ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๙ ภาษาบาลี อักษรไทย พระสุตตันตปิฎกเล่มที่ ๑ สุตฺต. ที. สีลกฺขนฺธวคฺโค

                       มหาลิสุตฺตํ ฉฏฺฐํ
     [๒๓๙]  เอวมฺเม  สุตํ  ฯ  เอกํ  สมยํ  ภควา  เวสาลิยํ  วิหรติ
มหาวเน   กูฏาคารสาลายํ   ฯ   เตน   โข   ปน  สมเยน  สมฺพหุลา
โกสลกา   จ   พฺราหฺมณทูตา   มาคธกา   จ   พฺราหฺมณทูตา  เวสาลิยํ
ปฏิวิสนฺติ   เกนจิเทว   กรณีเยน   ฯ  อสฺโสสุํ  โข  เต  โกสลกา  จ
พฺราหฺมณทูตา    มาคธกา    จ    พฺราหฺมณทูตา    สมโณ   ขลุ   โภ
โคตโม   สกฺยปุตฺโต   สกฺยกุลา   ปพฺพชิโต  เวสาลิยํ  วิหรติ  มหาวเน
กูฏาคารสาลายํ   ตํ  โข  ปน  ภวนฺตํ  โคตมํ  เอวํกลฺยาโณ  กิตฺติสทฺโท
อพฺภุคฺคโต   อิติปิ  โส  ภควา  ฯเปฯ  พุทฺโธ  ภควาติ  โส  อิมํ  โลกํ
สเทวกํ   สมารกํ  ฯเปฯ  ตถารูปานํ  อรหตํ  ทสฺสนํ  โหตีติ  ฯ  อถโข
เต   โกสลกา   จ   พฺราหฺมณทูตา   มาคธกา  จ  พฺราหฺมณทูตา  เยน
มหาวนํ กูฏาคารสาลา เตนุปสงฺกมึสุ ฯ
     [๒๔๐]  เตน  โข ปน สมเยน อายสฺมา นาคิโต ภควโต อุปฏฺฐาโก
โหติ   ฯ   อถโข   เต   โกสลกา   จ   พฺราหฺมณทูตา  มาคธกา  จ
พฺราหฺมณทูตา    เยนายสฺมา    นาคิโต    เตนุปสงฺกมึสุ   อุปสงฺกมิตฺวา
อายสฺมนฺตํ  นาคิตํ  เอตทโวจุํ  กหํ  นุ  โข  โภ  นาคิต เอตรหิ โส ภวํ
โคตโม  วิหรติ  ทสฺสนกามา  หิ  มยํ  ตํ  ภวนฺตํ  โคตมนฺติ  ฯ  อกาโล
โข   อาวุโส   ภควนฺตํ  ทสฺสนาย  ปฏิสลฺลีโน  ภควาติ  ฯ  อถโข  เต
โกสลกา   จ   พฺราหฺมณทูตา   มาคธกา   จ   พฺราหฺมณทูตา   ตตฺเถว
เอกมนฺตํ นิสีทึสุ ทิสฺวา ว มยํ ตํ ภวนฺตํ โคตมํ คจฺฉิสฺสามาติ ฯ
     [๒๔๑]   โอฏฺฐทฺโธปิ   โข  ลิจฺฉวิ  มหติยา  ลิจฺฉวิปริสาย  สทฺธึ
เยน    มหาวนํ   กูฏาคารสาลา   เยนายสฺมา   นาคิโต   เตนุปสงฺกมิ
อุปสงฺกมิตฺวา   อายสฺมนฺตํ   นาคิตํ  อภิวาเทตฺวา  เอกมนฺตํ  อฏฺฐาสิ  ฯ
เอกมนฺตํ  ฐิโต  โข  โอฏฺฐทฺโธปิ  ลิจฺฉวิ  อายสฺมนฺตํ  นาคิตํ  เอตทโวจ
กหนฺนุ   โข   ภนฺเต   นาคิต   เอตรหิ   โส   ภควา   วิหรติ  อรหํ
สมฺมาสมฺพุทฺโธ    ทสฺสนกามา    หิ    มยํ    ตํ    ภควนฺตํ   อรหนฺตํ
สมฺมาสมฺพุทฺธนฺติ    ฯ    อกาโล    โข   มหาลิ   ภควนฺตํ   ทสฺสนาย
ปฏิสลฺลีโน    ภควาติ   ฯ   โอฏฺฐทฺโธปิ   ลิจฺฉวิ   ตตฺเถว   เอกมนฺตํ
