|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
|
| ThaiVersion PaliThai PaliRoman |
TIPITAKA Volume 33 : PALI ROMAN Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ
|
|
Ekādasamaṃ kaṇhadīpāyanacariyaṃ [31] |31.93| Punāparaṃ yadā homi kaṇhadīpāyano isi paropaññāsavassāni anabhirato cariṃ ahaṃ. |31.94| Na koci etaṃ jānāti anabhiratimanaṃ mama ahaṃpi kassaci nācikkhiṃ arati 1- me ca ratimānase. |31.95| Sabrahmacārī maṇḍabyo sahāyo me mahāisi pubbakammasamāyutto sūlamāropanaṃ labhi. |31.96| Tamahaṃ upaṭṭhahitvāna ārogyamanupāpayiṃ āpucchitvāna āgañchiṃ yaṃ mayhaṃ sakamassamaṃ. @Footnote: 1 Yu. aratiṃ. |31.97| Sahāyo brāhmaṇo mayhaṃ bhariyaṃ ādāya puttakaṃ tayo janā samāgantvā āgacchuṃ pāhunāgataṃ. |31.98| Sammodamāno tehi saha nisinno sakaassame dārako vaṭṭamanukkhipaṃ āsīvisamakopayi. |31.99| Tato so vaṭṭagataṃ maggaṃ anvesanto kumārako āsīvisassa hatthena uttamaṅgaṃ parāmasi. |31.100| Tassa āmasane kuddho sappo visabalassito kupito paramakopena aḍaṃsi dārakaṃ khaṇe. |31.101| Saha daṭṭho ativisena dārako papati bhūmiyaṃ tenāhaṃ dukkhito āsiṃ mama vā hasitaṃ dukkhaṃ. |31.102| Tyāhaṃ assāsayitvāna dukkhite sokasalline 1- paṭhamaṃ akāsiṃ kiriyaṃ aggaṃ saccavaruttamaṃ. |31.103| Sattāhamevāhaṃ pasannacitto puññatthiko acariṃ brahmacariyaṃ athāparaṃ yaṃ caritaṃ mamaṃ idaṃ vassāni paññāsasamādhikāni. |31.104| Ākāmakovāhi ahañcarāmi etena saccena suvatthi hotu hataṃ visaṃ jīvatu yaññadatto. @Footnote: 1 Ma. Yu. sokasallite. |31.105| Saha sacce kate mayhaṃ visavegena vedhito abujjhitvāna vuṭṭhāsi arogo vāsi 1- māṇavo saccena me samo natthi esā me saccapāramīti. Kaṇhadīpāyanacariyaṃ ekādasamaṃ.The Pali Tipitaka in Roman Character Volume 33 page 590-592. https://84000.org/tipitaka/read/roman_item.php?book=33.3&item=31&items=1 Classified by [Item Number] :- http://84000.org/tipitaka/read/roman_item.php?book=33.3&item=31&items=1&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=33.3&item=31&items=1 Compare with The Royal Version of Thai Tipitaka :- https://84000.org/tipitaka/read/byitem.php?book=33.3&item=31&items=1 Study Atthakatha :- https://84000.org/tipitaka/attha/attha.php?b=33.3&i=31 Contents of The Tipitaka Volume 33 https://84000.org/tipitaka/read/?index_33 https://84000.org/tipitaka/english/?index_33
      |
|
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]