Kukkurovādasuttaṃ
[84] Evamme sutaṃ ekaṃ samayaṃ bhagavā koliyesu viharati haliddavasanaṃ
nāma koliyānaṃ nigamo . atha kho puṇṇo ca koliyaputto govattiko
acelo ca seniyo kukkuravattiko yena bhagavā tenupasaṅkamiṃsu
upasaṅkamitvā puṇṇo koliyaputto govattiko bhagavantaṃ abhivādetvā
ekamantaṃ nisīdi . acelo pana seniyo kukkuravattiko bhagavatā saddhiṃ
sammodi sammodanīyaṃ kathaṃ sārāṇīyaṃ vītisāretvā kukkurova palikuṇṭhitvā 1-
ekamantaṃ nisīdi . ekamanataṃ nisinno kho puṇṇo koliyaputto
govattiko bhagavantaṃ etadavoca ayaṃ bhante acelo seniyo kukkuravattiko
dukkarakārako chamāyaṃ 2- nikkhittaṃ bhojanaṃ 3- bhuñjati tassa taṃ kukkuravattaṃ
dīgharattaṃ samattaṃ samādinnaṃ tassa kā gati ko abhisamparāyoti .
Alaṃ puṇṇa tiṭṭhatetaṃ mā maṃ etaṃ pucchīti.
{84.1} Dutiyampikho puṇṇo koliyaputto govattiko bhagavantaṃ
etadavoca ayaṃ bhante acelo seniyo kukkuravattiko dukkarakārako chamāyaṃ
nikkhittaṃ bhojanaṃ bhuñjati tassa taṃ kukkuravattaṃ dīgharattaṃ samattaṃ samādinnaṃ
tassa kā gati ko abhisamparāyoti . alaṃ puṇṇa tiṭṭhatetaṃ mā maṃ etaṃ
pucchīti tatiyampi kho puṇṇo koliyaputto govattiko bhagavantaṃ etadavoca
@Footnote: 1 Sī. Yu. palikujjitvā . 2 Ma. chamānikkhittaṃ . 3 Yu. ayaṃ pāṭho natthi.
Ayaṃ bhante acelo seniyo kukkuravattiko dukkarakārako chamāyaṃ
nikkhittaṃ bhojanaṃ bhuñjati tassa taṃ kukkuravattaṃ dīgharattaṃ samattaṃ
samādinnaṃ tassa kā gati ko abhisamparāyoti.
[85] Addhā kho te ahaṃ puṇṇa na labhāmi alaṃ puṇṇa
tiṭṭhatetaṃ mā maṃ etaṃ pucchīti apica te ahaṃ byākarissāmi
idha puṇṇa ekacco kukkuravattaṃ bhāveti paripuṇṇaṃ abbokiṇṇaṃ
kukkurasīlaṃ bhāveti paripuṇṇaṃ abbokiṇṇaṃ kukkuracittaṃ
bhāveti paripuṇṇaṃ abbokiṇṇaṃ kukkurākappaṃ bhāveti paripuṇṇaṃ
abbokiṇṇaṃ so kukkuravattaṃ bhāvetvā paripuṇṇaṃ abbokiṇṇaṃ
kukkurasīlaṃ bhāvetvā paripuṇṇaṃ abbokiṇṇaṃ kukkuracittaṃ bhāvetvā
paripuṇṇaṃ abbokiṇṇaṃ kukkurākappaṃ bhāvetvā paripuṇṇaṃ
abbokiṇṇaṃ kāyassa bhedā parammaraṇā kukkurānaṃ sahabyataṃ
upapajjati sace kho panassa evaṃ diṭṭhi hoti imināhaṃ sīlena vā vattena
vā tapena vā brahmacariyena vā devo vā bhavissāmi devaññataro
vāti sāssa 1- hoti micchādiṭṭhi micchādiṭṭhissa kho ahaṃ puṇṇa
dvinnaṃ gatīnaṃ aññataraṃ gatiṃ vadāmi nirayaṃ vā tiracchānayoniṃ vā
iti kho puṇṇa sampajjamānaṃ kukkuravattaṃ kukkurānaṃ sahabyataṃ
upaneti vipajjamānaṃ nirayanti . evaṃ vutte acelo seniyo
kukkuravattiko parodi assūni pavattesi.
[86] Atha kho bhagavā puṇṇaṃ koliyaputtaṃ govattikaṃ etadavoca
@Footnote: 1 Ma. sāyaṃ.
Etaṃ kho te ahaṃ puṇṇa nālatthaṃ alaṃ puṇṇa tiṭṭhatetaṃ mā maṃ
etaṃ pucchīti 1- . nāhaṃ bhante etaṃ rodāmi yaṃ maṃ bhagavā evamāha
apica me idaṃ bhante kukkuravattaṃ dīgharattaṃ samattaṃ samādinnaṃ ayaṃ
bhante puṇṇo koliyaputto govattiko tassa taṃ govattaṃ dīgharattaṃ
samattaṃ samādinnaṃ tassa kā gati ko abhisamparāyoti . alaṃ seniya
tiṭṭhatetaṃ mā maṃ etaṃ pucchīti . dutiyampi kho acelo seniyo .pe.
Tatiyampi kho acelo seniyo kukkuravattiko bhagavantaṃ etadavoca ayaṃ
bhante puṇṇo koliyaputto govattiko tassa taṃ govattaṃ dīgharattaṃ
samattaṃ samādinnaṃ tassa kā gati ko abhisamparāyoti.
{86.1} Addhā kho te ahaṃ seniya na labhāmi alaṃ seniya tiṭṭhatetaṃ
mā maṃ etaṃ pucchīti apica te ahaṃ byākarissāmi idha seniya ekacco
govattaṃ bhāveti paripuṇṇaṃ abbokiṇṇaṃ gosīlaṃ bhāveti paripuṇṇaṃ
abbokiṇṇaṃ gocittaṃ bhāveti paripuṇṇaṃ abbokiṇṇaṃ gavākappaṃ
bhāveti paripuṇṇaṃ abbokiṇṇaṃ so govattaṃ bhāvetvā paripuṇṇaṃ
abbokiṇṇaṃ gosīlaṃ bhāvetvā paripuṇṇaṃ abbokiṇṇaṃ gocittaṃ
bhāvetvā paripuṇṇaṃ abbokiṇṇaṃ gavākappaṃ bhāvetvā paripuṇṇaṃ
abbokiṇṇaṃ kāyassa bhedā parammaraṇā gunnaṃ sahabyataṃ upapajjati
sace kho panassa evaṃ diṭṭhi hoti imināhaṃ sīlena vā vattena
vā tapena vā brahmacariyena vā devo vā bhavissāmi devaññataro
@Footnote: 1 Ma. pucchāti.