นิสีทิ ทิสฺวา วาหํ ตํ ภควนฺตํ คมิสฺสามิ อรหนฺตํ สมฺมาสมฺพุทฺธนฺติ ฯ
     [๒๔๒]  อถโข  สีโห  สมณุทฺเทโส เยนายสฺมา นาคิโต เตนุปสงฺกมิ
อุปสงฺกมิตฺวา   อายสฺมนฺตํ   นาคิตํ  อภิวาเทตฺวา  เอกมนฺตํ  อฏฺฐาสิ  ฯ
เอกมนฺตํ   ฐิโต  โข  สีโห  สมณุทฺเทโส  อายสฺมนฺตํ  นาคิตํ  เอตทโวจ
เอเต   ภนฺเต  กสฺสป  สมฺพหุลา  โกสลกา  จ  พฺราหฺมณทูตา  มาคธกา
จ    พฺราหฺมณทูตา    อิธูปสงฺกนฺตา   ภควนฺตํ   ทสฺสนาย   โอฏฺฐทฺโธปิ
ลิจฺฉวิ   มหติยา   ลิจฺฉวิปริสาย  สทฺธึ  อิธูปสงฺกนฺโต  ภควนฺตํ  ทสฺสนาย
สาธุ   ภนฺเต   กสฺสป   ลภตํ  เอสา  ชนตา  ภควนฺตํ  ทสฺสนายาติ  ฯ
เตนหิ   สีห   ตฺวญฺเญว   ภควโต  อาโรเจหีติ  ฯ  เอวํ  ภนฺเตติ  โข
สีโห   สมณุทฺเทโส   อายสฺมโต   นาคิตสฺส   ปฏิสฺสุตฺวา   เยน  ภควา
เตนุปสงฺกมิ  อุปสงฺกมิตฺวา  ภควนฺตํ  อภิวาเทตฺวา  เอกมนฺตํ  อฏฺฐาสิ  ฯ
เอกมนฺตํ  ฐิโต  โข  สีโห  สมณุทฺเทโส  ภควนฺตํ เอตทโวจ เอเต ภนฺเต
สมฺพหุลา   โกสลกา   จ   พฺราหฺมณทูตา   มาคธกา   จ  พฺราหฺมณทูตา
อิธูปสงฺกนฺตา    ภควนฺตํ    ทสฺสนาย    โอฏฺฐทฺโธปิ   ลิจฺฉวิ   มหติยา
ลิจฺฉวิปริสาย   สทฺธึ   อิธูปสงฺกนฺโต   ภควนฺตํ   ทสฺสนาย  สาธุ  ภนฺเต
ลภตํ  เอสา  ชนตา  ภควนฺตํ  ทสฺสนายาติ  ฯ เตนหิ สีห วิหารปจฺฉายายํ
อาสนํ    ปญฺญเปหีติ   ฯ   เอวํ   ภนฺเตติ   โข   สีโห   สมณุทฺเทโส
ภควโต   ปฏิสฺสุตฺวา   วิหารปจฺฉายายํ   อาสนํ   ปญฺญเปสิ   ฯ  อถโข
ภควา   วิหารา   นิกฺขมฺม   วิหารปจฺฉายายํ   ปญฺญตฺตาสเน   นิสีทิ  ฯ
อถโข   เต   โกสลกา   จ  พฺราหฺมณทูตา  มาคธกา  จ  พฺราหฺมณทูตา
เยน   ภควา   เตนุปสงฺกมึสุ   อุปสงฺกมิตฺวา   ภควตา  สทฺธึ  สมฺโมทึสุ
สมฺโมทนียํ กถํ สาราณียํ วีติสาเรตฺวา เอกมนฺตํ นิสีทึสุ ฯ
     [๒๔๓]   โอฏฺฐทฺโธปิ  ลิจฺฉวิ  มหติยา  ลิจฺฉวิปริสาย  สทฺธึ  เยน
ภควา   เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา  เอกมนฺตํ
นิสีทิ   ฯ   เอกมนฺตํ   นิสินฺโน   โข   โอฏฺฐทฺโธปิ   ลิจฺฉวิ   ภควนฺตํ
เอตทโวจ  ปุริมานิ  ภนฺเต  ทิวสานิ  ปุริมตรานิ  สุนกฺขตฺโต  ลิจฺฉวิปุตฺโต
เยนาหํ   เตนุปสงฺกมิ   อุปสงฺกมิตฺวา   มํ   เอตทโวจ   ยทคฺเค   อหํ
