[179] Athakho anāthapiṇḍiko gahapati pañcamattehi upāsakasatehi
parivuto yena bhagavā tenupasaṅkami upasaṅkamitvā bhagavantaṃ abhivādetvā
ekamantaṃ nisīdi . athakho bhagavā āyasmantaṃ sārīputtaṃ āmantesi
yaṅkañci sārīputta jāneyyātha gihiṃ odātavasanaṃ pañcasu sikkhāpadesu
saṃvutakammantaṃ catunnañca ābhicetasikānaṃ diṭṭhadhammasukhavihārānaṃ
nikāmalābhiṃ akicchalābhiṃ akasiralābhiṃ so ākaṅkhamāno attanāva attānaṃ
byākareyya khīṇanirayomhi khīṇatiracchānayoni khīṇapittivisayo
khīṇāpāyaduggativinipāto sotāpannohamasmi avinipātadhammo niyato
sambodhiparāyanoti.
{179.1} Katamesu pañcasu sikkhāpadesu saṃvutakammanto hoti idha
sārīputta ariyasāvako pāṇātipātā paṭivirato hoti adinnādānā
paṭivirato hoti kāmesu micchācārā paṭivirato hoti musāvādā
paṭivirato hoti surāmerayamajjapamādaṭṭhānā paṭivirato hoti . imesu
pañcasu sikkhāpadesu saṃvutakammanto hoti.
{179.2} Katamesaṃ catunnaṃ ābhicetasikānaṃ diṭṭhadhammasukhavihārānaṃ
nikāmalābhī hoti akicchalābhī akasiralābhī . idha sārīputta ariyasāvako
buddhe aveccappasādena samannāgato hoti itipi so bhagavā arahaṃ
sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṃ buddho bhagavāti ayamassa paṭhamo
ābhicetasiko diṭṭhadhammasukhavihāro adhigato hoti avisuddhassa
cittassa visuddhiyā apariyodātassa cittassa pariyodapanāya.
{179.3} Puna caparaṃ sārīputta ariyasāvako dhamme aveccappasādena samannāgato
Hoti svākkhāto bhagavatā dhammo sandiṭṭhiko akāliko ehipassiko
opanayiko paccattaṃ veditabbo viññūhīti ayamassa dutiyo ābhicetasiko
diṭṭhadhammasukhavihāro adhigato hoti avisuddhassa cittassa visuddhiyā
apariyodātassa cittassa pariyodapanāya.
{179.4} Puna caparaṃ sārīputta ariyasāvako saṅghe aveccappasādena
samannāgato hoti supaṭipanno bhagavato sāvakasaṅgho ujupaṭipanno bhagavato
sāvakasaṅgho ñāyapaṭipanno bhagavato sāvakasaṅgho sāmīcipaṭipanno bhagavato
sāvakasaṅgho yadidaṃ cattāri purisayugāni aṭṭha purisapuggalā esa bhagavato
sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ
puññakkhettaṃ lokassāti ayamassa tatiyo ābhicetasiko diṭṭhadhammasukhavihāro
adhigato hoti avisuddhassa cittassa visuddhiyā apariyodātassa cittassa
pariyodapanāya.
{179.5} Puna caparaṃ sārīputta ariyasāvako ariyakantehi sīlehi
samannāgato hoti akhaṇḍehi acchiddehi asabalehi akammāsehi bhujissehi
viññūpasatthehi samādhisaṃvattanikehi ayamassa catuttho ābhicetasiko
diṭṭhadhammasukhavihāro adhigato hoti avisuddhassa cittassa visuddhiyā
apariyodātassa cittassa pariyodapanāya . imesaṃ catunnaṃ ābhicetasikānaṃ
diṭṭhadhammasukhavihārānaṃ nikāmalābhī hoti akicchalābhī akasiralābhī . Yaṅkañci
sārīputta jāneyyātha gihiṃ odātavasanaṃ imesu pañcasu sikkhāpadesu
saṃvutakammantaṃ imesañca catunnaṃ ābhicetasikānaṃ diṭṭhadhammasukhavihārānaṃ
@Footnote: 1 Ma. Yu. etthantare aparāmaṭṭhehīti atthi.
