[303] Sāvatthī . ekamantaṃ nisinno kho so bhikkhu bhagavantaṃ
etadavoca dhammakathiko dhammakathikoti bhante vuccati kittāvatā
nu kho bhante dhammakathiko hoti kittāvatā dhammānudhammapaṭipanno
hoti kittāvatā diṭṭhadhammanibbānappatto hotīti . rūpassa ce
bhikkhu nibbidāya virāgāya nirodhāya dhammaṃ deseti dhammakathiko
bhikkhūti alaṃ vacanāya . rūpassa ce bhikkhu nibbidāya virāgāya nirodhāya
@Footnote: 1 Ma. Yu. kittāvatā ... hotīti natthi . 2 Yu. diṭṭhadhamme nibbānapatto.
Paṭipanno hoti dhammānudhammapaṭipanno bhikkhūti alaṃ vacanāya .
Rūpassa ce bhikkhu nibbidā virāgā nirodhā anupādā vimutto hoti
diṭṭhadhammanibbānappatto bhikkhūti alaṃ vacanāya . vedanāya ce bhikkhu
.pe. saññāya ce bhikkhu . saṅkhārānaṃ ce bhikkhu . viññāṇassa
ce bhikkhu nibbidāya virāgāya nirodhāya dhammaṃ deseti dhammakathiko
bhikkhūti alaṃ vacanāya . viññāṇassa ce bhikkhu nibbidāya virāgāya
nirodhāya paṭipanno hoti dhammānudhammapaṭipanno bhikkhūti alaṃ
vacanāya . viññāṇassa ce bhikkhu nibbidā virāgā nirodhā
anupādā vimutto hoti diṭṭhadhammanibbānappatto bhikkhūti alaṃ
vacanāyāti.
[304] Sāvatthī . idha bhikkhave assutavā puthujjano ariyānaṃ
adassāvī .pe. sappurisadhamme 1- avinīto rūpaṃ attato
samanupassati rūpavantaṃ vā attānaṃ attani vā rūpaṃ rūpasmiṃ vā
attānaṃ . ayaṃ vuccati bhikkhave assutavā puthujjano rūpabandhanabandho
sāntarabāhirabandhanabandho 2- atīradassī apāradassī bandho jiyyati 3-
bandho miyyati bandho asmā lokā paraṃ lokaṃ gacchati. Vedanaṃ attato
samanupassati .pe. vedanāya vā attānaṃ . ayaṃ vuccati bhikkhave
assutavā puthujjano vedanābandhanabandho sāntarabāhirabandhanabandho
atīradassī apāradassī bandho jiyyati bandho miyyati bandho asmā
@Footnote: 1 Yu. sappurisadhammesu . 2 Po. abbhantarabāhirabandhana ....
@3 Yu. jāyatītipi pāṭho. Po. jīyati.
Lokā paraṃ lokaṃ gacchati . saññaṃ . saṅkhāre . viññāṇaṃ attato
samanupassati .pe. ayaṃ vuccati bhikkhave assutavā puthujjano viññāṇa-
bandhanabandho sāntarabāhirabandhanabandho atīradassī apāradassī
bandho jiyyati bandho miyyati bandho asmā lokā paraṃ lokaṃ gacchati.
[305] Sutavā ca kho bhikkhave ariyasāvako ariyānaṃ dassāvī
.pe. sappurisadhamme suvinīto na rūpaṃ attato samanupassati na
rūpavantaṃ vā attānaṃ na attani vā rūpaṃ na rūpasmiṃ vā attānaṃ.
Ayaṃ vuccati bhikkhave sutavā ariyasāvako narūpabandhanabandho
nasāntarabāhirabandhanabandho tīradassī pāradassī parimutto
so dukkhasmāti vadāmi .pe. na saññaṃ . na saṅkhāre . na
viññāṇaṃ attato samanupassati .pe. ayaṃ vuccati bhikkhave
sutavā ariyasāvako naviññāṇabandhanabandho nasāntarabāhira-
bandhanabandho tīradassī pāradassī parimutto so dukkhasmāti
vadāmīti.
