บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[625] Parinibbute bhagavati saha parinibbānā āyasmā anuruddho imā gāthāyo abhāsi nāhu assāsapassāso ṭhitacittassa tādino anejo santimārabbha cakkhumā parinibbuto 1- asallīnena cittena vedanaṃ ajjhavāsayi pajjotasseva nibbānaṃ vimokkho cetaso ahūti. Brahmapañcakaṃ. Tassuddānaṃ brahmāsanaṃ devadatto andhakavindo aruṇavatī parinibbānena ca desitaṃ idaṃ brahmapañcakaṃ 2-. Brahmasaṃyuttaṃ samattaṃ. @Footnote: 1 dī. mahā. 10/182. mahāparinibbānasutte yaṃ kālamakarī munīti pāṭho dissati. @2 imasmiñca brahmasaṃyuttassante. @tassuddānaṃ @brahmāyācanaṃ gāravañca brahmadevo bako brahmā Aññataro ca brahmā ca brahmaloko kokālikañca āḷavikañca tudu ca brahmā kokālikabhikkhu sanaṅkumārena devadattaṃ andhavindaṃ aruṇavatī parinibbānena paṇṇarasāti īdisā pāṭhakkamā dissanti. ---------------- Brāhmaṇasaṃyuttaṃ arahantavaggo paṭhamo ---------- paṭhamaṃ dhanañjānīsuttaṃ [626] Evamme sutaṃ ekaṃ samayaṃ bhagavā rājagahe viharati veḷuvane kalandakanivāpe . tena kho pana samayena aññatarassa bhāradvājagottassa brāhmaṇassa dhanañjānī nāma brāhmaṇī abhippasannā hoti buddhe ca dhamme ca saṅghe ca. [627] Atha kho dhanañjānī brāhmaṇī bhāradvājagottassa brāhmaṇassa bhattaṃ upasaṃharantī upakkamitvā 1- tikkhattuṃ udānaṃ udānesi namo tassa bhagavato arahato sammāsambuddhassa ... Namo tassa bhagavato arahato sammāsambuddhassāti . evaṃ vutte bhāradvājagotto brāhmaṇo dhanañjāniṃ brāhmaṇiṃ etadavoca evamevaṃ panāyaṃ vasalī yasmiṃ vā tasmiṃ vā tassa muṇḍakassa samaṇassa vaṇṇaṃ bhāsati idāni tyāhaṃ vasali tassa satthuno vādaṃ āropessāmīti . na khvāhantaṃ brāhmaṇa passāmi sadevake loke samārake sabrahmake sassamaṇabrāhmaṇiyā pajāya sadevamanussāya yo tassa bhagavato vādaṃ āropeyya arahato sammāsambuddhassa apica tvaṃ brāhmaṇa gaccha gantvāpi jānissasīti. @Footnote: 1 Po. Ma. upakkhalitvā. [628] Atha kho bhāradvājagotto brāhmaṇo kupito anattamano yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho bhāradvājagotto brāhmaṇo bhagavantaṃ gāthāya ajjhabhāsi kiṃsu chetvā sukhaṃ seti kiṃsu chetvā na socati kissassa ekadhammassa vadhaṃ rocesi gotamāti. [629] Kodhaṃ chetvā sukhaṃ seti kodhaṃ chetvā na socati kodhassa visamūlassa madhuraggassa brāhmaṇa vadhaṃ ariyā pasaṃsanti tañhi chetvā na socatīti.The Pali Tipitaka in Roman Character Volume 15 page 233-236. https://84000.org/tipitaka/read/roman_item.php?book=15&item=625&items=5 Classified by [Item Number] :- http://84000.org/tipitaka/read/roman_item.php?book=15&item=625&items=5&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=15&item=625&items=5 Compare with The Royal Version of Thai Tipitaka :- https://84000.org/tipitaka/read/byitem.php?book=15&item=625&items=5 Study Atthakatha :- https://84000.org/tipitaka/attha/attha.php?b=15&i=625 Contents of The Tipitaka Volume 15 https://84000.org/tipitaka/read/?index_15 https://84000.org/tipitaka/english/?index_15
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]