บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
Khandhasaṃyuttassa cullapaṇṇāsake antavaggo paṭhamo [274] Sāvatthī .pe. tatra .pe. avoca cattārome bhikkhave antā . katame cattāro . sakkāyanto sakkāyasamudayanto sakkāyanirodhanto sakkāyanirodhagāminīpaṭipadanto. [275] Katamo ca bhikkhave sakkāyanto . Pañcupādānakkhandhātissa vacanīyaṃ . katame pañca . seyyathīdaṃ . rūpūpādānakkhandho vedanūpādānakkhandho saññūpādānakkhandho saṅkhārūpādānakkhandho viññāṇūpādānakkhandho. Ayaṃ vuccati bhikkhave sakkāyanto. [276] Katamo ca bhikkhave sakkāyasamudayanto . yāyaṃ taṇhā ponobbhavikā nandirāgasahagatā tatratatrābhinandinī . seyyathīdaṃ . Kāmataṇhā bhavataṇhā vibhavataṇhā . ayaṃ vuccati bhikkhave sakkāyasamudayanto. [277] Katamo ca bhikkhave sakkāyanirodhanto . yo tassā yeva taṇhāya asesavirāganirodho cāgo paṭinissaggo mutti anālayo . Ayaṃ vuccati bhikkhave sakkāyanirodhanto. [278] Katamo ca bhikkhave sakkāyanirodhagāminīpaṭipadanto. Ayameva 1- ariyo aṭṭhaṅgiko maggo . seyyathīdaṃ . sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi . ayaṃ vuccati bhikkhave sakkāyanirodhagāminīpaṭipadanto . @Footnote: 1 Po. ayamevāti natthi. Ime kho bhikkhave cattāro antāti. [279] Sāvatthī . Dukkhañca vo bhikkhave desissāmi 1- dukkhasamudayañca dukkhanirodhañca dukkhanirodhagāminīpaṭipadañca taṃ suṇātha. [280] Katamañca bhikkhave dukkhaṃ . pañcupādānakkhandhātissa vacanīyaṃ . katame pañca . seyyathīdaṃ . rūpūpādānakkhandho .pe. Viññāṇūpādānakkhandho. Idaṃ vuccati bhikkhave dukkhaṃ. [281] Katamo ca bhikkhave dukkhasamudayo . yāyaṃ taṇhā ponobbhavikā nandirāgasahagatā tatratatrābhinandinī . seyyathīdaṃ . Kāmataṇhā bhavataṇhā vibhavataṇhā. Ayaṃ vuccati bhikkhave dukkhasamudayo. [282] Katamo ca bhikkhave dukkhanirodho . Yo tassāyeva taṇhāya asesavirāganirodho cāgo paṭinissaggo mutti anālayo . ayaṃ vuccati bhikkhave dukkhanirodho. [283] Katamā ca bhikkhave dukkhanirodhagāminīpaṭipadā . ayameva ariyo aṭṭhaṅgiko maggo . seyyathīdaṃ . sammādiṭṭhi .pe. Sammāsamādhi. Ayaṃ vuccati bhikkhave dukkhanirodhagāminīpaṭipadāti. [284] Sāvatthī. Sakkāyañca vo bhikkhave desissāmi sakkāyasamudayañca sakkāyanirodhañca sakkāyanirodhagāminīpaṭipadañca 2- taṃ suṇātha.The Pali Tipitaka in Roman Character Volume 17 page 192-193. https://84000.org/tipitaka/read/roman_item.php?book=17&item=274&items=11 Classified by [Item Number] :- http://84000.org/tipitaka/read/roman_item.php?book=17&item=274&items=11&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=17&item=274&items=11 Compare with The Royal Version of Thai Tipitaka :- https://84000.org/tipitaka/read/byitem.php?book=17&item=274&items=11 Study Atthakatha :- https://84000.org/tipitaka/attha/attha.php?b=17&i=274 Contents of The Tipitaka Volume 17 https://84000.org/tipitaka/read/?index_17 https://84000.org/tipitaka/english/?index_17
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]