Vāti sāssa hoti micchādiṭṭhi micchādiṭṭhissa kho ahaṃ seniya
dvinnaṃ gatīnaṃ aññataraṃ gatiṃ vadāmi nirayaṃ vā tiracchānayoniṃ
vā iti kho seniya sampajjamānaṃ govattaṃ gunnaṃ sahabyataṃ
upaneti vipajjamānaṃ nirayanti . evaṃ vutte puṇṇo koliyaputto
govattiko parodi assūni pavattesi.
[87] Atha kho bhagavā acelaṃ seniyaṃ kukkuravattikaṃ etadavoca
etaṃ kho te ahaṃ seniya nālatthaṃ alaṃ seniya tiṭṭhatetaṃ mā
maṃ etaṃ pucchīti . nāhaṃ bhante etaṃ rodāmi yaṃ maṃ bhagavā
evamāha apica me idaṃ bhante govattaṃ dīgharattaṃ samattaṃ
samādinnaṃ evaṃ pasanno ahaṃ bhante bhagavati pahoti bhagavā
tathā dhammaṃ desetuṃ yathā ahañcevimaṃ govattaṃ pajaheyyaṃ ayañca
acelo seniyo kukkuravattiko taṃ kukkuravattaṃ pajaheyyāti . tenahi
puṇṇa suṇāhi sādhukaṃ manasikarohi bhāsissāmīti . evaṃ bhanteti
kho puṇṇo koliyaputto govattiko bhagavato paccassosi.
[88] Bhagavā etadavoca cattārīmāni puṇṇa kammāni mayā
sayaṃ abhiññā sacchikatvā paveditāni katamāni cattāri atthi
puṇṇa kammaṃ kaṇhaṃ kaṇhavipākaṃ atthi puṇṇa kammaṃ sukkaṃ sukkavipākaṃ
atthi puṇṇa kammaṃ kaṇhasukkaṃ kaṇhasukkavipākaṃ atthi puṇṇa
kammaṃ akaṇhaṃ asukkaṃ akaṇha asukkavipākaṃ 1- kammakkhayāya
@Footnote: 1 Sī. Yu. etthanutare kammanti pāṭho dissati.
Saṃvattatīti 1-.
{88.1} Katamañca puṇṇa kammaṃ kaṇhaṃ kaṇhavipākaṃ idha
puṇṇa ekacco sabyāpajjhaṃ kāyasaṅkhāraṃ abhisaṅkharoti sabyāpajjhaṃ
vacīsaṅkhāraṃ abhisaṅkharoti sabyāpajjhaṃ manosaṅkhāraṃ abhisaṅkharoti
so sabyāpajjhaṃ kāyasaṅkhāraṃ abhisaṅkharitvā sabyāpajjhaṃ vacīsaṅkhāraṃ
abhisaṅkharitvā sabyāpajjhaṃ manosaṅkhāraṃ abhisaṅkharitvā sabyāpajjhaṃ
lokaṃ upapajjati tamenaṃ sabyāpajjhaṃ lokaṃ upapannaṃ samānaṃ
sabyāpajjhā phassā phusanti so sabyāpajjhehi phassehi phuṭṭho
samāno sabyāpajjhaṃ vedanaṃ vedeti ekantadukkhaṃ seyyathāpi
sattā nerayikāti 1- iti kho puṇṇa bhūtā bhūtassa upapatti
hoti yaṃ karoti tena upapajjati upapannametaṃ phassā phusanti
evampāhaṃ puṇṇa kammadāyādā sattāti vadāmi idaṃ vuccati
puṇṇa kammaṃ kaṇhaṃ kaṇhavipākaṃ.
{88.2} Katamañca puṇṇa kammaṃ sukkaṃ sukkavipākaṃ idha puṇṇa
ekacco abyāpajjhaṃ kāyasaṅkhāraṃ abhisaṅkharoti abyāpajjhaṃ
vacīsaṅkhāraṃ abhisaṅkharoti abyāpajjhaṃ manosaṅkhāraṃ abhisaṅkharoti so
abyāpajjhaṃ kāyasaṅkhāraṃ abhisaṅkharitvā abyāpajjhaṃ vacīsaṅkhāraṃ
abhisaṅkharitvā abyāpajjhaṃ manosaṅkhāraṃ abhisaṅkharitvā abyāpajjhaṃ
lokaṃ upapajjati tamenaṃ abyāpajjhaṃ lokaṃ upapannaṃ samānaṃ abyāpajjhā
phassā phusanti so abyāpajjhehi phassehi phuṭṭho samāno abyāpajjhaṃ
vedanaṃ vedeti ekantasukhaṃ seyyathāpi devā subhakiṇhā iti kho
@Footnote: 1 Ma. Yu. itisaddo natthi.
Puṇṇa bhūtā bhūtassa upapatti hoti yaṃ karoti tena upapajjati
upapannametaṃ phassā phusanti evampāhaṃ puṇṇa kammadāyādā
sattāti vadāmi idaṃ vuccati 1- kammaṃ sukkaṃ sukkavipākaṃ.
