paliTIPITAKA Volume 5 - Vinaya Pitaka 5

[234] Idha pana bhikkhave bhikkhu saṅghena paṭisāraṇīyakammakato sammā vattati lomaṃ pāteti netthāraṃ vattati paṭisāraṇīyakammassa paṭippassaddhiṃ yācati . tatra ce bhikkhūnaṃ evaṃ hoti ayaṃ kho āvuso bhikkhu saṅghena paṭisāraṇīyakammakato sammā vattati lomaṃ pāteti netthāraṃ vattati paṭisāraṇīyakammassa paṭippassaddhiṃ yācati handassa mayaṃ paṭisāraṇīyakammaṃ paṭippassambhemāti . te tassa paṭisāraṇīyakammaṃ paṭippassambhenti adhammena vaggā .pe. adhammena samaggā . dhammena vaggā . dhammapaṭirūpakena vaggā. Dhammapaṭirūpakena samaggā . tatraṭṭho saṅgho vivadati adhammena vaggakammaṃ adhammena samaggakammaṃ dhammena vaggakammaṃ dhammapaṭirūpakena vaggakammaṃ dhammapaṭirūpakena samaggakammaṃ akataṃ kammaṃ dukkaṭaṃ kammaṃ puna kātabbaṃ kammanti . tatra bhikkhave ye te bhikkhū evamāhaṃsu dhammapaṭirūpakena samaggakammanti ye ca te bhikkhū evamāhaṃsu akataṃ kammaṃ dukkaṭaṃ kammaṃ puna kātabbaṃ kammanti . @Footnote: ¹ Ma. imepi. Ime tattha bhikkhū dhammavādino. Ime pañca vārā saṅkhittā. [235] Idha pana bhikkhave bhikkhu saṅghena āpattiyā adassane ukkhepanīyakammakato sammā vattati lomaṃ pāteti netthāraṃ vattati āpattiyā adassane ukkhepanīyakammassa paṭippassaddhiṃ yācati . Tatra ce bhikkhūnaṃ evaṃ hoti ayaṃ kho āvuso bhikkhu saṅghena āpattiyā adassane ukkhepanīyakammakato sammā vattati lomaṃ pāteti netthāraṃ vattati āpattiyā adassane ukkhepanīyakammassa paṭippassaddhiṃ yācati handassa mayaṃ āpattiyā adassane ukkhepanīyakammaṃ paṭippassambhemāti. {235.1} Te tassa āpattiyā adassane ukkhepanīyakammaṃ paṭippassambhenti adhammena vaggā .pe. adhammena samaggā . Dhammena vaggā . dhammapaṭirūpakena vaggā . dhammapaṭirūpakena samaggā . tatraṭṭho saṅgho vivadati adhammena vaggakammaṃ adhammena samaggakammaṃ dhammena vaggakammaṃ dhammapaṭirūpakena vaggakammaṃ dhammapaṭirūpakena samaggakammaṃ akataṃ kammaṃ dukkaṭaṃ kammaṃ puna kātabbaṃ kammanti . tatra bhikkhave ye te bhikkhū evamāhaṃsu dhammapaṭirūpakena samaggakammanti ye ca te bhikkhū evamāhaṃsu akataṃ kammaṃ dukkaṭaṃ kammaṃ puna kātabbaṃ kammanti . Ime tattha bhikkhū dhammavādino. Ime pañca vārā saṅkhittā. {235.2} Idha pana bhikkhave bhikkhu saṅghena āpattiyā appaṭikamme ukkhepanīyakammakato sammā vattati lomaṃ pāteti netthāraṃ vattati āpattiyā Appaṭikamme ukkhepanīyakammassa paṭippassaddhiṃ yācati . tatra ce bhikkhūnaṃ evaṃ hoti ayaṃ kho āvuso bhikkhu saṅghena āpattiyā appaṭikamme ukkhepanīyakammakato sammā vattati lomaṃ pāteti netthāraṃ vattati āpattiyā appaṭikamme ukkhepanīyakammassa paṭippassaddhiṃ yācati handassa mayaṃ āpattiyā appaṭikamme ukkhepanīyakammaṃ paṭippassambhemāti. {235.3} Te tassa āpattiyā appaṭikamme ukkhepanīyakammaṃ paṭippassambhenti adhammena vaggā .pe. adhammena samaggā . Dhammena vaggā . dhammapaṭirūpakena vaggā . dhammapaṭirūpakena samaggā . tatraṭṭho saṅgho vivadati adhammena vaggakammaṃ adhammena samaggakammaṃ dhammena vaggakammaṃ dhammapaṭirūpakena vaggakammaṃ dhammapaṭirūpakena samaggakammaṃ akataṃ kammaṃ dukkaṭaṃ kammaṃ puna kātabbaṃ kammanti . tatra bhikkhave ye te bhikkhū evamāhaṃsu dhammapaṭirūpakena samaggakammanti ye ca te bhikkhū evamāhaṃsu akataṃ kammaṃ dukkaṭaṃ kammaṃ puna kātabbaṃ kammanti . Ime tattha bhikkhū dhammavādino. Ime pañca vārā saṅkhittā. [236] Idha pana bhikkhave bhikkhu saṅghena pāpikāya diṭṭhiyā appaṭinissagge ukkhepanīyakammakato sammā vattati lomaṃ pāteti netthāraṃ vattati pāpikāya diṭṭhiyā appaṭinissagge ukkhepanīyakammassa paṭippassaddhiṃ yācati . tatra ce bhikkhūnaṃ evaṃ hoti ayaṃ kho āvuso bhikkhu saṅghena pāpikāya diṭṭhiyā appaṭinissagge ukkhepanīyakammakato Sammā vattati lomaṃ pāteti netthāraṃ vattati pāpikāya diṭṭhiyā appaṭinissagge ukkhepanīyakammassa paṭippassaddhiṃ yācati handassa mayaṃ pāpikāya diṭṭhiyā appaṭinissagge ukkhepanīyakammaṃ paṭippassambhemāti . te tassa pāpikāya diṭṭhiyā appaṭinissagge ukkhepanīyakammaṃ paṭippassambhenti adhammena vaggā .pe. adhammena samaggā . dhammena vaggā . dhammapaṭirūpakena vaggā. Dhammapaṭirūpakena samaggā . tatraṭṭho saṅgho vivadati adhammena vaggakammaṃ adhammena samaggakammaṃ dhammena vaggakammaṃ dhammapaṭirūpakena vaggakammaṃ dhammapaṭirūpakena samaggakammaṃ akataṃ kammaṃ dukkaṭaṃ kammaṃ puna kātabbaṃ kammanti . tatra bhikkhave ye te bhikkhū evamāhaṃsu dhammapaṭirūpakena samaggakammanti ye ca te bhikkhū evamāhaṃsu akataṃ kammaṃ dukkaṭaṃ kammaṃ puna kātabbaṃ kammanti . Ime tattha bhikkhū dhammavādinoti ^1- imepi pañca vārā saṅkhittā. Campeyyakkhandhakaṃ navamaṃ ^2-. Imamhi khandhake vatthūni chattiṃsa. ------------------ Tassuddānaṃ. [237] Campāyaṃ bhagavā āsi vatthu vāsabhagāmake āgantukānaṃ ussukkaṃ akāsi icchitabbake ^3- pakataññunoti ñatvā ussukkaṃ na karī tadā @Footnote: ¹ Ma. itisaddo na dissati. ² Ma. campeyyakkhandhako navamo. ³ Po. icchitabbako. Ukkhitto na karotīti agamā ^1- jinasantike. Adhammena vaggakammaṃ samaggaṃ adhammena ca dhammena vaggakammaṃ ca paṭirūpakena vaggikaṃ paṭirūpakena samaggaṃ eko ukkhipatekakaṃ eko ca dve sambahule saṅghaṃ ukkhipatekato ^2- duvepi sambahulāpi saṅgho saṅghaṃ ca ukkhipi sabbaññū pavaro sutvā adhammanti paṭikkhipi. Ñattivipannaṃ yaṃ kammaṃ sampannaṃ anusāvanaṃ anussāvanavipannaṃ sampannaṃ ñattiyā ca yaṃ ubhayena vipannañca aññatra dhammameva ca vinayaṃ ^3- satthu paṭikuṭṭhaṃ kuppaṃ aṭṭhānarūpakaṃ ^4- adhammavaggasamaggaṃ paṭirūpena ye duve ^5- dhammeneva ca sāmaggiṃ anuññāsi tathāgato. Catuvaggo pañcavaggo dasavaggo ca vīsati atirekavīsativaggo ^6- saṅgho pañcavidho tathā. Ṭhapetvā upasampadaṃ yañca kammaṃ pavāraṇaṃ abbhānakammena saha catuvaggehi kammiko. Duve kamme ṭhapetvāna majjhadesupasampadaṃ ^7- abbhānaṃ pañcavaggiko sabbakammesu kammiko. Abbhānekaṃ ṭhapetvāna ye bhikkhū dasavaggikā. @Footnote: ¹ Ma. sāgamā. ² Po. ukkhipasegakako. Ma. ukkhipatekako. ³ Yu. vinā. @⁴ Ma. Yu. uṭṭhānārahikaṃ. ⁵ Ma. dhammapaṭirūpāni ye duve. Yu. paṭirūpāni ye duve. @⁶ Ma. Yu. parovisativaggo