[103] Ekamantaṃ nisinno kho āyasmā ānando .pe.
Bhagavantaṃ etadavoca sādhu me bhante bhagavā saṅkhittena dhammaṃ
desetu yamahaṃ bhagavato dhammaṃ sutvā eko vūpakaṭṭho appamatto
ātāpī pahitatto vihareyyanti . taṃ kiṃ maññasi ānanda cakkhuṃ
niccaṃ vā aniccaṃ vāti.
{103.1} Aniccaṃ bhante . yaṃ panāniccaṃ dukkhaṃ vā taṃ sukhaṃ vāti.
Dukkhaṃ bhante . yaṃ panāniccaṃ dukkhaṃ vipariṇāmadhammaṃ kallaṃ nu taṃ
samanupassituṃ etaṃ mama esohamasmi eso me attāti . no hetaṃ
bhante . rūpā niccā vā aniccā vāti . aniccā bhante .pe.
Cakkhuviññāṇaṃ cakkhusamphasso yampidaṃ cakkhusamphassapaccayā
uppajjati vedayitaṃ sukhaṃ vā dukkhaṃ vā adukkhamasukhaṃ vā tampi
niccaṃ vā aniccaṃ vāti . aniccaṃ bhante . yaṃ panāniccaṃ
@Footnote: 1 Ma. Yu. ca.
Dukkhaṃ vā taṃ sukhaṃ vāti . dukkhaṃ bhante . yaṃ panāniccaṃ dukkhaṃ
vipariṇāmadhammaṃ kallaṃ nu taṃ samanupassituṃ etaṃ mama esohamasmi
eso me attāti . no hetaṃ bhante .pe. jivhā niccā
vā aniccā vāti . aniccā bhante .pe. jivhāviññāṇaṃ
jivhāsamphasso .pe. yampidaṃ manosamphassapaccayā uppajjati
vedayitaṃ sukhaṃ vā dukkhaṃ vā adukkhamasukhaṃ vā tampi niccaṃ vā
aniccaṃ vāti . aniccaṃ bhante . yaṃ panāniccaṃ dukkhaṃ vā taṃ
sukhaṃ vāti.
{103.2} Dukkhaṃ bhante . yaṃ panāniccaṃ dukkhaṃ vipariṇāmadhammaṃ
kallaṃ nu taṃ samanupassituṃ etaṃ mama esohamasmi eso me attāti.
No hetaṃ bhante . evaṃ passaṃ ānanda sutavā ariyasāvako
cakkhusmiṃpi nibbindati rūpesupi nibbindati cakkhuviññāṇepi
nibbindati cakkhusamphassepi nibbindati .pe. yampidaṃ
manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ
vā tasmiṃpi nibbindati nibbindaṃ virajjati virāgā vimuccati .
Vimuttasmiṃ vimuttamiti ñāṇaṃ hoti . khīṇā jāti vusitaṃ brahmacariyaṃ
kataṃ karaṇīyaṃ nāparaṃ itthattāyāti pajānātīti. Tatiyaṃ.
[104] Ekaṃ samayaṃ bhagavā rājagahe viharati veḷuvane kalandakanivāpe.
Tena kho pana samayena āyasmā ca sārīputto āyasmā
ca mahācundo āyasmā ca channo gijjhakūṭe pabbate viharanti .
Tena kho pana samayena āyasmā channo ābādhiko hoti dukkhito
Bāḷhagilāno . atha kho āyasmā sārīputto sāyaṇhasamayaṃ
paṭisallānā vuṭṭhito yenāyasmā mahācundo tenupasaṅkami
upasaṅkamitvā āyasmantaṃ mahācundaṃ etadavoca āyāmāvuso cunda
yenāyasmā channo tenupasaṅkamissāma gilānapucchakāti .
Evamāvusoti kho āyasmā mahācundo āyasmato sārīputtassa
paccassosi . atha kho āyasmā ca sārīputto āyasmā ca mahācundo
yenāyasmā channo tenupasaṅkamiṃsu upasaṅkamitvā paññatte āsane
nisīdiṃsu . nisajja kho āyasmā sārīputto āyasmantaṃ channaṃ
etadavoca kacci te āvuso channa khamanīyaṃ kacci yāpanīyaṃ
kacci dukkhā vedanā paṭikkamanti no abhikkamanti paṭikkamo
sānaṃ paññāyati no abhikkamoti.