{88.3} Katamañca puṇṇa kammaṃ kaṇha sukkaṃ kaṇha sukkavipākaṃ idha
puṇṇa ekacco sabyāpajjhampi abyāpajjhampi kāyasaṅkhāraṃ abhisaṅkharoti
sabyāpajjhampi abyāpajjhampi vacīsaṅkhāraṃ abhisaṅkharoti sabyāpajjhampi
abyāpajjhampi manosaṅkhāraṃ abhisaṅkharoti so sabyāpajjhampi
abyāpajjhampi kāyasaṅkhāraṃ abhisaṅkharitvā sabyāpajjhampi
abyāpajjhampi vacīsaṅkhāraṃ abhisaṅkharitvā sabyāpajjhampi abyāpajjhampi
manosaṅkhāraṃ abhisaṅkharitvā sabyāpajjhampi abyāpajjhampi lokaṃ
upapajjati tamenaṃ sabyāpajjhampi abyāpajjhampi lokaṃ upapannaṃ
samānaṃ sabyāpajjhāpi abyāpajjhāpi phassā phusanti so
sabyāpajjhehipi abyāpajjhehipi phassehi phuṭṭho samāno
sabyāpajjhampi abyāpajjhampi vedanaṃ vedeti vokiṇṇaṃ sukhadukkhaṃ
seyyathāpi manussā ekacce ca devā ekacce ca vinipātikā
iti kho puṇṇa bhūtā bhūtassa upapatti hoti yaṃ karoti tena upapajjati
upapannametaṃ 2- phassā phusanti evampāhaṃ puṇṇa kammadāyādā
sattāti vadāmi idaṃ vuccati puṇṇa kammaṃ kaṇhasukkaṃ kaṇhasukkavipākaṃ.
{88.4} Katamañca puṇṇa kammaṃ akaṇhaṃ asukkaṃ akaṇha-
asukkavipākaṃ [3]- kammakkhayāya saṃvattati tatra puṇṇa
@Footnote: 1 Ma. Yu. puṇṇa . 2 Ma. uppannametaṃ. Yu. upapannamenaṃ . 3 Sī. Yu. kammaṃ.
Yamidaṃ kammaṃ kaṇhaṃ kaṇhavipākaṃ tassa pahānāya yā cetanā
yamidaṃ kammaṃ sukkaṃ sukkavipākaṃ tassa pahānāya yā cetanā
yamidaṃ kammaṃ kaṇhasukkaṃ kaṇhasukkavipākaṃ tassa pahānāya yā
cetanā idaṃ vuccati puṇṇa kammaṃ akaṇhaṃ asukkaṃ akaṇhaasukkavipākaṃ
kammakkhayāya saṃvattati 1- . imāni kho puṇṇa cattāri
kammāni mayā sayaṃ abhiññā sacchikatvā paveditānīti.
[89] Evaṃ vutte puṇṇo koliyaputto govattiko bhagavantaṃ
etadavoca abhikkantaṃ bhante abhikkantaṃ bhante seyyathāpi bhante
nikkujjitaṃ vā ukkujjeyya paṭicchannaṃ vā vivareyya mūḷhassa vā
maggaṃ ācikkheyya andhakāre vā telapajjotaṃ dhāreyya cakkhumanto
rūpāni dakkhantīti evameva bhotā gotamena anekapariyāyena dhammo
pakāsito esāhaṃ bhante bhagavantaṃ saraṇaṃ gacchāmi dhammañca
bhikkhusaṅghañca upāsakaṃ maṃ bhagavā dhāretu ajjatagge pāṇupetaṃ
saraṇaṅgatanti.
{89.1} Acelo 2- seniyo kukkuravattiko bhagavantaṃ etadavoca
abhikkantaṃ bhante abhikkantaṃ bhante seyyathāpi bhante nikkujjitaṃ vā
ukkujjeyya paṭicchannaṃ vā vivareyya mūḷhassa vā maggaṃ ācikkheyya
andhakāre vā telapajjotaṃ dhāreyya cakkhumanto rūpāni dakkhantīti
evameva bhotā gotamena 3- anekapariyāyena dhammo pakāsito esāhaṃ
bhante bhagavantaṃ saraṇaṃ gacchāmi dhammañca bhikkhusaṅghañca labheyyāhaṃ
bhante bhagavato santike pabbajjaṃ labheyyaṃ upasampadanti . yo kho
@Footnote: 1 Ma. saṃvattatīti . 2 Ma. Yu. acelo pana . 3 Yu. evamevaṃ bhagavatā.
Seniya aññatitthiyapubbo imasmiṃ dhammavinaye ākaṅkhati pabbajjaṃ
ākaṅkhati upasampadaṃ so cattāro māse parivasati catunnaṃ māsānaṃ
accayena āraddhacittā bhikkhū pabbājenti upasampādenti
bhikkhubhāvāya apica mettha puggalavemattatā viditāti.
[90] Sace kho 1- bhante aññatitthiyapubbā imasmiṃ dhammavinaye
ākaṅkhantā pabbajjaṃ ākaṅkhantā upasampadaṃ 2- cattāro māse
parivasanti catunnaṃ māsānaṃ accayena āraddhacittā bhikkhū pabbājenti
upasampādenti bhikkhubhāvāya ahaṃ cattāri vassāni parivasissāmi
catunnaṃ 3- vassānaṃ accayena āraddhacittā bhikkhū pabbājenti 4-
upasampādenti 5- bhikkhubhāvāyāti . alattha kho acelo
seniyo kukkuravattiko bhagavato santike pabbajjaṃ alattha upasampadaṃ .
Acirūpasampanno kho panāyasmā seniyo eko vūpakaṭṭho appamatto
ātāpī pahitatto viharanto nacirasseva yassatthāya kulaputtā sammadeva
agārasmā anagāriyaṃ pabbajanti tadanuttaraṃ brahmacariyapariyosānaṃ
diṭṭheva dhamme sayaṃ abhiññā sacchikatvā upasampajja vihāsi khīṇā
jāti vusitaṃ brahmacariyaṃ kataṃ karaṇīyaṃ nāparaṃ itthattāyāti abbhaññāsi.
Aññataro ca 6- kho panāyasmā seniyo arahataṃ ahosīti.
Kukkurovādasuttaṃ niṭṭhitaṃ sattamaṃ.
-----------
@Footnote: 1 Ma. Yu. khoti natthi . 2 Ma. te . 3 Yu. maṃ . 4-5 Ma. Yu. ...tu.
@6 Yu. casaddo natthi.
Abhayarājakumārasuttaṃ
[91] Evamme sutaṃ ekaṃ samayaṃ bhagavā rājagahe viharati veḷuvane
kalandakanivāpe . atha kho abhayo rājakumāro yena nigantho nāṭaputto
tenupasaṅkami upasaṅkamitvā niganthaṃ nāṭaputtaṃ abhivādetvā ekamantaṃ
nisīdi.
