TIPITAKA Volume 26 : PALI ROMAN
Sutta Pitaka Vol 18 : Sutta. Khu. vimāna-petavatthu thera-therīgāthā

     [32] |32.300| 4 Latā ca sajjā pavarā ca devatā
                 acchimutīrājavarassa sirīmato
                 sutā ca rañño vessavaṇṇassa dhītā
                 rājī matī dhammaguṇehi sobhitā 1-
      |32.301| pañcettha nāriyo agamaṃsu nhāyituṃ
                 sītodakaṃ uppaliniṃ sivaṃ nadiṃ
@Footnote: 1 Po. Ma. sobhatha.
---------------------------------------------------------------------------------------------
page46.
                 Tā tattha nhāyitvā ramitvā devatā
                 naccitvā gāyitvā sutālataṃ bravi
      |32.302| pucchāmi taṃ uppalamāladhārini
                 āveḷini kāñcanasannibhattace
                 pītarattāmbakkhi nabheva sobhaṇe
                 dīghāyukī kena kato yaso tava
      |32.303| kenāsi bhadde patino piyatarā
                 visiṭṭhakalyāṇitarassa rūpato
                 padakkhiṇā naccagītavādite
                 ācikkha no tvaṃ naranāri pucchitāti.
      |32.304| Ahaṃ manussesu manussabhūtā
                 uḷārabhoge kule suṇisā ahosiṃ
                 akkodhanā bhattu vasānuvattinī
                 appamattā uposathe
      |32.305| manussabhūtā daharā apāvikā
                 pasannacittā patimābhirādhayiṃ
                 sadevaraṃ sassuraṃ sadāsakaṃ
                 abhirādhayiṃ tamhi kato yaso mama
      |32.306| sāhaṃ tena kusalena kammunā
                 catubbhi ṭhānesu visesamajjhagā
---------------------------------------------------------------------------------------------
page47.
                 Āyuñca vaṇṇañca sukhaṃ balañca
                 khiddaṃ ratiṃ paccanubhomanappakaṃ
      |32.307| sutaṃ nu taṃ bhāsati yaṃ ayaṃ latā
                 yaṃ no āpucchimha 1- akittayino
                 patino kiramhākaṃ visiṭṭhā nārinaṃ
                 gatī ca nesaṃ pavarā ca devatā
      |32.308| patīsu dhammaṃ paricarāma sabbā
                 patibbatā yathābhavanti itthiyo
                 patīsu dhammaṃ paricarāma sabbā
                 lacchāmase bhāsati yaṃ ayaṃ latā
      |32.309| sīho yathā pabbatasānugocaro
                 mahindharaṃ pabbatamāvasitvā
                 pasayha gantvā itare catuppade
                 khudde mige khādati maṃsabhojano
      |32.310| tatheva saddhā idha ariyasāvikā
                 bhattāraṃ nissāya patiṃ anubbatā
                 kodhaṃ vadhitvā anubhuyya maccheraṃ
                 saggamhi sā modati dhammacārinīti.
                     Latāvimānaṃ catutthaṃ.


             The Pali Tipitaka in Roman Character Volume 26 page 45-47.
https://84000.org/tipitaka/read/roman_item.php?book=26&item=32&items=1&pagebreak=1
             Classified by [Item Number] :-
http://84000.org/tipitaka/read/roman_item.php?book=26&item=32&items=1&pagebreak=1&mode=bracket
             Compare with The Pali Tipitaka in Thai Character :-
https://84000.org/tipitaka/read/pali_item.php?book=26&item=32&items=1&pagebreak=1
             Compare with The Royal Version of Thai Tipitaka :-
https://84000.org/tipitaka/read/byitem.php?book=26&item=32&items=1&pagebreak=1
             Study Atthakatha :-
https://84000.org/tipitaka/attha/attha.php?b=26&i=32
             Contents of The Tipitaka Volume 26
https://84000.org/tipitaka/read/?index_26
https://84000.org/tipitaka/english/?index_26