paliTIPITAKA Volume 19 - Sutta Pitaka 11

[703] Gocare bhikkhave caratha sake pettike visaye. Gocare Bhikkhave carataṃ sake pettike visaye na lacchati māro otāraṃ na lacchati māro ārammaṇaṃ . ko ca bhikkhave bhikkhuno gocaro sako pettiko visayo . yadidaṃ cattāro satipaṭṭhānā . katame cattāro . idha bhikkhave bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ . vedanāsu citte dhammesu dhammānupassī viharati ātāpī sampajāno satimā vineyya loke abhijjhādomanassaṃ . ayaṃ bhikkhave bhikkhuno gocaro sako pettiko visayoti. [704] Seyyathāpi bhikkhave bālo abyatto akusalo sūdo rājānaṃ vā rājamahāmattaṃ ^1- vā nānaccayehi ^2- sūpehi paccupaṭṭhito assa ambilaggehipi tittakaggehipi kaṭukaggehipi madhuraggehipi khārikehipi akhārikehipi loṇikehipi aloṇikehipi . sakho so bhikkhave bālo abyatto akusalo sūdo sakassa bhattanimittaṃ ^3- na uggaṇhāti idaṃ vā me ajja bhattasūpeyyaṃ ruccati imassa vā abhiharati imassa vā bahuṃ gaṇhāti imassa vā vaṇṇaṃ bhāsati ambilaggaṃ vā me ajja bhattasūpeyyaṃ ruccati ambilaggassa vā abhiharati ambilaggassa vā bahuṃ gaṇhāti ambilaggassa vā vaṇṇaṃ bhāsati tittakaggaṃ vā me ajja . kaṭukaggaṃ vā me ajja . madhuraggaṃ vā me ajja . khārikaṃ vā me ajja . akhārikaṃ vā me ajja . @Footnote: ¹ Sī. Yu. rājamahāmattānaṃ. evamupari. ² nānāvidhehīti vā pāṭho. @Yu. nānāccayehi. evamupari. ³ Ma. Yu. bhattassa.... evamupari. Loṇikaṃ vā me ajja . aloṇikaṃ vā me ajja bhattasūpeyyaṃ ruccati aloṇikassa vā abhiharati aloṇikassa vā bahuṃ gaṇhāti aloṇikassa vā vaṇṇaṃ bhāsatīti . sakho so bhikkhave bālo abyatto akusalo sūdo na ceva lābhī hoti acchādanassa na lābhī vettanassa na lābhī abhihārānaṃ . taṃ kissa hetu . tathā hi so bhikkhave bālo abyatto akusalo sūdo sakassa bhattanimittaṃ na uggaṇhāti. [705] Evameva kho bhikkhave idhekacco bālo abyatto akusalo bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ . tassa kāye kāyānupassino viharato cittaṃ na samādhiyati upakkilesā na pahīyanti so taṃ nimittaṃ na uggaṇhāti . vedanāsu citte dhammesu dhammānupassī viharati ātāpī sampajāno satimā vineyya loke abhijjhādomanassaṃ . tassa dhammesu dhammānupassino viharato cittaṃ na samādhiyati upakkilesā na pahīyanti so taṃ nimittaṃ na uggaṇhāti . sakho so bhikkhave bālo abyatto akusalo bhikkhu na ceva lābhī hoti diṭṭheva dhamme sukhavihārānaṃ na lābhī satisampajaññassa . taṃ kissa hetu . Tathā hi so bhikkhave bālo abyatto akusalo bhikkhu sakassa cittassa nimittaṃ na uggaṇhāti. [706] Seyyathāpi bhikkhave paṇḍito byatto kusalo sūdo Rājānaṃ vā rājamahāmattaṃ vā nānaccayehi sūpehi paccupaṭṭhito assa ambilaggehipi tittakaggehipi kaṭukaggehipi madhuraggehipi khārikehipi akhārikehipi loṇikehipi aloṇikehipi . sakho so bhikkhave paṇḍito byatto kusalo sūdo sakassa bhattanimittaṃ uggaṇhāti idaṃ vā me ajja bhattasūpeyyaṃ ruccati imassa vā abhiharati imassa vā bahuṃ gaṇhāti imassa vā vaṇṇaṃ bhāsati ambilaggaṃ vā me ajja bhattasūpeyyaṃ ruccati ambilaggassa vā abhiharati ambilaggassa vā bahuṃ gaṇhāti ambilaggassa vā vaṇṇaṃ bhāsati tittakaggaṃ vā me ajja . kaṭukaggaṃ vā me ajja . madhuraggaṃ vā me ajja . khārikaṃ vā me ajja. Akhārikaṃ vā me ajja . loṇikaṃ vā me ajja . aloṇikaṃ vā me ajja bhattasūpeyyaṃ ruccati aloṇikassa vā abhiharati aloṇikassa vā bahuṃ gaṇhāti aloṇikassa vā vaṇṇaṃ bhāsatīti . sakho so bhikkhave paṇḍito byatto kusalo sūdo lābhī ceva hoti acchādanassa lābhī vettanassa lābhī abhihārānaṃ . taṃ kissa hetu . tathā hi so bhikkhave paṇḍito byatto kusalo sūdo sakassa bhattanimittaṃ uggaṇhāti.

The Pali Tipitaka in Roman Character Volume 19 page 199-202. https://84000.org/tipitaka/read/roman_item.php?book=19&item=703&items=4 Classified by [Item Number] :- http://84000.org/tipitaka/read/roman_item.php?book=19&item=703&items=4&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=19&item=703&items=4 Compare with The Royal Version of Thai Tipitaka :- https://84000.org/tipitaka/read/byitem.php?book=19&item=703&items=4 Study Atthakatha :- https://84000.org/tipitaka/attha/attha.php?b=19&i=703 Contents of The Tipitaka Volume 19 https://84000.org/tipitaka/read/?index_19 https://84000.org/tipitaka/english/?index_19