสิ    ฯ    โสหํ    ปริวุตฺถปริวาโส
มานตฺตารโห   อนฺตรา   เอกํ  อาปตฺตึ  อาปชฺชึ  สญฺเจตนิกํ  สุกฺกวิสฏฺฐึ
อปฺปฏิจฺฉนฺนํ    โสหํ   ภนฺเต   สงฺฆํ   อนฺตรา   เอกิสฺสา   อาปตฺติยา
สญฺเจตนิกาย     สุกฺกวิสฏฺฐิยา    อปฺปฏิจฺฉนฺนาย    มูลาย    ปฏิกสฺสนํ
ยาจามีติ ฯ ทุติยมฺปิ ยาจิตพฺพา ตติยมฺปิ ยาจิตพฺพา ฯ
     [๔๐๐]   พฺยตฺเตน ภิกฺขุนา ปฏิพเลน สงฺโฆ ญาเปตพฺโพ
     {๔๐๐.๑}   สุณาตุ  เม  ภนฺเต  สงฺโฆ  อยํ  อุทายิ  ภิกฺขุ  เอกํ
อาปตฺตึ     อาปชฺชิ     สญฺเจตนิกํ     สุกฺกวิสฏฺฐึ     ปญฺจาหปฏิจฺฉนฺนํ
โส    สงฺฆํ    เอกิสฺสา    อาปตฺติยา    สญฺเจตนิกาย   สุกฺกวิสฏฺฐิยา
ปญฺจาหปฏิจฺฉนฺนาย      ปญฺจาหปริวาสํ      ยาจิ      ฯ      สงฺโฆ
อุทายิสฺส      ภิกฺขุโน      เอกิสฺสา     อาปตฺติยา     สญฺเจตนิกาย
สุกฺกวิสฏฺฐิยา     ปญฺจาหปฏิจฺฉนฺนาย     ปญฺจาหปริวาสํ    อทาสิ    ฯ
โส    ปริวสนฺโต    อนฺตรา    เอกํ   อาปตฺตึ   อาปชฺชิ   สญฺเจตนิกํ
สุกฺกวิสฏฺฐึ   อปฺปฏิจฺฉนฺนํ   โส   สงฺฆํ   อนฺตรา   เอกิสฺสา  อาปตฺติยา
สญฺเจตนิกาย     สุกฺกวิสฏฺฐิยา    อปฺปฏิจฺฉนฺนาย    มูลาย    ปฏิกสฺสนํ
ยาจิ    ฯ   สงฺโฆ   อุทายึ   ภิกฺขุํ   อนฺตรา   เอกิสฺสา   อาปตฺติยา
สญฺเจตนิกาย    สุกฺกวิสฏฺฐิยา    อปฺปฏิจฺฉนฺนาย   มูลาย   ปฏิกสฺสิ   ฯ
โส   ปริวุตฺถปริวาโส   มานตฺตารโห   อนฺตรา  เอกํ  อาปตฺตึ  อาปชฺชิ
สญฺเจตนิกํ   สุกฺกวิสฏฺฐึ   อปฺปฏิจฺฉนฺนํ   โส   สงฺฆํ   อนฺตรา  เอกิสฺสา
อาปตฺติยา    สญฺเจตนิกาย    สุกฺกวิสฏฺฐิยา    อปฺปฏิจฺฉนฺนาย    มูลาย
ปฏิกสฺสนํ    ยาจติ   ฯ   ยทิ   สงฺฆสฺส   ปตฺตกลฺลํ    สงฺโฆ   อุทายึ
ภิกฺขุํ    อนฺตรา   เอกิสฺสา   อาปตฺติยา   สญฺเจตนิกาย   สุกฺกวิสฏฺฐิยา
อปฺปฏิจฺฉนฺนาย มูลาย ปฏิกสฺเสยฺย ฯ เอสา ญตฺติ ฯ
     {๔๐๐.๒}   สุณาตุ  เม  ภนฺเต  สงฺโฆ  อยํ  อุทายิ  ภิกฺขุ  เอกํ
อาปตฺตึ     อาปชฺชิ     สญฺเจตนิกํ     สุกฺกวิสฏฺฐึ     ปญฺจาหปฏิจฺฉนฺนํ
โส    สงฺฆํ    เอกิสฺสา    อาปตฺติยา    สญฺเจตนิกาย   สุกฺกวิสฏฺฐิยา
ปญฺจาหปฏิจฺฉนฺนาย      ปญฺจาหปริวาสํ      ยาจิ      ฯ      สงฺโฆ