Nikāmalābhiṃ akicchalābhiṃ akasiralābhiṃ so ākaṅkhamāno attanāva attānaṃ
byākareyya khīṇanirayomhi khīṇatiracchānayoni khīṇapittivisayo 1- khīṇāpāya-
duggativinipāto sotāpannohamasmi avinipātadhammo niyato sambodhiparāyanoti.
Nirayesu bhayaṃ disvā pāpāni parivajjaye
ariyadhammaṃ samādāya paṇḍito parivajjaye
na hiṃse pāṇabhūtāni vijjamāne parakkame
musā ca na bhaṇe jānaṃ adinnaṃ na parāmase
sehi 2- dārehi santuṭṭho paradārañca nārame 3-
merayaṃ vāruṇiṃ jantu na pive cittamohaniṃ
anussareyya sambuddhaṃ dhammaṃ cānuvitakkaye 4-
abyāpajjhaṃ hitaṃ cittaṃ devalokāya bhāvaye
upaṭṭhite deyyadhamme puññatthassa jigiṃsato 5-
santesu paṭhamaṃ dinnā vipulā hoti dakkhiṇā.
Santo have pavakkhāmi sārīputta suṇohi me
iti kaṇhāsu setāsu rohiṇīsu cārīsu vā
kammāsāsu sarūpāsu gosu pārevatāsu 6- vā
yāsukāsuci etāsu danto jāyati puṅgavo
dhoreyho balasampanno kalyāṇajavanikkamo
@Footnote: 1 Ma. khīṇapetti ... . 2 Po. sakehi . 3 Ma. Yu. ārame.
@4 Po. dhammaṃ anuvi .... Ma. dhammañcānu .... 5 Ma. jigīsato.
@6 Yu. pārāpatāsu.
Tameva bhāre yuñjanti nāssa vaṇṇaṃ parikkhare
evameva manussesu yasmiṃkasmiñci jātiye
khattiye brāhmaṇe vesse sudde caṇḍālapukkuse
yāsukāsuci 1- etāsu danto jāyati subbato
dhammaṭṭho sīlasampanno saccavādī hirīmano
pahīnajātimaraṇo brahmacariyassa kevalī
pannabhāro visaṃyutto katakicco anāsavo
pāragū sabbadhammānaṃ anupādāya nibbuto
tasmiñca viraje khette vipulā hoti dakkhiṇā.
Bālā ca avijānantā dummedhā assutāvino
bahiddhā denti 2- dānāni na hi sante upāsare.
Ye ca sante upāsanti sappaññe dhīrasammate
saddhā ca nesaṃ sugate mūlajātā patiṭṭhitā
devalokañca te yanti kule vā idha jāyare
anupubbena nibbānaṃ adhigacchanti paṇḍitāti.
[180] Ekaṃ samayaṃ bhagavā kosalesu cārikaṃ carati mahatā bhikkhusaṅghena
saddhiṃ addasā kho bhagavā addhānamaggapaṭipanno aññatarasmiṃ
padese mahantaṃ sālavanaṃ disvāna maggā okkamma yena taṃ sālavanaṃ
tenupasaṅkami upasaṅkamitvā taṃ sālavanaṃ ajjhogāhetvā aññatarasmiṃ
padese sitaṃ pātvākāsi . athakho āyasamto ānandassa etadahosi
@Footnote: 1 Po. Yu. kāsu ca . 2 Po. Ma. dadanti.
Ko nu kho hetu ko paccayo bhagavato sitassa pātukammāya na
akāraṇena tathāgatā sitaṃ pātukarontīti . athakho āyasmā ānando
bhagavantaṃ etadavoca ko nu kho bhante hetu ko paccayo bhagavato
sitassa pātukammāya na akāraṇena tathāgatā sitaṃ pātukarontīti.
