[929] Pañcanna 1- dhīro bhayānaṃ na bhāye
bhikkhu sato sappariyantacārī
ḍaṃsādhipātāna siriṃsapānaṃ 2-
manussaphassāna catuppadānaṃ.
[930] Pañcanna dhīro bhayānaṃ na bhāyeti dhīroti dhīro
paṇḍito paññavā buddhimā ñāṇī vibhāvī medhāvī . dhīro
pañcannaṃ bhayānaṃ na bhāyeyya na taseyya [3]- na uttaseyya na
parittaseyya na santāsaṃ āpajjeyya abhiru 4- assa acchambhī
anutrāsī apalāyī pahīnabhayabheravo vigatalomahaṃso vihareyyāti
pañcanna dhīro bhayānaṃ na bhāye.
[931] Bhikkhu sato sappariyantacārīti bhikkhūti kalyāṇaputhujjano
vā bhikkhu sekkho vā bhikkhu . satoti catūhi kāraṇehi sato kāye
kāyānupassanāsatipaṭṭhānaṃ bhāvento sato vedanāsu citte
dhammesu dhammānupassanāsatipaṭṭhānaṃ bhāvento sato so vuccati
sato . sappariyantacārīti cattāro pariyantā sīlasaṃvarapariyanto
indriyasaṃvarapariyanto bhojane mattaññutāpariyanto
jāgariyānuyogapariyanto.
@Footnote: 1 Po. Ma. pañcannaṃ. 2 Ma. sirīsapānaṃ. 3 Ma. na santaseyya. 4 Ma. Yu. abhīrū.
{931.1} Katamo sīlasaṃvarapariyanto . idha bhikkhu sīlavā hoti
pāṭimokkhasaṃvarasaṃvuto viharati ācāragocarasampanno aṇumattesu
vajjesu bhayadassāvī samādāya sikkhati sikkhāpadesu anto pūtibhāvaṃ
paccavekkhamāno anto sīlasaṃvarapariyante carati mariyādaṃ na bhindati
ayaṃ sīlasaṃvarapariyanto.
{931.2} Katamo indriyasaṃvarapariyanto . idha bhikkhu cakkhunā
rūpaṃ disvā na nimittaggāhī hoti nānubyañjanaggāhī yatvādhikaraṇamenaṃ
cakkhundriyaṃ asaṃvutaṃ viharantaṃ abhijjhādomanassā pāpakā akusalā
dhammā anvāssaveyyuṃ tassa saṃvarāya paṭipajjati rakkhati cakkhundriyaṃ
cakkhundriye saṃvaraṃ āpajjati sotena saddaṃ sutvā ghānena gandhaṃ
ghāyitvā jivhāya rasaṃ sāyitvā kāyena phoṭṭhabbaṃ phusitvā
manasā dhammaṃ viññāya na nimittaggāhī hoti nānubyañjanaggāhī
yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā
pāpakā akusalā dhammā anvāssaveyyuṃ tassa saṃvarāya paṭipajjati
rakkhati manindriyaṃ manindriye saṃvaraṃ āpajjati ādittapariyāyaṃ
paccavekkhamāno anto indriyasaṃvarapariyante carati mariyādaṃ na
bhindati ayaṃ indriyasaṃvarapariyanto.
{931.3} Katamo bhojane mattaññutāpariyanto . idha bhikkhu
paṭisaṅkhā yoniso āhāraṃ āhāreti neva davāya na madāya na maṇḍanāya
Na vibhūsanāya yāvadeva imassa kāyassa ṭhitiyā yāpanāya vihiṃsuparatiyā
brahmacariyānuggahāya iti purāṇañca vedanaṃ paṭihaṅkhāmi navañca
vedanaṃ na uppādessāmi yātrā ca me bhavissati anavajjatā
ca phāsuvihāro cāti akkhabbhañjanavaṇapaṭicchādanaputtamaṃsūpamaṃ
paccavekkhamāno anto bhojane mattaññutāpariyante carati mariyādaṃ
na bhindati ayaṃ bhojane mattaññutāpariyanto.
{931.4} Katamo jāgariyānuyogapariyanto . idha bhikkhu divasaṃ 1-
caṅkamena nisajjāya āvaraṇīyehi dhammehi cittaṃ parisodheti rattiyā paṭhamaṃ
yāmaṃ caṅkamena nisajjāya āvaraṇīyehi dhammehi cittaṃ parisodheti
rattiyā majjhimaṃ yāmaṃ dakkhiṇena passena sīhaseyyaṃ kappeti pāde
pādaṃ accādhāya sato sampajāno uṭṭhānasaññaṃ manasikaritvā
rattiyā pacchimaṃ yāmaṃ paccuṭṭhāya caṅkamena nisajjāya āvaraṇīyehi
dhammehi cittaṃ parisodheti bhaddekarattavihāraṃ paccavekkhamāno anto
jāgariyānuyogapariyante carati mariyādaṃ na bhindati ayaṃ jāgariyānuyoga-
pariyantoti bhikkhu sato sappariyantacārī.
[932] Ḍaṃsādhipātāna siriṃsapānanti ḍaṃsā vuccanti piṅgalamakkhikā.
Adhipātikā 2- vuccanti sabbāpi makkhikāyo . kiṃkāraṇā adhipātikā
vuccanti sabbāpi makkhikāyo . tā uppatitvā uppatitvā khādanti
taṃkāraṇā adhipātikā vuccanti sabbāpi makkhikāyo . siriṃsapā vuccanti
ahīti ḍaṃsādhipātāna siriṃsapānaṃ.
@Footnote: 1 Po. Yu. divā. 2 Ma. adhipātakā.
[933] Manussaphassāna catuppadānanti manussaphassā vuccanti
corā vā assu māṇavā katakammā vā akatakammā vā . Te bhikkhuṃ
pañhaṃ vā puccheyyuṃ vādaṃ vā āropeyyuṃ akkoseyyuṃ paribhāseyyuṃ
roseyyuṃ viroseyyuṃ hiṃseyyuṃ vihiṃseyyuṃ heṭheyyuṃ viheṭheyyuṃ ghāteyyuṃ
upaghāteyyuṃ upaghātaṃ vā kareyyuṃ . yokoci manussato upaghāto
manussaphasso . catuppadānanti sīhā byagghā dīpi acchataracchā
kokā gomahisā hatthī . te bhikkhuṃ maddeyyuṃ khādeyyuṃ hiṃseyyuṃ
vihiṃseyyuṃ heṭheyyuṃ viheṭheyyuṃ ghāteyyuṃ upaghāteyyuṃ upaghātaṃ
vā kareyyuṃ . catuppadato upaghāto yaṅkiñci catuppadabhayanti
manussaphassāna catuppadānaṃ. Tenāha bhagavā
pañcanna dhīro bhayānaṃ na bhāye
bhikkhu sato sappariyantacārī
ḍaṃsādhipātāna siriṃsapānaṃ
manussaphassāna catuppadānanti.
The Pali Tipitaka in Roman Character Volume 29 page 593-596.
https://84000.org/tipitaka/read/roman_item.php?book=29&item=929&items=5
Classified by [Item Number] :-
http://84000.org/tipitaka/read/roman_item.php?book=29&item=929&items=5&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=29&item=929&items=5
Compare with The Royal Version of Thai Tipitaka :-
https://84000.org/tipitaka/read/byitem.php?book=29&item=929&items=5
Study Atthakatha :-
https://84000.org/tipitaka/attha/attha.php?b=29&i=929
Contents of The Tipitaka Volume 29
https://84000.org/tipitaka/read/?index_29
https://84000.org/tipitaka/english/?index_29
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
