paliTIPITAKA Volume 27 - Sutta Pitaka 19

⁹ Mahādhammapālajātakaṃ [1410] Kinte vataṃ kiṃ pana brahmacariyaṃ kissa suciṇṇassa ayaṃ vipāko akkhāhi me brāhmaṇa etamatthaṃ kasmā nu tumhaṃ daharā na miyyare. [1411] Dhammaṃ carāma na musā bhaṇāma pāpāni kammāni vivajjayāma ^1- anariyaṃ parivajjema ^2- sabbaṃ tasmā hi amhaṃ daharā na miyyare. [1412] Suṇoma dhammaṃ asataṃ satañca na cāpi dhammaṃ asataṃ rocayāma hitvā asante na jahāma sante tasmā hi amhaṃ daharā na miyyare. [1413] Pubbeva dānā sumanā bhavāma dadaṃpi ve attamanā bhavāma datvāpi ve nānutapāma pacchā tasmā hi amhaṃ daharā na miyyare. [1414] Samaṇe mayaṃ brāhmaṇe addhike ca vaṇibbake yācanake dalidde annena pānena abhitappayāma @Footnote: ¹ Ma. parivajjayāma . ² Ma. parivajjemu. Tasmā hi amhaṃ daharā na miyyare. [1415] Mayañca bhariyaṃ nātikkamāma bhariyāpi amhe ^1- nātikkamanti aññatra tāhi brahmacariyaṃ carāma tasmā hi amhaṃ daharā na miyyare. [1416] Pāṇātipātā viramāma sabbe loke adinnaṃ parivajjayāma amajjapā nopi musā bhaṇāma tasmā hi amhaṃ daharā na miyyare. [1417] Etāsu ve jāyare suttamāsu medhāvino honti bahūtapaññā bahussutā vedagunā ^2- ca honti tasmā hi amhaṃ daharā na miyyare. [1418] Mātāpitaro ^[3]- bhaginībhātaro ca puttā ca dārā ca mayañca sabbe dhammaṃ carāma paralokahetu tasmā hi amhaṃ daharā na miyyare. [1419] Dāsā ca dāsī ^4- anujīvino ca paricārakā kammakarā ca sabbe dhammaṃ caranti paralokahetu @Footnote: ¹ Ma. amhe ca bhariyā . ² Ma. vedaguno . ³ Ma. ca. @⁴ Ma. dāsyo. Sī. Yu. dāsso. Tasmā hi amhaṃ daharā na miyyare. [1420] Dhammo have rakkhati dhammacāriṃ dhammo suciṇṇo sukhamāvahāti esānisaṃso dhamme suciṇṇe na duggatiṃ gacchati dhammacārī. [1421] Dhammo have rakkhati dhammacāriṃ chattaṃ mahantaṃ viya vassakāle dhammena gutto mama dhammapālo aññassa aṭṭhīni sukhī kumāroti. Mahādhammapālajātakaṃ navamaṃ. -----------

The Pali Tipitaka in Roman Character Volume 27 page 288-290. https://84000.org/tipitaka/read/roman_item.php?book=27&item=1410&items=12 Classified by [Item Number] :- http://84000.org/tipitaka/read/roman_item.php?book=27&item=1410&items=12&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=27&item=1410&items=12 Compare with The Royal Version of Thai Tipitaka :- https://84000.org/tipitaka/read/byitem.php?book=27&item=1410&items=12 Study Atthakatha :- https://84000.org/tipitaka/attha/attha.php?b=27&i=1410 Contents of The Tipitaka Volume 27 https://84000.org/tipitaka/read/?index_27 https://84000.org/tipitaka/english/?index_27