มหาลิ  ภควนฺตํ  อุปนิสฺสาย  วิหรามิ  น  จิรํ  ตีณิ  วสฺสานิ  ทิพฺพานิ  หิ
โข   รูปานิ   ปสฺสามิ   ปิยรูปานิ   กามูปสญฺหิตานิ   รชนิยานิ  โน  จ
โข   ทิพฺพานิ   สทฺทานิ   สุณามิ   ปิยรูปานิ   กามูปสญฺหิตานิ  รชนิยานิ
สนฺตาเนว   นุ   โข  ภนฺเต  สุนกฺขตฺโต  ลิจฺฉวิปุตฺโต  ทิพฺพานิ  สทฺทานิ
นาสฺโสสิ    ปิยรูปานิ    กามูปสญฺหิตานิ    รชนิยานิ    ตานิ    อุทาหุ
อสนฺตานีติ ฯ
     {๒๔๓.๑}  สนฺตาเนว  โข  มหาลิ  สุนกฺขตฺโต ลิจฺฉวิปุตฺโต ทิพฺพานิ
สทฺทานิ    นาสฺโสสิ    ปิยรูปานิ    กามูปสญฺหิตานิ    รชนิยานิ    โน
อสนฺตานีติ  ฯ  โก  นุ  โข  ภนฺเต  เหตุ  โก  ปจฺจโย เยน สุนกฺขตฺโต
ลิจฺฉวิปุตฺโต   สนฺตาเนว   ทิพฺพานิ   สทฺทานิ   น   อสฺโสสิ   ปิยรูปานิ
กามูปสญฺหิตานิ รชนิยานิ โน อสนฺตานีติ ฯ
     [๒๔๔]   อิธ   มหาลิ  ภิกฺขุโน  ปุรตฺถิมาย  ทิสาย  เอกํสภาวิโต
สมาธิ   โหติ   ทิพฺพานํ   รูปานํ   ทสฺสนาย   ปิยรูปานํ  กามูปสญฺหิตานํ
รชนิยานํ    โน    จ   โข   ทิพฺพานํ   สทฺทานํ   สวนาย   ปิยรูปานํ
กามูปสญฺหิตานํ    รชนิยานํ    โส   ปุรตฺถิมาย   ทิสาย   เอกํสภาวิเต
สมาธิมฺหิ    ทิพฺพานํ    รูปานํ    ทสฺสนาย   ปิยรูปานํ   กามูปสญฺหิตานํ
รชนิยานํ    โน    จ   โข   ทิพฺพานํ   สทฺทานํ   สวนาย   ปิยรูปานํ
กามูปสญฺหิตานํ    รชนิยานํ    ปุรตฺถิมาย    ทิสาย    ทิพฺพานิ   รูปานิ
ปสฺสติ   ปิยรูปานิ   กามูปสญฺหิตานิ   รชนิยานิ   โน   จ  โข  ทิพฺพานิ
สทฺทานิ    สุณาติ    ปิยรูปานิ   กามูปสญฺหิตานิ   รชนิยานิ   ตํ   กิสฺส
เหตุ  เอวํ  เหตํ  มหาลิ  โหติ  ภิกฺขุโน  ปุรตฺถิมาย ทิสาย เอกํสภาวิเต
สมาธิมฺหิ    ทิพฺพานํ    รูปานํ    ทสฺสนาย   ปิยรูปานํ   กามูปสญฺหิตานํ
รชนิยานํ    โน    จ   โข   ทิพฺพานํ   สทฺทานํ   สวนาย   ปิยรูปานํ
กามูปสญฺหิตานํ รชนิยานํ ฯ
     [๒๔๕]   ปุน   จปรํ   มหาลิ  ภิกฺขุโน  ทกฺขิณาย  ทิสาย  ฯเปฯ
ปจฺฉิมาย    ทิสาย    ฯเปฯ    อุตฺตราย   ทิสาย   ฯเปฯ   อุทฺธมโธ
ติริยํ   เอกํสภาวิโต  สมาธิ  โหติ  ทิพฺพานํ  รูปานํ  ทสฺสนาย  ปิยรูปานํ
กามูปสญฺหิตานํ    รชนิยานํ    โน    จ    โข    ทิพฺพานํ    สทฺทานํ
สวนาย    ปิยรูปานํ    กามูปสญฺหิตานํ    รชนิยานํ    โส    อุทฺธมโธ