[105] Na me āvuso sārīputta khamanīyaṃ na yāpanīyaṃ bāḷhā
me dukkhā vedanā abhikkamanti no paṭikkamanti abhikkamo sānaṃ
paññāyati no paṭikkamoti 1- . seyyathāpi āvuso balavā puriso
tiṇhena sikharena muddhanaṃ 2- abhimattheyya evameva kho me 3- āvuso
adhimattā vātā muddhani 4- upahananti 5- . Na me āvuso khamanīyaṃ na
yāpanīyaṃ .pe. no paṭikkamoti 6- . seyyathāpi āvuso balavā
puriso daḷhena varattakkhandhena sīse sīsaveṭhaṃ dadeyya evameva
kho āvuso adhimattā vātā 7- sīse sīsavedanā . Na me āvuso
@Footnote: 1-6 Ma. itisaddo na dissati. evamuparipi . 2 Yu. muddhānaṃ. Ma. muddhani.
@3 Ma. Yu. mesaddo natthi . 4 Yu. muddhānaṃ . 5 Ma. ūhananti . 6 Ma. ayaṃ
@pāṭho natthi. Yu. me.
Khamanīyaṃ na yāpanīyaṃ .pe. no paṭikkamoti . seyyathāpi āvuso
dakkho goghātako vā goghātakantevāsī vā tiṇhena govikantanena
kucchiṃ parikanteyya evameva kho me āvuso 1- adhimattā vātā
kucchiṃ parikantanti . na me āvuso khamanīyaṃ na yāpanīyaṃ .pe.
No paṭikkamoti . seyyathāpi āvuso dve balavanto purisā
dubbalataraṃ purisaṃ nānā bāhāsu gahetvā aṅgārakāsuyā santāpeyyuṃ
saṃparitāpeyyuṃ evameva kho me 2- āvuso adhimatto kāyasmiṃ
ḍāho . na me āvuso khamanīyaṃ na yāpanīyaṃ bāḷhā me dukkhā
vedanā abhikkamanti no paṭikkamanti abhikkamo sānaṃ paññāyati
no paṭikkamoti . satthaṃ āvuso sārīputta āharissāmi nāvakaṅkhāmi
jīvitanti 3- [4]- āyasmā channo satthaṃ āharesi.
[106] Yāpetāyasmā channo yāpentaṃ mayaṃ āyasmantaṃ channaṃ
icchāma sace āyasmato channassa natthi sappāyāni bhojanāni
ahaṃ āyasmato channassa sappāyāni bhojanāni pariyesissāmi sace
āyasmato channassa natthi sappāyāni bhesajjāni ahaṃ āyasmato
channassa sappāyāni bhesajjāni pariyesissāmi sace āyasmato
channassa natthi paṭirūpā upaṭṭhākā ahaṃ āyasmantaṃ channaṃ
upaṭṭhahissāmi mā ca 5- āyasmā channo satthaṃ āharesi
yāpetāyasmā channo yāpentaṃ mayaṃ āyasmantaṃ channaṃ icchāmāti.
{106.1} Na me āvuso sārīputta natthi sappāyāni bhojanāni atthi me
@Footnote: 1 Ma. me āvusoti padadvayaṃ natthi . 2 Ma. mesaddo natthi . 3 Yu. jīvitunti.
@4 Ma. Yu. mā . 5 Ma. Yu. casaddo natthi.
Sappāyāni bhojanāni napi me natthi sappāyāni bhesajjāni atthi
me sappāyāni bhesajjāni napi me natthi paṭirūpā upaṭṭhākā
atthi me paṭirūpā upaṭṭhākā . api ca me āvuso satthā
pariciṇṇo dīgharattaṃ manāpeneva no amanāpena . etaṃ hi
āvuso sāvakassa paṭirūpaṃ yaṃ satthāraṃ paricareyya manāpeneva
no amanāpena taṃ 1- anupavajjaṃ channo bhikkhu satthaṃ āharissatīti
evametaṃ āvuso sārīputta dhārehīti.
[107] Puccheyyāma mayaṃ āyasmantaṃ channaṃ kiñcideva desaṃ
sace āyasmā channo okāsaṃ karoti pañhassa veyyākaraṇāyāti .
Pucchāvuso sārīputta sutvā vedayāmāti 2- . cakkhuṃ āvuso channa
cakkhuviññāṇaṃ cakkhuviññāṇaviññātabbe dhamme etaṃ mama
esohamasmi eso me attāti samanupassasi .pe. jivhaṃ āvuso
channa jivhāviññāṇaṃ jivhāviññāṇaviññātabbe dhamme etaṃ mama
esohamasmi eso me attāti samanupassasi .pe. manaṃ āvuso
channa manoviññāṇaṃ manoviññāṇaviññātabbe dhamme etaṃ mama
esohamasmi eso me attāti samanupassasīti.
