[810] Yena sallena otiṇṇo disā sabbā vidhāvatīti
rāgasallena otiṇṇo viddho phuṭṭho pareto samohito
samannāgato kāyena duccaritaṃ carati vācāya duccaritaṃ carati manasā
duccaritaṃ carati pāṇampi hanati adinnampi ādiyati sandhimpi
chindati nillopampi harati ekāgārikampi karoti paripanthepi
tiṭṭhati paradārampi gacchati musāpi bhaṇati . evampi rāgasallena
otiṇṇo viddho phuṭṭho pareto samohito samannāgato
dhāvati vidhāvati sandhāvati saṃsarati.
{810.1} Athavā rāgasallena otiṇṇo viddho phuṭṭho pareto
samohito samannāgato bhoge pariyesanto nāvāya mahāsamuddaṃ
pakkhandati sītassa purakkhato uṇhassa purakkhato ḍaṃsamakasavātātapa-
siriṃsapasamphassehi rissamāno 1- khuppipāsāya pīḷiyamāno 2-
gumbaṃ 3- gacchati takkolaṃ gacchati takkasilaṃ gacchati kālamukhaṃ gacchati
maraṇapāraṃ 4- gacchati vesuṅgaṃ gacchati verāpathaṃ gacchati javaṃ gacchati
tambaliṅgaṃ 5- gacchati vaṅkaṃ gacchati eḷavaddhanaṃ 6- gacchati suvaṇṇakūṭaṃ
gacchati suvaṇṇabhūmiṃ gacchati tambapaṇṇiṃ gacchati suppāraṃ 7- gacchati
bharukaṃ 8- gacchati suraddhaṃ 9- gacchati aṅgaṇekaṃ 10- gacchati gaṅgaṇaṃ 11-
gacchati paramagaṅgaṇaṃ 12- gacchati yonaṃ gacchati [13]- pinakaṃ 14- gacchati
allasaṇḍaṃ 15- gacchati marukantāraṃ gacchati jaṇṇupathaṃ gacchati ajapathaṃ
@Footnote: 1 Ma. pīḷiyamāno. 2 Po. Ma. Yu. miyyamāno. 3 Ma. tigumbaṃ. 4 Ma. purapūraṃ.
@5 Yu. tamaliṅgaṃ. 6 Po. Ma. eḷabandhanaṃ. 7 Ma. suppārakaṃ. 8 Ma. Yu. bhārukacchaṃ.
@9 Ma. suraṭṭhaṃ. 10 Ma. bhaṅgalokaṃ. 11 Po. Ma. bhaṅgaṇaṃ. 12 Ma. paramabhaṅgaṇaṃ.
@13 paramayonaṃ gacchati. 14 Ma. vinakaṃ. 15 mūlapadaṃ.
Gacchati meṇḍapathaṃ gacchati saṅkupathaṃ gacchati chattapathaṃ gacchati vaṃsapathaṃ gacchati
sakuṇapathaṃ gacchati mūsikāpathaṃ gacchati daripathaṃ gacchati vettādhāraṃ gacchati.
Pariyesanto na labhati alābhamūlakampi dukkhadomanassaṃ paṭisaṃvedeti .
Pariyesanto labhati laddhā ārakkhamūlakampi dukkhadomanassaṃ paṭisaṃvedeti
kinti me bhoge neva rājāno hareyyuṃ na corā hareyyuṃ na aggi ḍaheyya na
udakaṃ vaheyya na appiyā dāyādā hareyyunti . tassa evaṃ
ārakkhato gopayato te bhogā vippalujjanti . so vippayogamūlakampi
dukkhadomanassaṃ paṭisaṃvedeti.
{810.2} Evampi rāgasallena otiṇṇo viddho phuṭṭho pareto
samohito samannāgato dhāvati vidhāvati sandhāvati saṃsarati . Dosasallena
mohasallena mānasallena otiṇṇo viddho phuṭṭho pareto samohito
samannāgato kāyena duccaritaṃ carati vācāya duccaritaṃ carati manasā
duccaritaṃ carati pāṇampi hanati adinnampi ādiyati sandhimpi chindati
nillopampi harati ekāgārikampi karoti paripanthepi tiṭṭhati
paradārampi gacchati musāpi bhaṇati . evaṃ mānasallena otiṇṇo
viddho phuṭṭho pareto samohito samannāgato dhāvati vidhāvati
sandhāvati saṃsarati.
{810.3} Diṭṭhisallena otiṇṇo viddho phuṭṭho pareto samohito
samannāgato acelako hoti muttācāro hatthāvalekhano 1- na
@Footnote: 1 Ma. hatthāpalekhano.