ca. ⁷ Yu. majjhe desupasampadā. Sabbakammakaro saṅgho vīso sabbattha kammiko. Bhikkhunī sikkhamānā ca sāmaṇero sāmaṇerikā ^1- paccakkhātantimavatthū ^2- ukkhittāpattidassane appaṭikammadiṭṭhiyā paṇḍakatheyyasaṃvāsakaṃ ^3- titthiyatiracchānagataṃ mātu pitu ca ghātakaṃ arahaṃ bhikkhunīdūsiṃ bhedakaṃ lohitupādakaṃ ^4- byañjanaṃ nānāsaṃvāsaṃ ^5- nānāsīmāya iddhiyā yassa saṅgho kare kammaṃ honti ^6- te catuvīsati sambuddhena paṭikkhittā na hete gaṇapūrakā pārivāsikacatuttho parivāsaṃ dadeyya vā mūlamānattamabbheyya ^7- akammaṃ na ca karaṇaṃ mūlaarahamānattaṃ abbhānārahameva ca akammakārakā ^8- pañca sambuddhena pakāsitā. Bhikkhunī sikkhamānā ca sāmaṇero sāmaṇerikā paccakkhantimaummattā khittavedanadassane appaṭikammadiṭṭhiyā paṇḍakatheyyasaṃvāsakaṃ ^9- titthiyatiracchānagataṃ mātā pitu ca ghātakaṃ arahaṃ bhikkhunīdūsiṃ bhedakaṃ lohitupādakaṃ ubhatobyañjanañceva nānāsaṃvāsakaṃpica ^10- nānāsīmāya ṭhitakaṃ ^11- vehāsaṃ yassa kamma ca @Footnote: ¹ Ma. sāmaṇerī. ² Yu. paccakkhātantimavatthuṃ. 3. Po. paṇḍakaṃ theyyasaṃvāsakaṃ. @Ma. paṇḍako theyyasaṃvāsakaṃ. ⁴ Ma. Yu. lohituppādaṃ. ⁵ Yu. nānāsaṃvāsako ceva. @⁶ honte te. ⁷ Ma. Yu. mūlā. ⁸ Ma. Yu. na kammakārakā. ⁹ Ma. Yu. paṇḍakāpica @byañjanā. ¹⁰ Ma. Yu. titthiyatiracchānagataṃ .pe. nānāsaṃvāsakaṃpicāti diyaḍḍhagāthā @na dissati. ¹¹ Ma. Yu. nānāsaṃvāsakā sīmā. Sattavīsānametesaṃ ^1- paṭikosaṃ na rūhati. Bhikkhussa pakatattassa rūhati paṭikosanā suddhassa dunnisārito bālo hi sunisārito paṇḍako theyyasaṃvāso ^2- pakkanto tiracchānago ^3- mātāpituarahanto ^4- dūsako saṅghabhedako lohituppādako ceva ubhatobyañjano ca yo ekādasannametesaṃ ^5- osāraṇaṃ na yujjati. Hatthapādā ^6- tadubbhayaṃ kaṇṇanāsā ^7- tadubbhayaṃ ^8- aṅgulīaḷakaṇḍaraṃ phaṇaṃ khujjo ca vāmano gaṇḍilakkhaṇakāsā ^9- ca likhitako ca sīpadī pāpaparisakāṇo ^10- ca kuṇi khañjo hatopi ^11- ca iriyāpathadubbalo andho mūgo ca bādhiro ^12- andhamūgandhabādhiro mūgabādhīrameva ca andhamūgabadhīro ^13- ca dvattiṃsete anūnakā tesaṃ osāraṇaṃ hoti sambuddhena pakāsitaṃ. Daṭṭhabbā paṭikātabbā nissajjetā ^14- na vijjati tassa ukkhepanā kammā satta honti adhammikā āpannaṃ anuvattanti ^15- satta tepi adhammikā āpannaṃ anuvattanti ^15- satta kammā sudhammikā sammukhā paṭipucchā ca paṭiññāya ca kārakā ^16- @Footnote: ¹ Po. sattavīsonametesaṃ. Ma. Yu. aṭṭhārasannametesaṃ. ² Yu. theyyasaṃvāsaṃ. @³ Po. tiracchānako. Ma. Yu. tiracchānagato. ⁴ Ma. Yu. mātupituarahanta. @⁵ Po. Yu. ekādasannaṃ etesaṃ. ⁶ Ma. hatthapādaṃ. ⁷ Ma. kaṇṇanāsā @⁸ Yu. tadubbhayā. ⁹ Ma. Yu. lakkhaṇakasā. ¹⁰ Ma. pāpā-. ¹¹ Po. hatenaca. @¹² Ma. Yu. badhiro. ¹³ Yu. andhabadhiramūgo. ¹⁴ Po. nissajjetvā. @Yu. nissajjetaṃ. ¹⁵ Po. Ma. Yu. anuvattantaṃ. ¹⁶ Po. Ma. kāraṇā. Satiamūḷhapāpikā tajjanīniyasena ca pabbājanīyapaṭisārā ^1- ukkhepaparivāsa ca mūlamānattaabbhānā tatheva upasampadā aññaṃ kareyya aññassa soḷasete adhammikā tantaṃ kareyya tantassa soḷasete sudhammikā paccāropeyya aññoññaṃ ^2- soḷasete adhammikā dve dve mūlā katā ^3- tassa tepi soḷasa dhammikā. Ekekamūlakaṃ cakkaṃ adhammanti jino bravi akāsi tajjanīyaṃ kammaṃ saṅgho bhaṇḍanakārako adhammena vaggakammaṃ aññaṃ āvāsa gacchi so tatthādhammena samaggā tassa tajjaniyaṃ karuṃ aññattha vaggadhammena tassa tajjaniyaṃ karuṃ paṭirūpakena ^4- vaggāpi samaggāpi tathā karuṃ adhammena samaggā ca dhammena vaggameva ca paṭirūpakena vaggā ca samaggā ca ime padā ekekaṃ mūlakaṃ katvā cakkaṃ bandhe vicakkhaṇo. Bālāpyattassa niyassaṃ ^5- pabbāje kuladūsakaṃ paṭisāraṇīyaṃ kammaṃ kare akkosakassa ca adassanāpaṭikkamme yo ca diṭṭhiṃ na nissaje tesaṃ ukkhepanaṃ kammaṃ ^6- satthavāhena bhāsitaṃ @Footnote: ¹ Ma. Yu. pabbājanīya paṭisāro. ² Po. aññamaññaṃ. Ma. aññaññaṃ. @Yu. aññañño. ³ Po. dosa mūlā katā. Ma. Yu. dve dve tamūlakaṃ. ⁴ Ma. paṭirūpena. @⁵ Yu. nissayaṃ. ⁶ Ma. Yu. ukkhepanīyakammaṃ. Upavinayakammānaṃ ^1- pañño tajjaniyaṃ naye tesaṃyeva anulomaṃ sammā vattati yācati ^2- passaddhiṃ tesaṃ kammānaṃ heṭṭhā kammanayena ca tasmiṃ tasmiṃ hi ^3- kammesu tatraṭṭho ca vivādati ^4- akataṃ dukkaṭañceva puna kātabbakanti ca kamme passaddhiyā cāpi te bhikkhū dhammavādino vipattibyādhite disvā kammappatte mahāmuni paṭippassaddhimakkhāsi sallakattova osadhanti ^5-. ---------------- @Footnote: ¹ Ma. upari-. Yu. ukkhepaniyakammānaṃ. ² Ma. Yu. yācite. ³ Ma. Yu. tu. ⁴ Ma. @Yu. vivadati. ⁵ idaṃ uddānaṃ Yu. Sī. potthakehi yebhuyyena visadisanti ñātabbaṃ. Kosambikkhandhakaṃ [238] Tena samayena buddho bhagavā kosambiyaṃ viharati ghositārāme . tena kho pana samayena aññataro bhikkhu āpattiṃ āpanno hoti . so tassā āpattiyā āpattidiṭṭhi hoti aññe bhikkhū tassā āpattiyā anāpattidiṭṭhino honti . So aparena samayena tassā āpattiyā anāpattidiṭṭhi hoti aññe bhikkhū tassā āpattiyā āpattidiṭṭhino honti . Athakho te bhikkhū taṃ bhikkhuṃ etadavocuṃ āpattiṃ tvaṃ *- āvuso āpanno passasetaṃ āpattinti. Natthi me āvuso āpatti yamahaṃ passeyyanti. {238.1} Athakho te bhikkhū sāmaggiṃ labhitvā taṃ bhikkhuṃ āpattiyā adassane ukkhipiṃsu . so ca bhikkhu bahussuto hoti āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo . athakho so bhikkhu sandiṭṭhe sambhatte bhikkhū upasaṅkamitvā etadavoca anāpatti esā āvuso nesā āpatti anāpannomhi namhi āpanno anukkhittomhi namhi ukkhitto adhammikenamhi kammena ukkhitto kuppena aṭṭhānārahena hotha me āyasmanto dhammato vinayato pakkhāti . alabhi kho so bhikkhu sandiṭṭhe sambhatte bhikkhū pakkhe . jānapadānaṃ ^[1]- ca sandiṭṭhānaṃ sambhattānaṃ bhikkhūnaṃ santike dūtaṃ pāhesi anāpatti esā āvuso @Footnote: ¹ Ma. Yu. pisaddo. @* mīkār—kṛ´์ khagœ tavaṃ peḌna tvaṃ Nesā āpatti anāpannomhi namhi āpanno anukkhittomhi namhi ukkhitto adhammikenamhi kammena ukkhitto kuppena aṭṭhānārahena hontu me āyasmanto dhammato vinayato pakkhāti . Alabhi kho so bhikkhu jānapadepi sandiṭṭhe sambhatte bhikkhū pakkhe. {238.2} Athakho te ukkhittānuvattakā bhikkhū yena ukkhepakā bhikkhū tenupasaṅkamiṃsu upasaṅkamitvā ukkhepake bhikkhū