{180.1} Bhūtapubbaṃ ānanda imasmiṃ padese nagaraṃ ahosi iddhañceva
phītañca bahujanaṃ ākiṇṇamanussaṃ taṃ kho panānanda nagaraṃ kassapo bhagavā
arahaṃ sammāsambuddho upanissāya viharati 1- kassapassa kho panānanda
bhagavato arahato sammāsambuddhassa bhavesī nāma upāsako ahosi
sīlesu aparipūrakārī bhavesinā kho ānanda upāsakena pañcamattāni
upāsakasatāni paṭidesitāni samādapitāni ahesuṃ sīlesu aparipūrakārino
athakho ānanda bhavesissa upāsakassa etadahosi ahaṃ kho imesaṃ
pañcannaṃ upāsakasatānaṃ bahūpakāro pubbaṅgamo samādapetā
ahañcamhi sīlesu aparipūrakārī imānipi pañca upāsakasatāni sīlesu
aparipūrakārino iccetaṃ samasamaṃ natthi kiñci atirekaṃ handāhaṃ
atirekāyāti.
{180.2} Athakho ānanda bhavesī 2- upāsako yena tāni pañca
upāsakasatāni tenupasaṅkami upasaṅkamitvā tāni pañca upāsakasatāni
etadavoca ajjatagge maṃ āyasmanto sīlesu paripūrakāriṃ dhārethāti.
Athakho ānanda tesaṃ pañcannaṃ upāsakasatānaṃ etadahosi
ayyo kho bhavesī amhākaṃ bahūpakāro pubbaṅgamo samādapetā
@Footnote: 1 Ma. Yu. vihāsi . 2 Ma. Yu. gavesī.
Ayyo hi nāma bhavesī 1- sīlesu paripūrakārī bhavissati kimaṅgaṃ
pana mayanti . athakho ānanda tāni pañca upāsakasatāni yena
bhavesī upāsako tenupasaṅkamiṃsu upasaṅkamitvā bhavesiṃ upāsakaṃ
etadavocuṃ ajjatagge ayyo bhavesī imānipi pañca upāsakasatāni
sīlesu paripūrakārino dhāretūti . athakho ānanda bhavesissa
upāsakassa etadahosi ahaṃ kho imesaṃ pañcannaṃ upāsakasatānaṃ
bahūpakāro pubbaṅgamo samādapetā ahañcamhi sīlesu paripūrakārī
imānipi 2- pañca upāsakasatāni sīlesu paripūrakārino iccetaṃ samasamaṃ
natthi kiñci atirekaṃ handāhaṃ atirekāyāti.
{180.3} Athakho ānanda bhavesī upāsako yena tāni pañca
upāsakasatāni tenupasaṅkami upasaṅkamitvā tāni pañca upāsakasatāni
etadavoca ajjatagge maṃ āyasmanto brahmacāriṃ dhāretha ārācāriṃ virataṃ
methunā gāmadhammāti . athakho ānanda tesaṃ pañcannaṃ upāsakasatānaṃ
etadahosi ayyo kho bhavesī amhākaṃ bahūpakāro pubbaṅgamo samādapetā
ayyo hi nāma bhavesī brahmacārī bhavissati ārācārī virato methunā
gāmadhammā kimaṅgaṃ pana mayanti . athakho ānanda tāni pañca
upāsakasatāni yena bhavesī upāsako tenupasaṅkamiṃsu upasaṅkamitvā
bhavesiṃ upāsakaṃ etadavocuṃ ajjatagge ayyo bhavesī imānipi
@Footnote: 1 Ma. Yu. gavesī. sabbattha īdisameva . 2 Yu. imāni ca.
Pañca upāsakasatāni brahmacārino dhāretu ārācārino virate 1-
methunā gāmadhammāti . athakho ānanda bhavesissa upāsakassa etadahosi
ahaṃ kho imesaṃ pañcannaṃ upāsakasatānaṃ bahūpakāro pubbaṅgamo
samādapetā ahañcamhi sīlesu paripūrakārī imānipi pañca upāsakasatāni
sīlesu paripūrakārino ahañcamhi brahmacārī ārācārī virato
methunā gāmadhammā imānipi pañca upāsakasatāni brahmacārino
ārācārino viratā methunā gāmadhammā iccetaṃ samasamaṃ natthi
kiñci atirekaṃ handāhaṃ atirekāyāti.