{107.1} Cakkhuṃ āvuso sārīputta cakkhuviññāṇaṃ cakkhuviññāṇa-
viññātabbe dhamme netaṃ mama nesohamasmi na meso
attāti samanupassāmi .pe. jivhaṃ āvuso sārīputta
jivhāviññāṇaṃ jivhāviññāṇaviññātabbe dhamme
@Footnote: 1 Ma. ayaṃ pāṭho natthi . 2 Sī. desissāmīti . Ma. Yu. vedissāmāti.
Netaṃ mama nesohamasmi .pe. manaṃ āvuso sārīputta
manoviññāṇaṃ manoviññāṇaviññātabbe dhamme netaṃ mama
nesohamasmi na meso attāti samanupassāmīti.
[108] Cakkhusmiṃ āvuso channa cakkhuviññāṇe cakkhuviññāṇaviññātabbesu
dhammesu kiṃ disvā kiṃ abhiññāya cakkhuṃ cakkhuviññāṇaṃ
cakkhuviññāṇaviññātabbe dhamme netaṃ mama nesohamasmi na meso
attāti samanupassasi .pe. jivhāya āvuso channa jivhāviññāṇe
jivhāviññāṇaviññātabbesu dhammesu kiṃ disvā kiṃ abhiññāya
jivhaṃ jivhāviññāṇaṃ jivhāviññāṇaviññātabbe dhamme netaṃ mama
nesohamasmi na meso attāti samanupassasi .pe. manasmiṃ āvuso
channa manoviññāṇe manoviññāṇaviññātabbesu dhammesu kiṃ disvā
kiṃ abhiññāya manaṃ manoviññāṇaṃ manoviññāṇaviññātabbe dhamme
netaṃ mama nesohamasmi na meso attāti samanupassasīti.
[109] Cakkhusmiṃ āvuso sārīputta cakkhuviññāṇe cakkhuviññāṇa-
viññātabbesu dhammesu nirodhaṃ disvā nirodhaṃ abhiññāya cakkhuṃ
cakkhuviññāṇaṃ cakkhuviññāṇaviññātabbe dhamme netaṃ mama
nesohamasmi na meso attāti samanupassāmi .pe. jivhāya āvuso
sārīputta jivhāviññāṇe jivhāviññāṇaviññātabbesu dhammesu
nirodhaṃ disvā nirodhaṃ abhiññāya jivhaṃ jivhāviññāṇaṃ
jivhāviññāṇaviññātabbe dhamme netaṃ mama nesohamasmi na meso
Attāti samanupassāmi .pe. manasmiṃ āvuso sārīputta manoviññāṇe
manoviññāṇaviññātabbesu dhammesu nirodhaṃ disvā nirodhaṃ
abhiññāya manaṃ manoviññāṇaṃ manoviññāṇaviññātabbe dhamme
netaṃ mama nesohamasmi na meso attāti samanupassāmīti.
[110] Evaṃ vutte āyasmā mahācundo āyasmantaṃ channaṃ
etadavoca tasmā tihāvuso channa idampi tassa bhagavato sāsanaṃ
niccakappaṃ sādhukaṃ manasikātabbaṃ nissitassa calitaṃ anissitassa
calitaṃ natthi calite asati passaddhi hoti passaddhiyā sati
nandi na hoti nandiyā 1- asati āgatigati na hoti āgatigatiyā
asati catūpapāto na hoti cutūpapāte asati nevidha na huraṃ na
ubhayamantarena esevanto dukkhassāti . atha kho āyasmā ca
sārīputto āyasmā ca mahācundo āyasmantaṃ channaṃ iminā
ovādena ovaditvā uṭṭhāyāsanā pakkamiṃsu . atha kho āyasmā
channo acirapakkantesu tesu āyasmantesu satthaṃ āharesi.
The Pali Tipitaka in Roman Character Volume 18 page 68-74.
https://84000.org/tipitaka/read/roman_item.php?book=18&item=103&items=8
Classified by [Item Number] :-
http://84000.org/tipitaka/read/roman_item.php?book=18&item=103&items=8&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=18&item=103&items=8
Compare with The Royal Version of Thai Tipitaka :-
https://84000.org/tipitaka/read/byitem.php?book=18&item=103&items=8
Study Atthakatha :-
https://84000.org/tipitaka/attha/attha.php?b=18&i=103
Contents of The Tipitaka Volume 18
https://84000.org/tipitaka/read/?index_18
https://84000.org/tipitaka/english/?index_18
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
