[469] |469.291| 3 Laṭṭhihattho pure āsiṃ so dāni migaluddako
āsāya palipā ghorā nāsakkhiṃ pārametase 2-.
|469.292| Sumattaṃ maṃ maññamānā cāpā puttamatosayi
cāpāya bandhanaṃ chetvā pabbajissaṃ pure 3- ahaṃ.
|469.293| Mā me kujjha mahāvīra mā me kujjha mahāmuni
na hi kodhaparetassa suddhi atthi kuto tapo.
|469.294| Pakkamissañca nālāto kodha nālāya vacchati
bandhantī itthirūpena samaṇe dhammajīvino.
|469.295| Ehi kāḷa nivattassu bhuñja kāme yathā pure
ahaṃ ca te vasīkatā ye ca me santi ñātakā.
|469.296| Etto ceva catubbhāgaṃ yathā bhāsasi taṃ cāpe 4-
tayi rattassa posassa uḷāraṃ vata taṃ siyā.
|469.297| Kāḷaṅginiṃva takkāriṃ pupphitaṃ girimuddhani
phullaṃ dālimalaṭṭhiṃva antodīpeva pāṭaliṃ
|469.298| haricandanalittaṅgiṃ kāsikuttamadhāriniṃ
@Footnote: 1 Ma. upemi saraṇaṃ buddhaṃ . 2 Ma. pārametave . 3 Ma. Yu. puno mahaṃ . 4 Ma. etto
@cāpe catubbhāgaṃ yathā bhāsasi tvaṃ ca me.
Taṃ maṃ rūpavatiṃ santiṃ kassa ohāya gacchasi.
|469.299| Sākuṇikova sakuṇaṃ 1- yathā bandhitumicchati
āharimena rūpena na maṃ tvaṃ bādhayissasi.
|469.300| Imañca me puttaphalaṃ kāḷa uppāditaṃ tayā
taṃ maṃ puttavatiṃ santiṃ kassa ohāya gacchasi.
|469.301| Jahanti putte sappaññā tato ñātī tato dhanaṃ
pabbajanti mahāvīrā nāgo chetvāva bandhanaṃ.
|469.302| Idāni te imaṃ puttaṃ daṇḍena churikāya vā
bhūmiyaṃ va nisumbheyyaṃ 2- puttasokā na gacchasi.
|469.303| Sace puttaṃpi sigālānaṃ kukkurānaṃ padāhisi
na maṃ puttakate jammi punarāvattayissasi.
|469.304| Handa kho dāni bhadante kuhiṃ kāḷa gamissasi
katamaṃ gāmaṃ nigamaṃ nagaraṃ rājadhāniyo.
|469.305| Ahumha pubbe gaṇino asamaṇā samaṇamānino
gāmena gāmaṃ vicarimha nagare rājadhāniyo.
|469.306| Eso hi bhagavā buddho nadiṃ nerañjaraṃ pati
sabbadukkhappahānāya dhammaṃ desesi pāṇinaṃ
tassāhaṃ santike 3- gacchaṃ so me satthā bhavissati.
|469.307| Vandanaṃ dāni vajjāsi 4- lokanāthaṃ anuttaraṃ
@Footnote: 1 Ma. Yu. sākuntikova sakuṇiṃ. 2 Ma. bhūmiyaṃ vā nisumbhissaṃ . 3 Ma. santikaṃ.
@4 Yu. vandanaṃ dāni me vajjāsi.
Padakkhiṇañca katvāna ādiseyyāsi dakkhiṇaṃ.
|469.308| Etaṃ kho labbhamamhehi yathā bhāsasi taṃ cāpe 1-
vandanaṃ dāni te vajjaṃ lokanāthaṃ anuttaraṃ
padakkhiṇañca katvāna ādisissāmi dakkhiṇaṃ.
|469.309| Tato ca kāḷo pakkāmi nadiṃ nerañjaraṃ pati
so addasāsi sambuddhaṃ desentaṃ amataṃpadaṃ
|469.310| dukkhaṃ dukkhasamuppādaṃ dukkhassa ca atikkamaṃ
ariyaṭṭhaṅgikaṃ maggaṃ dukkhūpasamagāminaṃ.
|469.311| Tassa pādāni vanditvā katvāna naṃ padakkhiṇaṃ
cāpāya ādisitvāna pabbaji anagāriyaṃ.
Tisso vijjā anuppattā kataṃ buddhassa sāsanaṃ.
Cāpā.
The Pali Tipitaka in Roman Character Volume 26 page 481-483.
https://84000.org/tipitaka/read/roman_item.php?book=26&item=469&items=1&mode=bracket
Classified by content :-
https://84000.org/tipitaka/read/roman_item.php?book=26&item=469&items=1
Compare with The Pali Tipitaka in Thai Character :-
https://84000.org/tipitaka/read/pali_item.php?book=26&item=469&items=1&mode=bracket
Compare with The Royal Version of Thai Tipitaka :-
https://84000.org/tipitaka/read/byitem.php?book=26&item=469&items=1&mode=bracket
Study Atthakatha :-
https://84000.org/tipitaka/attha/attha.php?b=26&i=469
Contents of The Tipitaka Volume 26
https://84000.org/tipitaka/read/?index_26
https://84000.org/tipitaka/english/?index_26
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