etadavocuṃ anāpatti esā āvuso nesā āpatti anāpanno eso bhikkhu neso bhikkhu āpanno anukkhitto eso bhikkhu neso bhikkhu ukkhitto adhammikena kammena ukkhitto kuppena aṭṭhānārahenāti. {238.3} Evaṃ vutte ukkhepakā bhikkhū ukkhittānuvattake bhikkhū etadavocuṃ āpatti esā āvuso nesā anāpatti āpanno eso bhikkhu neso bhikkhu anāpanno ukkhitto eso bhikkhu neso bhikkhu anukkhitto dhammikena kammena ukkhitto akuppena ṭhānārahena mā kho tumhe āyasmanto etaṃ ukkhittakaṃ bhikkhuṃ anuvattittha anuparivārethāti. Evaṃpi kho te ukkhittānuvattakā bhikkhū ukkhepakehi bhikkhūhi vuccamānā tatheva taṃ ukkhittakaṃ bhikkhuṃ anuvattiṃsu anuparivāresuṃ. [239] Athakho aññataro bhikkhu yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho so bhikkhu bhagavantaṃ etadavoca idha bhante aññataro bhikkhu āpattiṃ āpanno ahosi so tassā āpattiyā āpattidiṭṭhi Ahosi aññe bhikkhū tassā āpattiyā anāpattidiṭṭhino ahesuṃ so aparena samayena tassā āpattiyā anāpattidiṭṭhi ahosi aññe bhikkhū tassā āpattiyā āpattidiṭṭhino ahesuṃ athakho te bhante bhikkhū taṃ bhikkhuṃ etadavocuṃ āpattiṃ tvaṃ āvuso āpanno passasetaṃ āpattinti natthi me āvuso āpatti yamahaṃ passeyyanti athakho te bhante bhikkhū sāmaggiṃ labhitvā taṃ bhikkhuṃ āpattiyā adassane ukkhipiṃsu so ca bhante bhikkhu bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo athakho so bhante bhikkhu sandiṭṭhe sambhatte bhikkhū upasaṅkamitvā etadavoca anāpatti esā āvuso nesā āpatti anāpannomhi namhi āpanno anukkhittomhi namhi ukkhitto adhammikenamhi kammena ukkhitto kuppena aṭṭhānārahena hotha me āyasmanto dhammato vinayato pakkhāti alabhi kho so bhante bhikkhu sandiṭṭhe sambhatte bhikkhū pakkhe jānapadānaṃpi sandiṭṭhānaṃ sambhattānaṃ ^[1]- santike dūtaṃ pāhesi anāpatti esā āvuso nesā āpatti anāpannomhi namhi āpanno anukkhittomhi namhi ukkhitto adhammikenamhi kammena ukkhitto kuppena aṭṭhānārahena hontu me āyasmanto dhammato vinayato pakkhāti alabhi kho so bhante bhikkhu jānapadepi sandiṭṭhe @Footnote: ¹ Ma. bhikkhūnaṃ. Sambhatte bhikkhū pakkhe {239.1} athakho te bhante ukkhittānuvattakā bhikkhū yena ukkhepakā bhikkhū tenupasaṅkamiṃsu upasaṅkamitvā ukkhepake bhikkhū etadavocuṃ anāpatti esā āvuso nesā āpatti anāpanno eso bhikkhu neso bhikkhu āpanno anukkhitto eso bhikkhu neso bhikkhu ukkhitto adhammikena kammena ukkhitto kuppena aṭṭhānārahenāti evaṃ vutte ^[1]- bhante ukkhepakā bhikkhū ukkhittānuvattake bhikkhū etadavocuṃ āpatti esā āvuso nesā anāpatti āpanno eso bhikkhu neso bhikkhu anāpanno ukkhitto eso bhikkhu neso bhikkhu anukkhitto dhammikena kammena ukkhitto akuppena ṭhānārahena mā kho tumhe āyasmanto etaṃ ukkhittakaṃ bhikkhuṃ anuvattittha anuparivārethāti evaṃpi kho te bhante ukkhittānuvattakā bhikkhū ukkhepakehi bhikkhūhi vuccamānā tatheva taṃ ukkhittakaṃ bhikkhuṃ anuvattanti anuparivārentīti. {239.2} Athakho bhagavā bhinno bhikkhusaṅgho bhinno bhikkhusaṅghoti uṭṭhāyāsanā yena ukkhepakā bhikkhū tenupasaṅkami upasaṅkamitvā paññatte āsane nisīdi . nisajja kho bhagavā ukkhepake bhikkhū etadavoca mā kho tumhe bhikkhave paṭibhāti no paṭibhāti noti yasmiṃ vā tasmiṃ vā bhikkhuṃ ukkhipitabbaṃ maññittha. {239.3} Idha pana bhikkhave bhikkhu āpattiṃ āpanno hoti . so tassā āpattiyā anāpattidiṭṭhi hoti aññe bhikkhū tassā āpattiyā āpattidiṭṭhino @Footnote: ¹ Po. Ma. te. Honti . te ce bhikkhave bhikkhū taṃ bhikkhuṃ evaṃ jānanti ayaṃ kho āyasmā bahussuto .pe. sikkhākāmo sace mayaṃ imaṃ bhikkhuṃ āpattiyā adassane ukkhipissāma na mayaṃ iminā bhikkhunā saddhiṃ uposathaṃ karissāma vinā iminā bhikkhunā uposathaṃ karissāma bhavissati saṅghassa tatonidānaṃ bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇanti . bhedagarukehi bhikkhave bhikkhūhi na so bhikkhu āpattiyā adassane ukkhipitabbo. {239.4} Idha pana bhikkhave bhikkhu āpattiṃ āpanno hoti. So tassā āpattiyā anāpattidiṭṭhi hoti aññe bhikkhū tassā āpattiyā āpattidiṭṭhino honti . te ce bhikkhave bhikkhū taṃ bhikkhuṃ evaṃ jānanti ayaṃ kho āyasmā bahussuto .pe. sikkhākāmo sace mayaṃ imaṃ bhikkhuṃ āpattiyā adassane ukkhipissāma na mayaṃ iminā bhikkhunā saddhiṃ pavāressāma vinā iminā bhikkhunā pavāressāma na mayaṃ iminā bhikkhunā saddhiṃ saṅghakammaṃ karissāma vinā iminā bhikkhunā saṅghakammaṃ karissāma na mayaṃ iminā bhikkhunā saddhiṃ āsane nisīdissāma vinā iminā bhikkhunā āsane nisīdissāma na mayaṃ iminā bhikkhunā saddhiṃ yāgupāne nisīdissāma vinā iminā bhikkhunā yāgupāne nisīdissāma na mayaṃ iminā bhikkhunā saddhiṃ bhattagge nisīdissāma vinā iminā bhikkhunā bhattagge nisīdissāma na mayaṃ iminā bhikkhunā saddhiṃ ekacchanne vasissāma vinā iminā Bhikkhunā ekacchanne vasissāma na mayaṃ iminā bhikkhunā saddhiṃ yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissāma vinā iminā bhikkhunā yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissāma bhavissati saṅghassa tatonidānaṃ bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇanti . bhedagarukehi bhikkhave bhikkhūhi na so bhikkhu āpattiyā adassane ukkhipitabboti. {239.5} Athakho bhagavā ukkhepakānaṃ bhikkhūnaṃ etamatthaṃ bhāsitvā uṭṭhāyāsanā yena ukkhittānuvattakā bhikkhū tenupasaṅkami upasaṅkamitvā paññatte āsane nisīdi . nisajja kho bhagavā ukkhittānuvattake bhikkhū etadavoca mā kho tumhe bhikkhave āpattiṃ āpajjitvā namha āpannā namha āpannāti āpattiṃ na paṭikātabbaṃ maññittha. {239.6} Idha pana bhikkhave bhikkhu āpattiṃ āpanno hoti . So tassā āpattiyā anāpattidiṭṭhi hoti aññe bhikkhū tassā āpattiyā āpattidaṭṭhino honti . so ce bhikkhave bhikkhu te bhikkhū evaṃ jānāti ime kho āyasmanto ^1- bahussutā .pe. Sikkhākāmā nālaṃ mamaṃ vā kāraṇā aññesaṃ vā kāraṇā chandā dosā mohā bhayā agatiṃ gantuṃ sace maṃ ime bhikkhū āpattiyā adassane ukkhipissanti na mayā saddhiṃ uposathaṃ karissanti vinā mayā uposathaṃ karissanti @Footnote: ¹ Sī. Yu. āyasmantā. Bhavissati saṅghassa tatonidānaṃ bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇanti . bhedagarukena bhikkhave bhikkhunā paresaṃpi saddhāya sā