[306] Sāvatthī . taṃ kiṃ maññatha bhikkhave rūpaṃ etaṃ
mama esohamasmi eso me attāti samanupassathāti . no
hetaṃ bhante . sādhu bhikkhave rūpaṃ bhikkhave netaṃ mama nesohamasmi
na meso attāti evametaṃ yathābhūtaṃ sammappaññāya
daṭṭhabbaṃ . vedanaṃ . saññaṃ . saṅkhāre . viññāṇaṃ etaṃ
mama esohamasmi eso me attāti samanupassathāti . no
hetaṃ bhante . sādhu bhikkhave viññāṇaṃ bhikkhave netaṃ mama
Nesohamasmi na meso attāti evametaṃ yathābhūtaṃ sammappaññāya
daṭṭhabbaṃ .pe. evaṃ passaṃ .pe. nāparaṃ itthattāyāti
pajānātīti.
[307] Sāvatthī . tatra kho . taṃ kiṃ maññatha bhikkhave rūpaṃ
netaṃ mama nesohamasmi na meso attāti samanupassathāti .
Evaṃ bhante . sādhu bhikkhave rūpaṃ bhikkhave netaṃ mama nesohamasmi
na meso attāti evametaṃ yathābhūtaṃ sammappaññāya
daṭṭhabbaṃ . vedanaṃ . saññaṃ . saṅkhāre . viññāṇaṃ netaṃ mama
nesohamasmi na meso attāti samanupassathāti . evaṃ bhante .
Sādhu bhikkhave viññāṇaṃ netaṃ mama nesohamasmi na meso
attāti evametaṃ yathābhūtaṃ sammappaññāya daṭṭhabbaṃ . evaṃ
passaṃ .pe. Nāparaṃ itthattāyāti pajānātīti.
[308] Sāvatthī . saññojaniye ca bhikkhave dhamme desissāmi
saññojanañca taṃ suṇātha . katame ca bhikkhave saññojaniyā
dhammā katamaṃ 1- saññojanaṃ . rūpaṃ bhikkhave saññojaniyo dhammo
yo tattha chandarāgo taṃ tattha saññojanaṃ vedanā .pe. saññā .
Saṅkhārā . viññāṇaṃ saññojaniyo dhammo yo tattha chandarāgo
taṃ tattha saññojanaṃ . ime vuccanti bhikkhave saññojaniyā dhammā
idaṃ saññojananti.
[309] Sāvatthī . upādāniye ca bhikkhave dhamme desissāmi
@Footnote: 1 Yu. katañca.
Upādānañca taṃ suṇātha . katame ca bhikkhave upādāniyā dhammā
katamaṃ upādānaṃ . rūpaṃ bhikkhave upādāniyo dhammo yo tattha
chandarāgo taṃ tattha upādānaṃ vedanā .pe. saññā .
Saṅkhārā . viññāṇaṃ upādāniyo dhammo yo tattha chandarāgo
taṃ tattha upādānaṃ . ime vuccanti bhikkhave upādāniyā dhammā
idaṃ upādānanti.
[310] Ekaṃ samayaṃ āyasmā ca sārīputto āyasmā ca
mahākoṭṭhito 1- bārāṇasiyaṃ viharanti isipatane migadāye . atha
kho āyasmā mahākoṭṭhito sāyaṇhasamayaṃ paṭisallānā vuṭṭhito
yenāyasmā sārīputto tenupasaṅkami .pe. etadavoca sīlavatāvuso
sārīputta bhikkhunā katame dhammā yoniso manasikātabbāti .
