[1202] Katīhi nu kho bhante aṅgehi samannāgatassa bhikkhuno
bhikkhunīsaṅgheneva kammaṃ kātabbanti . pañcahupāli aṅgehi
samannāgatassa bhikkhuno bhikkhunīsaṅgheneva kammaṃ kātabbaṃ avandiyo
so bhikkhu bhikkhunīsaṅghena . katamehi pañcahi . vivaritvā kāyaṃ
bhikkhunīnaṃ dasseti ūruṃ dasseti aṅgajātaṃ dasseti ubho
aṃsakūṭe dasseti obhāsati gihī sampayojeti . imehi kho
upāli pañcahaṅgehi samannāgatassa bhikkhuno bhikkhunīsaṅgheneva
kammaṃ kātabbaṃ avandiyo so bhikkhu bhikkhunīsaṅghena.
{1202.1} Aparehipi upāli pañcahaṅgehi samannāgatassa
bhikkhuno bhikkhunīsaṅgheneva kammaṃ kātabbaṃ avandiyo so bhikkhu
bhikkhunīsaṅghena . katamehi pañcahi . bhikkhunīnaṃ alābhāya parisakkati
bhikkhunīnaṃ anatthāya parisakkati bhikkhunīnaṃ anāvāsāya parisakkati
bhikkhuniyo akkosati paribhāsati bhikkhū bhikkhunīhi bhedeti . imehi kho
upāli pañcahaṅgehi samannāgatassa bhikkhuno bhikkhunīsaṅgheneva kammaṃ
kātabbaṃ avandiyo so bhikkhu bhikkhunīsaṅghena.
{1202.2} Aparehipi upāli pañcahaṅgehi samannāgatassa bhikkhuno
bhikkhunīsaṅgheneva kammaṃ kātabbaṃ avandiyo
So bhikkhu bhikkhunīsaṅghena . katamehi pañcahi . bhikkhunīnaṃ alābhāya
parisakkati bhikkhunīnaṃ anatthāya parisakkati bhikkhunīnaṃ anāvāsāya
parisakkati bhikkhuniyo akkosati paribhāsati bhikkhū bhikkhunīhi
sampayojeti . imehi kho upāli pañcahaṅgehi samannāgatassa
bhikkhuno bhikkhunīsaṅgheneva kammaṃ kātabbaṃ avandiyo so bhikkhu
bhikkhunīsaṅghenāti.
[1203] Katīhi nu kho bhante aṅgehi samannāgatāya bhikkhuniyā
kammaṃ kātabbanti . pañcahupāli aṅgehi samannāgatāya bhikkhuniyā
kammaṃ kātabbaṃ . katamehi pañcahi . vivaritvā kāyaṃ bhikkhūnaṃ
dasseti ūruṃ dasseti aṅgajātaṃ dasseti ubho aṃsakūṭe
dasseti obhāsati gihī sampayojeti . imehi kho upāli
pañcahaṅgehi samannāgatāya bhikkhuniyā kammaṃ kātabbaṃ.
{1203.1} Aparehipi upāli pañcahaṅgehi samannāgatāya
bhikkhuniyā kammaṃ kātabbaṃ . katamehi pañcahi . bhikkhūnaṃ alābhāya
parisakkati bhikkhūnaṃ anatthāya parisakkati bhikkhūnaṃ anāvāsāya parisakkati
bhikkhū akkosati paribhāsati bhikkhuniyo bhikkhūhi bhedeti. Imehi kho upāli
pañcahaṅgehi samannāgatāya bhikkhuniyā kammaṃ kātabbaṃ . aparehipi
upāli pañcahaṅgehi samannāgatāya bhikkhuniyā kammaṃ kātabbaṃ .
Katamehi pañcahi . bhikkhūnaṃ alābhāya parisakkati bhikkhūnaṃ anatthāya
parisakkati bhikkhūnaṃ anāvāsāya parisakkati bhikkhū
Akkosati paribhāsati bhikkhuniyo bhikkhūhi sampayojeti . imehi
kho upāli pañcahaṅgehi samannāgatāya bhikkhuniyā kammaṃ kātabbanti.
[1204] Katīhi nu kho bhante aṅgehi samannāgatena bhikkhunā
bhikkhunīnaṃ ovādo na ṭhapetabboti . pañcahupāli aṅgehi
samannāgatena bhikkhunā bhikkhunīnaṃ ovādo na ṭhapetabbo . katamehi
pañcahi . alajjī ca hoti bālo ca apakatatto ca cāvanādhippāyo
vattā hoti no vuṭṭhānādhippāyo . imehi kho upāli pañcahaṅgehi
samannāgatena bhikkhunā bhikkhunīnaṃ ovādo na ṭhapetabbo .