{180.4} Athakho ānanda bhavesī upāsako yena tāni pañca
upāsakasatāni tenupasaṅkami upasaṅkamitvā tāni pañca upāsakasatāni
etadavoca ajjatagge maṃ āyasmanto ekabhattikaṃ dhāretha
rattūparataṃ virataṃ vikālabhojanāti . athakho ānanda tesaṃ pañcannaṃ
upāsakasatānaṃ etadahosi ayyo kho bhavesī amhākaṃ 2-
bahūpakāro pubbaṅgamo samādapetā ayyo hi nāma bhavesī
ekabhattiko bhavissati rattūparato virato vikālabhojanā kimaṅgaṃ
pana mayanti . athakho ānanda tāni pañca upāsakasatāni yena
bhavesī upāsako tenupasaṅkamiṃsu upasaṅkamitvā bhavesiṃ upāsakaṃ
etadavocuṃ ajjatagge ayyo bhavesī imānipi pañca upāsakasatāni
ekabhattike dhāretu rattūparate virate vikālabhojanāti . athakho
ānanda bhavesissa upāsakassa etadahosi ahaṃ kho imesaṃ
@Footnote: 1 Po. ma viratā . 2 Ma. ayaṃ saddo natthi.
Pañcannaṃ upāsakasatānaṃ bahūpakāro pubbaṅgamo samādapetā
ahañcamhi sīlesu paripūrakārī imānipi pañca upāsakasatāni sīlesu
paripūrakārino ahañcamhi brahmacārī ārācārī virato methunā
gāmadhammā imānipi pañca upāsakasatāni brahmacārino ārācārino
viratā methunā gāmadhammā ahañcamhi ekabhattiko rattūparato
virato vikālabhojanā imānipi pañca upāsakasatāni ekabhattikā
rattūparatā viratā vikālabhojanā iccetaṃ samasamaṃ natthi kiñci
atirekaṃ handāhaṃ atirekāyāti.
{180.5} Athakho ānanda bhavesī upāsako yena kassapo bhagavā
arahaṃ sammāsambuddho tenupasaṅkami upasaṅkamitvā kassapaṃ bhagavantaṃ
arahantaṃ sammāsambuddhaṃ etadavoca labheyyāhaṃ bhante bhagavato santike
pabbajjaṃ labheyyaṃ upasampadanti . alattha kho ānanda bhavesī upāsako
kassapassa bhagavato arahato sammāsambuddhassa santike pabbajjaṃ alattha
upasampadaṃ acirūpasampanno kho panānanda bhavesī bhikkhu eko vūpakaṭṭho
appamatto ātāpī pahitatto viharanto nacirasseva yassatthāya
kulaputtā sammadeva agārasmā anagāriyaṃ pabbajanti tadanuttaraṃ
brahmacariyapariyosānaṃ diṭṭheva dhamme sayaṃ abhiññā sacchikatvā
upasampajja vihāsi khīṇā jāti vusitaṃ brahmacariyaṃ kataṃ karaṇīyaṃ nāparaṃ
itthattāyāti abbhaññāsi aññataro ca panānanda bhavesī bhikkhu
arahataṃ ahosi.
{180.6} Athakho ānanda tesaṃ pañcannaṃ upāsakasatānaṃ etadahosi
ayyo kho bhavesī amhākaṃ bahūpakāro pubbaṅgamo samādapetā ayyo hi
nāma bhavesī kesamassuṃ ohāretvā kāsāyāni vatthāni acchādetvā
agārasmā anagāriyaṃ pabbajissati kimaṅgaṃ pana mayanti . athakho
ānanda tāni pañca upāsakasatāni yena kassapo bhagavā arahaṃ
sammāsambuddho tenupasaṅkamiṃsu upasaṅkamitvā kassapaṃ bhagavantaṃ
arahantaṃ sammāsambuddhaṃ etadavocuṃ labheyyāma mayaṃ bhante bhagavato
santike pabbajjaṃ labheyyāma upasampadanti alabhiṃsu kho ānanda
tāni pañca upāsakasatāni kassapassa bhagavato arahato
sammāsambuddhassa santike pabbajjaṃ alabhiṃsu upasampadaṃ
{180.7} athakho ānanda bhavesissa bhikkhuno etadahosi ahaṃ kho
imassa anuttarassa vimuttisukhassa nikāmalābhī [1]- akicchalābhī
akasiralābhī ahovatimānipi pañca bhikkhusatāni imassa anuttarassa
vimuttisukhassa nikāmalābhino assu akicchalābhino akasiralābhinoti
athakho ānanda tāni pañca bhikkhusatāni ekekā 2- vūpakaṭṭhā
appamattā ātāpino pahitattā viharantā nacirasseva
yassatthāya kulaputtā sammadeva agārasmā anagāriyaṃ pabbajanti
tadanuttaraṃ brahmacariyapariyosānaṃ diṭṭheva dhamme sayaṃ
abhiññā sacchikatvā upasampajja vihariṃsu khīṇā jāti vusitaṃ
brahmacariyaṃ kataṃ karaṇīyaṃ nāparaṃ itthattāyāti abbhaññiṃsu iti
@Footnote: 1 Ma. hoti . 2 Ma. yu ayaṃ pāṭho natthi.