[92] Ekamantaṃ nisinnaṃ kho abhayaṃ rājakumāraṃ nigantho nāṭaputto
etadavoca ehi tvaṃ rājakumāra samaṇassa gotamassa vādaṃ āropehi
evaṃ te kalyāṇo kittisaddo abbhuggacchissati 1- abhayena
rājakumārena samaṇassa gotamassa evaṃ mahiddhikassa evaṃ
mahānubhāvassa vādo āropitoti.
{92.1} Yathākathaṃ panāhaṃ bhante samaṇassa gotamassa evaṃ
mahiddhikassa evaṃ mahānubhāvassa vādaṃ āropessāmīti . ehi
tvaṃ rājakumāra yena samaṇo gotamo tenupasaṅkama upasaṅkamitvā
samaṇaṃ gotamaṃ evaṃ vadehi bhāseyya nu kho bhante tathāgato taṃ vācaṃ
yā sā vācā paresaṃ appiyā amanāpāti sace pana 2- te
samaṇo gotamo evaṃ puṭṭho evaṃ byākaroti bhāseyya rājakumāra
tathāgato taṃ vācaṃ yā sā vācā paresaṃ appiyā amanāpāti tamenaṃ
tvaṃ evaṃ vadeyyāsi atha kiñcarahi te bhante puthujjanena nānākaraṇaṃ
puthujjanopi hi taṃ vācaṃ bhāseyya yā sā vācā paresaṃ appiyā amanāpāti
@Footnote: 1 Yu. abbhuggañchiti. Ma. ubbhuggacchati . 2 Yu. panasaddo natthi.
Sace pana te samaṇo gotamo evaṃ puṭṭho evaṃ byākaroti
na rājakumāra tathāgato taṃ vācaṃ bhāseyya yā sā vācā paresaṃ
appiyā amanāpāti tamenaṃ tvaṃ evaṃ vadeyyāsi atha kiñcarahi
te bhante devadatto byākato āpāyiko devadatto nerayiko
devadatto kappaṭṭho devadatto atekiccho devadattoti tāya
ca pana te vācāya devadatto kupito ahosi anattamanoti.
{92.2} Imaṃ kho te rājakumāra samaṇo gotamo ubhatokoṭikaṃ pañhaṃ
puṭṭho samāno neva sakkhiti 1- uggilituṃ neva sakkhiti oggilituṃ
seyyathāpi nāma purisassa ayasiṅghāṭakaṃ 2- kaṇṭhe vilaggaṃ so neva
sakkuṇeyya uggilituṃ neva 3- sakkuṇeyya oggilituṃ evameva kho
te rājakumāra samaṇo gotamo imaṃ ubhatokoṭikaṃ pañhaṃ puṭṭho
samāno neva sakkhiti uggilituṃ neva sakkhiti oggilitunti.
{92.3} Evaṃ bhanteti kho abhayo rājakumāro niganthassa nāṭaputtassa
paṭissutvā uṭṭhāyāsanā niganthaṃ nāṭaputtaṃ abhivādetvā padakkhiṇaṃ
katvā yena bhagavā tenupasaṅkami upasaṅkamitvā bhagavantaṃ abhivādetvā
ekamantaṃ nisīdi . ekamantaṃ nisinnassa kho abhayassa rājakumārassa
suriyaṃ oloketvā etadahosi akālo kho ajja bhagavato vādaṃ
āropetuṃ svedānāhaṃ sake nivesane bhagavato vādaṃ āropessāmīti.
Bhagavantaṃ etadavoca adhivāsetu me bhante bhagavā svātanāya
attacatuttho bhattanti . adhivāsesi bhagavā tuṇhībhāvena .
@Footnote: 1 Ma. sakkhati. Yu. sakkhīti. ito paraṃ īdisapāṭhā evameva pākaṭā.
@2 Yu. ayo.... 3 Ma. na..
Atha kho abhayo rājakumāro bhagavato adhivāsanaṃ viditvā uṭṭhāyāsanā
bhagavantaṃ abhivādetvā padakkhiṇaṃ katvā pakkāmi 1- . atha kho bhagavā
tassā rattiyā accayena pubbaṇhasamayaṃ nivāsetvā pattacīvaramādāya
yena abhayassa rājakumārassa nivesanaṃ tenupasaṅkami upasaṅkamitvā
paññatte āsane nisīdi . atha kho abhayo rājakumāro bhagavantaṃ
paṇītena khādanīyena bhojanīyena sahatthā santappesi sampavāresi .
Atha kho abhayo rājakumāro bhagavantaṃ bhuttāviṃ onītapattapāṇiṃ
aññataraṃ nīcaṃ āsanaṃ gahetvā ekamantaṃ nisīdi.
[93] Ekamantaṃ nisinno kho abhayo rājakumāro bhagavantaṃ
etadavoca bhāseyya nu kho bhante tathāgato taṃ vācaṃ yā sā
vācā paresaṃ appiyā amanāpāti . na khvettha 2- rājakumāra
ekaṃsenāti . ettha bhante anassuṃ niganthāti . kiṃ pana tvaṃ
rājakumāra evaṃ vadesīti 3- . ettha bhante anassuṃ niganthāti idhāhaṃ
bhante yena nigantho nāṭaputto tenupasaṅkamiṃ upasaṅkamitvā
niganthaṃ nāṭaputtaṃ abhivādetvā ekamantaṃ nisīdiṃ ekamantaṃ nisinnaṃ
kho maṃ bhante nigantho nāṭaputto etadavoca ehi tvaṃ rājakumāra
samaṇassa gotamassa vādaṃ āropehi evaṃ te kalyāṇo kittisaddo
abbhuggacchissati 4- abhayena rājakumārena samaṇassa gotamassa
evaṃ mahiddhikassa evaṃ mahānubhāvassa vādo āropitoti
{93.1} evaṃ vutte ahaṃ bhante niganthaṃ nāṭaputtaṃ etadavocaṃ yathākathaṃ
@Footnote: 1 Ma. pakkami . 2 Yu. na khottha . 3 Ma. Yu. itisaddo natthi.
@4 Ma. abbhuggacchati. Yu. abbhuggañchīti.