Aparehipi upāli pañcahaṅgehi samannāgatena bhikkhunā bhikkhunīnaṃ
ovādo na ṭhapetabbo . katamehi pañcahi . aparisuddhakāyasamācāro
hoti aparisuddhavacīsamācāro hoti aparisuddhājīvo hoti bālo hoti
abyatto na paṭibalo anuyuñjiyamāno anuyogaṃ dātuṃ . imehi kho
upāli pañcahaṅgehi samannāgatena bhikkhunā bhikkhunīnaṃ ovādo na
ṭhapetabbo.
{1204.1} Aparehipi upāli pañcahaṅgehi samannāgatena bhikkhunā
bhikkhunīnaṃ ovādo na ṭhapetabbo . katamehi pañcahi . kāyikena
anācārena samannāgato hoti vācasikena anācārena samannāgato
hoti kāyikavācasikena anācārena samannāgato hoti bhikkhunīnaṃ
akkosakaparibhāsako hoti bhikkhunīhi saddhiṃ saṃsaṭṭho viharati
ananulomikena saṃsaggena . imehi kho upāli pañcahaṅgehi
Samannāgatena bhikkhunā bhikkhunīnaṃ ovādo na ṭhapetabbo .
Aparehipi upāli pañcahaṅgehi samannāgatena bhikkhunā bhikkhunīnaṃ
ovādo na ṭhapetabbo . katamehi pañcahi . alajjī ca hoti
bālo ca apakatatto ca bhaṇḍanakārako ca hoti kalahakārako
sikkhāya ca na paripūrikārī . imehi kho upāli pañcahaṅgehi
samannāgatena bhikkhunā bhikkhunīnaṃ ovādo na ṭhapetabboti.
[1205] Katīhi nu kho bhante aṅgehi samannāgatena bhikkhunā
bhikkhunīnaṃ ovādo na gahetabboti . pañcahupāli aṅgehi samannāgatena
bhikkhunā bhikkhunīnaṃ ovādo na gahetabbo . katamehi pañcahi .
Kāyikena anācārena samannāgato hoti vācasikena anācārena
samannāgato hoti kāyikavācasikena anācārena samannāgato hoti
bhikkhunīnaṃ akkosakaparibhāsako hoti bhikkhunīhi saddhiṃ saṃsaṭṭho viharati
ananulomikena saṃsaggena . imehi kho upāli pañcahaṅgehi
samannāgatena bhikkhunā bhikkhunīnaṃ ovādo na gahetabbo . aparehipi
upāli pañcahaṅgehi samannāgatena bhikkhunā bhikkhunīnaṃ ovādo
na gahetabbo . katamehi pañcahi . Alajjī ca hoti bālo ca apakatatto
ca gamiko vā hoti gilāno vā . imehi kho upāli pañcahaṅgehi
samannāgatena bhikkhunā bhikkhunīnaṃ ovādo na gahetabboti.
[1206] Katīhi nu kho bhante aṅgehi samannāgatena bhikkhunā
saddhiṃ na sākacchātabboti . pañcahupāli aṅgehi samannāgatena
bhikkhunā saddhiṃ na sākacchātabbo . katamehi pañcahi . na asekhena
sīlakkhandhena samannāgato hoti na asekhena samādhikkhandhena
samannāgato hoti na asekhena paññākhandhena samannāgato
hoti na asekhena vimuttikkhandhena samannāgato hoti na asekhena
vimuttiñāṇadassanakkhandhena samannāgato hoti . imehi kho upāli
pañcahaṅgehi samannāgatena bhikkhunā saddhiṃ na sākacchātabbo.
{1206.1} Pañcahupāli aṅgehi samannāgatena bhikkhunā saddhiṃ
sākacchātabbo . katamehi pañcahi . asekhena sīlakkhandhena
samannāgato hoti asekhena samādhikkhandhena samannāgato hoti
asekhena paññākhandhena samannāgato hoti asekhena vimuttikkhandhena
samannāgato hoti asekhena vimuttiñāṇadassanakkhandhena
samannāgato hoti . imehi kho upāli pañcahaṅgehi samannāgatena
bhikkhunā saddhiṃ sākacchātabbo.
