[71] Bhūtagāmapātabyatāya pācittiyaṃ kattha paññattanti .
Āḷaviyā paññattaṃ . kaṃ ārabbhāti . āḷavike bhikkhū ārabbha .
Kismiṃ vatthusminti . āḷavikā bhikkhū rukkhaṃ chindiṃsu tasmiṃ
vatthusmiṃ . ekā paññatti . channaṃ āpattisamuṭṭhānānaṃ tīhi
samuṭṭhānehi samuṭṭhāti .pe.
[72] Aññavādake vihesake pācittiyaṃ kattha paññattanti .
Kosambiyā paññattaṃ . kaṃ ārabbhāti . āyasmantaṃ channaṃ
ārabbha . kismiṃ vatthusminti . āyasmā channo saṅghamajjhe
āpattiyā anuyuñjiyamāno aññenaññaṃ paṭicari tasmiṃ vatthusmiṃ .
Ekā paññatti ekā anuppaññatti . channaṃ āpattisamuṭṭhānānaṃ
Tīhi samuṭṭhānehi samuṭṭhāti .pe.
[73] Ujjhāpanake khīyanake pācittiyaṃ kattha paññattanti .
Rājagahe paññattaṃ . kaṃ ārabbhāti . mettiyabhummajake bhikkhū
ārabbha . kismiṃ vatthusminti . mettiyabhummajakā bhikkhū āyasmantaṃ
dabbaṃ mallaputtaṃ bhikkhū ujjhāpesuṃ tasmiṃ vatthusmiṃ . ekā
paññatti ekā anuppaññatti . channaṃ āpattisamuṭṭhānānaṃ
tīhi samuṭṭhānehi samuṭṭhāti .pe.
[74] Saṅghikaṃ mañcaṃ vā pīṭhaṃ vā bhisiṃ vā kocchaṃ vā
ajjhokāse santharitvā anuddharitvā anāpucchā pakkamantassa
pācittiyaṃ kattha paññattanti . sāvatthiyā paññattaṃ . kaṃ
ārabbhāti . sambahule bhikkhū ārabbha . kismiṃ vatthusminti .
Sambahulā bhikkhū saṅghikaṃ senāsanaṃ ajjhokāse santharitvā anuddharitvā
anāpucchā pakkamiṃsu tasmiṃ vatthusmiṃ . ekā paññatti ekā
anuppaññatti . channaṃ āpattisamuṭṭhānānaṃ dvīhi samuṭṭhānehi
samuṭṭhāti (kaṭhinake) .pe.
[75] Saṅghike vihāre seyyaṃ santharitvā anuddharitvā anāpucchā
pakkamantassa pācittiyaṃ kattha paññattanti . sāvatthiyā paññattaṃ .
Kaṃ ārabbhāti . sattarasavaggiye bhikkhū ārabbha . kismiṃ vatthusminti.
Sattarasavaggiyā bhikkhū saṅghike vihāre seyyaṃ santharitvā anuddharitvā
anāpucchā pakkamiṃsu tasmiṃ vatthusmiṃ . ekā
Paññatti . channaṃ āpattisamuṭṭhānānaṃ dvīhi samuṭṭhānehi samuṭṭhāti
(kaṭhinake) .pe.
[76] Saṅghike vihāre jānaṃ pubbūpagataṃ bhikkhuṃ anupakhajja seyyaṃ
kappentassa pācittiyaṃ kattha paññattanti . sāvatthiyā paññattaṃ .
Kaṃ ārabbhāti . chabbaggiye bhikkhū ārabbha . kismiṃ vatthusminti .
Chabbaggiyā bhikkhū there bhikkhū anupakhajja seyyaṃ kappesuṃ tasmiṃ
vatthusmiṃ . ekā paññatti . channaṃ āpattisamuṭṭhānānaṃ ekena
samuṭṭhānena samuṭṭhāti kāyato ca cittato ca samuṭṭhāti na
vācato .pe.