Panāhaṃ bhante samaṇassa gotamassa evaṃ mahiddhikassa evaṃ
mahānubhāvassa vādaṃ āropessāmīti ehi tvaṃ rājakumāra yena
samaṇo gotamo tenupasaṅkama upasaṅkamitvā samaṇaṃ gotamaṃ evaṃ
vadehi bhāseyya nu kho bhante tathāgato taṃ vācaṃ yā sā
vācā paresaṃ appiyā amanāpāti sace te samaṇo gotamo
evaṃ puṭṭho samāno 1- evaṃ byākaroti bhāseyya rājakumāra
tathāgato taṃ vācaṃ yā sā vācā paresaṃ appiyā amanāpāti
tamenaṃ tvaṃ evaṃ vadeyyāsi atha kiñcarahi te bhante puthujjanena
nānākaraṇaṃ puthujjanopi hi taṃ vācaṃ bhāseyya yā sā vācā paresaṃ
appiyā amanāpāti sace pana te samaṇo gotamo evaṃ puṭṭho
{93.2} evaṃ byākaroti na rājakumāra tathāgato taṃ vācaṃ bhāseyya
yā sā vācā paresaṃ appiyā amanāpāti tamenaṃ tvaṃ evaṃ vadeyyāsi
atha kiñcarahi te bhante devadatto byākato āpāyiko
devadatto nerayiko devadatto kappaṭṭho devadatto atekiccho
devadattoti tāya ca pana te vācāya devadatto kupito ahosi
anattamanoti imaṃ kho te rājakumāra samaṇo gotamo ubhatokoṭikaṃ
pañhaṃ puṭṭho samāno neva sakkhiti uggilituṃ neva sakkhiti oggilituṃ
seyyathāpi nāma purisassa ayasiṅghāṭakaṃ kaṇṭhe vilaggaṃ so neva
sakkuṇeyya uggilituṃ neva sakkuṇeyya oggilituṃ evameva kho
te rājakumāra samaṇo gotamo imaṃ ubhatokoṭikaṃ pañhaṃ puṭṭho
@Footnote: 1 Ma. Yu. samānoti natthi.
Samāno neva sakkhiti uggilituṃ neva sakkhiti oggilitunti.
[94] Tena kho pana samayena daharo 1- mando uttānaseyyako
abhayassa rājakumārassa aṅke 2- nisinno hoti . atha kho bhagavā
abhayaṃ rājakumāraṃ etadavoca taṃ kiṃ maññasi rājakumāra sacāyaṃ
kumāro tuyhaṃ vā pamādamanvāya dhātiyā vā pamādamanvāya
kaṭṭhaṃ vā kaṭhalaṃ vā mukhe āhareyya kinti taṃ 3- kareyyāsīti .
Āhareyyassāhaṃ bhante 4- sacāhaṃ bhante na sakkuṇeyyaṃ ādikeneva
āharituṃ 5- vāmena hatthena sīsaṃ pariggahetvā dakkhiṇena hatthena
vaṅkaṅguliṃ katvā salohitampi āhareyyaṃ taṃ kissa hetu atthi hi 6-
me bhante kumāre anukampāti.
{94.1} Evameva kho rājakumāra yaṃ tathāgato vācaṃ 7- jānāti
abhūtaṃ atacchaṃ anatthasañhitaṃ sā ca paresaṃ appiyā amanāpā
na taṃ tathāgato vācaṃ bhāsati yampi tathāgato vācaṃ jānāti bhūtaṃ tacchaṃ
anatthasañhitaṃ sā ca paresaṃ appiyā amanāpā tampi tathāgato
vācaṃ na bhāsati yañca kho tathāgato vācaṃ jānāti bhūtaṃ tacchaṃ
atthasañhitaṃ sā ca paresaṃ appiyā amanāpā tatra kālaññū tathāgato
hoti tassā vācāya veyyākaraṇāya yaṃ tathāgato vācaṃ jānāti
abhūtaṃ atacchaṃ anatthasañhitaṃ sā ca paresaṃ piyā manāpā taṃ 8- tathāgato
vācaṃ na bhāsati yampi tathāgato vācaṃ jānāti bhūtaṃ tacchaṃ anatthasañhitaṃ
@Footnote: 1 Ma. Yu. etthantare kumāroti atthi . 2 Ma. aṅge . 3 Ma. Yu. naṃ.
@4 Ma. sace bhante na sakkuṇeyya . 5 Sī. Yu. āhattuṃ . 6 Yu. hisaddo natthi.
@7 Ma. taṃ vācaṃ . 8 Ma. Yu. na taṃ.
Sā ca paresaṃ piyā manāpā tampi tathāgato vācaṃ na bhāsati
yañca kho tathāgato vācaṃ jānāti bhūtaṃ tacchaṃ atthasañhitaṃ sā
ca paresaṃ piyā manāpā tatra kālaññū tathāgato hoti tassā
vācāya byākaraṇāya 1- taṃ kissa hetu atthi hi 2- rājakumāra
tathāgatassa sattesu anukampāti.
[95] Ye me bhante khattiyapaṇḍitāpi brāhmaṇapaṇḍitāpi
gahapatipaṇḍitāpi samaṇapaṇḍitāpi pañhaṃ abhisaṅkharitvā tathāgataṃ
upasaṅkamitvā pucchanti pubbeva nu kho etaṃ bhante bhagavato
cetaso parivitakkitaṃ hoti ye maṃ upasaṅkamitvā evaṃ pucchissanti
tesāhaṃ evaṃ puṭṭho evaṃ byākarissāmīti udāhu ṭhānasovetaṃ
tathāgataṃ paṭibhātīti 3- . tenahi rājakumāra taññevettha paṭipucchissāmi
yathā te khameyya tathā naṃ byākareyyāsi taṃ kiṃ maññasi
rājakumāra kusalo tvaṃ rathassa aṅgapaccaṅgānanti . evaṃ bhante
kusalo ahaṃ rathassa aṅgapaccaṅgānanti.
{95.1} Taṃ kiṃ maññasi rājakumāra ye taṃ upasaṅkamitvā evaṃ puccheyyuṃ
kinnāmidaṃ rathassa aṅgapaccaṅganti pubbeva nukho te etaṃ cetaso 4-
parivitakkitaṃ assa ye maṃ upasaṅkamitvā evaṃ pucchissanti tesāhaṃ evaṃ
puṭṭho 5- evaṃ byākarissāmīti udāhu ṭhānasovetaṃ taṃ 6- paṭibhāseyyāti.