{1206.2} Aparehipi upāli pañcahaṅgehi samannāgatena
bhikkhunā saddhiṃ na sākacchātabbo . katamehi pañcahi . na
atthapaṭisambhidāpatto hoti na dhammapaṭisambhidāpatto hoti
na niruttipaṭisambhidāpatto hoti na paṭibhāṇapaṭisambhidāpatto
hoti na yathāvimuttaṃ cittaṃ paccavekkhati 1- . imehi kho upāli
pañcahaṅgehi samannāgatena bhikkhunā saddhiṃ na sākacchātabbo .
@Footnote: 1 Ma. paccavekkhitā.
Pañcahupāli aṅgehi samannāgatena bhikkhunā saddhiṃ sākacchātabbo .
Katamehi pañcahi . atthapaṭisambhidāpatto hoti dhammapaṭisambhidāpatto
hoti niruttipaṭisambhidāpatto hoti paṭibhāṇapaṭisambhidāpatto
hoti yathāvimuttaṃ cittaṃ paccavekkhati 1- .
Imehi kho upāli pañcahaṅgehi samannāgatena bhikkhunā saddhiṃ
sākacchātabboti.
Bhikkhunīovādavaggo aṭṭhamo.
Tassuddānaṃ
[1207] Bhikkhunīheva kātabbaṃ aparehi tathā duve
bhikkhunīnaṃ tayo kammā na ṭhapetabbo 2- dve dukā
na gahetabbo dve vuttā sākacchāsu 3- ca dve dukāti.
[1208] Katīhi nu kho bhante aṅgehi samannāgato bhikkhu
ubbāhikāya na sammannitabboti.
{1208.1} Pañcahupāli aṅgehi samannāgato bhikkhu ubbāhikāya
na sammannitabbo . katamehi pañcahi . Na atthakusalo hoti na dhammakusalo
hoti na niruttikusalo hoti na byañjanakusalo hoti na pubbāparakusalo hoti.
Imehi kho upāli pañcahaṅgehi samannāgato bhikkhu ubbāhikāya na
sammannitabbo . pañcahupāli aṅgehi samannāgato bhikkhu ubbāhikāya
sammannitabbo . katamehi pañcahi . atthakusalo hoti dhammakusalo
hoti niruttikusalo hoti byañjanakusalo hoti pubbāparakusalo
@Footnote: 1 Ma. paccavekkhitā. 2 Po. ṭhapetabbaṃ. Ma. ṭhapetabbā. 3 Po. sākacchā.
Hoti . imehi kho upāli pañcahaṅgehi samannāgato bhikkhu
ubbāhikāya sammannitabbo.
{1208.2} Aparehipi upāli pañcahaṅgehi samannāgato bhikkhu
ubbāhikāya na sammannitabbo . katamehi pañcahi . kodhano hoti
kodhābhibhūto makkhī hoti makkhābhibhūto palāsī hoti palāsābhibhūto issukī
hoti issābhibhūto sandiṭṭhiparāmāsī hoti ādhānaggāhī duppaṭinissaggī.
Imehi kho upāli pañcahaṅgehi samannāgato bhikkhu ubbāhikāya na
sammannitabbo . pañcahupāli aṅgehi samannāgato bhikkhu ubbāhikāya
sammannitabbo . katamehi pañcahi . na kodhano hoti na kodhābhibhūto
na makkhī hoti na makkhābhibhūto na palāsī hoti na palāsābhibhūto na
issukī hoti na issābhibhūto asandiṭṭhiparāmāsī hoti anādhānaggāhī
suppaṭinissaggī . imehi kho upāli pañcahaṅgehi samannāgato
bhikkhu ubbāhikāya sammannitabbo.
{1208.3} Aparehipi upāli pañcahaṅgehi samannāgato bhikkhu
ubbāhikāya na sammannitabbo . katamehi pañcahi . kuppati byāpajjati
patitthīyati kopaṃ janeti akkhamo hoti appadakkhiṇaggāhī anusāsaniṃ 1-.
Imehi kho upāli pañcahaṅgehi samannāgato bhikkhu ubbāhikāya na
sammannitabbo . pañcahupāli aṅgehi samannāgato bhikkhu ubbāhikāya
sammannitabbo . katamehi pañcahi . na kuppati na byāpajjati na patitthīyati
na kopaṃ janeti khamo hoti padakkhiṇaggāhī anusāsaniṃ 1-. Imehi kho upāli
@Footnote: 1 Yu. anusāsanī.
Pañcahaṅgehi samannāgato bhikkhu ubbāhikāya sammannitabbo.