Ehibhadantiko na tiṭṭhabhadantiko nābhihaṭaṃ na uddissa kataṃ na
nimantanaṃ sādiyati . so na kumbhimukhā paṭiggaṇhāti na
kaḷopimukhā paṭiggaṇhāti na eḷakamantaraṃ na daṇḍamantaraṃ na
mūsalamantaraṃ na dvinnaṃ bhuñjamānānaṃ na gabbhiniyā na pāyamānāya
na purisantaragatāya na saṅkittīsu na yattha sā upaṭṭhito hoti na
yattha makkhikā saṇḍasaṇḍacārinī na macchaṃ na maṃsaṃ [1]- na merayaṃ
na thusodakaṃ pivati . so ekāgāriko vā hoti ekālopiko
dvāgāriko vā hoti dvālopiko .pe. sattāgāriko vā hoti
sattālopiko ekissāpi dattiyā 2- yāpeti dvīhipi dattīhi 3-
yāpeti .pe. sattahipi dattīhi yāpeti ekāhikampi āhāraṃ
āhāreti dvīhikampi āhāraṃ āhāreti .pe. sattāhikampi āhāraṃ
āhāreti iti evarūpaṃ aḍḍhamāsikampi pariyāyabhattabhojanānu-
yogamanuyutto viharati.
{810.4} Evampi diṭṭhisallena otiṇṇo viddho phuṭṭho pareto
samohito samannāgato dhāvati vidhāvati sandhāvati saṃsarati . athavā
diṭṭhisallena otiṇṇo viddho phuṭṭho pareto samohito samannāgato
so sākabhakkho vā hoti sāmākabhakkho vā hoti nīvārabhakkho vā hoti
daddulabhakkho vā hoti hatabhakkho vā hoti [4]- ācāmabhakkho vā hoti
piññākabhakkho vā hoti [5]- tiṇabhakkho vā hoti gomayabhakkho vā hoti
vanamūlaphalāhāro yāpeti pavattaphalabhojī 6- . so sāṇānipi dhāreti
@Footnote: 1 ma na suraṃ. 2 Ma. bhattiyā. 3 Ma. bhattīhi. 4 Ma. kaṇabhakkho vā hoti.
@5 Ma. tilabhakkho vā hoti. 6 Po. Ma. pavattaphalabhojano.
Masāṇānipi dhāreti chavadussānipi dhāreti tirīṭānipi dhāreti
ajinānipi dhāreti paṃsukūlānipi dhāreti ajinakkhipampi dhāreti
kusacīrampi dhāreti vākacīrampi dhāreti phalakacīrampi dhāreti
kesakambalampi dhāreti ulūkapakkhampi dhāreti kesamassulocakopi
hoti kesamassulocanānuyogamanuyutto viharati ubbhaṭṭhakopi hoti
āsanapaṭikkhitto ukkuṭikopi hoti ukkuṭikappadhānamanuyutto
kaṇṭakāpassayikopi hoti kaṇṭakāpassaye seyyaṃ kappeti phalakaseyyampi
kappeti thaṇḍilaseyyampi kappeti ekapassayikopi hoti
rajojalladharo abbhokāsikopi hoti yathāsanthatikopi hoti vikaṭikopi 1-
hoti vikaṭabhojanānuyogamanuyutto apānakopi hoti apānabhattamanuyutto 2-
sāyatatiyakampi udakorohaṇānuyogamanuyutto viharati iti evarūpaṃ
anekavihitaṃ kāyassa ātāpanaparitāpanānuyogamanuyutto viharati .
Evampi diṭṭhisallena otiṇṇo viddho phuṭṭho pareto samohito
samannāgato dhāvati vidhāvati sandhāvati saṃsarati.
{810.5} Sokasallena otiṇṇo viddho phuṭṭho pareto samohito
samannāgato socati kilamati paridevati urattāḷiṃ kandati sammohaṃ
āpajjati . vuttaṃ hetaṃ bhagavatā bhūtapubbaṃ brāhmaṇa imissāyeva
sāvatthiyā aññatarissā itthiyā mātā kālamakāsi . sā tassā
kālakiriyāya ummattikā khittacittā rathiyā 3- rathiyaṃ siṅghāṭakena siṅghāṭakaṃ
upasaṅkamitvā evamāha api me mātaraṃ addasatha api me mātaraṃ
@Footnote: 1 Ma. vekaṭikopi. 2 Ma. apānakatthamanuyutto. 3 Ma. rathiyāya.
Addasathāti . bhūtapubbaṃ brāhmaṇa imissāyeva sāvatthiyā
aññatarissā itthiyā pitā kālamakāsi bhātā kālamakāsi
bhaginī kālamakāsi putto kālamakāsi dhītā kālamakāsi sāmiko
kālamakāsi . sā tassa kālakiriyāya ummattikā khittacittā
rathiyā rathiyaṃ siṅghāṭakena siṅghāṭakaṃ upasaṅkamitvā evamāha
api me sāmikaṃ addasatha api me sāmikaṃ addasathāti . bhūtapubbaṃ
brāhmaṇa imissāyeva sāvatthiyā aññatarassa purisassa mātā
kālamakāsi . so tassā kālakiriyāya ummattako khittacitto
rathiyā rathiyaṃ siṅghāṭakena siṅghāṭakaṃ upasaṅkamitvā evamāha
api me mātaraṃ addasatha api me mātaraṃ addasathāti.
