[1023] Kati chedanakāni kati bhedanakāni kati uddālanakāni
kati anaññapācittiyāni kati bhikkhusammatiyo kati sāmīciyo
kati paramāni
kati jānanti paññattā buddhenādiccabandhunā.
Cha chedanakāni ekaṃ bhedanakaṃ ekaṃ uddālanakaṃ cattāri
anaññapācittiyāni catasso bhikkhusammatiyo satta sāmīciyo
cuddasa paramāni
soḷasa jānanti paññattā buddhenādiccabandhunā.
[1024] Vīsaṃ dve satāni bhikkhūnaṃ sikkhāpadāni uddesaṃ
āgacchanti uposathesu tīṇi satāni cattāri bhikkhunīnaṃ sikkhāpadāni
uddesaṃ āgacchanti uposathesu.
Chacattāḷīsa bhikkhūnaṃ bhikkhunīhi asādhāraṇā
sataṃ tiṃsā ca bhikkhunīnaṃ bhikkhūhi asādhāraṇā
sataṃ sattati cha ceva ubhinnaṃ asādhāraṇā
sataṃ sattati cattāri ubhinnaṃ samasikkhātā.
[1025] Vīsaṃ dve satāni bhikkhūnaṃ sikkhāpadāni
uddesaṃ āgacchanti uposathesu te suṇohi yathākathaṃ.
Pārājikāni cattāri saṅghādisesāni bhavanti terasa
aniyatāni dve honti
nissaggiyāni tiṃseva dvenavuti ca khuddakā
Cattāro pāṭidesanīyā pañcasattati sekhiyā
vīsaṃ dve satāni cime honti bhikkhūnaṃ sikkhāpadāni uddesaṃ
āgacchanti uposathesu.
[1026] Tīṇi satāni cattāri bhikkhunīnaṃ sikkhāpadāni
uddesaṃ āgacchanti uposathesu te suṇohi yathākathaṃ.
Pārājikāni aṭṭha saṅghādisesāni bhavanti sattarasa
nissaggiyāni tiṃseva sataṃ saṭṭhī ca cha ceva
khuddakāni pavuccanti aṭṭha pāṭidesanīyā
pañcasattati sekhiyā tīṇi satāni cattāri cime honti
bhikkhunīnaṃ sikkhāpadāni uddesaṃ āgacchanti uposathesu.
[1027] Chacattāḷīsa bhikkhūnaṃ bhikkhunīhi asādhāraṇā
te suṇohi yathākathaṃ.
Cha saṅghādisesā dvīhi aniyatehi
aṭṭha nissaggiyā dvādasa tehi
te honti vīsati dvevīsati khuddakā
cattāro pāṭidesanīyā
chacattāḷīsa cime honti bhikkhūnaṃ bhikkhūhi asādhāraṇā.
[1028] Sataṃ tiṃsā bhikkhunīnaṃ bhikkhūhi asādhāraṇā
te suṇohi yathākathaṃ.
Pārājikāni cattāri saṅghamhā dasa nissare
Nissaggiyāni dvādasa channavuti ca khuddakā
aṭṭha pāṭidesanīyā
sataṃ tiṃsā cime honti bhikkhunīnaṃ bhikkhūhi asādhāraṇā.
[1029] Sataṃ sattati cha ceva ubhinnaṃ asādhāraṇā
te suṇohi yathākathaṃ.
Pārājikāni cattāri saṅghādisesāni bhavanti soḷasa
aniyatāni dve hoti nissaggiyā catuvīsati
sataṃ aṭṭhārasa ceva khuddakāni pavuccanti
dvādasa pāṭidesanīyā
sataṃ sattati cha cevime honti ubhinnaṃ asādhāraṇā.
[1030] Sataṃ sattati cattāri ubhinnaṃ samasikkhātā
te suṇohi yathākathaṃ.
Pārājikāni cattāri saṅghādisesāni bhavanti satta
nissaggiyāni aṭṭhārasa samasattati khuddakā
pañcasattati sekhiyā
sataṃ sattati cattāri cime honti ubhinnaṃ samasikkhātā.
The Pali Tipitaka in Roman Character Volume 8 page 365-367.
https://84000.org/tipitaka/read/roman_item.php?book=8&item=1023&items=8&mode=bracket
Classified by content :-
https://84000.org/tipitaka/read/roman_item.php?book=8&item=1023&items=8
Compare with The Pali Tipitaka in Thai Character :-
https://84000.org/tipitaka/read/pali_item.php?book=8&item=1023&items=8&mode=bracket
Compare with The Royal Version of Thai Tipitaka :-
https://84000.org/tipitaka/read/byitem.php?book=8&item=1023&items=8&mode=bracket
Study Atthakatha :-
https://84000.org/tipitaka/attha/attha.php?b=8&i=1023
Contents of The Tipitaka Volume 8
https://84000.org/tipitaka/read/?index_8
https://84000.org/tipitaka/english/?index_8
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