āpatti desetabbā. {239.7} Idha pana bhikkhave bhikkhu āpattiṃ āpanno hoti . So tassā āpattiyā anāpattidiṭṭhi hoti aññe bhikkhū tassā āpattiyā āpattidiṭṭhino honti . so ce bhikkhave bhikkhu te bhikkhū evaṃ jānāti ime kho āyasmanto bahussutā .pe. Sikkhākāmā nālaṃ mamaṃ vā kāraṇā aññesaṃ vā kāraṇā chandā dosā mohā bhayā agatiṃ gantuṃ sace maṃ ime bhikkhū āpattiyā adassane ukkhipissanti na mayā saddhiṃ pavāressanti vinā mayā pavāressanti na mayā saddhiṃ saṅghakammaṃ karissanti vinā mayā saṅghakammaṃ karissanti na mayā saddhiṃ āsane nisīdissanti vinā mayā āsane nisīdissanti na mayā saddhiṃ yāgupāne nisīdissanti vinā mayā yāgupāne nisīdissanti na mayā saddhiṃ bhattagge nisīdissanti vinā mayā bhattagge nisīdissanti na mayā saddhiṃ ekacchanne vasissanti vinā mayā ekacchanne vasissanti na mayā saddhiṃ yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissanti vinā mayā yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissanti bhavissati saṅghassa tatonidānaṃ bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ Saṅghanānākaraṇanti . bhedagarukena bhikkhave bhikkhunā paresaṃpi saddhāya sā āpatti desetabbāti . athakho bhagavā ukkhittānuvattakānaṃ bhikkhūnaṃ etamatthaṃ bhāsitvā uṭṭhāyāsanā pakkāmi. [240] Tena kho pana samayena ukkhittānuvattakā bhikkhū tattheva antosīmāya uposathaṃ karonti saṅghakammaṃ karonti . ukkhepakā pana bhikkhū nissīmaṃ gantvā uposathaṃ karonti saṅghakammaṃ karonti . athakho aññataro ukkhepako bhikkhu yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho so bhikkhu bhagavantaṃ etadavoca te bhante ukkhittānuvattakā bhikkhū tattheva antosīmāya uposathaṃ karonti saṅghakammaṃ karonti mayaṃ pana bhante ukkhepakā bhikkhū nissīmaṃ gantvā uposathaṃ karoma saṅghakammaṃ karomāti. {240.1} Te ce bhikkhu ukkhittānuvattakā bhikkhū tattheva antosīmāya uposathaṃ karissanti saṅghakammaṃ karissanti yathā mayā ñatti ca anussāvanā ca paññattā tesaṃ tāni kammāni dhammikāni bhavissanti akuppāni ṭhānārahāni . tumhe ce bhikkhu ukkhepakā bhikkhū tattheva antosīmāya uposathaṃ karissatha saṅghakammaṃ karissatha yathā mayā ñatti ca anussāvanā ca paññattā tumhākampi tāni kammāni dhammikāni bhavissanti akuppāni ṭhānārahāni. Taṃ kissa hetu . nānāsaṃvāsakā te ^1- bhikkhu tumhehi tumhe ca tehi nānāsaṃvāsakā . dvemā bhikkhu nānāsaṃvāsakabhūmiyo @Footnote: ¹ Ma. Yu. ete. Attanā vā attānaṃ nānāsaṃvāsakaṃ karoti samagto vā naṃ saṅgho ukkhipati adassane vā appaṭikamme vā appaṭinissagge vā imā kho bhikkhu dve nānāsaṃvāsakabhūmiyo. {240.2} Dvemā bhikkhu samānasaṃvāsakabhūmiyo attanā vā attānaṃ samānasaṃvāsakaṃ ^1- karoti samaggo vā naṃ saṅgho ukkhittaṃ osāreti adassane vā appaṭikamme vā appaṭinissagge vā imā kho bhikkhu dve samānasaṃvāsakabhūmiyoti. [241] Tena kho pana samayena bhikkhū bhattagge antaraghare bhaṇḍanajātā kalahajātā vivādāpannā aññamaññaṃ ananulomikaṃ kāyakammaṃ vacīkammaṃ upadaṃsenti hatthaparāmāsaṃ karonti . manussā ujjhāyanti khīyanti vipācenti kathaṃ hi nāma samaṇā sakyaputtiyā bhattagge antaraghare bhaṇḍanajātā kalahajātā vivādāpannā aññamaññaṃ ananulomikaṃ kāyakammaṃ vacīkammaṃ upadaṃsessanti hatthaparāmāsaṃ karissantīti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma bhikkhū bhattagge antaraghare bhaṇḍanajātā .pe. hatthaparāmāsaṃ karissantīti . Athakho te bhikkhū bhagavato etamatthaṃ ārocesuṃ . saccaṃ kira bhikkhave bhikkhū bhattagge antaraghare bhaṇḍanajātā .pe. hatthaparāmāsaṃ karontīti . saccaṃ bhagavāti . vigarahi buddho bhagavā .pe. @Footnote: ¹ Ma. samānasaṃvāsaṃ. Vigarahitvā dhammiṃ kathaṃ katvā bhikkhū āmantesi bhinne bhikkhave saṅghe adhammiyamāne ^1- asammodikāya vattamānāya ettāvatā na aññamaññaṃ ananulomikaṃ kāyakammaṃ vacīkammaṃ upadaṃsessāma hatthaparāmāsaṃ karissāmāti āsane nisīditabbaṃ bhinne bhikkhave saṅghe dhammiyamāne ^1- sammodikāya vattamānāya āsanantarikāya nisīditabbanti. [242] Tena kho pana samayena bhikkhū saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti . Te na sakkonti taṃ adhikaraṇaṃ vūpasametuṃ . athakho aññataro bhikkhu yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ aṭṭhāsi . ekamantaṃ ṭhito kho so bhikkhu bhagavantaṃ etadavoca idha bhante bhikkhū saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti te na sakkonti taṃ adhikaraṇaṃ vūpasametuṃ sādhu bhante bhagavā yena te bhikkhū tenupasaṅkamatu anukampaṃ upādāyāti . adhivāsesi bhagavā tuṇhībhāvena . athakho bhagavā yena te bhikkhū tenupasaṅkami upasaṅkamitvā paññatte āsane nisīdi . nisajja kho bhagavā te bhikkhū etadavoca alaṃ bhikkhave mā bhaṇḍanaṃ mā kalahaṃ mā viggahaṃ mā vivādanti . evaṃ vutte aññataro adhammavādī bhikkhu bhagavantaṃ etadavoca āgametu bhante bhagavā dhammasāmī appossukko bhante bhagavā diṭṭhadhammasukhavihāraṃ anuyutto viharatu mayametena @Footnote: ¹ Ma. adhammiyāyamāne. Bhaṇḍanena kalahena viggahena vivādena paññāyissāmāti . Dutiyampi kho bhagavā te bhikkhū etadavoca alaṃ bhikkhave mā bhaṇḍanaṃ mā kalahaṃ mā viggahaṃ mā vivādanti . dutiyampi kho so adhammavādī bhikkhu bhagavantaṃ etadavoca āgametu bhante bhagavā dhammasāmī appossukko bhante bhagavā diṭṭhadhammasukhavihāraṃ anuyutto viharatu mayametena bhaṇḍanena kalahena viggahena vivādena paññāyissāmāti. [243] Athakho bhagavā bhikkhū āmantesi bhūtapubbaṃ bhikkhave bārāṇasiyaṃ brahmadatto nāma kāsīrājā ahosi aḍḍho mahaddhano mahābhogo mahabbalo mahāvāhano mahāvijito paripuṇṇakosakoṭṭhāgāro. Dīghīti nāma kosalarājā ahosi daliddo appadhano appabhogo appabalo appavāhano appavijito aparipuṇṇakosakoṭṭhāgāro . Athakho bhikkhave brahmadatto kāsīrājā caturaṅginiṃ senaṃ sannayhitvā dīghītiṃ kosalarājānaṃ abbhuyyāsi . assosi kho bhikkhave dīghīti kosalarājā brahmadatto kira kāsīrājā caturaṅginiṃ senaṃ sannayhitvā maṃ ^1- abbhuyyātoti . athakho bhikkhave dīghītissa kosalarañño etadahosi brahmadatto kho kāsīrājā aḍḍho mahaddhano mahābhogo mahabbalo mahāvāhano mahāvijito paripuṇṇakosakoṭṭhāgāro ahaṃ panamhi daliddo appadhano