Ahaṃ hi bhante rathiko saññāto kusalo rathassa aṅgapaccaṅgānaṃ
sabbāni me rathassa aṅgapaccaṅgāni suviditāni ṭhānasovetaṃ maṃ
@Footnote: 1 Yu. veyyākaraṇāya 2 Yu. hisaddo natthi . 3 Po. paṭibhāseyya . 4 Po. cetasā.
@5 Yu. evaṃ puṭṭhoti dve pāṭhā natthi . 6 Ma. ayaṃ pāṭho natthi.
Paṭibhāseyyāti . evameva kho rājakumāra ye te khattiyapaṇḍitāpi
brāhmaṇapaṇḍitāpi gahapatipaṇḍitāpi samaṇapaṇḍitāpi pañhaṃ
abhisaṅkharitvā tathāgataṃ upasaṅkamitvā pucchissanti 1- ṭhānasovetaṃ
tathāgataṃ paṭibhāti taṃ kissa hetu sā hi rājakumāra tathāgatassa dhammadhātu
supaṭividdhā 2- yassā dhammadhātuyā supaṭividdhattā ṭhānasovetaṃ
tathāgataṃ paṭibhātīti.
[96] Evaṃ vutte abhayo rājakumāro bhagavantaṃ etadavoca
abhikkantaṃ bhante abhikkantaṃ bhante seyyathāpi bhante nikkujjitaṃ
vā ukkujjeyya paṭicchannaṃ vā vivareyya mūḷhassa vā maggaṃ
ācikkheyya andhakāre vā telapajjotaṃ dhāreyya cakkhumanto rūpāni
dakkhantīti 3- evameva bhagavatā anekapariyāyena dhammo pakāsito
esāhaṃ bhante bhagavantaṃ saraṇaṃ gacchāmi dhammañca bhikkhusaṅghañca
upāsakaṃ maṃ bhagavā dhāretu ajjatagge pāṇupetaṃ saraṇaṅgatanti.
Abhayarājakumārasuttaṃ niṭṭhitaṃ aṭṭhamaṃ.
------------
@Footnote: 1 Ma. Yu. pucchanti . 2 Ma. suppaṭividitā . 3 Yu. dakkhintīti
@dissati. sabbattha īdisameva.
Bahuvedaniyasuttaṃ
[97] Evamme sutaṃ ekaṃ samayaṃ bhagavā sāvatthiyaṃ viharati jetavane
anāthapiṇḍikassa ārāme . atha kho pañcakaṅgo thapati yenāyasmā
udāyī tenupasaṅkami upasaṅkamitvā āyasmantaṃ udāyiṃ abhivādetvā
ekamantaṃ nisīdi.
[98] Ekamantaṃ nisinno kho so 1- pañcakaṅgo thapati āyasmantaṃ
udāyiṃ etadavoca kati nu kho bhante udāyi vedanā vuttā
bhagavatāti . tisso kho gahapati vedanā vuttā bhagavatā sukhā vedanā
dukkhā vedanā adukkhamasukhā vedanā imā kho gahapati 2- tisso
vedanā vuttā bhagavatāti . na kho bhante udāyi tisso vedanā
vuttā bhagavatā dve vedanā vuttā bhagavatā sukhā vedanā
dukkhā vedanā yāyaṃ bhante adukkhamasukhā vedanā santasmiṃ esā
paṇīte sukhe vuttā bhagavatāti . dutiyampi kho āyasmā udāyī
pañcakaṅgaṃ thapatiṃ etadavoca na kho gahapati dve vedanā vuttā
bhagavatā tisso vedanā vuttā bhagavatā sukhā vedanā dukkhā vedanā
adukkhamasukhā vedanā imā kho gahapati tisso vedanā vuttā bhagavatāti.
{98.1} Dutiyampi kho pañcakaṅgo thapati āyasmantaṃ udāyiṃ
etadavoca na kho bhante udāyi tisso vedanā vuttā bhagavatā
dve vedanā vuttā bhagavatā sukhā vedanā dukkhā vedanā yāyaṃ
@Footnote: 1 Ma. Yu. ayaṃ pāṭho natthi . 2 Ma. thapati.
Bhante adukkhamasukhā vedanā santasmiṃ esā paṇīte sukhe vuttā
bhagavatāti.
{98.2} Tatiyampi kho āyasmā udāyī pañcakaṅgaṃ thapatiṃ
etadavoca na kho gahapati dve vedanā vuttā bhagavatā tisso
vedanā vuttā bhagavatā sukhā vedanā dukkhā vedanā adukkhamasukhā
vedanā imā kho gahapati tisso vedanā vuttā bhagavatāti .
Tatiyampi kho pañcakaṅgo thapati āyasmantaṃ udāyiṃ etadavoca
na kho bhante udāyi tisso vedanā vuttā bhagavatā dve
vedanā vuttā bhagavatā sukhā vedanā dukkhā vedanā yāyaṃ
bhante adukkhamasukhā vedanā santasmiṃ esā paṇīte sukhe vuttā
bhagavatāti . neva kho asakkhi 1- āyasmā udāyī pañcakaṅgaṃ thapatiṃ
saññāpetuṃ na panāsakkhi pañcakaṅgo thapati āyasmantaṃ udāyiṃ
saññāpetuṃ.
[99] Assosi kho āyasmā ānando āyasmato udāyissa
pañcakaṅgena thapatinā saddhiṃ imaṃ kathāsallāpaṃ . atha kho āyasmā
ānando yena bhagavā tenupasaṅkami upasaṅkamitvā bhagavantaṃ
abhivādetvā ekamantaṃ nisīdi . ekamantaṃ nisinno kho āyasmā
ānando yāvatako ahosi āyasmato udāyissa pañcakaṅgena
thapatinā saddhiṃ kathāsallāpo taṃ sabbaṃ bhagavato ārocesi.
{99.1} Evaṃ vutte bhagavā āyasmantaṃ ānandaṃ etadavoca santaññeva
kho ānanda pariyāyaṃ pañcakaṅgo thapati udāyissa nābbhinumodi 2-
@Footnote: 1 Ma. sakkhi . 2 Ma. nābbhanumodi.
Santaññeva ca pana pariyāyaṃ udāyī pañcakaṅgassa thapatissa
nābbhinumodi dvepānanda vedanā vuttā mayā pariyāyena tissopi
vedanā vuttā mayā pariyāyena catassopi 1- vedanā vuttā mayā
pariyāyena pañcapi vedanā vuttā mayā pariyāyena chapi vedanā
vuttā mayā pariyāyena aṭṭhārasapi vedanā vuttā mayā pariyāyena
chattiṃsāpi vedanā vuttā mayā pariyāyena aṭṭhasatampi vedanā
vuttā mayā pariyāyena evaṃ pariyāyadesito kho ānanda mayā
dhammo evaṃ pariyāyadesite kho ānanda mayā dhamme ye aññamaññassa
subhāsitaṃ sulapitaṃ na samanujānissanti na samanumaññissanti
na samanumodissanti tesametaṃ pāṭikaṅkhaṃ bhaṇḍanajātā
kalahajātā vivādāpannā aññamaññaṃ mukhasattīhi vitudantā
viharissantīti evaṃ pariyāyadesito kho ānanda mayā dhammo
evaṃ pariyāyadesite kho ānanda mayā dhamme ye aññamaññassa
subhāsitaṃ sulapitaṃ samanujānissanti samanumaññissanti samanumodissanti
tesametaṃ pāṭikaṅkhaṃ samaggā sammodamānā avivadamānā khīrodakībhūtā
aññamaññaṃ piyacakkhūhi sampassantā viharissanti.
[100] Pañca kho ime ānanda kāmaguṇā katame pañca
cakkhuviññeyyā rūpā iṭṭhā kantā manāpā piyarūpā kāmūpasañhitā
rajanīyā sotaviññeyyā saddā ... ghānaviññeyyā gandhā ...
Jivhāviññeyyā rasā ... kāyaviññeyyā phoṭṭhabbā iṭṭhā kantā
@Footnote: 1 Ma. catassopi vedanā vuttā mayā pariyāyenāti ime pāṭhā natthi.
Manāpā piyarūpā kāmūpasañhitā rajanīyā ime kho ānanda pañca
kāmaguṇā . yaṃ kho ānanda ime pañca kāmaguṇe paṭicca uppajjati
sukhaṃ somanassaṃ idaṃ vuccati kāmasukhaṃ.
[101] Yo kho ānanda evaṃ vadeyya etaparamaṃ sattā
sukhaṃ somanassaṃ paṭisaṃvedentīti idamassa nānujānāmi taṃ kissa
hetu atthānanda etamhā sukhā aññaṃ sukhaṃ abhikkantatarañca
paṇītatarañca . katamañcānanda etamhā sukhā aññaṃ sukhaṃ
abhikkantatarañca paṇītatarañca idhānanda bhikkhu vivicceva kāmehi
vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ
jhānaṃ upasampajja viharati idaṃ kho ānanda etamhā sukhā
aññaṃ sukhaṃ abhikkantatarañca paṇītatarañca.
{101.1} Yo kho ānanda evaṃ vadeyya etaparamaṃ sattā sukhaṃ
somanassaṃ paṭisaṃvedentīti idamassa nānujānāmi taṃ kissa hetu
atthānanda etamhā sukhā aññaṃ sukhaṃ abhikkantatarañca paṇītatarañca .
Katamañcānanda etamhā sukhā aññaṃ sukhaṃ abhikkantatarañca
paṇītatarañca idhānanda bhikkhu vitakkavicārānaṃ vūpasamā ajjhattaṃ
sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ
dutiyaṃ jhānaṃ .pe. tatiyaṃ jhānaṃ ... catutthaṃ jhānaṃ upasampajja viharati
idaṃ kho ānanda etamhā sukhā aññaṃ sukhaṃ abhikkantatarañca
paṇītatarañca [1]-.
{101.2} Katamañcānanda etamhā sukhā aññaṃ sukhaṃ abhikkantatarañca
@Footnote: 1 Ma. etthantare "yo kho evaṃ vadeyya .pe. iti dissati. Yu. yo kho ānanda evaṃ
@vadeyya .pe. iti dissati. ito parampi īdisaṭṭhāne pāṭhā evameva ñātabbā.
Paṇītatarañca idhānanda bhikkhu sabbaso rūpasaññānaṃ samatikkamā
paṭighasaññānaṃ atthaṅgamā nānattasaññānaṃ amanasikārā ananto
ākāsoti ākāsānañcāyatanaṃ upasampajja viharati idaṃ kho
ānanda etamhā sukhā aññaṃ sukhaṃ abhikkantatarañca paṇītatarañca.
{101.3} Katamañcānanda etamhā sukhā aññaṃ sukhaṃ abhikkantatarañca
paṇītatarañca idhānanda bhikkhu sabbaso ākāsānañcāyatanaṃ
samatikkamma anantaṃ viññāṇanti viññāṇañcāyatanaṃ upasampajja
viharati idaṃ kho ānanda etamhā sukhā .pe. katamañcānanda
etamhā sukhā aññaṃ sukhaṃ abhikkantatarañca paṇītatarañca idhānanda
bhikkhu sabbaso viññāṇañcāyatanaṃ samatikkamma natthi kiñcīti
ākiñcaññāyatanaṃ upasampajja viharati idaṃ kho ānanda etamhā
sukhā .pe. katamañcānanda etamhā sukhā aññaṃ sukhaṃ abhikkantatarañca
paṇītatarañca idhānanda bhikkhu sabbaso ākiñcaññāyatanaṃ
samatikkamma nevasaññānāsaññāyatanaṃ upasampajja viharati idaṃ kho
ānanda etamhā sukhā aññaṃ sukhaṃ abhikkantatarañca paṇītatarañca.
[102] Yo kho ānanda evaṃ vadeyya etaparamaṃ sattā sukhaṃ somanassaṃ
paṭisaṃvedentīti idamassa nānujānāmi taṃ kissa hetu atthānanda
etamhā sukhā aññaṃ sukhaṃ abhikkantatarañca paṇītatarañca .