Sīlavatāvuso koṭṭhita bhikkhunā pañcupādānakkhandhā aniccato
dukkhato rogato gaṇḍato sallato aghato ābādhato parato
palokato suññato anattato yoniso manasikātabbā . katame
pañca . seyyathīdaṃ . rūpūpādānakkhandho vedanūpādānakkhandho
saññūpādānakkhandho saṅkhārūpādānakkhandho viññāṇūpādānakkhandho .
Sīlavatāvuso koṭṭhita bhikkhunā ime pañcupādānakkhandhā aniccato
dukkhato rogato gaṇḍato sallato aghato ābādhato parato
palokato suññato anattato yoniso manasikātabbā . ṭhānaṃ
@Footnote: 1 Ma. mahākoṭṭhiko.
Kho panetaṃ āvuso vijjati yaṃ sīlavā bhikkhu ime pañcupādānakkhandhe
aniccato .pe. anattato yoniso manasikaronto sotāpattiphalaṃ
sacchikareyyāti.
[311] Sotāpannena panāvuso sārīputta bhikkhunā katame
dhammā yoniso manasikātabbāti . sotāpannenapi kho āvuso
koṭṭhita bhikkhunā ime pañcupādānakkhandhā aniccato .pe.
Anattato yoniso manasikātabbā . ṭhānaṃ kho panetaṃ āvuso vijjati
yaṃ sotāpanno bhikkhu ime pañcupādānakkhandhe aniccato .pe.
Anattato yoniso manasikaronto sakadāgāmiphalaṃ sacchikareyyāti.
[312] Sakadāgāminā panāvuso sārīputta bhikkhunā katame 1- dhammā
yoniso manasikātabbāti . sakadāgāmināpi kho āvuso koṭṭhita
bhikkhunā imeva pañcupādānakkhandhā aniccato .pe. anattato
yoniso manasikātabbā . ṭhānaṃ kho panetaṃ āvuso vijjati yaṃ
sakadāgāmī bhikkhu ime pañcupādānakkhandhe aniccato .pe.
Anattato yoniso manasikaronto anāgāmiphalaṃ sacchikareyyāti.
[313] Anāgāminā panāvuso sārīputta bhikkhunā katame dhammā
yoniso manasikātabbāti . anāgāmināpi kho āvuso koṭṭhita
bhikkhunā imeva pañcupādānakkhandhā aniccato .pe. anattato
yoniso manasikātabbā . ṭhānaṃ kho panetaṃ āvuso vijjati yaṃ
anāgāmī bhikkhu ime pañcupādānakkhandhe aniccato .pe.
@Footnote: 1 Yu. katame ca dhammā.
Anattato yoniso manasikaronto arahattaṃ 1- sacchikareyyāti.
[314] Arahatā panāvuso sārīputta katame dhammā yoniso
manasikātabbāti . arahatāpi kho āvuso koṭṭhita imeva
pañcupādānakkhandhā aniccato dukkhato rogato gaṇḍato
sallato aghato ābādhato parato palokato suññato anattato
yoniso manasikātabbā . natthi kho āvuso arahato uttarikaraṇīyaṃ
katassa vā paṭiccayo api 2- cime dhammā bhāvitā bahulīkatā
diṭṭhadhammasukhavihārāya ceva saṃvattanti satisampajaññāya cāti.
The Pali Tipitaka in Roman Character Volume 17 page 199-205.
https://84000.org/tipitaka/read/roman_item.php?book=17&item=303&items=12
Classified by [Item Number] :-
http://84000.org/tipitaka/read/roman_item.php?book=17&item=303&items=12&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=17&item=303&items=12
Compare with The Royal Version of Thai Tipitaka :-
https://84000.org/tipitaka/read/byitem.php?book=17&item=303&items=12
Study Atthakatha :-
https://84000.org/tipitaka/attha/attha.php?b=17&i=303
Contents of The Tipitaka Volume 17
https://84000.org/tipitaka/read/?index_17
https://84000.org/tipitaka/english/?index_17
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