appabhogo appabalo appavāhano appavijito aparipuṇṇakosakoṭṭhāgāro @Footnote: ¹ Sī. Yu. mama. Ma. mamaṃ. Nāhaṃ paṭibalo brahmadattena kāsīraññā ekasaṅghātaṃpi sahituṃ yannūnāhaṃ paṭikacceva ^1- nagaramhā nippateyyanti. {243.1} Athakho bhikkhave dīghīti kosalarājā mahesiṃ ādāya paṭikacceva nagaramhā nippati . athakho bhikkhave brahmadatto kāsīrājā dīghītissa kosalarañño balañca vāhanañca janapadañca kosañca koṭṭhāgārañca abhivijiya ajjhāvasati ^2- . athakho bhikkhave dīghīti kosalarājā sapajāpatiko yena bārāṇasī tena pakkāmi anupubbena yena bārāṇasī tadavasari . tatra sudaṃ bhikkhave dīghīti kosalarājā sapajāpatiko bārāṇasiyaṃ aññatarasmiṃ paccantime okāse kumbhakāranivesane aññātakavesena paribbājakacchannena paṭivasati. {243.2} Athakho bhikkhave dīghītissa kosalarañño mahesī nacirasseva gabbhinī ahosi . tassā evarūpo dohaḷo ^[3]- hoti icchati suriyassa uggamanakāle caturaṅginiṃ senaṃ sannaddhaṃ vammikaṃ ^4- subhūmiyaṃ ^5- ṭhitaṃ passituṃ khaggānañca dhovanaṃ pātuṃ . athakho bhikkhave dīghītissa kosalarañño mahesī dīghītiṃ kosalarājānaṃ etadavoca gabbhinimhi deva tassā me evarūpo dohaḷo uppanno icchāmi suriyassa uggamanakāle caturaṅginiṃ senaṃ sannaddhaṃ vammikaṃ subhūmiyaṃ ^5- ṭhitaṃ passituṃ khaggānañca dhovanaṃ pātunti . kuto devi amhākaṃ duggatānaṃ caturaṅginī senā sannaddhā vammikā subhūmiyaṃ ^5- ṭhitā khaggānañca dhovananti ^6- . Sacāhaṃ deva na labhissāmi marissāmīti . tena kho pana bhikkhave ^7- samayena @Footnote: ¹ Sī. Yu. paṭigacceva. ² Sī. ajjhāvasi. ³ Ma. uppanno. ⁴ Sī. vammitaṃ. @⁵ Ma. subhūme. ⁶ Ma. dhovanaṃ pātunti. ⁷ Ma. ayaṃ pāṭho natthi. Brahmadattassa kāsīrañño purohito brāhmaṇo dīghītissa kosalarañño sahāyo hoti . athakho bhikkhave dīghīti kosalarājā yena brahmadattassa kāsīrañño purohito brāhmaṇo tenupasaṅkami upasaṅkamitvā brahmadattassa kāsīrañño purohitaṃ brāhmaṇaṃ etadavoca sakhī te samma gabbhinī tassā evarūpo dohaḷo uppanno icchati suriyassa uggamanakāle caturaṅginiṃ senaṃ sannaddhaṃ vammikaṃ subhūmiyaṃ ṭhitaṃ passituṃ khaggānañca dhovanaṃ pātunti . tenahi deva mayaṃpi deviṃ passāmāti. {243.3} Athakho bhikkhave dīghītissa kosalarañño mahesī yena brahmadattassa kāsīrañño purohito brāhmaṇo tenupasaṅkami . Addasā kho bhikkhave brahmadattassa kāsīrañño purohito brāhmaṇo dīghītissa kosalarañño mahesiṃ dūrato va āgacchantiṃ disvāna uṭṭhāyāsanā ekaṃsaṃ uttarāsaṅgaṃ karitvā yena dīghītissa kosalarañño mahesī tenañjalimpaṇāmetvā tikkhattuṃ udānaṃ udānesi kosalarājā vata bho kucchigato kosalarājā vata bho kucchigatoti avimanā ^1- devi hohi lacchasi suriyassa uggamanakāle caturaṅginiṃ senaṃ sannaddhaṃ vammikaṃ subhūmiyaṃ ṭhitaṃ passituṃ khaggānañca dhovanaṃ pātunti . athakho bhikkhave brahmadattassa kāsīrañño purohito brāhmaṇo yena brahmadatto kāsīrājā tenupasaṅkami upasaṅkamitvā brahmadattaṃ kāsīrājānaṃ etadavoca tathā deva nimittāni dissanti sve suriyassa uggamanakāle @Footnote: ¹ Ma. attamanā. Caturaṅginī senā sannaddhā vammikā subhūmiyaṃ tiṭṭhatu khaggā ca dhoviyantūti . athakho bhikkhave brahmadatto kāsīrājā manusse āṇāpesi yathā bhaṇe purohito brāhmaṇo āha tathā karothāti . Alabhi kho bhikkhave dīghītissa kosalarañño mahesī suriyassa uggamanakāle caturaṅginiṃ senaṃ sannaddhaṃ vammikaṃ subhūmiyaṃ ṭhitaṃ passituṃ khaggānañca dhovanaṃ pātuṃ. {243.4} Athakho bhikkhave dīghītissa kosalarañño mahesī tassa gabbhassa paripākamanvāya puttaṃ vijāyi . tassa dīghāvūti nāmaṃ akaṃsu . athakho bhikkhave dīghāvu kumāro nacirasseva viññutaṃ pāpuṇi . athakho bhikkhave dīghītissa kosalarañño etadahosi ayaṃ kho brahmadatto kāsīrājā bahuno amhākaṃ anatthassa kārako iminā amhākaṃ balañca vāhanañca janapado ca koso ca koṭṭhāgārañca acchinnaṃ sacāyaṃ amhe jānissati sabbe va tayo ghātāpessati yannūnāhaṃ dīghāvuṃ kumāraṃ bahinagare vāseyyanti . Athakho bhikkhave dīghīti kosalarājā dīghāvuṃ kumāraṃ bahinagare vāsesi. Athakho bhikkhave dīghāvu kumāro bahinagare paṭivasanto nacirasseva sabbasippāni sikkhi. [244] Tena kho pana bhikkhave ^1- samayena dīghītissa kosalarañño kappako brahmadatte kāsīraññe paṭivasati . addasā kho bhikkhave dīghītissa kosalarañño kappako dīghītiṃ kosalarājānaṃ sapajāpatikaṃ bārāṇasiyaṃ aññatarasmiṃ paccantime okāse kumbhakāranivesane @Footnote: ¹ Ma. ayaṃ pāṭho na dissati. Aññātakavesena paribbājakacchannena paṭivasantaṃ disvāna yena brahmadatto kāsīrājā tenupasaṅkami upasaṅkamitvā brahmadattaṃ kāsīrājānaṃ etadavoca dīghīti deva kosalarājā sapajāpatiko bārāṇasiyaṃ aññatarasmiṃ paccantime okāse kumbhakāranivesane aññātakavesena paribbājakacchannena paṭivasatīti . athakho bhikkhave brahmadatto kāsīrājā manusse āṇāpesi tenahi bhaṇe dīghītiṃ kosalarājānaṃ sapajāpatikaṃ ānethāti . evaṃ devāti kho bhikkhave te manussā brahmadattassa kāsīrañño paṭissuṇitvā dīghītiṃ kosalarājānaṃ sapajāpatikaṃ ānesuṃ. {244.1} Athakho bhikkhave brahmadatto kāsīrājā manusse āṇāpesi tenahi bhaṇe dīghītiṃ kosalarājānaṃ sapajāpatikaṃ daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathiyāya rathiyaṃ ^1- siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa catudhā chinditvā catuddisā bilāni nikkhipathāti . evaṃ devāti kho bhikkhave te manussā brahmadattassa kāsīrañño paṭissuṇitvā ^2- dīghītiṃ kosalarājānaṃ sapajāpatikaṃ daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathiyāya rathiyaṃ siṅghāṭakena siṅghāṭakaṃ parinenti. {244.2} Athakho bhikkhave dīghāvussa kumārassa etadahosi ciraṃ diṭṭhā ^3- kho me mātāpitaro @Footnote: ¹ Po. rathiyā rathiyaṃ. Ma. rathikāya rathikaṃ. ² Po. Ma. Yu. paṭissutvā. @³ Sī. Yu. ciradiṭṭhā. Yannūnāhaṃ mātāpitaro passeyyanti . athakho bhikkhave dīghāvu kumāro bārāṇasiṃ pavisitvā addasa mātāpitaro daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathiyāya rathiyaṃ siṅghāṭakena siṅghāṭakaṃ parinente disvāna yena mātāpitaro tenupasaṅkami . addasā kho bhikkhave dīghīti kosalarājā dīghāvuṃ kumāraṃ dūrato va āgacchantaṃ disvāna dīghāvuṃ kumāraṃ etadavoca mā kho tvaṃ tāta dīghāvu dīghaṃ passa mā rassaṃ na hi tāta dīghāvu verena verā sammanti averena hi tāta dīghāvu verā sammantīti. {244.3} Evaṃ vutte bhikkhave te manussā dīghītiṃ kosalarājānaṃ etadavocuṃ ummattako ayaṃ dīghīti kosalarājā vippalapati ko imassa dīghāvu kaṃ ayaṃ evamāha mā kho tvaṃ tāta dīghāvu dīghaṃ passa mā rassaṃ na hi tāta dīghāvu verena verā sammanti averena hi tāta dīghāvu verā sammantīti . nāhaṃ bhaṇe ummattako vippalapāmi apica yo viññū so vibhāvessatīti . dutiyampi kho bhikkhave .pe. Tatiyampi kho bhikkhave dīghīti kosalarājā dīghāvuṃ kumāraṃ etadavoca mā kho tvaṃ tāta dīghāvu dīghaṃ passa mā rassaṃ na hi tāta dīghāvu verena verā sammanti averena hi tāta dīghāvu verā sammantīti. Tatiyampi kho bhikkhave te manussā dīghītiṃ kosalarājānaṃ etadavocuṃ ummattako ayaṃ dīghīti kosalarājā vippalapati ko imassa Dīghāvu kaṃ ayaṃ evamāha mā kho tvaṃ tāta dīghāvu dīghaṃ passa mā rassaṃ na hi tāta dīghāvu verena verā sammanti averena hi tāta dīghāvu verā sammantīti . nāhaṃ bhaṇe ummattako vippalapāmi apica yo viññū so vibhāvessatīti . athakho bhikkhave te manussā dīghītiṃ kosalarājānaṃ sapajāpatikaṃ rathiyāya rathiyaṃ siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa catudhā chinditvā catuddisā bilāni nikkhipitvā gumbaṃ ṭhapetvā pakkamiṃsu. {244.4} Athakho bhikkhave dīghāvu kumāro bārāṇasiṃ pavisitvā suraṃ nīharitvā gumbiye pāyesi . yadā te mattā ahesuṃ patitā atha kaṭṭhāni saṅkaḍḍhitvā ^[1]- mātāpitūnaṃ sarīraṃ citakaṃ āropetvā aggiṃ datvā pañjaliko tikkhattuṃ citakaṃ padakkhiṇaṃ akāsi. {244.5} Tena kho pana bhikkhave samayena brahmadatto kāsīrājā uparipāsādavaragato hoti . addasā kho bhikkhave brahmadatto kāsīrājā dīghāvuṃ kumāraṃ pañjalikaṃ tikkhattuṃ citakaṃ padakkhiṇaṃ karontaṃ disvānassa etadahosi nissaṃsayaṃ kho so manusso dīghītissa kosalarañño ñāti vā sālohito vā aho me anatthako na hi nāma me koci ārocessatīti . athakho bhikkhave dīghāvu kumāro araññaṃ gantvā yāvadatthaṃ kanditvā roditvā vappaṃ ^2- puñchitvā bārāṇasiṃ pavisitvā antepurassa sāmantā hatthisālaṃ gantvā hatthācariyaṃ etadavoca icchāmahaṃ ācariya @Footnote: ¹ Ma. Yu. citakaṃ karitvā. ² Ma. khappaṃ. Sippaṃ sikkhitunti . tenahi bhaṇe māṇavaka sikkhassūti . athakho bhikkhave dīghāvu kumāro rattiyā paccūsasamayaṃ paccuṭṭhāya hatthisālāyaṃ mañjunā sarena gāyi vīṇañca vādesi. {244.6} Assosi kho bhikkhave brahmadatto kāsīrājā rattiyā paccūsasamayaṃ paccuṭṭhāya hatthisālāyaṃ mañjunā sarena gītaṃ vīṇañca vāditaṃ sutvāna manusse pucchi ko bhaṇe rattiyā paccūsasamayaṃ paccuṭṭhāya hatthisālāyaṃ mañjunā sarena gāyi vīṇañca vādesīti . amukassa deva hatthācariyassa antevāsī māṇavako rattiyā paccūsasamayaṃ paccuṭṭhāya hatthisālāyaṃ mañjunā sarena gāyi vīṇañca vādesīti . tenahi bhaṇe taṃ māṇavakaṃ ānethāti . Evaṃ devāti kho bhikkhave te manussā brahmadattassa kāsīrañño paṭissuṇitvā dīghāvuṃ kumāraṃ ānesuṃ. {244.7} Athakho bhikkhave brahmadatto kāsīrājā dīghāvuṃ kumāraṃ etadavoca tvaṃ bhaṇe māṇavaka rattiyā paccūsasamayaṃ paccuṭṭhāya hatthisālāyaṃ mañjunā sarena gāyi vīṇañca vādesīti . evaṃ devāti . tenahi ^[1]- bhaṇe māṇavaka gāyassu vīṇañca vādehīti. Evaṃ devāti kho bhikkhave dīghāvu kumāro brahmadattassa kāsīrañño paṭissuṇitvā ārādhāpekkho mañjunā sarena gāyi vīṇañca vādesi . Athakho bhikkhave brahmadatto kāsīrājā dīghāvuṃ kumāraṃ etadavoca tvaṃ bhaṇe māṇavaka maṃ upaṭṭhahāti . evaṃ devāti kho bhikkhave dīghāvu kumāro brahmadattassa kāsīrañño paccassosi . athakho bhikkhave @Footnote: ¹ Ma. Yu. tvaṃ. Dīghāvu kumāro brahmadattassa kāsīrañño pubbuṭṭhāyī ahosi pacchānipātī kiṃkārapaṭissāvī ^1- manāpacārī piyavādī . athakho bhikkhave brahmadatto kāsīrājā dīghāvuṃ kumāraṃ nacirasseva abbhantarike ^2- vissāsikaṭṭhāne ṭhapesi. {244.8} Athakho bhikkhave brahmadatto kāsīrājā dīghāvuṃ kumāraṃ etadavoca tenahi bhaṇe māṇavaka rathaṃ yojehi migavaṃ gamissāmāti . Evaṃ devāti kho bhikkhave dīghāvu kumāro brahmadattassa kāsīrañño paṭissuṇitvā rathaṃ yojetvā brahmadattaṃ kāsīrājānaṃ etadavoca yutto kho te deva ratho yassadāni kālaṃ maññasīti. {244.9} Athakho bhikkhave brahmadatto kāsīrājā rathaṃ abhirūhi dīghāvu kumāro rathaṃ pesesi . tathā tathā rathaṃ pesesi yathā yathā aññeneva senā agamāsi aññeneva ratho . athakho bhikkhave brahmadatto kāsīrājā dūraṃ gantvā dīghāvuṃ kumāraṃ etadavoca tenahi bhaṇe māṇavaka rathaṃ muñcassu kilantomhi nipajjissāmīti . Evaṃ devāti kho bhikkhave dīghāvu kumāro brahmadattassa kāsīrañño paṭissuṇitvā rathaṃ muñcitvā paṭhaviyaṃ pallaṅkena nisīdi . athakho bhikkhave brahmadatto kāsīrājā dīghāvussa kumārassa ucchaṅge sīsaṃ katvā seyyaṃ kappesi . tassa kilantassa muhuttakeneva niddaṃ okkami . athakho bhikkhave dīghāvussa kumārassa etadahosi ayaṃ kho brahmadatto kāsīrājā bahuno amhākaṃ anatthassa kārako iminā amhākaṃ balañca vāhanañca janapado ca koso ca @Footnote: ¹ Po. kiṃkāraṇapaṭissāvī ² Ma. abbhantarime. Koṭṭhāgārañca acchinnaṃ iminā ca me mātāpitaro hatā ayaṃ khvassa kālo yohaṃ veraṃ appeyyanti kosiyā khaggaṃ nibbāhi. {244.10} Athakho bhikkhave dīghāvussa kumārassa etadahosi pitā kho maṃ maraṇakāle avaca mā kho tvaṃ tāta dīghāvu dīghaṃ passa mā rassaṃ na hi tāta dīghāvu verena verā sammanti averena hi tāta dīghāvu verā sammantīti na kho me taṃ paṭirūpaṃ yohaṃ pitu vacanaṃ atikkameyyanti kosiyā khaggaṃ pavesesi . dutiyampi kho bhikkhave .pe. tatiyampi kho bhikkhave dīghāvussa kumārassa etadahosi ayaṃ kho brahmadatto kāsīrājā bahuno amhākaṃ anatthassa kārako iminā amhākaṃ balañca vāhanañca janapado ca koso ca koṭṭhāgārañca acchinnaṃ iminā ca me mātāpitaro hatā ayaṃ khvassa kālo yohaṃ veraṃ appeyyanti kosiyā khaggaṃ nibbāhi . tatiyampi kho bhikkhave dīghāvussa kumārassa etadahosi pitā kho maṃ maraṇakāle avaca mā kho tvaṃ tāta dīghāvu dīghaṃ passa mā rassaṃ na hi tāta dīghāvu verena verā sammanti averena hi tāta dīghāvu verā sammantīti na kho me taṃ paṭirūpaṃ yohaṃ pitu vacanaṃ atikkameyyanti punadeva kosiyā khaggaṃ pavesesi. {244.11} Athakho bhikkhave brahmadatto kāsīrājā bhīto ubbiggo ussaṅkī utrasto sahasā vuṭṭhāsi . athakho bhikkhave dīghāvu kumāro brahmadattaṃ kāsīrājānaṃ etadavoca kissa Tvaṃ deva bhīto ubbiggo ussaṅkī utrasto sahasā vuṭṭhāsīti . Idha maṃ bhaṇe māṇavaka dīghītissa kosalarañño putto dīghāvu kumāro supinantena khaggena paripātesi tenāhaṃ bhīto ubbiggo ussaṅkī utrasto sahasā vuṭṭhāsinti . athakho bhikkhave dīghāvu kumāro vāmena hatthena brahmadattassa kāsīrañño sīsaṃ parāmasitvā dakkhiṇena hatthena khaggaṃ nibbāhetvā brahmadattaṃ kāsīrājānaṃ etadavoca ahaṃ kho so deva dīghītissa kosalarañño putto dīghāvu kumāro bahuno tvaṃ amhākaṃ anatthassa kārako tayā amhākaṃ balañca vāhanañca janapado ca koso ca koṭṭhāgārañca acchinnaṃ tayā ca me mātāpitaro hatā ayaṃ khvassa kālo yohaṃ veraṃ appeyyanti. Athakho bhikkhave brahmadatto kāsīrājā dīghāvussa kumārassa pādesu sirasā nipatitvā dīghāvuṃ kumāraṃ etadavoca jīvitaṃ me tāta dīghāvu dehi jīvitaṃ me tāta dīghāvu dehīti . kyāhaṃ ussahāmi devassa jīvitaṃ dātuṃ devo kho me jīvitaṃ dadeyyāti . tenahi tāta dīghāvu tvañceva me jīvitaṃ dehi ahañca te jīvitaṃ dammīti. {244.12} Athakho bhikkhave brahmadatto ca kāsīrājā dīghāvu ca kumāro aññamaññassa jīvitaṃ adaṃsu pāṇiñca aggahesuṃ sapathañca akaṃsu adūhāya ^1- . athakho bhikkhave brahmadatto kāsīrājā dīghāvuṃ kumāraṃ etadavoca tenahi tāta dīghāvu rathaṃ @Footnote: ¹ Yu. adrūbhāya. Po. Ma. addūbhāya. Yojehi gamissāmāti . evaṃ devāti kho bhikkhave dīghāvu kumāro brahmadattassa kāsīrañño paṭissuṇitvā rathaṃ yojetvā brahmadattaṃ kāsīrājānaṃ etadavoca yutto kho te deva ratho yassadāni kālaṃ maññasīti . athakho bhikkhave brahmadatto kāsīrājā rathaṃ abhirūhi dīghāvu kumāro rathaṃ pesesi . tathā tathā rathaṃ pesesi yathā yathā nacirasseva senāya samāgacchi . athakho bhikkhave brahmadatto kāsīrājā bārāṇasiṃ pavisitvā amacce pārisajje sannipātāpetvā etadavoca sace bhaṇe dīghītissa kosalarañño puttaṃ dīghāvuṃ kumāraṃ passeyyātha kinti taṃ ^1- kareyyāthāti . Ekacce amaccā ^2- evamāhaṃsu mayaṃ deva hatthe chindeyyāma mayaṃ deva pāde chindeyyāma mayaṃ deva hatthapāde chindeyyāma mayaṃ deva kaṇṇe chindeyyāma mayaṃ deva nāsaṃ chindeyyāma mayaṃ deva kaṇṇanāsaṃ chindeyyāma mayaṃ deva sīsaṃ chindeyyāmāti . Ayaṃ kho so bhaṇe dīghītissa kosalarañño putto dīghāvu kumāro nāyaṃ labbhā kiñci kātuṃ iminā ca me jīvitaṃ dinnaṃ mayā ca imassa jīvitaṃ dinnanti. {244.13} Athakho bhikkhave brahmadatto kāsīrājā dīghāvuṃ kumāraṃ etadavoca yaṃ kho tāta dīghāvu pitā maraṇakāle avaca mā kho tvaṃ tāta dīghāvu dīghaṃ passa mā rassaṃ na hi tāta dīghāvu verena verā sammanti averena hi tāta dīghāvu verā sammantīti kinte pitā sandhāya avacāti . yaṃ kho @Footnote: ¹ Ma. Yu. naṃ. ² Ma. Yu. ayaṃ pāṭho natthi. Me deva pitā maraṇakāle avaca mā dīghanti mā ciraṃ veraṃ akāsīti imaṃ kho me deva pitā maraṇakāle avaca mā dīghanti yaṃ kho me deva pitā maraṇakāle avaca mā rassanti mā khippaṃ mittehi bhijjitthāti imaṃ kho me deva pitā maraṇakāle avaca mā rassanti yaṃ kho me deva pitā maraṇakāle avaca na hi tāta dīghāvu verena verā sammanti averena hi tāta dīghāvu verā sammantīti devena me mātāpitaro hatāti sacāhaṃ devaṃ jīvitā voropeyyaṃ ye devassa atthakāmā te maṃ jīvitā voropeyyuṃ ye me atthakāmā te te jīvitā voropeyyuṃ evantaṃ veraṃ verena na vūpasameyya idāni ca pana me devena jīvitaṃ dinnaṃ mayā ca devassa jīvitaṃ dinnaṃ evantaṃ veraṃ averena vūpasantaṃ imaṃ kho me deva pitā maraṇakāle avaca na hi tāta dīghāvu verena verā sammanti averena hi tāta dīghāvu verā sammantīti. {244.14} Athakho bhikkhave brahmadatto kāsīrājā acchariyaṃ vata bho abbhutaṃ vata bho yāva paṇḍito ayaṃ dīghāvu kumāro yatra hi nāma pituno saṅkhittena bhāsitassa vitthārena atthaṃ ājānissatīti pettikaṃ balañca vāhanañca janapadañca kosañca koṭṭhāgārañca paṭipādesi dhītarañca adāsi . tesaṃ hi nāma bhikkhave rājūnaṃ ādinnadaṇḍānaṃ ādinnasatthānaṃ evarūpaṃ khantisoraccaṃ bhavissatīti . idha kho pana taṃ Bhikkhave sobhetha yaṃ tumhe evaṃ svākkhāte dhammavinaye pabbajitā samānā khamā ca bhaveyyātha soratā cāti. [245] Tatiyampi kho bhagavā te bhikkhū etadavoca alaṃ bhikkhave mā bhaṇḍanaṃ mā kalahaṃ mā viggahaṃ mā vivādanti . Tatiyampi kho so adhammavādī bhikkhu bhagavantaṃ etadavoca āgametu bhante bhagavā dhammasāmī appossukko bhante bhagavā diṭṭhadhammasukhavihāraṃ anuyutto viharatu mayametena bhaṇḍanena kalahena viggahena vivādena paññāyissāmāti . athakho bhagavā pariyādinnarūpā kho ime moghapurisā nayime sukarā saññāpetunti uṭṭhāyāsanā pakkāmi. Dīghāvubhāṇavāraṃ paṭhamaṃ ^1-. [246] Athakho bhagavā pubbaṇhasamayaṃ nivāsetvā pattacīvaramādāya kosambiṃ piṇḍāya pāvisi kosambiyaṃ piṇḍāya caritvā pacchābhattaṃ piṇḍapātapaṭikkanto senāsanaṃ saṃsāmetvā pattacīvaramādāya saṅghamajjhe ṭhitako va imā gāthāyo abhāsi [247] Puthusaddo samajano na bālo koci maññatha saṅghasmiṃ bhijjamānasmiṃ nāññaṃ bhiyyo amaññaruṃ. Parimuṭṭhā paṇḍitā bhāsā vācāgocarabhāṇino yāvicchanti mukhāyāmaṃ yena nītā na taṃ vidū. Akkocchi maṃ avadhi maṃ ajini maṃ ahāsi me @Footnote: ¹ Ma. niṭṭhito paṭhamo. Ye ca taṃ upanayhanti veraṃ tesaṃ na sammati. Akkocchi maṃ avadhi maṃ ajini maṃ ahāsi me ye ca taṃ nupanayhanti veraṃ tesūpasammati. Na hi verena verāni sammantīdha kudācanaṃ averena ca sammanti esa dhammo sanantano. Pare ca na vijānanti mayamettha yamāmhase ^1-. Ye ca tattha vijānanti tato sammanti medhagā. Aṭṭhicchiddā ^2- pāṇaharā gavāssadhanahārino raṭṭhaṃ vilumpamānānaṃ tesaṃpi hoti saṅgati. Kasmā tumhāka ^3- no siyā. Sace labhetha nipakaṃ sahāyaṃ saddhiñcaraṃ sādhuvihāridhīraṃ abhibhuyya sabbāni parissayāni careyya tenattamano satīmā. No ce labhetha nipakaṃ sahāyaṃ saddhiñcaraṃ sādhuvihāridhīraṃ rājāva raṭṭhaṃ vijitaṃ pahāya eko care mātaṅgaraññeva nāgo. Ekassa caritaṃ seyyo natthi bāle sahāyatā. @Footnote: ¹ Ma. Yu. yamāmase. ² Ma. Yu. aṭṭhicchinnā. ³ Yu. tumhākaṃ. Eko care na ca pāpāni kayirā appossukko mātaṅgaraññeva nāgoti. [248] Athakho