ติริยํ   เอกํสภาวิเต   สมาธิมฺหิ   ทิพฺพานํ   รูปานํ  ทสฺสนาย  ปิยรูปานํ
กามูปสญฺหิตานํ   รชนิยานํ   โน   จ   โข   ทิพฺพานํ  สทฺทานํ  สวนาย
ปิยรูปานํ    กามูปสญฺหิตานํ    รชนิยานํ    อุทฺธมโธ    ติริยํ   ทิพฺพานิ
รูปานิ   ปสฺสติ   ปิยรูปานิ   กามูปสญฺหิตานิ   รชนิยานิ   โน   จ  โข
ทิพฺพานิ    สทฺทานิ    สุณาติ    ปิยรูปานิ    กามูปสญฺหิตานิ   รชนิยานิ
ตํ   กิสฺส   เหตุ   เอวํ  เหตํ  มหาลิ  โหติ  ภิกฺขุโน  อุทฺธมโธ  ติริยํ
เอกํสภาวิเต    สมาธิมฺหิ    ทิพฺพานํ    รูปานํ    ทสฺสนาย   ปิยรูปานํ
กามูปสญฺหิตานํ   รชนิยานํ   โน   จ   โข   ทิพฺพานํ  สทฺทานํ  สวนาย
ปิยรูปานํ กามูปสญฺหิตานํ รชนิยานํ ฯ
     [๒๔๖]   อิธ   มหาลิ  ภิกฺขุโน  ปุรตฺถิมาย  ทิสาย  เอกํสภาวิโต
สมาธิ   โหติ   ทิพฺพานํ   สทฺทานํ   สวนาย   ปิยรูปานํ  กามูปสญฺหิตานํ
รชนิยานํ    โน    จ   โข   ทิพฺพานํ   รูปานํ   ทสฺสนาย   ปิยรูปานํ
กามูปสญฺหิตานํ    รชนิยานํ    โส   ปุรตฺถิมาย   ทิสาย   เอกํสภาวิเต
สมาธิมฺหิ    ทิพฺพานํ    สทฺทานํ    สวนาย   ปิยรูปานํ   กามูปสญฺหิตานํ
รชนิยานํ    โน    จ   โข   ทิพฺพานํ   รูปานํ   ทสฺสนาย   ปิยรูปานํ
กามูปสญฺหิตานํ    รชนิยานํ    ปุรตฺถิมาย    ทิสาย   ทิพฺพานิ   สทฺทานิ
สุณาติ   ปิยรูปานิ   กามูปสญฺหิตานิ   รชนิยานิ   โน   จ  โข  ทิพฺพานิ
รูปานิ    ปสฺสติ    ปิยรูปานิ    กามูปสญฺหิตานิ   รชนิยานิ   ตํ   กิสฺส
เหตุ  เอวํ  เหตํ  มหาลิ  โหติ  ภิกฺขุโน  ปุรตฺถิมาย ทิสาย เอกํสภาวิเต
สมาธิมฺหิ    ทิพฺพานํ    สทฺทานํ    สวนาย   ปิยรูปานํ   กามูปสญฺหิตานํ
รชนิยานํ  โน  จ  โข  ทิพฺพานํ  รูปานํ ทสฺสนาย ปิยรูปานํ กามูปสญฺหิตานํ
รชนิยานํ ฯ
     [๒๔๗]   ปุน   จปรํ   มหาลิ  ภิกฺขุโน  ทกฺขิณาย  ทิสาย  ฯเปฯ
ปจฺฉิมาย    ทิสาย    ฯเปฯ   อุตฺตราย   ทิสาย   ฯเปฯ    อุทฺธมโธ
ติริยํ   เอกํสภาวิโต  สมาธิ  โหติ  ทิพฺพานํ  สทฺทานํ  สวนาย  ปิยรูปานํ
กามูปสญฺหิตานํ   รชนิยานํ   โน   จ   โข   ทิพฺพานํ  รูปานํ  ทสฺสนาย
ปิยรูปานํ   กามูปสญฺหิตานํ  รชนิยานํ  โส  อุทฺธมโธ  ติริยํ  เอกํสภาวิเต
สมาธิมฺหิ    ทิพฺพานํ    สทฺทานํ    สวนาย   ปิยรูปานํ   กามูปสญฺหิตานํ