{1208.4} Aparehipi upāli pañcahaṅgehi samannāgato bhikkhu
ubbāhikāya na sammannitabbo . katamehi pañcahi . pasāretā 1-
hoti no sāretā anokāsakammaṃ kārāpetvā vattā 2- hoti na
yathādhamme yathāvinaye yathāpattiyā codetā hoti na yathādhamme yathāvinaye
yathāpattiyā kāretā hoti na yathādiṭṭhiyā byākatā hoti . Imehi
kho upāli pañcahaṅgehi samannāgato bhikkhu ubbāhikāya na
sammannitabbo . pañcahupāli aṅgehi samannāgato bhikkhu ubbāhikāya
sammannitabbo . katamehi pañcahi . sāretā hoti no pasāretā 1-
okāsakammaṃ kārāpetvā vattā 2- hoti yathādhamme yathāvinaye
yathāpattiyā codetā hoti yathādhamme yathāvinaye yathāpattiyā
kāretā hoti yathādiṭṭhiyā byākatā hoti . imehi kho upāli
pañcahaṅgehi samannāgato bhikkhu ubbāhikāya sammannitabbo.
{1208.5} Aparehipi upāli pañcahaṅgehi samannāgato bhikkhu
ubbāhikāya na sammannitabbo . katamehi pañcahi . chandāgatiṃ
gacchati dosāgatiṃ gacchati mohāgatiṃ gacchati bhayāgatiṃ gacchati alajjī
ca hoti . imehi kho upāli pañcahaṅgehi samannāgato bhikkhu ubbāhikāya
na sammannitabbo . pañcahupāli aṅgehi samannāgato bhikkhu
ubbāhikāya sammannitabbo . katamehi pañcahi . na chandāgatiṃ
gacchati na dosāgatiṃ gacchati na mohāgatiṃ gacchati na bhayāgatiṃ gacchati
@Footnote: 1 Po. apasāretā . 2 Ma. Yu. pavattā.
Lajjī ca hoti . imehi kho upāli pañcahaṅgehi samannāgato
bhikkhu ubbāhikāya sammannitabbo.
{1208.6} Aparehipi upāli pañcahaṅgehi samannāgato bhikkhu
ubbāhikāya na sammannitabbo . katamehi pañcahi . chandāgatiṃ
gacchati dosāgatiṃ gacchati mohāgatiṃ gacchati bhayāgatiṃ gacchati akusalo
ca hoti vinaye . imehi kho upāli pañcahaṅgehi samannāgato bhikkhu
ubbāhikāya na sammannitabbo . pañcahupāli aṅgehi samannāgato
bhikkhu ubbāhikāya sammannitabbo . katamehi pañcahi . na chandāgatiṃ
gacchati na dosāgatiṃ gacchati na mohāgatiṃ gacchati na bhayāgatiṃ gacchati
kusalo ca hoti vinaye . imehi kho upāli pañcahaṅgehi samannāgato
bhikkhu ubbāhikāya sammannitabboti.
[1209] Katīhi nu kho bhante aṅgehi samannāgato bhikkhu
bālotveva saṅkhaṃ gacchati 1- . pañcahupāli aṅgehi samannāgato
bhikkhu bālotveva saṅkhaṃ gacchati . katamehi pañcahi . suttaṃ na
jānāti suttānulomaṃ na jānāti vinayaṃ na jānāti vinayānulomaṃ
na jānāti na ca ṭhānāṭhānakusalo hoti . imehi kho upāli
pañcahaṅgehi samannāgato bhikkhu bālotveva saṅkhaṃ gacchati .
Pañcahupāli aṅgehi samannāgato bhikkhu paṇḍitotveva saṅkhaṃ
gacchati . katamehi pañcahi . suttaṃ jānāti suttānulomaṃ
jānāti vinayaṃ jānāti vinayānulomaṃ jānāti ṭhānāṭhānakusalo
@Footnote: 1 gacchatīti yuttataraṃ.
Ca hoti . imehi kho upāli pañcahaṅgehi samannāgato bhikkhu
paṇḍitotveva saṅkhaṃ gacchati.
{1209.1} Aparehipi upāli pañcahaṅgehi samannāgato bhikkhu
bālotveva saṅkhaṃ gacchati . katamehi pañcahi . dhammaṃ na jānāti
dhammānulomaṃ na jānāti vinayaṃ na jānāti vinayānulomaṃ na jānāti
na ca pubbāparakusalo hoti . imehi kho upāli pañcahaṅgehi
samannāgato bhikkhu bālotveva saṅkhaṃ gacchati . pañcahupāli aṅgehi
samannāgato bhikkhu paṇḍitotveva saṅkhaṃ gacchati . katamehi pañcahi .
