[1399] Atha kho āyasmā ānando yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ . nisīdi ekamantaṃ
nisinnaṃ kho āyasmantaṃ ānandaṃ bhagavā etadavoca atthi nu kho
ānanda ekadhammo bhāvito bahulīkato cattāro dhamme paripūreti
cattāro dhammā bhāvitā bahulīkatā satta dhamme paripūrenti satta
dhammā bhāvitā bahulīkatā dve dhamme paripūrentīti . bhagavaṃmūlakā
no bhante dhammā .pe. atthānanda ekadhammo bhāvito bahulīkato
cattāro dhamme paripūreti cattāro dhammā bhāvitā bahulīkatā
satta dhamme paripūrenti satta dhammā bhāvitā bahulīkatā dve
dhamme paripūrenti.
[1400] Katamo cānanda ekadhammo bhāvito bahulīkato cattāro
dhamme paripūreti cattāro dhammā bhāvitā bahulīkatā satta dhamme
paripūrenti satta dhammā bhāvitā bahulīkatā dve dhamme paripūrenti.
Ānāpānassatisamādhi ānanda ekadhammo bhāvito bahulīkato cattāro
satipaṭṭhāne paripūreti cattāro satipaṭṭhānā bhāvitā bahulīkatā
satta bojjhaṅge paripūrenti satta bojjhaṅgā bhāvitā bahulīkatā
vijjāvimuttiṃ paripūrenti.
[1401] Kathaṃ bhāvito cānanda ānāpānassatisamādhi kathaṃ bahulīkato
cattāro satipaṭṭhāne paripūreti . idhānanda bhikkhu araññagato
vā .pe. evaṃ bhāvitā kho ānanda satta bojjhaṅgā evaṃ
bahulīkatā vijjāvimuttiṃ paripūrentīti.
[1402] Atha kho sambahulā bhikkhū yena bhagavā tenupasaṅkamiṃsu
upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ
nisinnā kho te bhikkhū bhagavantaṃ etadavocuṃ atthi nu kho bhante
ekadhammo bhāvito bahulīkato cattāro dhamme paripūreti cattāro
dhammā bhāvitā bahulīkatā satta dhamme paripūrenti satta dhammā
bhāvitā bahulīkatā dve dhamme paripūrentīti . atthi kho bhikkhave
ekadhammo bhāvito bahulīkato cattāro dhamme paripūreti cattāro
dhammā bhāvitā bahulīkatā satta dhamme paripūrenti satta dhammā
bhāvitā bahulīkatā dve dhamme paripūrentīti.
[1403] Katamo pana bhante ekadhammo bhāvito bahulīkato
cattāro dhamme paripūreti cattāro dhammā bhāvitā bahulīkatā
satta dhamme paripūrenti satta dhammā bhāvitā bahulīkatā dve
dhamme paripūrentīti . ānāpānassatisamādhi kho bhikkhave ekadhammo
bhāvito bahulīkato cattāro satipaṭṭhāne paripūreti cattāro
satipaṭṭhānā bhāvitā bahulīkatā satta bojjhaṅge paripūrenti satta
bojjhaṅgā bhāvitā bahulīkatā vijjāvimuttiṃ paripūrentīti . (yathā
Bhūtamayaṃ veyyākaraṇaṃ evaṃ vitthāretabbaṃ).
[1404] Atha kho sambahulā bhikkhū yena bhagavā tenupasaṅkamiṃsu
upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ
nisinne kho te bhikkhū bhagavā etadavoca atthi nu kho bhikkhave
ekadhammo bhāvito bahulīkato cattāro dhamme paripūreti cattāro
dhammā bhāvitā bahulīkatā satta dhamme paripūrenti satta dhammā
bhāvitā bahulīkatā dve dhamme paripūrentīti . bhagavaṃmūlakā no
bhante dhammā .pe. bhagavato sutvā bhikkhū dhāressantīti . atthi
bhikkhave ekadhammo bhāvito bahulīkato cattāro dhamme paripūreti
cattāro dhammā bhāvitā bahulīkatā satta dhamme paripūrenti satta
dhammā bhāvitā bahulīkatā dve dhamme paripūrenti.
[1405] Katamo ca bhikkhave ekadhammo bhāvito bahulīkato
cattāro dhamme paripūreti cattāro dhammā bhāvitā bahulīkatā
satta dhamme paripūrenti satta dhammā bhāvitā bahulīkatā dve
dhamme paripūrenti . ānāpānassatisamādhi [1]- bhikkhave ekadhammo
bhāvito bahulīkato cattāro satipaṭṭhāne paripūreti cattāro satipaṭṭhānā
bhāvitā bahulīkatā satta bojjhaṅge paripūrenti satta bojjhaṅgā
bhāvitā bahulīkatā vijjāvimuttiṃ paripūrentīti .pe. (yathā dutiyaṃ
veyyākaraṇaṃ tathā bhikkhūnaṃ kātabbaṃ) .pe.