รชนิยานํ    โน    จ   โข   ทิพฺพานํ   รูปานํ   ทสฺสนาย   ปิยรูปานํ
กามูปสญฺหิตานํ   รชนิยานํ   อุทฺธมโธ   ติริยํ   ทิพฺพานิ  สทฺทานิ  สุณาติ
ปิยรูปานิ   กามูปสญฺหิตานิ   รชนิยานิ   โน   จ   โข  ทิพฺพานิ  รูปานิ
ปสฺสติ   ปิยรูปานิ   กามูปสญฺหิตานิ   รชนิยานิ   ตํ   กิสฺส  เหตุ  เอวํ
เหตํ   มหาลิ   โหติ  ภิกฺขุโน  อุทฺธมโธ  ติริยํ  เอกํสภาวิเต  สมาธิมฺหิ
ทิพฺพานํ   สทฺทานํ  สวนาย  ปิยรูปานํ  กามูปสญฺหิตานํ  รชนิยานํ  โน  จ
โข ทิพฺพานํ รูปานํ ทสฺสนาย ปิยรูปานํ กามูปสญฺหิตานํ รชนิยานํ ฯ
     [๒๔๘]   อิธ   มหาลิ  ภิกฺขุโน  ปุรตฺถิมาย  ทิสาย  อุภยํสภาวิโต
สมาธิ   โหติ   ทิพฺพานญฺจ   รูปานํ  ทสฺสนาย  ปิยรูปานํ  กามูปสญฺหิตานํ
รชนิยานํ    ทิพฺพานญฺจ   สทฺทานํ   สวนาย   ปิยรูปานํ   กามูปสญฺหิตานํ
รชนิยานํ   โส   ปุรตฺถิมาย  ทิสาย  อุภยํสภาวิเต  สมาธิมฺหิ  ทิพฺพานญฺจ
รูปานํ    ทสฺสนาย    ฯเปฯ   ทิพฺพานญฺจ   สทฺทานํ   สวนาย   ฯเปฯ
ปุรตฺถิมาย  ทิสาย  ทิพฺพานิ  จ  รูปานิ  ปสฺสติ  ปิยรูปานิ  กามูปสญฺหิตานิ
รชนิยานิ   ทิพฺพานิ   จ   สทฺทานิ   สุณาติ   ปิยรูปานิ   กามูปสญฺหิตานิ
รชนิยานิ  ตํ  กิสฺส  เหตุ  เอวํ  เหตํ  มหาลิ  โหติ  ภิกฺขุโน ปุรตฺถิมาย
ทิสาย   อุภยํสภาวิเต   สมาธิมฺหิ   ทิพฺพานญฺจ  รูปานํ  ทสฺสนาย  ฯเปฯ
ทิพฺพานญฺจ สทฺทานํ สวนาย ปิยรูปานํ กามูปสญฺหิตานํ รชนิยานํ ฯ
     [๒๔๙]   ปุน   จปรํ   มหาลิ  ภิกฺขุโน  ทกฺขิณาย  ทิสาย  ฯเปฯ
ปจฺฉิมาย   ทิสาย   ฯเปฯ   อุตฺตราย   ทิสาย  ฯเปฯ  อุทฺธมโธ  ติริยํ
อุภยํสภาวิโต   สมาธิ   โหติ   ทิพฺพานญฺจ   รูปานํ  ทสฺสนาย  ปิยรูปานํ
กามูปสญฺหิตานํ    รชนิยานํ   ทิพฺพานญฺจ   สทฺทานํ   สวนาย   ปิยรูปานํ
กามูปสญฺหิตานํ    รชนิยานํ    โส    อุทฺธมโธ    ติริยํ   อุภยํสภาวิเต
สมาธิมฺหิ    ทิพฺพานญฺจ   รูปานํ   ทสฺสนาย   ปิยรูปานํ   กามูปสญฺหิตานํ
รชนิยานํ    ทิพฺพานญฺจ   สทฺทานํ   สวนาย   ปิยรูปานํ   กามูปสญฺหิตานํ
รชนิยานํ    อุทฺธมโธ    ติริยํ    ทิพฺพานิ   รูปานิ   ปสฺสติ   ปิยรูปานิ
กามูปสญฺหิตานิ     รชนิยานิ     ทิพฺพานิ     จ     สทฺทานิ    สุณาติ
ปิยรูปานิ   กามูปสญฺหิตานิ   รชนิยานิ   ตํ   กิสฺส   เหตุ   เอวํ  เหตํ