[77] Bhikkhuṃ kupitena anattamanena saṅghikā vihārā nikkaḍḍhantassa
pācittiyaṃ kattha paññattanti . sāvatthiyā paññattaṃ . kaṃ
ārabbhāti . chabbaggiye bhikkhū ārabbha . kismiṃ vatthusminti .
Chabbaggiyā bhikkhū kupitā anattamanā bhikkhū saṅghikā vihārā
nikkaḍḍhiṃsu tasmiṃ vatthusmiṃ . ekā paññatti . channaṃ
āpattisamuṭṭhānānaṃ tīhi samuṭṭhānehi samuṭṭhāti .pe.
[78] Saṅghike vihāre upari vehāsakuṭiyā āhaccapādakaṃ mañcaṃ
vā pīṭhaṃ vā abhinisīdantassa pācittiyaṃ kattha paññattanti .
Sāvatthiyā paññattaṃ . kaṃ ārabbhāti . aññataraṃ bhikkhuṃ ārabbha .
Kismiṃ vatthusminti . aññataro bhikkhu saṅghike vihāre upari
vehāsakuṭiyā āhaccapādakaṃ mañcaṃ sahasā abhinisīdi tasmiṃ vatthusmiṃ .
Ekā paññatti . channaṃ āpattisamuṭṭhānānaṃ dvīhi samuṭṭhānehi
samuṭṭhāti siyā kāyato samuṭṭhāti na vācato na cittato siyā
kāyato ca cittato ca samuṭṭhāti na vācato .pe.
[79] Dvittipariyāye adhiṭṭhahitvā taduttariṃ adhiṭṭhahantassa
pācittiyaṃ kattha paññattanti . kosambiyā paññattaṃ . kaṃ
ārabbhāti . āyasmantaṃ channaṃ ārabbha . kismiṃ vatthusminti .
Āyasmā channo katapariyositaṃ vihāraṃ punappunaṃ chādāpesi punappunaṃ
limpāpesi atibhāriko vihāro paripati tasmiṃ vatthusmiṃ .
Ekā paññatti . channaṃ āpattisamuṭṭhānānaṃ chahi samuṭṭhānehi
samuṭṭhāti .pe.
[80] Jānaṃ sappāṇakaṃ udakaṃ tiṇaṃ vā mattikaṃ vā siñcantassa
pācittiyaṃ kattha paññattanti . āḷaviyā paññattaṃ . kaṃ
ārabbhāti . āḷavike bhikkhū ārabbha . kismiṃ vatthusminti .
Āḷavikā bhikkhū jānaṃ sappāṇakaṃ udakaṃ tiṇampi mattikampi siñciṃsu
tasmiṃ vatthusmiṃ . ekā paññatti . channaṃ āpattisamuṭṭhānānaṃ
tīhi samuṭṭhānehi samuṭṭhāti .pe.
Bhūtagāmavaggo dutiyo.
Tassuddānaṃ
[81] Rukkhupacchedanañceva pesuññujjhāpanena ca
ajjhokāso vihāro ca anupakhajjanikaḍḍhanā
Vehāsakuṭilepanā sappāṇakavisiñcananti.
------------
The Pali Tipitaka in Roman Character Volume 8 page 33-37.
https://84000.org/tipitaka/read/roman_item.php?book=8&item=71&items=11
Classified by [Item Number] :-
http://84000.org/tipitaka/read/roman_item.php?book=8&item=71&items=11&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=8&item=71&items=11
Compare with The Royal Version of Thai Tipitaka :-
https://84000.org/tipitaka/read/byitem.php?book=8&item=71&items=11
Study Atthakatha :-
https://84000.org/tipitaka/attha/attha.php?b=8&i=71
Contents of The Tipitaka Volume 8
https://84000.org/tipitaka/read/?index_8
https://84000.org/tipitaka/english/?index_8
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