อุทายิสฺส      ภิกฺขุโน      เอกิสฺสา     อาปตฺติยา     สญฺเจตนิกาย
สุกฺกวิสฏฺฐิยา            ปญฺจาหปฏิจฺฉนฺนาย           ปญฺจาหปริวาสํ
อทาสิ    ฯ    โส   ปริวสนฺโต   อนฺตรา   เอกํ   อาปตฺตึ   อาปชฺชิ
สญฺเจตนิกํ     สุกฺกวิสฏฺฐึ     อปฺปฏิจฺฉนฺนํ     โส    สงฺฆํ    อนฺตรา
เอกิสฺสา    อาปตฺติยา    สญฺเจตนิกาย   สุกฺกวิสฏฺฐิยา   อปฺปฏิจฺฉนฺนาย
มูลาย   ปฏิกสฺสนํ   ยาจิ   ฯ  สงฺโฆ  อุทายึ  ภิกฺขุํ  อนฺตรา  เอกิสฺสา
อาปตฺติยา       สญฺเจตนิกาย       สุกฺกวิสฏฺฐิยา      อปฺปฏิจฺฉนฺนาย
มูลาย   ปฏิกสฺสิ   ฯ   โส   ปริวุตฺถปริวาโส   มานตฺตารโห   อนฺตรา
เอกํ    อาปตฺตึ    อาปชฺชิ    สญฺเจตนิกํ    สุกฺกวิสฏฺฐึ    อปฺปฏิจฺฉนฺนํ
โส     สงฺฆํ     อนฺตรา     เอกิสฺสา    อาปตฺติยา    สญฺเจตนิกาย
สุกฺกวิสฏฺฐิยา         อปฺปฏิจฺฉนฺนาย         มูลาย        ปฏิกสฺสนํ
ยาจติ   ฯ   สงฺโฆ   อุทายึ   ภิกฺขุํ   อนฺตรา   เอกิสฺสา   อาปตฺติยา
สญฺเจตนิกาย    สุกฺกวิสฏฺฐิยา   อปฺปฏิจฺฉนฺนาย   มูลาย   ปฏิกสฺสติ   ฯ
ยสฺสายสฺมโต   ขมติ   อุทายิสฺส  ภิกฺขุโน  อนฺตรา  เอกิสฺสา  อาปตฺติยา
สญฺเจตนิกาย    สุกฺกวิสฏฺฐิยา    อปฺปฏิจฺฉนฺนาย    มูลาย    ปฏิกสฺสนา
โส ตุณฺหสฺส ยสฺส นกฺขมติ โส ภาเสยฺย ฯ
     {๔๐๐.๓}   ทุติยมฺปิ  เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ ฯเปฯ
     {๔๐๐.๔}   ปฏิกสฺสิโต  สงฺเฆน  อุทายิ  ภิกฺขุ  อนฺตรา  เอกิสฺสา
อาปตฺติยา   สญฺเจตนิกาย   สุกฺกวิสฏฺฐิยา   อปฺปฏิจฺฉนฺนาย   มูลาย  ๑-
ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๖ หน้าที่ ๑๗๗-๑๘๔. https://84000.org/tipitaka/read/pali_read.php?B=6&A=3594&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=6&A=3594&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=6&item=395&items=6              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=6&siri=24              สารบัญพระไตรปิฎกเล่มที่ ๖ https://84000.org/tipitaka/read/?index_6 https://84000.org/tipitaka/english/?index_6

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]