มหาลิ    โหติ   ภิกฺขุโน   อุทฺธมโธ   ติริยํ   อุภยํสภาวิเต   สมาธิมฺหิ
ทิพฺพานญฺจ    รูปานํ   ทสฺสนาย   ปิยรูปานํ   กามูปสญฺหิตานํ   รชนิยานํ
ทิพฺพานญฺจ    สทฺทานํ   สวนาย   ปิยรูปานํ   กามูปสญฺหิตานํ   รชนิยานํ
อยํ  โข  มหาลิ  เหตุ อยํ ปจฺจโย เยน สนฺตาเนว สุนกฺขตฺโต ลิจฺฉวิปุตฺโต
ทิพฺพานิ   สทฺทานิ   น   อสฺโสสิ   ปิยรูปานิ   กามูปสญฺหิตานิ  รชนิยานิ
โน อสนฺตานีติ ฯ
     [๒๕๐]  เอตาสํ  นูน  ภนฺเต  สมาธิภาวนานํ  สจฺฉิกิริยาเหตุ ภิกฺขู
ภควติ  พฺรหฺมจริยํ  จรนฺตีติ  ฯ  น  โข  มหาลิ  เอตาสํ  สมาธิภาวนานํ
สจฺฉิกิริยาเหตุ   ภิกฺขู   มยิ   พฺรหฺมจริยํ   จรนฺติ   อตฺถิ   โข  มหาลิ
อญฺเญ   ธมฺมา   อุตฺตริตรา   จ   ปณีตตรา   จ  เยสํ  สจฺฉิกิริยาเหตุ
ภิกฺขู มยิ พฺรหฺมจริยํ จรนฺตีติ ฯ
     {๒๕๐.๑}  กตเม  ปน  ภนฺเต  ธมฺมา  อุตฺตริตรา  จ ปณีตตรา จ
เยสํ  สจฺฉิกิริยาเหตุ  ภิกฺขู  ภควติ  พฺรหฺมจริยํ  จรนฺตีติ  ฯ  อิธ  มหาลิ
ภิกฺขุ   ติณฺณํ   สญฺโญชนานํ  ปริกฺขยา  โสตาปนฺโน  โหติ  อวินิปาตธมฺโม
นิยโต  สมฺโพธิปรายโน  อยํ  โข  มหาลิ  ธมฺโม  อุตฺตริตโร จ ปณีตตโร
จ ยสฺส สจฺฉิกิริยาเหตุ ภิกฺขู มยิ พฺรหฺมจริยํ จรนฺติ ฯ
     [๒๕๑]   ปุน   จปรํ  มหาลิ  ภิกฺขุ  ติณฺณํ  สญฺโญชนานํ  ปริกฺขยา
ราคโทสโมหานํ    ตนุตฺตา   สกทาคามี   โหติ   สกิเทว   อิมํ   โลกํ
อาคนฺตฺวา   ทุกฺขสฺสนฺตํ  กโรติ  อยํ  โข  มหาลิ  ธมฺโม  อุตฺตริตโร  จ
ปณีตตโร จ ยสฺส สจฺฉิกิริยาเหตุ ภิกฺขู มยิ พฺรหฺมจริยํ จรนฺติ ฯ
     [๒๕๒]   ปุน   จปรํ   มหาลิ   ภิกฺขุ   ปญฺจนฺนํ   โอรมฺภาคิยานํ
สญฺโญชนานํ    ปริกฺขยา    โอปปาติโก    โหติ    ตตฺถ    ปรินิพฺพายี
อนาวตฺติธมฺโม   ตสฺมา  โลกา  อยํ  โข  มหาลิ  ธมฺโม  อุตฺตริตโร  จ
ปณีตตโร จ ยสฺส สจฺฉิกิริยาเหตุ ภิกฺขู มยิ พฺรหฺมจริยํ จรนฺติ ฯ
     [๒๕๓]   ปุน   จปรํ   มหาลิ   ภิกฺขุ   อาสวานํ  ขยา  อนาสวํ
เจโตวิมุตฺตึ    ปญฺญาวิมุตฺตึ    ทิฏฺเฐ    ว    ธมฺเม    สยํ   อภิญฺญา
สจฺฉิกตฺวา   อุปสมฺปชฺช   วิหรติ   อยํปิ  โข  มหาลิ  ธมฺโม  อุตฺตริตโร
จ    ปณีตตโร   จ   ยสฺส   สจฺฉิกิริยาเหตุ   ภิกฺขู   มยิ   พฺรหฺมจริยํ
จรนฺติ   อิเม   โข   เต  มหาลิ  ธมฺมา  อุตฺตริตรา  จ  ปณีตตรา  จ