[1406] Ānāpānassatisamādhi bhikkhave bhāvito bahulīkato
@Footnote: 1 Po. kho.
Saññojanānaṃ pahānāya saṃvattati.
[1407] Kathaṃ bhāvito ca bhikkhave ānāpānassatisamādhi kathaṃ
bahulīkato saññojanānaṃ pahānāya saṃvattati . idha bhikkhave bhikkhu
araññagato vā .pe. paṭinissaggānupassī assasissāmīti sikkhati
paṭinissaggānupassī passasissāmīti sikkhati . evaṃ bhāvito kho
bhikkhave ānāpānassatisamādhi evaṃ bahulīkato saññojanānaṃ
pahānāya saṃvattatīti .pe.
[1408] Ānāpānassatisamādhi bhikkhave bhāvito bahulīkato
anusayasamugghātāya saṃvattati . (vitthāretabbaṃ) . evaṃ bhāvito kho
bhikkhave ānāpānassatisamādhi evaṃ bahulīkato anusayasamugghātāya
saṃvattatīti.
[1409] Ānāpānassatisamādhi bhikkhave bhāvito bahulīkato
addhānapariññāya saṃvattatīti . (vitthāro) . evaṃ bhāvito kho
bhikkhave ānāpānassatisamādhi evaṃ bahulīkato addhānapariññāya
saṃvattatīti.
[1410] Ānāpānassatisamādhi bhikkhave bhāvito bahulīkato
āsavānaṃ khayāya saṃvattatīti . (vitthāro) . evaṃ bhāvito kho
bhikkhave ānāpānassatisamādhi evaṃ bahulīkato āsavānaṃ khayāya
saṃvattatīti.
Vaggo dutiyo.
Tassuddānaṃ
icchānaṅgalaṃ sakaṃbhiyaṃ 1- ānande apare duve
bhikkhuhi 2- dve vuttā saññojanaṃ anusayaṃ
addhānaṃ āsavakkhayāti.
Ānāpānasaṃyuttaṃ niṭṭhitaṃ.
--------
@Footnote: 1 Ma. Yu. ... kaṅkheyyaṃ, ānandā ... . 2 Ma. bhikkhū saṃyojanānusayā, addhānaṃ
@āsavakkhayanti. Yu. bhikkhave bhikkhu dve vuttā.
Sotāpattisaṃyuttaṃ
-----
veḷudvāravaggo paṭhamo
[1411] Sāvatthiyaṃ . tatra kho bhagavā etadavoca kiñcāpi
bhikkhave rājā cakkavatti catunnaṃ dīpānaṃ issariyādhipaccaṃ rajjaṃ
kāretvā kāyassa bhedā paraṃ maraṇā sugatiṃ saggaṃ lokaṃ upapajjati
devānaṃ tāvatiṃsānaṃ sahabyataṃ . so tattha nandanavane accharāsaṅghaparivuto
dibbehi [1]- pañcahi kāmaguṇehi samappito samaṅgibhūto paricāreti .
So catūhi dhammehi samannāgato . atha kho so aparimutto ca 2-
nirayā aparimutto ca 3- tiracchānayoniyā aparimutto ca 4-
pittivisayā aparimutto ca 5- apāyaduggativinipātā.
[1412] Kiñcāpi bhikkhave ariyasāvako piṇḍiyālopena yāpeti
nantakānipi 6- dhāreti . so catūhi dhammehi samannāgato. Atha kho
so parimutto ca 7- nirayā parimutto ca 8- tiracchānayoniyā parimutto ca 9-
pittivisayā parimutto ca 10- apāyaduggativinipātā. Katamehi catūhi.
{1412.1} Idha bhikkhave ariyasāvako buddhe aveccappasādena
samannāgato hoti itipi so bhagavā arahaṃ sammāsambuddho
vijjācaraṇasampanno sugato lokavidū anuttaro
purisadammasārathi satthā devamanussānaṃ buddho
@Footnote: 1 Ma. Yu. ca. 2 Po. Ma. va. 3-4-5-7-8-9-10 Po. Ma. casaddo
@natthi. 6 Ma. Yu. nantakāni ca.