Katamañcānanda etamhā sukhā aññaṃ sukhaṃ abhikkantatarañca
paṇītatarañca idhānanda bhikkhu sabbaso nevasaññānāsaññāyatanaṃ
Samatikkamma saññāvedayitanirodhaṃ upasampajja viharati idaṃ kho
ānanda etamhā sukhā aññaṃ sukhaṃ abhikkantatarañca paṇītatarañca .
Ṭhānaṃ kho panetaṃ ānanda vijjati yaṃ aññatitthiyā paribbājakā
evaṃ vadeyyuṃ saññāvedayitanirodhaṃ samaṇo gotamo āha tañca
sukhasmiṃ paññapeti tayidaṃ kiṃsu tayidaṃ kathaṃsūti evaṃvādino ānanda
aññatitthiyā paribbājakā evamassu vacanīyā na kho āvuso bhagavā
sukhaṃyeva vedanaṃ sandhāya sukhasmiṃ paññapeti apicāvuso yattha yattha
sukhaṃ upalabbhati yahiṃ yahiṃ taṃ taṃ tathāgato sukhasmiṃ paññapetīti.
Idamavoca bhagavā attamano āyasmā ānando bhagavato
bhāsitaṃ abhinandīti.
Bahuvedaniyasuttaṃ niṭṭhitaṃ navamaṃ.
------------
Apaṇṇakasuttaṃ
[103] Evamme sutaṃ ekaṃ samayaṃ bhagavā kosalesu cārikañcaramāno
mahatā bhikkhusaṅghena saddhiṃ yena sālā nāma kosalānaṃ brāhmaṇagāmo
tadavasari . assosuṃ kho sāleyyakā brāhmaṇagahapatikā samaṇo khalu
bho gotamo sakyaputto sakyakulā pabbajito kosalesu cārikañcaramāno
mahatā bhikkhusaṅghena saddhiṃ sālaṃ anuppatto.
{103.1} Taṃ kho pana bhavantaṃ gotamaṃ evaṃkalyāṇo kittisaddo
abbhuggato itipi so bhagavā arahaṃ sammāsambuddho vijjācaraṇasampanno
sugato lokavidū anuttaro purisadammasārathi satthā devamanussānaṃ buddho
bhagavā 1- so imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ
pajaṃ sadevamanussaṃ sayaṃ abhiññā sacchikatvā pavedeti so dhammaṃ deseti
ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ
kevalaparipuṇṇaṃ parisuddhaṃ brahmacariyaṃ pakāseti sādhu kho pana tathārūpānaṃ
arahataṃ dassanaṃ hotīti.
{103.2} Atha kho sāleyyakā brāhmaṇagahapatikā yena bhagavā
tenupasaṅkamiṃsu upasaṅkamitvā appekacce bhagavantaṃ abhivādetvā
ekamantaṃ nisīdiṃsu appekacce bhagavatā saddhiṃ sammodiṃsu sammodanīyaṃ
kathaṃ sārāṇīyaṃ vītisāretvā ekamantaṃ nisīdiṃsu appekacce
yena bhagavā tenañjalimpaṇāmetvā ekamantaṃ nisīdiṃsu
@Footnote: 1 Ma. bhagavāti.
Appekacce bhagavato santike nāmagottaṃ sāvetvā ekamantaṃ nisīdiṃsu
appekacce tuṇhībhūtā ekamantaṃ nisīdiṃsu.
[104] Ekamantaṃ nisinne kho sāleyyake brāhmaṇagahapatike
bhagavā etadavoca atthi pana vo gahapatayo koci manāpo satthā
yasmiṃ vo ākāravatī saddhā paṭiladdhāti . natthi kho no bhante
koci manāpo satthā yasmiṃ no ākāravatī saddhā paṭiladdhāti .
Manāpaṃ vo gahapatayo satthāraṃ alabhantehi ayaṃ apaṇṇako dhammo
samādāya vattitabbo apaṇṇako hi gahapatayo dhammo samatto
samādinno so vo bhavissati dīgharattaṃ hitāya sukhāya . katamo
ca gahapatayo apaṇṇako dhammo 1-.
[105] Santi gahapatayo eke samaṇabrāhmaṇā evaṃvādino
evaṃdiṭṭhino natthi dinnaṃ natthi yiṭṭhaṃ natthi hutaṃ natthi sukaṭadukkaṭānaṃ
kammānaṃ phalaṃ vipāko natthi ayaṃ loko natthi paro loko natthi
mātā natthi pitā natthi sattā opapātikā natthi loke
samaṇabrāhmaṇā sammaggatā sammāpaṭipannā ye imañca lokaṃ
parañca lokaṃ sayaṃ abhiññā sacchikatvā pavedentīti tesaññeva
kho gahapatayo samaṇabrāhmaṇānaṃ eke samaṇabrāhmaṇā
ujuvipaccanīkavādā te evamāhaṃsu atthi dinnaṃ atthi yiṭṭhaṃ
atthi hutaṃ atthi sukaṭadukkaṭānaṃ kammānaṃ phalaṃ vipāko atthi
ayaṃ loko atthi paro loko atthi mātā atthi pitā atthi
@Footnote: 1 Ma. samādāYu...hitāya sukhāya.
Sattā opapātikā atthi loke samaṇabrāhmaṇā sammaggatā
sammāpaṭipannā ye imañca lokaṃ parañca lokaṃ sayaṃ abhiññā
sacchikatvā pavedentīti . taṃ kiṃ maññatha gahapatayo nanume
samaṇabrāhmaṇā aññamaññaṃ 1- ujuvipaccanīkavādāti .
Evaṃ bhante.
The Pali Tipitaka in Roman Character Volume 13 page 79-102.
https://84000.org/tipitaka/read/roman_item.php?book=13&item=84&items=22
Classified by [Item Number] :-
http://84000.org/tipitaka/read/roman_item.php?book=13&item=84&items=22&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=13&item=84&items=22
Compare with The Royal Version of Thai Tipitaka :-
https://84000.org/tipitaka/read/byitem.php?book=13&item=84&items=22
Study Atthakatha :-
https://84000.org/tipitaka/attha/attha.php?b=13&i=84
Contents of The Tipitaka Volume 13
https://84000.org/tipitaka/read/?index_13
https://84000.org/tipitaka/english/?index_13
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