เยสํ สจฺฉิกิริยาเหตุ ภิกฺขู มยิ พฺรหฺมจริยํ จรนฺตีติ ฯ
     [๒๕๔]   อตฺถิ   นุ  โข  ภนฺเต  มคฺโค  อตฺถิ  ปฏิปทา  เอเตสํ
ธมฺมานํ   สจฺฉิกิริยายาติ   ฯ  อตฺถิ  โข  มหาลิ  มคฺโค  อตฺถิ  ปฏิปทา
เอเตสํ   ธมฺมานํ   สจฺฉิกิริยายาติ   ฯ   กตโม   ปน   ภนฺเต  มคฺโค
กตมา    ปฏิปทา    เอเตสํ   ธมฺมานํ   สจฺฉิกิริยายาติ   ฯ   อยเมว
อริโย    อฏฺฐงฺคิโก    มคฺโค   เสยฺยถีทํ   สมฺมาทิฏฺฐิ   สมฺมาสงฺกปฺโป
สมฺมาวาจา      สมฺมากมฺมนฺโต      สมฺมาอาชีโว      สมฺมาวายาโม
สมฺมาสติ    สมฺมาสมาธิ   อยํ   โข   มหาลิ   มคฺโค   อยํ   ปฏิปทา
เอเตสํ ธมฺมานํ สจฺฉิกิริยาย ฯ
     [๒๕๕]  เอกมิทาหํ  มหาลิ  สมยํ โกสมฺพิยํ วิหรามิ โฆสิตาราเม ฯ
อถโข    เทฺว    ปพฺพชิตา    มณฺฑิโย    จ    ปริพฺพาชโก   ชาลิโย
จ   ทารุปตฺติกนฺเตวาสี   เยนาหํ   เตนุปสงฺกมึสุ   อุปสงฺกมิตฺวา   มยา
สทฺธึ   สมฺโมทึสุ   สมฺโมทนียํ   กถํ   สาราณียํ  วีติสาเรตฺวา  เอกมนฺตํ
อฏฺฐํสุ   ฯ   เอกมนฺตํ  ฐิตา  โข  เต  เทฺว  ปพฺพชิตา  มํ  เอตทโวจุํ
กินฺนุ  โข  อาวุโส  โคตม  ตํ  ชีวํ  ตํ  สรีรํ  อุทาหุ  อญฺญํ  ชีวํ  อญฺญํ
สรีรนฺติ ฯ
     {๒๕๕.๑}  เตนหาวุโส  สุณาถ  สาธุกํ  มนสิกโรถ  ภาสิสฺสามิ  ฯ
อิธาวุโส  ตถาคโต  โลเก  อุปฺปชฺชติ  อรหํ  สมฺมาสมฺพุทฺโธ ฯเปฯ (ยถา
สามญฺญผเล   เอวํ   วิตฺถาเรตพฺพํ)   ฯเปฯ  เอวํ  โข  อาวุโส  ภิกฺขุ
สีลสมฺปนฺโน โหติ ฯเปฯ ปฐมํ ฌานํ อุปสมฺปชฺช วิหรติ ฯ
     {๒๕๕.๒}  โย  นุ  โข  อาวุโส  ภิกฺขุ  เอวํ ชานาติ เอวํ ปสฺสติ
กลฺลนฺนุ   โข   ตสฺเสตํ  วจนาย  ตํ  ชีวํ  ตํ  สรีรนฺติ  วา  อญฺญํ  ชีวํ
อญฺญํ  สรีรนฺติ  วาติ  ฯ  โย  โส  อาวุโส  ภิกฺขุ  เอวํ  ชานาติ  เอวํ
ปสฺสติ   น   กลฺลํ   ตสฺเสตํ  วจนาย  ตํ  ชีวํ  ตํ  สรีรนฺติ  วา  อญฺญํ
ชีวํ   อญฺญํ  สรีรนฺติ  วา  ฯ  อหํ  โข  ปเนตํ  อาวุโส  เอวํ  ชานามิ
เอวํ  ปสฺสามิ  อถ  จ  ปนาหํ  น  วทามิ  ตํ  ชีวํ  ตํ สรีรนฺติ วา อญฺญํ
ชีวํ   อญฺญํ  สรีรนฺติ  วาติ  ฯ  ทุติยํ  ฌานํ  ฯ  ตติยํ  ฌานํ  ฯ  จตุตฺถํ
ฌานํ  อุปสมฺปชฺช  วิหรติ  ฯ  โย  นุ โข อาวุโส ภิกฺขุ เอวํ ชานาติ เอวํ
ปสฺสติ  กลฺลนฺนุ  โข  ตสฺเสตํ  วจนาย  ตํ  ชีวํ  ตํ  สรีรนฺติ  วา  อญฺญํ
