paliTIPITAKA Volume 20 - Sutta Pitaka 12

Tatiyapaṇṇāsako sambodhivaggo paṭhamo [543] 104 Pubbeva me bhikkhave sambodhā anabhisambuddhassa bodhisattasseva sato etadahosi ko nu kho loke assādo ko ādīnavo kiṃ nissaraṇanti . tassa mayhaṃ bhikkhave etadahosi yaṃ kho loke ^1- paṭicca uppajjati sukhaṃ somanassaṃ ayaṃ loke assādo yaṃ loko anicco dukkho vipariṇāmadhammo ayaṃ loke ādīnavo yo loke chandarāgapaṭivinayo chandarāgappahānaṃ idaṃ loke nissaraṇanti . Yāvakīvañcāhaṃ bhikkhave evaṃ lokassa assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsiṃ neva tāvāhaṃ bhikkhave sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddho ^2- paccaññāsiṃ . yato ca khohaṃ bhikkhave evaṃ lokassa assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññāsiṃ athāhaṃ bhikkhave sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddho paccaññāsiṃ . ñāṇañca pana me dassanaṃ udapādi akuppā me vimutti ayamantimā jāti natthidāni punabbhavoti. @Footnote: ¹ Po. Ma. lokaṃ . ² Ma. abhisambuddhoti. ito paraṃ īdisameva.

The Pali Tipitaka in Roman Character Volume 20 page 332. https://84000.org/tipitaka/read/roman_item.php?book=20&item=543&items=1 Classified by [Item Number] :- http://84000.org/tipitaka/read/roman_item.php?book=20&item=543&items=1&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=20&item=543&items=1 Compare with The Royal Version of Thai Tipitaka :- https://84000.org/tipitaka/read/byitem.php?book=20&item=543&items=1 Study Atthakatha :- https://84000.org/tipitaka/attha/attha.php?b=20&i=543 Contents of The Tipitaka Volume 20 https://84000.org/tipitaka/read/?index_20 https://84000.org/tipitaka/english/?index_20