bhagavā saṅghamajjhe ṭhitako va imā gāthāyo bhāsitvā yena bālakaloṇakārakagāmo ^1- tenupasaṅkami . tena kho pana samayena āyasmā bhagu bālakaloṇakārakagāme viharati . Addasā kho āyasmā bhagu bhagavantaṃ dūrato va āgacchantaṃ disvāna āsanaṃ paññāpesi pādodakaṃ pādapīṭhaṃ pādakathalikaṃ upanikkhipi paccuggantvā pattacīvaraṃ paṭiggahesi . nisīdi bhagavā paññatte āsane nisajja pāde pakkhālesi . āyasmāpi kho bhagu bhagavantaṃ abhivādetvā ekamantaṃ nisīdi. {248.1} Ekamantaṃ nisinnaṃ kho āyasmantaṃ bhaguṃ bhagavā etadavoca kacci bhikkhu khamanīyaṃ kacci yāpanīyaṃ kacci piṇḍakena na kilamasīti . khamanīyaṃ bhagavā yāpanīyaṃ bhagavā na cāhaṃ bhante piṇḍakena kilamāmīti . athakho bhagavā āyasmantaṃ bhaguṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā yena pācīnavaṃsadāyo tenupasaṅkami. {248.2} Tena kho pana samayena āyasmā ca anuruddho āyasmā ca nandiyo āyasmā ca kimbilo ^2- pācīnavaṃsadāye viharanti . Addasā kho dāyapālo bhagavantaṃ dūrato va āgacchantaṃ disvāna bhagavantaṃ etadavoca mā samaṇa etaṃ dāyaṃ pāvisi santettha tayo kulaputtā @Footnote: ¹ Yu. bālakaloṇakāragāmo. Ma. bālakaloṇakagāmo. ² Ma. kimilo. Attakāmarūpā viharanti mā tesaṃ aphāsumakāsīti . assosi kho āyasmā anuruddho dāyapālassa bhagavatā saddhiṃ mantayamānassa sutvāna dāyapālaṃ etadavoca mā āvuso dāyapāla bhagavantaṃ vāresi satthā no bhagavā anuppattoti . athakho āyasmā anuruddho yenāyasmā ca nandiyo āyasmā ca kimbilo tenupasaṅkami upasaṅkamitvā āyasmantañca nandiyaṃ āyasmantañca kimbilaṃ etadavoca abhikkamathāyasmanto abhikkamathāyasmanto satthā no bhagavā anuppattoti. {248.3} Athakho āyasmā ca anuruddho āyasmā ca nandiyo āyasmā ca kimbilo bhagavantaṃ paccuggantvā eko bhagavato pattacīvaraṃ paṭiggahesi eko āsanaṃ paññāpesi eko pādodakaṃ pādapīṭhaṃ pādakathalikaṃ upanikkhipi . nisīdi bhagavā paññatte āsane nisajja ^[1]- pāde pakkhālesi . tepi kho āyasmanto ^2- bhagavantaṃ abhivādetvā ekamantaṃ nisīdiṃsu . ekamantaṃ nisinnaṃ kho āyasmantaṃ anuruddhaṃ bhagavā etadavoca kacci vo anuruddhā khamanīyaṃ kacci yāpanīyaṃ kacci piṇḍakena na kilamathāti . khamanīyaṃ bhagavā yāpanīyaṃ bhagavā na ca mayaṃ bhante piṇḍakena kilamāmāti. {248.4} Kacci pana vo anuruddhā samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharathāti . taggha te ^3- mayaṃ bhante samaggā sammodamānā avivadamānā khīrodakībhūtā @Footnote: ¹ Po. Ma. kho bhagavā. ² Sī. Po. Yu. āyasmantā. ³ Ma. Yu. ayaṃ pāṭho natthi. Aññamaññaṃ piyacakkhūhi sampassantā viharāmāti . yathākathaṃ pana tumhe anuruddhā samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharathāti . idha mayhaṃ bhante evaṃ hoti lābhā vata me suladdhaṃ vata me yohaṃ evarūpehi sabrahmacārīhi saddhiṃ viharāmīti tassa mayhaṃ bhante imesu āyasmantesu mettaṃ kāyakammaṃ paccupaṭṭhitaṃ āvi ceva raho ca mettaṃ vacīkammaṃ mettaṃ manokammaṃ paccupaṭṭhitaṃ āvi ceva raho ca tassa mayhaṃ bhante evaṃ hoti yannūnāhaṃ sakaṃ cittaṃ nikkhipitvā imesaṃyeva āyasmantānaṃ cittassa vasena vatteyyanti so kho ahaṃ bhante sakaṃ cittaṃ nikkhipitvā imesaṃyeva āyasmantānaṃ cittassa vasena vattāmi nānā hi kho no bhante kāyā ekañca pana maññe cittanti. {248.5} Āyasmāpi kho nandiyo āyasmāpi kho kimbilo bhagavantaṃ etadavoca mayhaṃpi kho bhante evaṃ hoti lābhā vata me suladdhaṃ vata me yohaṃ evarūpehi sabrahmacārīhi saddhiṃ viharāmīti tassa mayhaṃ bhante imesu āyasmantesu mettaṃ kāyakammaṃ paccupaṭṭhitaṃ āvi ceva raho ca mettaṃ vacīkammaṃ mettaṃ manokammaṃ paccupaṭṭhitaṃ āvi ceva raho ca tassa mayhaṃ bhante evaṃ hoti yannūnāhaṃ sakaṃ cittaṃ nikkhipitvā imesaṃyeva āyasmantānaṃ cittassa vasena vatteyyanti so kho ahaṃ bhante sakaṃ cittaṃ nikkhipitvā imesaṃyeva āyasmantānaṃ cittassa vasena vattāmi Nānā hi kho no bhante kāyā ekañca pana maññe cittanti evaṃ kho mayaṃ bhante samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharāmāti. {248.6} Kacci pana vo anuruddhā appamattā ātāpino pahitattā viharathāti . taggha mayaṃ bhante appamattā ātāpino pahitattā viharāmāti . yathākathaṃ pana tumhe anuruddhā appamattā ātāpino pahitattā viharathāti. {248.7} Idha bhante amhākaṃ yo paṭhamaṃ gāmato piṇḍāya paṭikkamati so āsanaṃ paññāpeti pādodakaṃ pādapīṭhaṃ pādakathalikaṃ upanikkhipati avakkārapātiṃ dhovitvā upaṭṭhāpeti pānīyaṃ paribhojanīyaṃ upaṭṭhāpeti yo pacchā gāmato piṇḍāya paṭikkamati sace hoti bhuttāvaseso sace ākaṅkhati bhuñjati no ce ākaṅkhati apaharite vā chaḍḍeti appāṇake vā udake opilāpeti so āsanaṃ uddharati pādodakaṃ pādapīṭhaṃ pādakathalikaṃ paṭisāmeti avakkārapātiṃ dhovitvā paṭisāmeti pānīyaṃ paribhojanīyaṃ paṭisāmeti bhattaggaṃ sammajjati yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ so upaṭṭhāpeti sacassa hoti avisayhaṃ hatthavikārena dutiyaṃpi ^1- āmantetvā hatthavilaṅghakena upaṭṭhāpema na tveva mayaṃ bhante tappaccayā vācaṃ bhindāma pañcāhikaṃ kho pana mayaṃ bhante sabbarattiyā dhammiyā kathāya sannisīdāma evaṃ kho mayaṃ bhante appamattā ātāpino pahitattā viharāmāti . @Footnote: ¹ Ma. Yu. pisaddo natthi. Athakho bhagavā āyasmantañca anuruddhaṃ āyasmantañca nandiyaṃ āyasmantañca kimbilaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā yena pārileyyakaṃ tena cārikaṃ pakkāmi anupubbena cārikaṃ caramāno yena pārileyyakaṃ tadavasari . tatra sudaṃ bhagavā pārileyyake viharati rakkhitavanasaṇḍe bhaddasālamūle.

The Pali Tipitaka in Roman Character Volume 5 page 303-341. https://84000.org/tipitaka/read/roman_item.php?book=5&item=234&items=15 Classified by [Item Number] :- http://84000.org/tipitaka/read/roman_item.php?book=5&item=234&items=15&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=5&item=234&items=15 Compare with The Royal Version of Thai Tipitaka :- https://84000.org/tipitaka/read/byitem.php?book=5&item=234&items=15 Study Atthakatha :- https://84000.org/tipitaka/attha/attha.php?b=5&i=234 Contents of The Tipitaka Volume 5 https://84000.org/tipitaka/read/?index_5 https://84000.org/tipitaka/english/?index_5