Bhagavāti . dhamme aveccappasādena samannāgato hoti svākkhāto
bhagavatā dhammo sandiṭṭhiko akāliko ehipassiko opanayiko paccattaṃ
veditabbo viññūhīti . saṅghe aveccappasādena samannāgato hoti
supaṭipanno bhagavato sāvakasaṅgho ujupaṭipanno bhagavato sāvakasaṅgho
ñāyapaṭipanno bhagavato sāvakasaṅgho sāmīcipaṭipanno bhagavato
sāvakasaṅgho . yadidaṃ cattāri purisayugāni aṭṭha purisapuggalā esa
bhagavato sāvakasaṅgho āhuneyyo pāhuneyyo dakkhiṇeyyo
añjalikaraṇīyo anuttaraṃ puññakkhettaṃ lokassāti . ariyakantehi
sīlehi samannāgato hoti akkhaṇḍehi acchiddehi asabalehi
akammāsehi bhujissehi viññūpasatthehi aparāmaṭṭhehi
samādhisaṃvattanikehi. Imehi catūhi dhammehi samannāgato hoti.
[1413] Yo ca bhikkhave catunnaṃ dīpānaṃ paṭilābho yo ca 1-
catunnaṃ dhammānaṃ paṭilābho catunnaṃ dīpānaṃ paṭilābho catunnaṃ
dhammānaṃ paṭilābhassa kalaṃ nāgghati soḷasinti.
[1414] Catūhi bhikkhave dhammehi samannāgato ariyasāvako
sotāpanno hoti avinipātadhammo niyato sambodhiparāyano . katamehi
catūhi . idha bhikkhave ariyasāvako buddhe aveccappasādena samannāgato
hoti itipi so bhagavā arahaṃ sammāsambuddho vijjācaraṇasampanno
sugato lokavidū anuttaro purisadammasārathi satthā devamanussānaṃ
buddho bhagavāti . dhamme .pe. saṅghe .pe. ariyakantehi
@Footnote: 1 Ma. casaddo natthi.
Sīlehi samannāgato hoti akkhaṇḍehi .pe. samādhisaṃvattanikehi .
Imehi kho bhikkhave catūhi dhammehi samannāgato ariyasāvako sotāpanno
hoti avinipātadhammo niyato sambodhiparāyanoti . idamavoca
bhagavā idaṃ vatvāna sugato athāparaṃ etadavoca satthā
[1415] Yesaṃ saddhā ca sīlañca pasādo dhammadassanaṃ
te ve kālena paccenti brahmacariyogadhaṃ sukhanti.
[1416] Ekaṃ samayaṃ bhagavā rājagahe viharati veḷuvane
kalandakanivāpe . tena kho pana samayena dīghāvu upāsako ābādhiko
hoti dukkhito bāḷhagilāno . atha kho dīghāvu upāsako pitaraṃ
jotiyaṃ 1- gahapatiṃ āmantesi ehi tvaṃ gahapati yena bhagavā tenupasaṅkama
upasaṅkamitvā mama vacanena bhagavato pāde sirasā vanda dīghāvu
bhante upāsako ābādhiko dukkhito bāḷhagilāno so bhagavato
pāde sirasā vandatīti . evañca vadehi sādhu kira bhante bhagavā
yena dīghāvussa upāsakassa nivesanaṃ tenupasaṅkamatu anukampaṃ
upādāyāti . evaṃ tātāti kho jotiyo gahapati dīghāvussa
upāsakassa paṭissutvā yena bhagavā tenupasaṅkami upasaṅkamitvā
bhagavantaṃ abhivādetvā ekamantaṃ nisīdi.
[1417] Ekamantaṃ nisinno kho jotiyo gahapati bhagavantaṃ etadavoca
dīghāvu bhante upāsako ābādhiko [2]- dukkhito bāḷhagilāno
@Footnote: 1 Sī. Ma. Yu. jotikaṃ. 2 Ma. Yu. hoti.
So bhagavato pāde sirasā vandati . evañca vadeti sādhu kira bhante
bhagavā yena dīghāvussa upāsakassa nivesanaṃ tenupasaṅkamatu
anukampaṃ upādāyāti. Adhivāsesi bhagavā tuṇhībhāvena.
The Pali Tipitaka in Roman Character Volume 19 page 423-431.
https://84000.org/tipitaka/read/roman_item.php?book=19&item=1399&items=19
Classified by [Item Number] :-
http://84000.org/tipitaka/read/roman_item.php?book=19&item=1399&items=19&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=19&item=1399&items=19
Compare with The Royal Version of Thai Tipitaka :-
https://84000.org/tipitaka/read/byitem.php?book=19&item=1399&items=19
Study Atthakatha :-
https://84000.org/tipitaka/attha/attha.php?b=19&i=1399
Contents of The Tipitaka Volume 19
https://84000.org/tipitaka/read/?index_19
https://84000.org/tipitaka/english/?index_19
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