ชีวํ  อญฺญํ  สรีรนฺติ  วาติ  ฯ  โย  โส  อาวุโส ภิกฺขุ เอวํ ชานาติ เอวํ
ปสฺสติ   น   กลฺลํ   ตสฺเสตํ  วจนาย  ตํ  ชีวํ  ตํ  สรีรนฺติ  วา  อญฺญํ
ชีวํ   อญฺญํ   สรีรนฺติ   วาติ   ฯ   อหํ   โข   ปเนตํ  อาวุโส  เอวํ
ชานามิ  เอวํ  ปสฺสามิ  อถ  จ  ปนาหํ  น  วทามิ  ตํ  ชีวํ  ตํ สรีรนฺติ
วา   อญฺญํ   ชีวํ   อญฺญํ   สรีรนฺติ   วาติ   ฯ   ญาณทสฺสนาย   จิตฺตํ
อภินีหรติ  อภินินฺนาเมติ  ฯ  โย  นุ  โข  อาวุโส  ภิกฺขุ  ฯเปฯ  นาปรํ
อิตฺถตฺตายาติ ปชานาติ ฯ
     {๒๕๕.๓}  โย  นุ  โข  อาวุโส  ภิกฺขุ  เอวํ ชานาติ เอวํ ปสฺสติ
กลฺลํ   นุ  โข  ตสฺเสตํ  วจนาย  ตํ  ชีวํ  ตํ  สรีรนฺติ  วา  อญฺญํ  ชีวํ
อญฺญํ  สรีรนฺติ  วาติ  ฯ  โย  โส  อาวุโส  ภิกฺขุ  เอวํ  ชานาติ  เอวํ
ปสฺสติ   น   กลฺลํ   ตสฺเสตํ  วจนาย  ตํ  ชีวํ  ตํ  สรีรนฺติ  วา  อญฺญํ
ชีวํ  อญฺญํ  สรีรนฺติ  วาติ  ฯ  อหํ  โข  ปเนตํ  อาวุโส  เอวํ  ชานามิ
เอวํ  ปสฺสามิ  อถ  จ  ปนาหํ  น  วทามิ  ตํ  ชีวํ  ตํ สรีรนฺติ วา อญฺญํ
ชีวํ   อญฺญํ   สรีรนฺติ   วาติ   ฯ   อิทมโวจ   ภควา   ฯ   อตฺตมโน
โอฏฺฐทฺโธ ลิจฺฉวิ ภควโต ภาสิตํ อภินนฺทีติ ฯ
                   มหาลิสุตฺตํ ฉฏฺฐํ นิฏฺฐิตํ ฯ
                           --------------


             เนื้อความพระไตรปิฎกฉบับภาษาบาลี อักษรไทย เล่มที่ ๙ หน้าที่ ๑๙๒-๒๐๒. https://84000.org/tipitaka/read/pali_read.php?B=9&A=3820&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=9&A=3820&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=9&item=239&items=17              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=9&siri=6              ศึกษาอรรถกถานี้ได้ที่ :- https://84000.org/tipitaka/attha/attha.php?b=9&i=239              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=4&A=7282              The Pali Atthakatha in Roman :- https://84000.org/tipitaka/atthapali/read_rm.php?B=4&A=7282              สารบัญพระไตรปิฎกเล่มที่ ๙ https://84000.org/tipitaka/read/?index_9 https://84000.org/tipitaka/english/?index_9

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]