Kho ānanda tāni pañca bhikkhusatāni bhavesipamukhāni uttaruttariṃ 1-
paṇītapaṇītaṃ vāyamamānā anuttaraṃ vimuttiṃ sacchākaṃsu . tasmā tiha
ānanda evaṃ sikkhitabbaṃ uttaruttariṃ 1- paṇītapaṇītaṃ vāyamamānā
anuttaraṃ vimuttiṃ sacchikarissāmāti evaṃ hi vo ānanda sikkhitabbanti.
Upāsakavaggo tatiyo.
Tassuddānaṃ
sārajjaṃ visārado nirayaṃ evaṃ caṇḍālapañcamaṃ
pīti vaṇijjā rājāno gihī ceva bhavesināti.
--------------
Araññavaggo catuttho
[181] Pañcime bhikkhave āraññakā 3- katame pañca mandattā
momūhattā āraññako hoti pāpiccho icchāpakato āraññako
hoti ummādā cittakkhepā āraññako hoti vaṇṇitaṃ buddhehi
buddhasāvakehīti āraññako hoti appicchataññeva nissāya
santuṭṭhiññeva nissāya sallekhaññeva nissāya pavivekaññeva nissāya
idamatthitaññeva nissāya āraññako hoti ime kho bhikkhave pañca
āraññakā . imesaṃ kho bhikkhave pañcannaṃ āraññakānaṃ yvāyaṃ āraññako
appicchataññeva nissāya santuṭṭhiññeva nissāya sallekhaññeva nissāya
pavivekaññeva nissāya idamatthitaññeva nissāya āraññako hoti
@Footnote: 1 Po. Ma. uttaruttari . 2 Ma. āraññikā. sabbattha īdisameva.
Ayaṃ imesaṃ pañcannaṃ āraññakānaṃ aggo ca seṭṭho ca mokkho ca
uttamo ca pavaro ca seyyathāpi bhikkhave gavā khīraṃ khīramhā dadhi
dadhimhā navanītaṃ navanītamhā sappi sappimhā sappimaṇḍo
sappimaṇḍo 1- tattha aggamakkhāyati evameva kho bhikkhave imesaṃ
pañcannaṃ āraññakānaṃ yvāyaṃ āraññako appicchataññeva
nissāya santuṭṭhiññeva nissāya sallekhaññeva nissāya
pavivekaññeva nissāya idamatthitaññeva nissāya āraññako
hoti ayaṃ imesaṃ pañcannaṃ āraññakānaṃ aggo ca seṭṭho ca
mokkho ca uttamo ca pavaro cāti.
[182] Pañcime bhikkhave paṃsukūlikā .pe.
[183] Pañcime bhikkhave rukkhamūlikā .pe.
[184] Pañcime bhikkhave sosānikā .pe.
[185] Pañcime bhikkhave abbhokāsikā .pe.
[186] Pañcime bhikkhave nesajjikā .pe.
The Pali Tipitaka in Roman Character Volume 22 page 236-246.
https://84000.org/tipitaka/read/roman_item.php?book=22&item=179&items=8
Classified by [Item Number] :-
http://84000.org/tipitaka/read/roman_item.php?book=22&item=179&items=8&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=22&item=179&items=8
Compare with The Royal Version of Thai Tipitaka :-
https://84000.org/tipitaka/read/byitem.php?book=22&item=179&items=8
Study Atthakatha :-
https://84000.org/tipitaka/attha/attha.php?b=22&i=179
Contents of The Tipitaka Volume 22
https://84000.org/tipitaka/read/?index_22
https://84000.org/tipitaka/english/?index_22
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