Dhammaṃ jānāti dhammānulomaṃ jānāti vinayaṃ jānāti vinayānulomaṃ
jānāti pubbāparakusalo ca hoti . imehi kho upāli pañcahaṅgehi
samannāgato bhikkhu paṇḍitotveva saṅkhaṃ gacchati.
{1209.2} Aparehipi upāli pañcahaṅgehi samannāgato bhikkhu
bālotveva saṅkhaṃ gacchati . katamehi pañcahi . Vatthuṃ na jānāti nidānaṃ
na jānāti paññattiṃ na jānāti padapacchābhaṭṭhaṃ na jānāti
anusandhivacanapathaṃ na jānāti . imehi kho upāli pañcahaṅgehi
samannāgato bhikkhu bālotveva saṅkhaṃ gacchati . pañcahupāli aṅgehi
samannāgato bhikkhu paṇḍitotveva saṅkhaṃ gacchati . katamehi pañcahi .
Vatthuṃ jānāti nidānaṃ jānāti paññattiṃ jānāti padapacchābhaṭṭhaṃ
jānāti anusandhivacanapathaṃ jānāti . imehi kho upāli pañcahaṅgehi
samannāgato bhikkhu paṇḍitotveva saṅkhaṃ gacchati.
{1209.3} Aparehipi upāli pañcahaṅgehi samannāgato bhikkhu bālotveva
saṅkhaṃ gacchati . katamehi pañcahi . āpattiṃ na jānāti āpattisamuṭṭhānaṃ
na jānāti āpattiyā payogaṃ na jānāti āpattiyā vūpasamaṃ na jānāti
na āpattiyā vinicchayakusalo hoti . imehi kho upāli pañcahaṅgehi
samannāgato bhikkhu bālotveva saṅkhaṃ gacchati . pañcahupāli aṅgehi
samannāgato bhikkhu paṇḍitotveva saṅkhaṃ gacchati . katamehi pañcahi .
Āpattiṃ jānāti āpattisamuṭṭhānaṃ jānāti āpattiyā payogaṃ
jānāti āpattiyā vūpasamaṃ jānāti āpattiyā vinicchayakusalo
hoti . imehi kho upāli pañcahaṅgehi samannāgato bhikkhu
paṇḍitotveva saṅkhaṃ gacchati.
{1209.4} Aparehipi upāli pañcahaṅgehi samannāgato bhikkhu
bālotveva saṅkhaṃ gacchati . katamehi pañcahi . adhikaraṇaṃ na jānāti
adhikaraṇasamuṭṭhānaṃ na jānāti adhikaraṇassa payogaṃ na jānāti adhikaraṇassa
vūpasamaṃ na jānāti na adhikaraṇassa vinicchayakusalo hoti . imehi kho
upāli pañcahaṅgehi samannāgato bhikkhu bālotveva saṅkhaṃ gacchati .
Pañcahupāli aṅgehi samannāgato bhikkhu paṇḍitotveva saṅkhaṃ gacchati .
Katamehi pañcahi . adhikaraṇaṃ jānāti adhikaraṇasamuṭṭhānaṃ jānāti
adhikaraṇassa payogaṃ jānāti adhikaraṇassa vūpasamaṃ jānāti adhikaraṇassa
vinicchayakusalo hoti . imehi kho upāli pañcahaṅgehi samannāgato
bhikkhu paṇḍitotveva saṅkhaṃ gacchatīti.
Ubbāhikavaggo navamo 1-.
Tassuddānaṃ
[1210] Anatthakusalo ceva kodhano kuppatī ca yo
pasāretā chandāgati 2- na kusalo tatheva ca
suttaṃ dhammañca vatthuñca āpatti 3- adhikaraṇaṃ 4-
dve dve pakāsitā sabbe kaṇhasukkaṃ vijānathāti.
The Pali Tipitaka in Roman Character Volume 8 page 480-491.
https://84000.org/tipitaka/read/roman_item.php?book=8&item=1202&items=9
Classified by [Item Number] :-
http://84000.org/tipitaka/read/roman_item.php?book=8&item=1202&items=9&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=8&item=1202&items=9
Compare with The Royal Version of Thai Tipitaka :-
https://84000.org/tipitaka/read/byitem.php?book=8&item=1202&items=9
Study Atthakatha :-
https://84000.org/tipitaka/attha/attha.php?b=8&i=1202
Contents of The Tipitaka Volume 8
https://84000.org/tipitaka/read/?index_8
https://84000.org/tipitaka/english/?index_8
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