{810.6} Bhūtapubbaṃ brāhmaṇa imissāyeva sāvatthiyā aññatarassa
purisassa pitā kālamakāsi bhātā kālamakāsi bhaginī kālamakāsi putto
kālamakāsi dhītā kālamakāsi pajāpatī kālamakāsi . so tassā
kālakiriyāya ummattako khittacitto rathiyā rathiyaṃ siṅghāṭakena
siṅghāṭakaṃ upasaṅkamitvā evamāha api me pajāpatiṃ addasatha
api me pajāpatiṃ addasathāti . bhūtapubbaṃ brāhmaṇa imissāyeva
sāvatthiyā aññatarā itthī ñātikulaṃ agamāsi . tassā te
ñātakā sāmikaṃ acchinditvā aññassa dātukāmā . sā ca naṃ
na icchati . athakho sā itthī sāmikaṃ etadavoca ime maṃ ayyaputta
ñātakā taṃ 1- acchinditvā aññassa dātukāmā ubho
@Footnote: 1 Ma. tava.
Mayaṃ marissāmāti . athakho so puriso taṃ itthiṃ dvidhā chetvā
attānaṃ opātesi 1- ubho pecca bhavissāmāti . Evaṃ sokasallena
otiṇṇo viddho phuṭṭho pareto samohito samannāgato dhāvati
vidhāvati sandhāvati saṃsarati.
{810.7} Kathaṃkathāsallena otiṇṇo viddho phuṭṭho pareto
samohito samannāgato saṃsayapakkhanno hoti vimatipakkhanno
dveḷhakajāto ahosiṃ nu kho ahaṃ atītamaddhānaṃ na nu kho ahosiṃ
atītamaddhānaṃ kiṃ nu kho ahosiṃ atītamaddhānaṃ kathaṃ nu kho ahosiṃ
atītamaddhānaṃ kiṃ hutvā kiṃ ahosiṃ nu kho ahaṃ atītamaddhānaṃ bhavissāmi
nu kho ahaṃ anāgatamaddhānaṃ na nu kho bhavissāmi anāgatamaddhānaṃ kiṃ
nu kho bhavissāmi anāgatamaddhānaṃ kathaṃ nu kho bhavissāmi anāgatamaddhānaṃ
kiṃ hutvā kiṃ bhavissāmi nu kho ahaṃ anāgatamaddhānanti.
{810.8} Etarahi paccuppannamaddhānaṃ ajjhattaṃ kathaṃkathī hoti
ahaṃ nukhosmi no nukhosmi kiṃ nukhosmiṃ kathaṃ nukhosmi [2]- satto kuto
āgato so kuhiṃ gāmī bhavissatīti . evaṃ kathaṃkathāsallena otiṇṇo
viddho phuṭṭho pareto samohito samannāgato dhāvati vidhāvati
sandhāvati saṃsarati . te ca salle abhisaṅkharoti te salle abhisaṅkharonto
sallābhisaṅkhāravasena puratthimadisaṃ dhāvati pacchimadisaṃ dhāvati
uttaradisaṃ dhāvati dakkhiṇadisaṃ dhāvati . te sallābhisaṅkhārā
appahīnā sallābhisaṅkhārānaṃ appahīnattā gatiyā dhāvati niraye
@Footnote: 1 Ma. opāteti. 2 ma ayaṃ nu kho.
Dhāvati tiracchānayoniyā dhāvati pittivisaye dhāvati manussaloke
dhāvati devaloke dhāvati gatiyā gatiṃ upapattiyā upapattiṃ
paṭisandhiyā paṭisandhiṃ bhavena bhavaṃ saṃsārena saṃsāraṃ vaṭṭena
vaṭṭaṃ dhāvati vidhāvati sandhāvati saṃsaratīti yena sallena otiṇṇo
disā sabbā vidhāvati.
The Pali Tipitaka in Roman Character Volume 29 page 504-510.
https://84000.org/tipitaka/read/roman_item.php?book=29&item=810&items=1
Classified by [Item Number] :-
http://84000.org/tipitaka/read/roman_item.php?book=29&item=810&items=1&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=29&item=810&items=1
Compare with The Royal Version of Thai Tipitaka :-
https://84000.org/tipitaka/read/byitem.php?book=29&item=810&items=1
Study Atthakatha :-
https://84000.org/tipitaka/attha/attha.php?b=29&i=810
Contents of The Tipitaka Volume 29
https://84000.org/tipitaka/read/?index_29
https://84000.org/tipitaka/english/?index_29
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
